Ichedendik 26
26
Isaak ọmaana Abimẹlẹk
1Ny'ogbe nwo, wa okwo f'ọgaang-ọgaangẹ oning ny'ẹkọma ndo, agbaarẹ ndo ch'iwa etto z'ogbe kw'Abraham abharẹ. Minna kw'Isaak obin ochina z'Gẹra, od-okebha Abimẹlẹk kw'ode ọvaarnọng kw'aPhilistiya. 2Ọvaar Ibinọkpaabyi oyin okebha Isaak, oben-ẹ bẹ́, “Z'Ijip kàta o! Ruk ny'izek s'mben-ọ bẹ́, aruk. 3Ninga m'izek nja k'ogbe biribirẹ, kaam m'nninga mmaan-ọ, mbir ndọ-ọ. Kaam m'nnang kọ ọttara iva p'iva pọ ozek mva maphyir. M'mbir nsi k'ose kw'uwa ikk'ncheka nnang atte kwọ Abraham. 4Kaam m'nsi iva p'iva pọ masaabh mach'ndidorọ s'ọrọngkpakpa. M'mbir nnang bẹ ozek mva maphyir. M'obir ofona ny'iva p'iva pọ nkọma s'iyagbin maphyir iyena ẹda, 5okurọ bẹ́, Abraham okpobh-m, osi ọttọhk kpenamkpen f'mben-ẹ, osok asana ọttara apaanga paam maphyir.” 6Ofona nya o, Isaak oninga ny'Gẹra, ọdọk ibyi kọta.
7K'ogbe kw'anọng p'obhon nwo mabọbh Isaak odik ọmaana kwanọng kwẹ, kẹ otek bẹ bẹ́, “Ọgbaanọkka kwaam wọ.” Obenẹ minna okurọ bẹ́, wa ojor-ẹ ojora bẹ́, oben bẹ́, kwanọng kwẹ wọ. Kẹ wa ochibhẹ z'ettem bẹ́, “Ajinọng p'obhon nwa m'afhọ-m ọfhọ okurọ bẹ́, Rẹbẹka ojibhẹ kwanọng mawuriji.”
8Ch'iwa Isaak ikk'oninga nya k'ogbe kw'ikk'obhira, Abimẹlẹk kw'ode ọvaarnọng kw'aPhilistiya ozenga z'ọmma kw'ofum oze Isaak ch'ọd-ọbaaka Rẹbẹka. 9Nya o, Abimẹlẹk oyerẹ Isaak oben-ẹ bẹ́, “Kẹ ode kwanọng kwọ k'odik ọkkọkka! Osi yen pira aben bẹ́, ọgbaanọkka kwọ wọ?”
Isaak ọpọhn-ẹ bẹ́, “Kaam osi-m bẹ́, mm'afhọ-m okurọ kẹ.”
10Abimẹlẹk oben-ẹ bẹ́, “Bọng-ọttọhkkira f'asi ma? Wúra ọnọng wanẹ ikk'oyima ọmaana kwanọng kwọ, wura mina k'odik kwiden atima aka o?”
11Minna kw'Abimẹlẹk ọnang ọsana z'obhon bẹ́, “Ọnọng kpenamkpen kw'ọlẹkẹ ojinọng nwoma, obir ode kwanọng kwẹ, obo mọ̀naanga.”
12Ny'icho nwo, Isaak otubh owonọ ny'izek njo, ọpha ekpo mawuriji okurọ ch'iwa Ọvaar Ibinọkpaabyi ikk'ẹ ọda. 13Minna kw'uwa ozeng okwu ode ojibhadanọng. Ojibhada kwẹ ọttara mach'ọttar nya maa, okwu ode ojibhadanọng kwiden. 14Oyena etirakpo ọmaana atọhmnọng p'aruk-ẹ ábẹ̀ k'ọsaabh. Ofona nya, aPhilistiya mbo matọm-ẹ ojijọhmọ. 15Matima ididọhbh akpa nsi-pe njo maphyir s'atọhmnọng p'otte atumọ z'ogbe kw'Abraham oning akpen.
16Minna kw'Abimẹlẹk oben Isaak bẹ́, “Bina rik obhon kwamina, okurọ bẹ́, kọ kk'mina ẹfa, ayọhnga.”
17Minna kw'Isaak obin nya ochina z'ilokodo s'Gẹra od-osi oruk kwẹ za. 18Obir okwu otum nsi-pe njo s'iwa matumọ z'ogbe kw'otte Abraham orukọ akpen, k'ogbe kw'Abraham ikk'ọpa. Isaak obir ọnang nsi-pe njo ache mbo p'uwa otte ọnang jẹ.
