Ichedendik 27
27
Jekọb ọtọk ittabọhng s'Ẹsau
1K'ogbe kw'uwa Isaak ikk'ọtama, ọdọk iyaan mawuriji koze, oyerẹ ochedennwa kwẹ kw'ode Ẹsau, oben-ẹ bẹ́, “Nnwa kwaam.”
Ẹsau ọpọhn-ẹ bẹ́, “Ttatta, kirẹ kaam ma.”
2Isaak oben-ẹ bẹ́, “Kaam kk'ntama, ewu ch'im'mpe kinzong. 3Tọka ẹgbaajikpo pyọ, ọmaana oyuk kwọ ọttara akọhn pọ, yin ẹgbaaji afhọ nten achen-m. 4Si ọchattọhk f'olebh-olebh f''ọdaak-m, chen-m, nchi, ọfha nsọ-ọ ittabọhng pira mpe.”
5Wa Rẹbẹka od-oyonga itọhng ọbhaanga idik s'Isaak ọd-ọgbaak Ẹsau. K'ose kw'Ẹsau obin oyin ẹgbaaji bẹ́, ọd-ọfhọ eten otima okwuna, 6minna kw'Rẹbẹka obin oben nnwa kwẹ Jekọb bẹ́, “Kirẹ ẹ, mmaang ch'atte od-oben Ẹsau bẹ́, 7‘Bina yin ẹgbaaji, ad-afhọ nten atima akwu asi ọchattọhk f'olebh-olebh anang-m nchi, ọfha nsọ-ọ ittabọhng ny'Ọvaar Ibinọkpaabyi k'ititika pira mpe.’ 8Nya o, nnwa kwaam, yong-m itọhng mawuriji, asi ọttọhk f'mben-ọ bẹ́, asi. 9Zọhng za ch'avu aning, teka avu p'ikarẹ minna afa chen-m, ọfha ntima nsi ọchattọhk-kira f'ọd-ọdaak atte. 10Kọ m'atọka ọchattọhk mvo achen-ẹ, ọfha ochi, otima ọsọ-ọ ittabọhng, pira ope.”
11Jekọb okwu oben ọkka bẹ́, “Agbaanakka kwaam Ẹsau, omenẹ iphyabha k'ifor mawuriji, kaam nsọhmọ ẹkpakpa. 12Ó̱de atte kwaam otwu-m kẹ? M'ọsẹ-ẹ bẹ́, kaam mbọhr-ẹ ọbọhra. Kẹ m'oter ọnang-m ẹmma otwu kw'im'osi-m ittabọhng.”
13Ọkka ọpọhn-ẹ bẹ́, “Nnwa kwaam, tte ẹmma ndo ẹbọka kaam e. Kọ tera si k'ose kw'mben-ọ. Zọhng tọka ekpo mbyo chen-m.”
14Minna kw'Jekọb ofon, ọd-ọtọka avu afa ochena ọkka, otima osi ọchattọhk f'olebh-olebh k'ose kw'ọdaak otte. 15Rẹbẹka ọtọka ẹnya ch'ochedennwa kwẹ Esau ch'ejibhẹ ọtam, ọfọra Jekọb kw'ode nnwa kwẹ kw'ikarẹ. 16Obir otima evukpakpa obubh-ẹ mbọhk ọmaana ẹdọngọ okurọ ch'isisa ina ide. 17Nya o, ọtọka ọchattọhk ọkkọkka mvo f'ikk'ọsa, ttara brẹd ọnang nnwa kwẹ Jekọb.
18Jekọb obina okebha otte za, oben-ẹ bẹ́, “Atte kwaam.” Otte ọpọhn-ẹ bẹ́, “Kirẹ kaam ma, nnwa kwaam. Kọ anyi wọ o?”
19Jekọb ọpọhn-ẹ bẹ́, “Kaam Ẹsau kw'nde ochedennwa kwọ wọ e. Kaam kk'nsa k'ose kw'aben-m bẹ́, nsi. Ototo, bina ninga ẹwọr achi ọttọhk, ọfha asi-m ittabọhng sọ.”
