Ichedendik 35
35
Jekọb ọkpa nnam z'Bẹtẹl
1Nya o, Ibinọkpaabyi oben Jekọb bẹ́, “Bina china z'Bẹtẹl asi oruk kwọ za, abira asi ija-byi nya anang kaam Ibinọkpaabyi kw'oyinẹ okebh-ọ k'ogbe kw'ad-arọbh z'mbọhk s'agbaanakka Ẹsau.”
2Nya o, Jekọb oben ẹsọhmmọr chẹ ọttara anọng p'aning amaan-ẹ maphyir bẹ́, “Màtọka akpata mbo p'aning amaana bọnga bharẹ, masok ifor sabọnga iwur-owur, mabira abhona ẹfọrakpo py'abọnga k'ifor. 3Nya o, màkwu mochina z'Bẹtẹl, za ch'im'nsi ija-byi nnang Ibinọkpaabyi kw'ọbhaang njọm saam k'ogbe kw'nning k'adama, obira oninga ọmaan-m k'ibyi kpenamkpen s'ikk'nta.” 4Minna kw'matte akpata pabẹ maphyir ọbọhk, ọttara ekpo py'itọhng pyabẹ manang Jekọb, ọtọka ọnọhnga z'echirin ch'oak, ch'ẹnyọm Shẹkẹm.
5K'ose kw'Jekọb ọmaana ajinọngva pẹ matọm ozenga, ojora fiden f'Ibinọkpaabyi ọsaka ny'ibhon njo maphyir s'ikọbh bẹ, ọfha ọnọng oning bẹ okwubhọ.
6Jekọb ọmaana anọng pẹ maphyir mapyirẹ z'Luz, kw'obira okpena Bẹtẹl, z'ẹkọma ch'Kenaan. 7Nya wọ kw'uwa osi ija-byi s'oyerẹ Ẹl-Bẹtẹl#35.7 Ẹl-Bẹtẹl oyinẹ bẹ́, Ibinọkpaabyi kw'Bẹtẹl., okurọ bẹ́, nya wọ kw'uwa Ibinọkpaabyi ọyaakẹ ifor sẹ ọnang-ẹ, k'ogbe kw'uwa ọd-ọrọbh z'ọgbaanọkka k'mbọhk.
8Ny'ogbe nwo, wa Dẹbọra kw'ode orirọka kw'Rẹbẹka okwu ope, manọhng-ẹ z'echirin ch'oak, z'izek-izek kw'Bẹtẹl. Ofona nya, wa mayerẹ ibyi njo bẹ́, Alon-Bakut#35.8 Alon-Bakut oyinẹ bẹ́, echi ch'ebhoma..
9K'ogbe kw'Jekọb ikk'obina z'Padan-Aram okwuna, Ibinọkpaabyi obira oyin okebh-ẹ, ọsẹ-ẹ ittabọhng, 10oben-ẹ bẹ́, “Kọ akpen Jekọb, okenaka, ọdọk Jekọb màkpena. Min'akpena Israẹl.” Minna kw'Ibinọkpaabyi ọkpẹ-ẹ Israẹl.
11Ọvaar Ibinọkpaabyi obira oben-ẹ bẹ́, “Kaam wọ nde Ọvaar Ibinọkpaabyi kw'Ẹfa maphyir. Màbhon iva k'ọsaabh. Ẹkọma ch'im'esi nkọma s'isaabh-ọsaabh m'efona k'ikọ. Avaarnọng mabira afona ny'ikọ k'ntaak. 12Izek njo s'iwa nnang Abraham ọttara Isaak, jẹ jọ s'im'nnang-ọ. M'mbira ntte izek njo ọbọhk nnang obhon fọ.” 13Ibinọkpaabyi obina orik-ẹ ny'ibyi njo, ch'ikk'ẹ odik ọgbaaka maphyir.
14Jekọb ommin ọta ny'ibyi njo s'Ibinọkpaabyi ọgbaakẹ odik ọnang-ẹ, obyenga atuk ọmaana ana p'oliv ọnang Ibinọkpaabyi nya. 15Jekọb oyerẹ ibyi njo s'Ibinọkpaabyi oyinẹ okebh-ẹ bẹ́, Bẹtẹl.
Obo kw'Rachẹl ọmaana Isaak
16Jekọb ọmaana anọng pẹ mabina z'Bẹtẹl, mad-azenga z'Ẹphrat. Ch'mazeng nya o, ọmaan f'ọgaang-ọgaangẹ ọbọka Rachẹl. 17Okker-ọmaan oben Rachẹl bẹ́, “Oning-ọ ojor. Kk'ojinọng abir amaana.” 18Nya ch'imin'ope, okpe ojinọngnwa nwo kwẹ bẹ́, Bẹn-Ọni#35.18 Bẹn-Ọni oyinẹ bẹ́, nnwa kw'irem.. Okenaka, otte ọkpẹ-ẹ, Bẹnjamin#35.18 Bẹnjamin oyinẹ bẹ́, nnwa kw'odimbọhk..
19Nya o, wa Rachẹl okwu ope, manọhng-ẹ ny'eden ch'nd-azenga achina Ẹphrat, kw'ode Bẹtẹlẹhẹm. 20Jekọb ommin ọta ny'epekwuk ndo. Tọma za maa, pyirẹ ma, ọta nwo kw'mad-atima ajima epekwuk ch'Rachẹl.
21Jekọb kw'inokpen Israẹl, ochina ororo maa, od-osi iruk-byi sẹ z'okwubha kw'Migdal-Eder. 22K'ose kw'Israẹl orukọ ny'izek njo, Reubẹn od-oyima ọmaana Bilha kw'ode oyok-nọng kw'otte. Otte ozonga odik nwo.
Wa Jekọb obhonọ ajinọngva ijobh kkamfa:
23Ajinọngva p'uwa Lea ọmaanẹ made:
Reubẹn, kw'ode ocheden kw'Jekọb,
ọmaana Simeọn, ọmaana Lẹvi, ọmaana Juda, ọmaana Isaka, ọttara Zẹbulun.
24Ajinọngva p'Rachẹl wa made:
Josẹph ọttara Bẹnjamin.
25Ajinọngva p'Bilha kw'ode ọtọhmnọng kw'Rachẹl made:
Dan ọttara Naphtali.
26Ajinọngva p'Zilpa kw'ode ọtọhmnọng kw'Lea made:
Gad ọttara Asha.
Ajinọngva mba bọ p'uwa Jekọb obhonọ z'Padan-Aram.
27Wa Jekọb ọkpa nnam otor otte Isaak z'Mamrẹ kw'ọnyọm Kiriyat-Arba (kw'mabir ayerẹ Hẹbrọn), za ch'iwa Abraham ọmaana Isaak marukọ. 28Wa Isaak orukọ icho arọbh osowanẹ. 29Nya o, okwu ope k'atam, od-okebha ab'ttatta pẹ. Ẹsau ọmaana Jekọb p'ade ajinọngva pẹ, manọhng-ẹ.
Currently Selected:
Ichedendik 35: mfn-x-ad
Highlight
Copy
Compare
Share
Want to have your highlights saved across all your devices? Sign up or sign in
©️2025 West Africa Christian Mission
