Tetkempet 29
29
Cingkume de teikemci
1Cu nang ainzwa delwe penuide a ziemne teimci maisia iciu eh peu penuide a cingkume teilu kerane. Magede zamra kemak hetumseu ge nah hemeuseu kena keulu, 2tsehi kai kemak tangku, nah maca le hai kelube tsehi kai kemak tangku. Tsehi kai kemak tangku kerepeidung maca le keniak kelube de si. Wheat tokkui le pwa tangku kerepeidung de teilu. 3Nang cidungde marak ket gage kailu maisia, marak gage cidungde kailu eh pwa gwanglu, delwe cidungde pwapeulu hetumseu nah hemeuseu kena de ncüt eh. 4Nang Aaron nah pe napeime de kengkwa paiki kimui ga ngngwa gwanglu maisia. Nang Aaron nah pe napeime de duile hui dilu maisia. 5Nang paihenidung de keulu maisia nah Aaron de pe ncwa le, cingkupei hekeutupai kangga kekai cwatie, cingkupei hekeutupai, nah hekakrakcum le ba beulu, cingkupei hekeutupai kiakang dak hemisüt kelu dele pecu kang twagwalu. 6Nang pe peuzui pe peu gage kai beulu maisia nah kemci hegwang peurwa pe peuzui gage kailu.#29:6 Tet. 28:36 7Pecai keheniak ca keulu delwe cide pe peu gage rui gailu, nah ainzwa eh pecu keniaklu#29:7 Pecu keniaklu: aide pekie pecu keu ncamlu Tinggwang ziemne maca pe peu gage ruigai eh.. 8Pecai nang pe napeime de ngngwa gwanglu maisia nah penuide ncwadung kai beulu. 9Nang Aaron nah pe napeime dage kiakang kanggai beulu nah penuide peurwa rwagai beulu. Hezai bammui kela gade cingkume ta ketei penui gu zie. Ainzwa delwe Aaron nah pe napeime de temcilu peu penuide a gwa tei kerane.
10Nnui pelane kengkwa paiki dwa gage ketumseu de teu gwanglu maisia, nah Aaron nah pe napeimedung pe peu gage penui ba kailu maisia. 11Nang RAMPAUBE dwa gade kengkwa paiki kimui gage ketumseu de gilu. 12Nang ketumseu jai kesa keulu maisia nah recabam kiidung gage n zurang le keu tau gailu, nah hejai kebangbe nang recabam pi gage ruigai dilu. 13Pe lungnet gumpwa kebam cadung pelane nang keulu, nah pe nceu nah pe nkeu kena gum kebam ca cidungde de de si eh keulu; recabam gage cide pelane rugai dilu. 14Dede ketumseu pumteih de ziemne au, pegeu nah perai de si eh, nang ramzeuki gwale ge ru dilu maisia. Cide kemau ratak ge zie.
15Aipau cai, nang hemeuseu ket keu gwanglu, nah Aaron nah pe napeime pe peu gage penui ba kailu maisia. 16Nang hemeuseu de gitsetlu, pecai pe jai keulu delwe recabam mbie pelane ga hezin gailu maisia. 17Nang hemeuseu de dim takcailu nah pe lungnetdung nah pe pi hui dilu, delwe nang pe lungnetdung de, pe tei kedadung nah pe peu de kai ncütlu eh, 18recabam gage kailu. Pecai hemeuseu pum pelane ru dilu. Cide RAMPAUBE ziemne keru ratak ge zie, marim kehengui ge, mi le RAMPAUBE dage keru ratak tei kegai ge.
19Nang hemeuseu keda ge de keulu, nah Aaron nah pe napeimedung pe peu gage penui ba kailu maisia. 20Pecai nang hemeuseu de gitsetlu delwe pe jai kesa keulu. Cide Aaron nah pe napeimedung kwen tu nzetle, penui ba zetle zurangpui kedi, nah penui pi zetle zurangpui ditu gage tau gailu. Pecai nang hejai de kezin pwa recabam tu leune gage kezin gailu maisia. 21Nang recabam ga kebam hejai kesa keulu nah keheniak ca kesa, nah cide Aaron paidung pelane gage kezin gailu, nah pe napeime nah penui painidung gage de. Pecai Aaron de a ziemne keu ntsam luzie, pe painidung de si eh, nah pecu ngngwa pe napeimedung nah penui painidung de. 22Nang hemeuseu ca keulu, pemi ca, pe lungnetdung gumpwa kebam ca, pe nceu gumpwa kebam ca, pe nkeu kena de nah cika kebam ca, nah pe nzetle mnie keulu, kedanemene hemeuseu aide a dage cingkume ziemne reca teigai kerabe gulu. 23Tangku kesiu ge ket keulu, maca le tei kelu tangku ket, nah tsehi kai kemak tangku kerepeibe tangku rak gade ket keu gwanglu RAMPAUBE dwa ga kebam de. 24Nang aidungde Aaron ba nah pe napeimedung ba gage kai beulu maisia nah cidungde a dwa gage pwa gailu RAMPAUBE dwa gage kezin kegai reca teigailu kerane. 25Pecai nang penui ba gade taktyei cide keulu delwe recabam gage cide ru di keru ratak de si eh. Cide a ziemne marim kehengui ge pwapeu zie; cide a dage mi gade ratak tei kegai ge zie.
