Tetkempet 28
28
Cingku Painidung
1Aaron n sinabe nah pe namedung, Nadab, Abihu, Eleazar, nah Ithamar, Israelme kakgade nda ge qu teugwanglu iciu eh peu penuide cingkume tei eh a kila teilu kerane. 2Nang Aaron, n sinabe ziemne, paiheni a ziemne tei mci kelube le teilu maisia. Paiheni aidungde pecu peu hetwapung nah hezuyilu kerane. 3Nang makecime mina pelane dage ranglu maisia, Ih peu rabe maci le kepui tei kelame de, iciu eh penuide peu Aaron paiheni de teilu kerane pecu teimci lu kera a cingkume tei eh a ta tei kerane. 4Penui tei mai kesia paiheni cai hekarakcum ge, cingkupei hekeutupai ge, cwatie ge, pekau rau kelu ncwa ge, peuzui ge, nah kiakang ge. Penui a ziemne teimci kelu paiheni aidungde teilu maisia. Aidungde n sinabe Aaron nah pe namedung ziemne zie iciu eh penui a cingkume tei eh a ta tei kerane. 5Hebaciem keyime kecak, kemhei, gieremang nah gierei kecu langcimpai keyibe teu teilu maisia.
Hekeutupai
6Penui cingkupei hekeutupai de, kecak, kemhei, gieremang, nah gierei kecu mamai, nah langcimpai keyi dak kelu gele teilu maisia. Cide hebaciem keyime teikecibe ta ge zie.#28:6 Paiheni kemdu kesa cingkumene teu kerabe Tinggwang ta gwa teilu kerane. 7Cide hekeutu cum kena bam maisia nreu le pe mbie kena gage tei ncütlu eh. 8Kiakang dak hemisüt kelude de cingkupei hekeutupai kesiakte maisia; cide cingkupei hekeutupai gage keu ncüt eh ket teilu maisia, kecak, kemhei, gieremang nah gierei kecu langcimpai keyi dak kelu le teilu. 9Nang onyx tsukang kena keulu nah cikage Israel napeimedung hang kereiekena zi de raulu maisia. 10Penui hang herok zi tangtsu ge ga raulu, nah hang herok zi be tangtsu keda gage raulu, pe namedung de mna kelu rehi gade. 11Tangtsu ga marau kegaime ta dele, kaugiak gage giak kegai nzwa, nang tangtsu kena de gage Israel napeimedung hang kereiekena zi de raulu maisia. Nang tangtsu kena de kecak le kemailu maisia. 12Nang tangtsu kena de cingkupei hekeutupai hekeutu kwak de gage kailu maisia, tangtsu aide pwane RAMPAUBE de peu Israel napeimedung de nsungla lu kerane. Aaron pe hekeutu kena gage penui zidung pungzie RAMPAUBE dwa de peu pecu nsungla lu kerane. 13Nang kecak le heriadung teilu 14nah pwakelu kecak kemci ria kena heria mlei kelube nzwa, nah nang hegeuria de kecak ria gage mtoklu.
Hekarakpai
15Nang hekarakcum ge ma tiaklu kera ziemne teilu maisia, aide heciemta tei kecime ta, cingkupei hekeutupai ketei nzwa teilu. Cide kecak, kemhei, gieremang, nah mamai gierei kecu, nah langcimpai keyi gele teilu. 16Hekarakcum cide pe tie pe di nsam zie. Nang hekarakcum cide kedip kena teilu maisia. Cide pe tie span ket nah pe di span ket maisia.#28:16 Span ket: 23 centimeter 17Nang cikage tangtsu pemi kehungbe ria mdai ge tei gailu. Ria raitube ga ruby ge, topaz ge, nah garnet ge bam maisia. 18Ria pe kenabe ga emerald ge, sapphire ge, nah diamond ge bam maisia. 19Ria pe kecumbe ga jacinth ge, agate ge, nah amethyst ge bam maisia. 20Ria pe mdaibe ga beryl ge, nah onyx ge, nah jasper ge bam maisia. Cidungde kecak kwak gage teigai zie. 21Tangtsu aidungde Israel napeimedung kereiekena zi rehi gade tei luzie, ketket kecu hezi rehi gade. Cidungde kaugiak bakap gage kerau nzwa maisia, hezi ketket kecu heleuh kereiekena ket mding tei eh. 22Nang hekarakcum gage hegeuria teigai lu heriadung kenzwa ge, kecak kemci le mlei kelube. 23Nang kecak le ringgoi kena ge teilu hekarakcum ziemne nah cide hekarakcum lule ailam tu kena gage keu gailu. 