Loma 7
7
Unkwejaniso unova mukulobolana
1Amutoziba na banakwaina ndikumulebeleka naabo banoziba mulawo kuti mulawo unoshinga panhu kana echi umpenyu chete? 2Nezwo unhukaji ulolobolwa unosungwa nomulawu kundume uwe kana undume echi umpenyu, koga undume uwe angofa, mulawo unokwendelana nondume auchinoshinga. 3Nokudalo, unowhi umpomboli angogala noumwe unhulume, undume uwe echi umpenyu. Asi kana undume uwe angoshayika, unosupuka pamulawu yoyu, akale angolobolwa noumwe unhulume aatoba umpomboli. 4Zwili alo banakwaina bangu, mwakafa mumulawo pezhulu pombili waKristo, kuti mube boumwe, kunaiye wakamuswa kubafi kuti tizwale unchelo waMwali. 5Tichinolalama nokwenyama, ishungu jedu jokulakamila luchinyo, jakanyungumulwa nomulawu, jakabeshinga mumhingu jedu kuti kuzwalwe unchelo wolufu. 6koga ngweno tasupulwa kuva kumulawu, tafa kunozo zwabakatigajika mubuzike, kutila kuti tisishinge tili pasi pomulawu wantolo ulokwalwa asi mubupenyu bupya bwoMpepo.
Mulawo noluChinyo
7“Ini zwatingalebe biya?” Tingati mulawo luchinyo na? Mane pe! Ngana kusakabeli nomulawu, andijaluluziba luchinyo. Ngana mulawo usakati, “Usichibe” andijaluziba kuti kuchiba ini. 8Asi luchinyo, palwakawana chibaka mumulawo, lwakabuza mwandili mishobo yose yoluchibo. Pasina mulawo luchinyo lulofa . 9Ndakabeli umpenyu kusanhu kwaba nomulawu, asi pawakatalwa undayo, luchinyo lwakamusilijwa, imi ndikafa; 10iwo undayo yoyu wakabimbisa bupenyu wakaba lufu kwandili. 11Nokuti luchinyo palwakawana chibaka mundayo, lwakandichengela, lukandibulaya.
12Nezwo mulawo unchena, nondayo unchena, ulolulama akale umbuya. 13Yecho chibuya, ndicho na chakandibuzila lufu? Mane pe! Luchinyo lwakata alo, lwakashingisa zwibuya kubuza lufu mwandili , kutila kuti luchinyo lutondejelwe kuti luchinyo kasa, nondayijo ungata kuti luchinyo lube lukulwana kasa.
Kusowhanana pakati pedu
14Toziba kuti mulawo ngowompepo; koga imi ndili wenyama, ndakatengeswa muluchinyo. 15Anditozwiwhisisa zwito zwangu. Nokuti anditota zwandinoda, koga ndinota yecho chinhu chandinobenga. 16Kana ndita yecho chandisinoda kuta, ndovumila kuti mulawo wakalulama. 17Nezwo akuchili imi ndikumuzwita asi luchinyo lunogala mwandili. 18Nokuti ndinoziba kuti apana zwibuya zwinogala mwandili, zwimo munyama yangu. Ndineshungu yokuta zwakalulama, asi anditozwita. 19Nokuti anditota zwibuya zwandinoda, asi zwibi zwandisinoda kuta ndizwo zwandinota. 20Feno kana ndita zwandisinoda, andichi imi ndikumuzwita, asi luchinyo lunogala mwandili.
21Nezwo ndowana kuti kunoba mulawo, pandinoda kuta zwibuya, bubi bunoba pelyo. 22Ndoshantila mulawo waMwali, nechomuntika mwangu, 23asi ndinobona jimwe jemhingu jangu, jitobela mulawo unolwisana nomulawu wendangalilo yangu, undita unzike womulawu woluchinyo iwo unogala mumhingu jangu. 24Imi nhu unoyangata! Ndiyani uchandisungunula munoyu umbili wolufu? 25Tinoboka Mwali munaJesu Kristo Tezi wedu! Nezwo, indangalilo jangu jinoshingila mulawo waMwali, asi umbili wangu unoshingila mulawo woluchinyo.
Currently Selected:
Loma 7: LTP
Highlight
Copy
Compare
Share
Want to have your highlights saved across all your devices? Sign up or sign in
The word for The World International