20Isaak ọbọbh-ẹ bẹ́, “Nnwa kwaam, asi yen aze eten ẹbhar-ẹbhar minna?”
Jekọb ọpọhn-ẹ bẹ́, “Ọvaar Ibinọkpaabyi, kw'ode Ibinọkpaabyi kwọ, kẹ wọ ọnang-m owujibha e.”
21Nya o, Isaak oben Jekọb bẹ́, “Nnwa kwaam, nyọm-m ka ntwọ-ọ, ọfha nzonga ode ade nnwa kwaam Ẹsau majijik.”
22Jekọb obina ọnyọma otte z'ifor, otte ọtwẹ-ẹ, pira oben bẹ́, “Ọgbaakadik kwọ okerẹ kw'Jekọb, okenaka, mbọhk sọ ide mbọhk s'Ẹsau.” 23Wa kẹ kotinẹ okurọ bẹ́, wa mbọhk sẹ ide iphyabha-iphyabha mach'mbọhk s'ọgbaanọkka Ẹsau. Ofona nya, Isaak ọtọm-ẹ ittabọhng osisi. 24Otte obir ọbọbh-ẹ bẹ́, “K'odik ọkkọkka, kọ Ẹsau kw'ade nnwa kwaam wọ o?”
Jekọb ọpọhn-ẹ bẹ́, “Iye e, kaam wọ e.”
25Otte oben-ẹ bẹ́, “Nnwa kwaam, tọka ọchattọhk fọ nang-m nchi, ọfha nsọ-ọ ittabọhng.”
Jekọb ọtọka ọchattọhk mvo ọnang-ẹ ochi, obir ọnang-ẹ atuk ogwo.
26Nya o, otte Isaak oben-ẹ bẹ́, “Nnwa kwaam, kwu baak-m.”
27Jekọb obina, ọd-ọbaak-ẹ. Ch'Isaak ọbhaang eruk ch'ekpo py'ọfọr nya o, ọsẹ-ẹ ittabọhng, oben-ẹ bẹ́,
“K'odik ọkkọkka, eruk ch'nnwa kwaam
ede mach'eruk ch'owonọ
kw'Ọvaar Ibinọkpaabyi ikk'ọda.
28Tte Ibinọkpaabyi osi iffọhng s'ẹrọng itebh-ọ, ọnang-ọ ọchattọhk k'ọsaabh,
abir ayena ọchattọhk
ọttara atuk k'ọsaabh.
29Tte nkọma s'iyagbin maphyir ikpobh-ọ,
anọng maphyir araka nso anang-ọ.
Kọ m'ade oso kw'ivọkka pọ,
tte echimma chọ ẹraka eso ẹnang-ọ.
Tte ẹmma ẹbhakẹ ẹbọka anọng p'anang-ọ ẹmma.
Tte anọng p'adọ-ọ mabir ayena ẹda.”
30K'ose kw'Isaak osi Jekọb ittabọhng nya maphyir, ogbe kobhirẹ kw'Jekọb obin, ọgbaanọkka Ẹsau, okwuna ẹgbaaji. 31Kẹ obir osi ọchattọhk f'olebh-olebh ochena otte, oben otte bẹ́, “Atte kwaam, ototo, bina chi ọchattọhk faam, ọfha asi-m ittabọhng sọ.”
32Otte Isaak ọbọbh-ẹ bẹ́, “Kọ anyi wọ o?”
Ẹsau ọpọhn-ẹ bẹ́, “Kaam ochedennwa kwọ Ẹsau wọ e.”
33Minna kw'Isaak ọfọnọ ma tiki-tiki k'ẹfa-k'ẹfa, oben bẹ́, “Bọng-ọnọng wọ oyinẹ ẹgbaaji otima osi ọchattọhk ochen-m o? Yina kw'nd-nchi ọchattọhk mvo ma, pira apyirẹ ma. Kaam kk'ẹ nda, m'oyena ẹda k'odik ọkkọkka!”
