Ichedendik 34
34
Daina ọmaana anọng p'Shẹkẹm
1Ewu danẹ, Daina kw'ode ominanwa kw'Lea ọmaanẹ ọnang Jekọb, obin ọta idibhada z'panọng banẹ p'obhon nwo. 2K'ogbe kw'Shẹkẹm kw'ode nnwa kw'Hamọr kw'ode ọvaarnọng kw'Hiv oze Daina nya, ọbọk-ẹ k'ẹfa, oyim-ẹ ábẹ̀. 3Ch'oze Daina kw'ode ominanwa kw'Jekọb, ọdaak-ẹ maa, oyer-ẹ eyonga. 4Shẹkẹm oben otte kwẹ Hamọr bẹ́, “Tọka ominanwa nwoma, nang-m k'ọbada.”
5Jekọb okwu ọbhaanga bẹ́, nkk'nnwa kwẹ Daina alẹka, mayim-ẹ ábẹ̀. Ode ch'iva p'Jekọb atim aning z'ẹgba ọmaana etirakpo py'otte. Omyi odik nwo nya maa, iva mbo makwuna.
6Nya o, Hamọr kw'ode otte kw'Shẹkẹm obina oyin nttọhna ọmaana Jekọb k'odik kw'oyinẹ. 7K'ogbe kw'ajinọngva p'Jekọb mabhaang odik nwo nya, makwuna eyina ny'eninga ndo, nttem ibhem bẹ, ibir ipyibh bẹ mawuriji okurọ ọgbardik-ttọhk f'Shẹkẹm osi ọnang Israẹl, ch'oyim ominanwa kw'Jekọb ábẹ̀ k'ẹfa, ọttọhk f'ina maphyir-phyir ọbaan bẹ́, osi.
8Okenaka, Hamọr oben bẹ bẹ́, “Ettem ch'ojinọngnwa kwaam Shẹkẹm, ẹgban k'ominanwa kwọ e. Ototo, ttẹ-ẹ ọbọhk maba ayok. 9Màtte mọbhakẹ ọba ayok: tte aminava pabọnga aba mina, aminava pamina mabira aba bọnga. 10Màruk maana mina m'izek nja s'itte eje ma, mazenga mphya s'idaakẹ bọnga, mabira asi oyena kwabọnga ma.”
11Nya o, Shẹkẹm oben otte kw'Daina, ọmaana ivotte bẹ́, “Ototokinẹ, màsi ọkkaan nwa nang-m. Kaam m'nnang bọnga ọttọhk kpenamkpen f'marorọ. 12Tek-m ẹba-phya, ọmaana ẹnanga k'ose kw'ọdaak-ọ, kaam m'nnang bọnga ọttọhk kpenamkpen f'maben-m. Màkenaka nang-m ominanwa nwo k'ọbada.”
13Ajinọngva p'Jekọb matima nkkar apọhna Shẹkẹm, ọmaana otte Hamọr odik nwo, okurọ ch'nkk'Daina kw'ode ọgbaanotte kwabẹ, alẹka. 14Maben bẹ bẹ́, “Mina m'ọttọhkse mvo mòsi bẹ́, motte agbaanatte kwamina ọbọhk, ọba ojinọng kw'ina ọnọm obhirẹ. M'ode ọgbardik-ttọhk ọnang mina. 15Mina mm'okenaka ochera ọmaana bọnga, óde nkk'achera bẹ́, ajinọng pabọnga maphyir abhirẹ inọm mach'mina. 16Nya wọ kw'mina mm'ọnang bọnga aminava pamina maba, mina mobir ọba pabọnga. Ó̱de mási minna, mm'oruk ọmaana bọnga, mobira ode ọttọhk mavanẹ. 17Okenaka, óde bọnga nnacher bẹ́, mm'abhirẹ inọm, mina mm'ọtọka agbaanatte kwamina otima ofona.”
18Ochibhẹ kwabẹ ọdaam Hamọr, ọmaana ojinọngnwa kwẹ Shẹkẹm ettem. 19Minna kw'Shẹkẹm nwo kw'ode ojinọngnwa kw'oyen ikpukpobha ọyọhnga ayok maphyir ny'echimma ch'otte, ina ogbe okibhẹ bẹ́, od-osi k'ose kw'maben-ẹ, okurọ ọdaakẹ kw'oyen k'ominanwa kw'Jekọb. 20Ofona nya, Hamọ ọmaana Shẹkẹm machina z'ẹbhaama chabẹ, mad-agbaak anọng pabẹ bẹ́, 21“Ajinọng mba ajibhẹ ẹ́mmáaná atima ator mina. Tte motte bẹ ọbọhk maruk amaana mina, mazenga mphya s'idaakẹ bẹ. Izek s'moyen ma, m'ibenga bẹ obenga. Mina mm'ọtọka aminava pabẹ k'ọbada, bẹ mabira atọka pamina. 22Anọng mba m'akenaka achera bẹ́, moruk mach'anọng mabanẹ, óde ajinọng pamina mm'achera abhirẹ inọm mach'abẹ. 23Ó̱de m'osi minna, nten sabẹ, ọmaana oyena kwabẹ maphyir, m'ode kwamina. Tte mochera ọmaana bẹ bẹ́, mm'obhirẹ inọm, mfha bẹ machera bẹ́, maruk amaan mina.”
24Ajinọng mbo maphyir p'mata z'ẹbhaama, machera amaana Hamọr, ọmaana Shẹkẹm. Ojinọng kpenamkpen kw'obhon nwo, obhir ọnọm.
25Ch'iwu ittaan s'ẹnọmbhirẹ ikk'ikpana, nya ch'abhaak atim amma bẹ ọmma, ajinọngva afa p'Jekọb p'ade Simeọn, ọmaana Lẹvi, p'ade ivọkka p'Daina, matọka akkangkkang pabẹ matima arima ajinọng p'obhon nwo k'ogbe kw'ina ichen asokọ, mafhọ bẹ maphyir. 26Mabira afhọ Hamọ ọttara Shẹkẹm, matọka Daina z'Shẹkẹm k'ọsọhm atim afona. 27Ajinọngva p'Jekọb machina nya ch'affuranọng mbo mayim nya bẹ́ bangẹ-bangẹ, madim ny'obhon kw'manang ọgbaanotte igbardik, macha oyena kwabẹ atima afona. 28Matọka nten sabẹ s'matirẹ, ọmaana oyena kpenamkpen kw'mayen ny'obhon ọmaana z'iwonọ. 29Matọka oyena kwabẹ maphyir, ọmaana ivava pabẹ, ọmaana panọng pabẹ maphyir, ọttara ọttọhk kpenamkpen f'oning zabẹ k'isọhm.
30Nya o, Jekọb oben Simeọn ọmaana Lẹvi bẹ́, “Nkk'odik aja anang-m. Nkk'aam asoka k'iwawuna ọmaana anọng p'Kenaan ọmaana anọng p'Periz p'arukọ m'izek nja. Mina nkọsaabhẹ. Ó̱de bẹ m'agbak, marim-m ábẹ̀, mm'afhọ-m ọmaana ẹsọhmmọr chaam maphyir.”
31Bẹ mapọhna otte bẹ́, “Ọbaan za bẹ́, Shẹkẹm osi agbaanakka kwamina mach'ọzaza o?”
Currently Selected:
Ichedendik 34: mfn-x-ad
Highlight
Copy
Compare
Share
Want to have your highlights saved across all your devices? Sign up or sign in
©️2025 West Africa Christian Mission
