Loma 8
8
Bupenyu bwoMpepo
1Nokudalo ngweno apachina kulashwa kunabo baimo munaKristo Jesu. 2Nokuti mulawo wompepo wobupenyu munaKristo Jesu wandisupula kuva kumulawu woluchinyo nolufu. 3Nokuti Mwali wata zwakabakona kutiwa nomulawu pezhulu pobutela bwenyama, akatuma mwananhulumyana uwe muntojaniso wenyama inaluchinyo, etila luchinyo, wakalasha luchinyo elimunyama, 4kuti zwimo mumulawo zwilokwelela kuti zwizhajikijwe kwatili isu tisinokwenda nokwenyama, koga nokwompepo . 5Nokuti yabo banolalama nozwenyama banobiga miyeyo yabo muzwinhu zwenyama, koga yabo banolalama noMpepo banobiga miyeyo yabo muzwinhu zwompepo. 6Kubiga miyeyo munazwenyama kunobuza lufu, asi kubiga miyeyo muMpepo kunobuza bupenyu nolunyalalo. 7Miyeyo inobigwa panazwenyama inolwisana naMwali; aitowhilila mulawo waMwali, ndimo kasa aitotubula; 8Akale yabo baimo munyama abatotubula kushantisa Mwali.
9Asi amwimo munazwenyama, mumo muMpepo, kana uMpepo waMwali ugala mwamuli wose unhu usina uMpepo waKristo aatobeli uwe. 10Koga kana Kristo eli mwamuli, kojoba mibili yenu yakafa pezhulu poluchinyo, mipepo yenu mipenyu pezhulu pokululama. 11Kana uMpepo woyo wakamusa Jesu kubafi ugala mwamuli, Iye wakamusa Kristo Jesu mubafi, unoopa bupenyu mumibili yenu inopalala, akale nomuMpepo uwe, unogala munamwi.
12Nokudalo, banakwaina tibacheneki, kusi kulalama kwenyama, kuti tilalame nokwenyama - 13nokuti mungolalama nokwenyama munoofa, asi kana noMpepo mupalaja zwito zwenyama muchalalama. 14Nokuti bose yabo banotungamililwa noMpepo waMwali bana baMwali . 15“Nezwo amujakatambula umpepo wobulanda kuti muwile mushule mulutyo, koga mwakatambula uMpepo wokuba bana baMwali. Kana tishomeja titi Abha! Tate!” 16umpepo nokukwe unopa busumikiji bwompepo wedu kuti tibana baMwali, 17kana tili bana, tibalyi befuma, balyi befuma yaMwali akale tibalyi befuma naKristo, yopo patinoyabula pamwempela naye, tinookujwa tilitose naye.
Lukujo lwambeli
18Ndikalinga kuti kuyangata kupo nonshaji youno akungakwelane nolukujo luchootondejwa kunasu. 19Nokuti zwibumbwa zwilomilila neshungu kutondejelwa kwabana baMwali; 20nokuti zwibumbwa zwakamuka nokulambwa kuti kusizhajikijwe chinangwa, kusi kuda kwazwo koga mukuda kukwe iye wakazwibiga mulubimbo; 21nokuti zwibumbwa izwo zwinoosungunulwa kuva mubulanda bwazo bwokubola akale zwiwane lukujo luna lusungunuko lwabana baMwali. 22Toziba kuti zwose zwibumbwa zwabemimila zwilwajilwa pamwempela kuswikila ngweno; 23akale atoba zwibumbwa chete, koga nasu nokwedu, tina michelo yotanga yoMpepo, tinomimila nechomukati, tikamilila kutambulwa sabana, nolusupuko lwemibili yedu. 24Nokuti mulubimbo yolu takachijwa. Koga lubimbo lunoboneka alutoba lubimbo. Ndiyani unobimba muchinhu chabweni? 25Asi kana tibimba kunoozwo zwatisinobona, tinozwimilila nomwoyo undefu.
26Nokudalo uMpepo unotibhancha mubutela bwedu; nokuti atitoziba kunamata sezwatilokwelela, koga uMpepo nokukwe unotilebelela isu tinomimila namawhi atinokona kuleba. 27Akale yoyo unoshaka myoyo yabanhu unoziba zwimo mundangalilo joMpepo, nokuti bachena banolebelelwa nompepo nokuda kwaMwali.
28Toziba kuti muzwinhu zwose Mwali unota zwibuya eli naabo banounda, baloshobwa nechinangwa chiche. 29Nezwo yabo baakaziba kale wakamuka nokubashala kuti bebe nechimo choMwananhulumyana uwe, kutila kuti ebe imbano pakati pabanakwaina banji. 30Akale naabo baakashala kale wakabashoba, akale naabo baakashoba wakabalulamisa ; naabo baakalulamisa, neebo wakabakuja.
Ludo lwaMwali munaKristo Jesu
31Totini biya pezhulu pezwi? Kana Mwali eli kubhazu lyedu, ndiyani angatilwisa? 32Iye wakapila mwananhulumyana uwe, etila isu, angakonwa chini kutipa zwimwe zwose naiye? 33Ndiyani angapa undandu kuna baloshalwa naMwali? NdiMwali unobalulamisa, 34biya ndiyani uchapa undandu? Angaba Kristo Jesu na, iye wakafa, eya, iye wakamuka mubafi, ugele kululyi lwaMwali, iye emene unotikumbilila? 35Ndiyani angatipambulanya noludo lwaKristo? Kungaba bujiili na, kana kusheta, kana luyabiso, kana ibhamba, kana bunkuna, kana impalajo, kana igwalabaza? 36Sezwilokwalwa kuwhi,
“Timubulayilwa imwi unshaji wose,
tilotolwa semhwizi jimunda kunobulayiwa.”
37Pe, muna yezwi zwinhu zwose tibazundi nomuna iye wakatida. 38Ndinechokomende kuti akutoba lufu kana bupenyu, kana ingilozi, kana bakulwana kulwana, kana zwinhu zwipo ngweno, kana zwikumuzha, kana isimba, 39kana bulefu, kana untika, kana chimwe zwacho chinhu chakabumbwa, chingatubula kutipambulanya noludo lwaMwali munaKristo Jesu, Tezi wedu.
Currently Selected:
Loma 8: LTP
Highlight
Copy
Compare
Share
Want to have your highlights saved across all your devices? Sign up or sign in
The word for The World International