19K'ose kw'atọhmnọng p'Isaak mad-atum izek ny'ilokodo, minna kw'mad-adwu k'esipe ch'asi asaabhẹ maa, mabhobh-obhobh. 20Okenaka, wa akker-arọkimaan p'Gẹra masi ẹkọhr amaana akker-arọkimaan p'Isaak okurọ ch'matọk bẹ́, asi pabẹ bọ. Ofona ny'ẹkọhr ndo o, Isaak okpe esi-pe ndo bẹ́, Esek#26.20 Esek oyinẹ bẹ́, nkaanga., okurọ bẹ́, makaang-ẹ odik. 21Anọng p'Isaak mabira atum esi-pe ẹbhachẹ, anọng mabira asi ẹkọhr nya. Ofona nya o, okpe chẹ bẹ́, Sitna#26.21 Sitna oyinẹ bẹ́, nkaanga.. 22Obina nya od-otum esi-pe ọdọk-ọdọk, ọnọng ẹkọhr nya kosi. Ofona nya, Isaak okpe esi-pe ndo bẹ́, Rehobot.#26.22 Rehobot oyinẹ bẹ́, obhokọ. Oben bẹ́, “Ọvaar Ibinọkpaabyi kk'mina obhokọ ọnanga m'izek nja s'mm'oninga osi ojibhada.”
23Isaak obin nya o, ochina z'Beershẹba. 24Ny'erungọ ndo, Ọvaar Ibinọkpaabyi oyin okebh-ẹ nya, oben-ẹ bẹ́, “Kaam wọ nde Ibinọkpaabyi kw'atte kwọ Abraham. Oning-ọ ojor, kaam nning ma mmaan-ọ. Kaam m'ndọ-ọ, mbir nsi iva p'iva pọ masaabh mawuriji okurọ atte Abraham kw'uwa ode ọtọhmnọng kwaam.”
25Minna kw'Isaak ottim ija-byi nya, okpobha eche ch'Ọvaar Ibinọkpaabyi. Ottima ikkira sẹ nya, atọhmnọng pẹ mabir atum esi-pe nya.
26Ny'ogbe nwo, Abimẹlẹk otima Ahuzat kw'ọd-ọtọhn-ẹ idik, ọmaana Phikol kw'ode odidennọng kw'asoja, obina z'Gẹra okwu. 27Isaak ọbọbh bẹ bẹ́, “Ode yen kw'nnazeng minna, ch'ogbe nwo bọnga mawun-m minna, mabir akwubh-m z'abọnga k'obhon o?”
28Mapọhn-ẹ bẹ́, “Mina nkk'ọza k'odik ọkkọkka bẹ́, Ọvaar Ibinọkpaabyi oning ọmaan-ọ. Ofona nya, moben bẹ́, ọbaan bẹ́, kọ ttara mina mochekẹ ọnang ayok. Tte mosi nttọhna ọttara kọ bẹ́, 29kọ mina itama màsi, k'ose kw'mina nna kọ itama osi. Mm'okker-ọ k'eden ọkkọkka maa, morik-ọ k'ẹmẹm. Madidanma, Ọvaar Ibinọkpaabyi kk'ọ ọda.”
30Isaak okwu osok eninga ọnang bẹ, machi, mabir agwo. 31K'ekpikpebha ch'ewu esobh nya, bẹ ajinọng mbo machekẹ anang ayok. Pira Isaak nod-orik bẹ k'eden, mabhana k'ẹmẹm.
32Ny'ewu ndo, atọhmnọng p'Isaak makwu atek-ẹ odik kw'ọmaan esi-pe ch'nkk'atuma. Maben-ẹ bẹ́, “Nkk'asi ọza!” 33Oyerẹ esi-pe ndo eche bẹ́, Shiba#26.33 Shiba oyinẹ bẹ́, echekẹ, wanẹma, achenọmfa.. Tọma za maa pyirẹ menda, obhon nwo okpen Beershẹba#26.33 Beershẹba k'eHiburu okpo-okpo oyin bẹ́, esi-pe ch'echekẹ, wanẹma, esi-pe ch'achenọmfa..
34K'ogbe kw'Ẹsau node icho arọbh afa, ọtọka kwanọng kw'okpen Judit, kw'ode ominanwa kw'Beeri kw'ofon Het. Obir ọtọka Basẹmat, ominanwa kw'Ẹlọn, kw'obir ofona Hit. 35Bẹ panọng mbo afa wa mawọhkọ Isaak ọmaana Rẹbẹka masọhrọ asen machi masọhrọ nya.
Currently Selected:
Ichedendik 26: mfn-x-ad
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
