Akpaar-aponga 4
4
Debọra ode ọkpaar-aponga kw'Israẹl
1K'okpe kw'Ehud kk'upua, wa anạng p'Israẹl abạra asi ibyibyia-dik k'ititikha s'Ọvaar Ubinọkpaabyi. 2Ma wọ, wa Ọvaar Ubinọkpaabyi okpe bẹ ọnạng ọvaar Jabin, kw'ode ọvaarnạng kw'ẹkhạma ch'Kenaan, kw'ọdạbhẹ Hazọr. Wa Sisẹra kw'ode ochonạng kw'arim-mkpong p'Jabin, urukhu k'Haroshẹt-Hagoyim. 3Wa Jabin ọkhaam ijaar s'nnyạnyaang n'itwạr s'abẹ atim mbaanga asi, nnọhna mfa ukuma arạbh asen, p'kk'utima usi anạng p'Israẹl igbaan k'icho ẹrạbh. Osenga ma, anạng p'Israẹl agạma aror ẹkkaana k'Ọvaar Ubinọkpaabyi.
4Ma okpe ngwọ, wa Debọra kw'ode usi-ẹyaakha, kw'ọbạra ode ikwanạng kw'Lapidot wọ n'ọkpaara aponga p'anạng p'Israẹl. 5Wa n'uninga k'Uji kw'Debọra, kw'obe k'ottemkwẹ kw'Rama ọttạra Bẹtẹl, k'ukhubha kw'akpecho p'Ephraim, n'ọttọhnọ aponga. Wa anạng p'Israẹl phyibh n'ata akhebh-ẹ ma bẹ́, ọttọhnọ aponga ọnạng bẹ. 6Wa ọtọhmọ abẹ ayeri Barak kw'ode nnwa kw'Abinoam kw'ubin Kadẹsh k'ẹkhạma ch'Naphtali, oben-ẹ bẹ́, “Ọvaar Ubinọkpaabyi, kw'ode Ubinọkpaabyi kw'Israẹl ọnạng-ọ ẹfa bẹ́: ‘Sọhng k'Naphtali ọttạra k'Zebulun, ata atạkha ajunung nnọhna ẹrạbh ukuma nsen, atima bẹ eden abạnga avura okpecho kw'Tabọr. 7Amma m'ntima Sisẹra kw'ode ochonạng kw'arim-ekpong p'Jabin eden, ọttạra ijaar sẹ s'nnyạnyaang n'itwạr, ọttạra arim-ekpong pẹ, afona kha Ọraanga kw'Kishọn, ntạkha bẹ ngiọ-ọ k'mbọhk.’ ”
8Osenga ma, Barak oben-ẹ bẹ́, “Ode atwạn abamẹ, amma m'nta-ọta; okhenka, ode nạn abamẹ nátwạna, amma mạ́nta.”
9Debọra ubhina bẹ́, “K'udik-ọkka, amma m'ntwạn abọ ọtwạn. Okhenkha, ukwuru ukhira kw'n'atima ator udik ngwa, ẹbạra mákhaama, s'Ọvaar Ubinọkpaabyi m'otte Sisẹra ọbọhk ikwanạng okhem-ẹ.” 10Mạnna wọ Barak otobh ajunung p'Zebulun ọttạra p'Naphtali, anạng nnọhna ẹrạbh ukuma nsen p'aning k'isekh-isek kw'ẹfa chẹ. Wa Debọra ọtwạnọ abẹ.
11Ma okpe ngwọ, wa Heber kw'ubin Ken kk'ubina urik ayok-ofhon p'Ken, p'ade iva p'iva p'Hobab kw'uwa ode ọnyẹ kw'Mosẹs, ọta uttima ukkira kwẹ ọbaanga ichi ch'ididen kha Zaananim kw'ọbaang Kadẹsh.
12Masẹ abẹ n'akpaakhẹ Sisẹra bẹ́ Barak kw'ode nnwa kw'Abinoam kk'okpecho kw'Tabọr uvura, 13Sisẹra ọtạkha ajunung pẹ phyibh ukwu ọttạra k'ijaar sẹ s'nnyạnyaang n'itwạr py'abẹ atim mbaanga asi, nnọhna mfa ukuma arạbh asen otobha, tạma k'Haroshẹt-Hagoyim tạrr ukpira k'Ọraanga kw'Kishọn.
