Tetkempet 21
21
1“Cu nang hezai aidungde penui dwa gage kaibi beu maisia:
Hebrewme kiladung
2‘Nnui Hebrew kila gede lui lucai, mmi herok ge pa peta tei maisia, nah mmi hena bekum pa pempaube de magede peu meliede pesui tei eh tet luzie. 3Pa pekatei gwang cai, pa pekatei ne tet maisia; pa pe nau tei kelume gecai, ciucai pe nau pecu ngngwa pesui tei eh tetdi maisia. 4Pe mpaube ne pe nau teibeu eh pa pecu pe na mipeina mede mipuina lungh beucai, pe nau nah pe namedung pe mpau be gu dizie, nah pa pekatei pesui tei eh tetdi maisia. 5Dede kilabe ainzwa rangla cai, “Ih a mpaube de, a nau nah a name de hungla; Ih asui tei eh tetdi gailak,” 6ciucai pe mpaube pecu Tinggwang da ngngwa gwang maisia. Pe mpaube pecu kikam mede kikam tsia ga ngngwa gwanglu maisia, delwe pe mpaube kebungtie le pe kwen bunglu maisia. Ciu eh kilabe pe teilungzie pe gwatei zie.
7Mige pe napui de kilapui ge nzwa zwa dicai, mipei kilamedung tei kelanzwa pa au pesui tei eh tetdi gailak. 8Magade pa pe mpaube pecu ngkwet kera ngngwa gwang kelube suiyi teilu mecai, ciucai pa pecu peu ngngwa caili gwangdai maisia. Pe mpaube pecu zwa pwa sangmedung dage peu dau lak. Pa cikenzwa teidau gailak, kedanemene pe mpaube pe dade masanglu kemakne. 9Magade pe mpaube pecu pe napei nau zielie rang dicai, pa pe napui mege nzwa luulu maisia. 10Pa pe ziemne penau kedage de luu dai cai, pa pe taktyei, paini, mede pa meukelu nzeu dungde teinggah di kerabe ma. 11Dede magade pa ma kecum aidungde pe ziemne peulu ta dicai, pa pe mpaube de magede peu mene tetdi lubui.
Mina de tei kerejam
12Keheibe de migede tei eh teitset dicai, pecu de teitset bidi maisia. 13Mina aipaude cetnswa eh teidi melie cai, dede meliene teimau eh, ciucai pa pakgai lu kebui heni ge Ih rengei beuzie. 14Mige lungning kesia teu nah penuide peciem peliem tei eh pe kidabe de teitset dicai, ciucai pa Tinggwang de kerecabam ga bam liede, nang pecu ngngwa gwanglu maisia, ciu eh pecu peu tsaidi kerane.
15Keheibe de pe pei mede pe pui de tei kelame de ketsai gage kaidi maisia.
16Caugame mige de nimteu dibi, mide kenimbe pecu zwadi, mede cipaude de pe ba gade ngau lucai, mide kenimbe cipaude de ketsai gage kaidi maisia.
17Caugame pepei mede pepui de reset labi cipaume de ketsai gage kaidi maisia.
18Mipeimedung nggi kebamdau nah tangtsu le mede pe bale kedage de tei dicai, nah cipaude tsai dima, dede pe zeu gade mlai gailak dicai; 19pecai pa yi dailu nah pe tui pwa eh tet dailu liecai, caune pecu tei bi cipaude pau ruibeu maisia peting teinggah kedi ziemne; pa pecu tei hemi cangsiaklu kerane pecu ngha maisia. Dede pa au dapketset mau ga lama.
20Mige pe kilapei mede pe kilapui de hetuitie le dapcai, nah dap kegaine pe kilame tsaidi liecai, ciucai mina cipaude de saja peubi maisia. 21Ciuliede, kilabe langnai ge mede langna ne ringbam lucai, pe mpaube de saja peu kerabe ma, kedanemene kilabe tsai kedi ziemne keherei pa ngaubi zielu.
22Midungge nggi kebam gade tetlak kecu puige de rejamdi iciu eh pena cide siadi liecai, dede ma keda gede cipau pui de de rejam dima, ciude teimau kedibe pei dade mipuibe nahpei kie kegaide subeu maisia, nah tutiakme de mzai eh pa peudi maisia. 23Dede magade rejamsüt kecu bamdi liecai, nang keringria ge ziemne keringria ge peu maisia, 24miak ge keleu miak ge, gei ge keleu gei ge, ba ge keleu ba ge, pi ge keleu pi ge, 25keru ge keleu keru ge, rejam ge keleu rejam ge, kedap ge keleu kedap ge.
26Mige pe kilapei mede pe kilapui miak gage tei nah teimsiadi liecai, pa pe miak mi de ziemne kilabe de lungmpet beudi maisia. 27Pa pe kilapei mede pe kilapui gei teimpet dicai, pa pe gei teimsia kedi mi de ziemne kilabe de lungmpet beudi maisia.
28Magade ketumseu mipei ge mede mipui ge de ntautset dicai, ketumseu de kebeu tsetdi kerabe, nah pe tei tyei kerabe ma; dede ketumseu mpaube de mmau gailak.#21:28 Tsai kedi kaune de pempaube gu dizie. 29Magade ketum be pedwa mide kemtau zai kesia ge bamcai, nah pe mpaube de ranglia de kezeulu mecai, nah ketumseu ne mipei ge mede mipui gede teitset di cai, ketumseu de tangtsu le sam tsetdi maisia, nah pe mpaube de de teitsetdi maisia. 30Pe teilung kelilu kerane pemi tei maisia dicai, pa peumai kesia kieege peulu maisia. 31Magade ketumseu mipei ge napei mede napui gede teitset dicai, ketumseu mpaube pecu tei lulo kebeu zai aipaude teilu maisia. 32Magade ketumseu kilapei ge mede kilapui de teitset dicai, ketumseu mpaube rangkanggeu shekel camrei#21:32 Rangkanggeu shekel camrei: rangkanggeu gram 342 peu kerabe, nah ketumseu de tangtsu le samtset di kerabe.
33Mige hekwaki letpwa bamcai, mede mige hekwaki kui pwabam nah ngkui mene kebamdau, nah ketumseu mede gada caklüt dicai, 34hekwaki mpaube kap kedi pau rui kerabe. Pa pekaune tsai kedi mpaube de rangkang peu maisia, nah tsaikedi makaune de pe gu dizie.
35Mige ketumseu gene mi keda tumseu de ntau rejamgai eh cide tsaidi cai, ciucai ringkebam tumseu de zwalu eh pemi de mzilu maisia, nah tsaikedi tumseu de de penai mzi nsamlu maisia. 36Dede ketumseu pe dwade mide ntautset kecu ha cibam liecai, nah pe mpaube cide kezeulu mecai, ketumseu kering ge keleu ketumseu tsaikedi ge pa peubi maisia, nah tsaikedi kaune de au pe gu dizie.
Currently Selected:
Tetkempet 21: NorthernZeme
Highlight
Copy
Compare
Share
Want to have your highlights saved across all your devices? Sign up or sign in
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