26Nang Aaron de teikemci hemeuseu hekarak de keulu nah cide pwa gailu RAMPAUBE dwa gage kezin kegai reca teigai kera ziemne, nah cide n qwa zie. 27Nang kezin reca hekarak pwa kepeu de a ziemne keuntsamlu, nah cingkume ziemne pe mnie peu kebeu de, kezin kegai hekarak de nah pe mnie kenana de Aaron nah pe napeimedung de peu kebeu de. 28Aide Aaron nah pe napeimedung ziemne bam mui kela qwa zie. Aide Israel minadung penui kezuyi ratak gade RAMPAUBE de peu kecu ge zie. 29Aaron gu kemci cingku painidung de pecai pe napeimedung ziemne kainzeulu maisia. Penuide cipau paini de gade keniak nah penuide a ziemne kedetlu maisia. 30Pe napeime kakgade cau pecia cingkupei teibi, pa kemci ni ga cingku ta tei kera kengkwa paiki ga kelüt dau, paini cidungde lang henane ziemne teu zie.
31Cingkume de a dage kehedet reca dau teu kecu hemeu teih de pwalu delwe kemci ni ge gade cide swalu. 32Aaron nah pe napeimedung hemeu tei de nah marak ga tangku kebam de kengkwa paiki kimuiki gade tyei maisia. 33Penui hetei nah tangku de tyei zie penuide kemaugi kecu kepeu de nah penuide kedet kera de, a dage tei mcilu kera. Mi kedame migede taktyei cide tyei kerabe ma, kedanemene penui cide a ziemne tei mci kelu ge lie de mnei maisia, a ziemne kainzeu pwa kebam ge. 34Kehedet reca gu hetei ma kesa mede tangku ma kesa pecai benai tingcang kecang bang bam cai, nang cide rudi maisia. Cide tyei kerabe ma kedanemene cide a ziemne teimci gelu.
35Ainzwa eh, Ih ncu tei lulo aja kai kebeu de pelane mzai eh, nang Aaron nah pe napeime de kedetlu maisia. Lang henane ziemne nang penuide mteilu maisia. 36Tingnai ramsangne nang hetumseu ge kemau gikebeu kemau reca ziemne gilu maisia. Nang recabam ziemne reca tei eh tei mcilu maisia, nah nang cide a ziemne tei mcilu kerane cide keniaklu. 37Lang henane ziemne nang recabam ziemne reca tei gailu nah cide RAMPAUBE ziemne tei mcilu. Iciude recabam de a ziemne tei mci canglu zie. Makeheibe de recabam de tung kedi dau cide RAMPAUBE ziemne tei mci luzie.
38Tingnai ramsangne nang meurünna kena mmi ge kecu recabam ga ratak teigai mui maisia 39Meurünna ket nang tingcang reca tei gailu maisia, nah meurünna keda ge de nang tingnaimiak nghungdi kera ting dega reca tei gailu maisia. 40Meurünna keraibe de pwa ratak teigai kecudau, olive ca tui kelu gade hin ca zi mdai gade zi ge#29:40 olive ca yitube litre ket. keu tokkui ephah zi kerei gade zi ge#29:40 wheat tokkui keyi kilogram ket. gage kai ncütlu, nah hin zau zi mdai gade zi ge#29:40 zau litre ket. keu zau reca tei beulu maisia. 41Nang meurünna pe kenabe de tingnaimiak nghung kerating de gage ratak tei gailu maisia. Nang tingcang mei reca nah zau reca tei kegai de kesiakte teigai dailu. Aidungde marim kehengui keyi ge a ziemne teigai zie; cide mi le ratak a dage tei kegai ge zie. 42Aidungde gwang dai kera n leuhme pelane teimui kera keru ratakdung, RAMPAUBE dage kengkwa paiki dwa gade tei kegai ge zie, cika de Ih nnuide gwang redau zie nah nnuide resiu zie. 43Cika de Ih Israelme de redau zie; paiki cide a kendu le a ziemne tei mci luzie. 44Ih kengkwa paiki de nah recabam aide a katei a ziemne tei mci luzie. Ih Aaron nah pe napeimedung a cingkume tei kerane keu ntsam luzie. 45Ih Israelme kakga lunghbam zie nah penui Tinggwang zie. 46Penui Ih RAMPAUBE, penui Tinggwang, penuide Egyptme deu gade ngngwa mpet kebeu be lie kecu ci luzie iciu eh Ih penui da lunghlu kerane. Ih au RAMPAUBE, penui Tinggwang.
Currently Selected:
Tetkempet 29: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