34K'ose kw'Ẹsau ọbhaang idik s'otte ọgbaakẹ nya, minna kw'obokọ edimmọng k'ẹrọng, oben otte bẹ́, “Atte kwaam, si-m ittabọhng, bira si kaam ittabọhng ọdọk!”
35Okenaka, otte ọpọhn-ẹ bẹ́, “Agbaanakka okwu ọbọhr-m, ọtọka ittabọhng sọ.”
36Ẹsau okwu oben bẹ́, “Kẹ zang okpen Jekọb o#27.36 Jekọb k'eHiburu ekkerẹ ọttọhk mach'ọbọhr-ọnọng.? Kẹ kk'aam ọbọhra igbedim ifa. K'ochedengbe, osi-m ichen, ọna-m ediden chaam ch'ochedennwa. Ma, kk'aam ittabọhng saam obir ọna!” Ẹsau nokwu ọbọbh otte bẹ́, “Kaam ittabọhng kpenamkpen karikẹ o?”
37Isaak ọpọhn-ẹ bẹ́, “Kaam kk'ẹ nsa bẹ́, ọbaabh-ọ, mbir nsi anọng pẹ maphyir bẹ́, maninga izek-izek kwẹ, mbir nnang-ẹ ẹda ch'ọchattọhk ọttara atuk k'ọsaabh. Mbọng vọ orikẹ f'iwura nsi nnang-ọ, nnwa kwaam?”
38Ẹsau ọpọhna otte bẹ́, “Atte kwaam, kọ ayen ittabọhng majanẹ jẹ-jẹ o? Atte kwaam, m'abir ado kaam e!” Minna kw'Ẹsau obhom ẹmọng k'ẹrọng.
39Otte ọpọhn-ẹ bẹ́,
“Oruk kwọ z'izek
s'id-ijibh ekpo mọ̀nyọma,
iffọhng s'ẹrọng màbir aruk anyọma.
40Kọ m'aruk k'egbong k'egbong,
abir ade ọtọhmnọng kw'agbaanakka.
Okenaka, óde asi ọmmakkaarẹ amaan-ẹ,
m'arọbha ẹdọhrọ ndo chẹ ny'ikọ k'ifor.”
Jekọb ọrọbhọ okebha Laban
41Ẹsau osok Jekọb iwawuna z'ettem okurọ ittabọhng njo s'otte ọsẹ-ẹ. Oben ifor sẹ bẹ́, “Iwu s'obo kw'atte kwaam iningka inyọm. Kaam m'mfhọ agbaanakka kwaam Jekọb.”
42K'ogbe kw'magbaak Rẹbẹka odik kw'ochedennwa kwẹ ọgbaakẹ, oyerẹ Jekọb kw'ode nnwa kwẹ kw'ikarẹ, oben-ẹ bẹ́, “Agbaanakka Ẹsau ọkamẹ za bẹ́, m'ọfhọ otima ofokọ ifor sẹ ettem e. 43Ofona nya, nnwa kwaam, ogbe maphyir-phyir kakibhẹ. Rọbh china z'Haran, za ch'Laban kw'ode agbaanakka kwaam oning. 44Ninga maan-ẹ maa, ettem ẹsaka agbaanakka. 45Ó̱de idididọkọ sẹ ikk'isa, obir ọzaama odik kw'asẹ-ẹ, nya kw'im'ntọhm bẹ́, akwuna. Kinnorọ bẹ́, ngwana bọnga anọng afa k'ewu madanẹ.”
46Nya o, Rẹbẹka oben Isaak bẹ́, “Akpen kk'aam abenga okurọ panọng mba p'Het. Ó̱de Jekọb obir ọtọka kwanọng m'panọng mba p'afon Het, zonga bẹ́, kaam ọdọk akpen minruk.”
Currently Selected:
Ichedendik 27: mfn-x-ad
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