24Nang kecak hegeuria kena de hekarakcum tuna na gage keu gailu. 25Nang mlei kelu hegeuria kena keda tu de pe ria kena de gage keu gailu. Pecai nang cidungde cingkupei hekeutupai hekeutu cum dwale ge keu gailu. 26Nang kecak le pwa ringgoi kena ge teilu, nah nang ci kena de hekarakcum kimiak kena keda tule ge kailu, pekung ga pelungle tu tai gage. 27Nang kecak ringgoi kena ge teisi lu, nah nang cide cingkupei hekeutupai pedwale gu hekeutu cum kena nkangle tu ge keu gailu, pe herui taiga cingkupei hekeutupai dak hemisüt pwa kebam kiakang reu gage. 28Hekarakcum ringgoi de cingkupei hekeutupai ringgoi gage kemhei heria ge le kanglu maisia, iciu eh hekarakcum dak kelu kiakang peureu ga keu gailu kerane. Aiciu kecude hekarakcum de cingkupei hekeutupai gade mpet cam di melu kerane. 29Aaron kemci ni ga nlüt kecudau, pa Israel leuhme zidung pe mlung reu hekarakcum gage keupung lu zie ma tiaklu kera ziemne, RAMPAUBE dwade nsung lamuilu kera ziemne. 30Nang ma tiaklu kera ziemne hekarakcum gage Urim nah Thummim kailu zie, iciu eh cide Aaron lungga bamlu kerane pa RAMPAUBE dwaga kegwang dau. Ciziemne Aaron cide pung lamui zie ma tiaklu kera ziemne Israel leuhme ziemne pe mlung reu gage RAMPAUBE dwade.#28:30 Urim nah Thummim au ma kecam ge Tinggwang lungning ci kerane cingkume ne teu kela ge.
Cingku Paini kedadung
31Cingkupei hekeutupai kangga kai kera ncwa de nang kemhei pai rünne le tei luzie. 32Cide mipeu ziemne sum ga ketietki ge bam maisia. Ketietki de petu herui twagwa di zie ciude hakti melu kerane. Aide ma keheruime ta ge zie. 33Nkangle pe herui ga, nang kuraletsi kemhei, gieremang, nah mamai gierei kecube tei twagwa lu maisia. Kecak bamdung cidungde kakga kai twagwa lu maisia. 34Cika bam maisia kecak bam ge nah kuraletsi ge, kecak bam ge nah kuraletsi ge, nah ainzwa eh, cwatie pe ri gage kai twagwalu maisia. 35Aaron pa cingku ta tei kecudau cwatie aide kai luzie, iciu eh pa RAMPAUBE dwa kemci ni ga kelüt dau nah pa kempet dau hebaam kwa siu lu kerane. Aiciu kecude peu pecu tsai di melu kerane.
36Nang kecak kemci hekwak ge teilu maisia, nah cide gage giaklu, kaugiak gage giak kecu de nzwa, “RAMPAUBE de Teimci kebeu.” 37Nang hekwak aide peria kemhei gele teu peuzui dwale ge kanggailu. 38Cide Aaron sipie ga bam maisia; pa kemau keheibe de liamui maisia Israelme RAMPAUBE ziemne tei mci kelu kemci mapeu ratak de ga ncütla lu kebui de. Peuzui de pe sipie ga bam mui maisia iciu eh RAMPAUBE penui mapeudung de luulu kerane. 39Nang langcimpai keyibe le ncwa teilu maisia, nah nang langcimpai keyibe le peuzui ge teilu maisia. Nang kiakang ge de teilu maisia, cide rau hezuyilu.
40Aaron napeimedung ziemne nang ncwadung, kiakangdung, nah peuzuidung teilu maisia, penui da hetwa nah hezukeyi bamlu kerane. 41Nang n sinabe Aaron nah, pe namedung de pecu ngngwa pai aidungde peu teulu. Nang penuide keniaklu, penuide kedetlu, nah a ziemne penuide tei mcilu, iciu eh penui cingkume tei eh a gwa teilu kerane. 42Nang penui ziemne penui paula pumteih de halu kerane langcimpai le pwa helungle nia teibeu lu maisia, cide penuide halu zie pekia gade penui mnie kecang. 43Aaron nah pe napeimedung paiheni aidungde kempau paiki ga kelüt dau mede kemci ni ga cingku ta tei kerane recabam taiga gwang kecudau teulu maisia. Penui aide teilu maisia iciu eh penuide mmau melu kerane mecai penui tsai zie. Aide Aaron nah pecai pe leuhme ziemne hezai bam mui kerabe.
Currently Selected:
Tetkempet 28: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