14Mạnna wọ Debọra obeni Barak bẹ́, “Ọma sọhng! Chemma wọ ode iwu ch'Ọvaar Ubinọkpaabyi kk'Sisẹra ọtạkha oge ọma Barak k'mbọhk. Ọvaar Ubinọkpaabyi sạng kw'kk'abọ ọtwạna?” Wa Barak utim ajunung nnọhna ẹrạbh ukuma nsen p'atwạnọ abẹ avura k'okpecho kw'Tabọr. 15Masẹ Barak n'osenga ukwu, Ọvaar Ubinọkpaabyi osenga k'ọkkạkkaang-kkro kw'Barak, ukhubh Sisẹra ọttạra ijaar sẹ phyibh s'nnyạnyaang n'itwạr, ọttạra arim-ekpong pẹ tạrr, Sisẹra ọsạkha k'ọkpaar kwẹ kw'ẹnyạnyaang n'ẹtwạr, n'utima mfhok ọrạbh.
16Wa Barak ukhubhu ijaar nnọ s'nnyạnyaang n'itwạr ọttạra arim-ekpong tạrr, ukpira kha Haroshẹt-Hagoyim. Arim-ekpong p'Sisẹra phyi-phyibh ape k'ọkkangkkang-kkro, ujunung wạnọ-wạnọ núrikha. 17Wa Sisẹra ọrạbhọ k'mfhok tạrr, ọta ukpira k'ukkira kw'Jayẹl, kw'ode ikwanạng kw'Heber kw'ubin Ken, ukwuru s'uwa Jabin kw'ode ọvaarnạng kw'Hazọr, ọttạra ẹchọhmfhạr ch'Heber kw'ubin Ken akhaam echekha ch'ẹmẹm.
18Wa Jayẹl uyini k'iyaan ọta okhebha Sisẹra oben-ẹ bẹ́, “Attite kwaam, kwu e, nwa kha etaanga. Tte nạng-ọ ojor.” Mạnna wọ kw'ọnwa k'ukkira kw'Jayẹl, Jayẹl o, ọtạkha ẹnọhmma-kpa ububh-ẹ.
19Sisẹra n'obeni bẹ́, “Asi adaakh-m o.” Mạnna wọ Jayẹl owong ẹkpa ch'abasi ch'abẹ atim atenkpa asi, ọkhaabha ọnạng-ẹ, ogwo, ọbạra ububh-ẹ.
20Sisẹra oben Jayẹl bẹ́, “Be ma ukkira-mma. De ọnạng wạnọ-wạnọ ukwu ọbạbhọ de ọnạng uning mama, ben bẹ́, ‘Mma o.’ ”
21Okhenkha, wa Jayẹl kw'ode ikwanạng kw'Heber ọtạk oyoma-chi wạnọ kw'ukkira, ọttạra ọtabọhk, ọbẹkh-ọbẹk ọta okhebha Sisẹra kha s'kkẹ-ẹ ọkhọhna uyima ọttaabha. Ọtạkha ubhina nwọ, ukhum-ẹ k'ochobem ọmaana k'isisek, ope.
22Ma ibua-ibua, Barak kw'n'ukhubh Sisẹra ukpira. Mạnna wọ Jayẹl uyini k'iyaan ọta okhebh-ẹ, oben bẹ́, “Kwu, ntibh-ọ ọnạng kw'n'aror.” Ma wọ, Barak ọtwạnọ abẹ ọnwa k'ukkira, ọta ose s'Sisẹra n'uyim ububukhu kha, ubhina awẹ kw'ukhum-ẹ udwu k'ochobem.
23Ma iwu njọ, anạng p'Israẹl ase oche kw'Ubinọkpaabyi okhem ọvaar Jabin kw'Kenaan. 24Wa anạng p'Israẹl afon ororo akhaama ẹfa arima ọvaar Jabin kw'Kenaan abẹ tạrr, abẹ adim-ẹ.
Currently Selected:
Akpaar-aponga 4: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission