Akpaar-aponga 3
3
1Mama wọ ode idifhon s'uwa Ọvaar Ubinọkpaabyi otte ọbọhk ininga, ọfha utima oyoma anạng p'Israẹl phyibh, p'uwa nạn ekpong jạnẹ-jạnẹ k'ẹkhạma ch'Kenaan tạm nárima. 2(Wa usi oche ngwọ ọfha utima ma okpebhi iva p'iva p'anạng p'Israẹl udik otena k'ekpong, p'uwa nạn udik kw'ekpong asong): 3wa idifhon nnọ ide avaar asen p'Philistiya, ọttạra anạng p'Kenaan phyi-phyibh, ọttạra anạng p'Sidọn, ọttạra anạng p'Hiv p'arukhu kha akpecho p'Lebanọn, tạma k'akpecho p'Baal-Hermọn tạrr akpira k'Lebo-Hamat. 4Wa otte idifhon nnọ ọbọhk ininga k'oche kw'm'utima oyoma anạng p'Israẹl, ọfha ose ode abẹ s'm'achok ntọhna s'Ọvaar Ubinọkpaabyi s'uwa kk'osenga k'Mosẹs ọnạng ab'otte.
5Wa anạng p'Israẹl arukhu attạra anạng p'Kenaan, ọttạra anạng p'Het, ọttạra anạng p'Amọr, ọttạra p'Pẹriz, ọttạra anạng p'Hiv, ọttạra anạng p'Jẹbus. 6Wa anạng p'idifhon nnọ atạk aminava p'Israẹl k'ọbada, abẹ abạra atạkha aminava pabẹ anạng ajunung p'Israẹl, abẹ abạra akpobha ikha s'idifhon nnọ.
Otniyẹl ode ọkpaar aponga kw'Israẹl
7Wa anạng p'Israẹl asi ibyibyia-dik k'ititikha s'Ọvaar Ubinọkpaabyi; abẹ abonu Ọvaar Ubinọkpaabyi, kw'ode Ubinọkpaabyi kwabẹ ata akpobha akpatava p'Baal ọttạra mkpọmmachi s'Ashẹra. 8Ettem ipyibhi Ọvaar Ubinọkpaabyi otena anạng p'Israẹl, osenga ma okpe bẹ ọnạng ọvaarnạng kw'Kushan-Rishatayim kw'ubin Aram-Naharayim, kw'anạng p'Israẹl asi ibira-tọhm anạng icho isenọttaan. 9Okhenkha, masẹ abẹ agạm ẹkkaana anạng Ọvaar Ubinọkpaabyi, Ọvaar Ubinọkpaabyi ọnạngẹ bẹ ọkkaana kw'okpen Otniyẹl, kw'ode nnwa kw'Kẹnaz, kw'ode nwotte kw'isạsạkhẹ kw'Kalẹb. 10Wa Iguguma s'Ọvaar Ubinọkpaabyi ẹsạk ẹnwẹ-ẹ, n'ukwu ode ọkpaar-aponga kw'Israẹl. Wa ọta urima ekpong ọvaar Kushan-Rishatayim kw'ubin Aram abẹ. Ma wọ Ọvaar Ubinọkpaabyi ọkkaan Otniyẹl, okhem-ẹ. 11Ma wọ isisek nnọ ikhaam ẹmẹm k'icho arạbh afa, tạrr ukpira k'okpe kw'Otniyẹl kw'ode nnwa kw'Kẹnaz ope.
Ehud ode ọkpaar aponga kw'Israẹl
12Wa anạng p'Israẹl abạra asi ibyibyia-dik k'ititikha s'Ọvaar Ubinọkpaabyi. Ukwuru ibyibyia njọ ch'abẹ asi, Ọvaar Ubinọkpaabyi ọnạngẹ ọvaar Eglọn kw'ode ọvaarnạng kw'Moab ẹfa okhema anạng p'Israẹl. 13Wa Eglọn obeni anạng p'Ammọn ọttạra anạng p'Amalẹk bẹ́, abẹ akwu attạr-ẹ ata arima anạng p'Israẹl abẹ. Wa abẹ atạk Efhondiden ch'Aji.#3.13 Efhondiden ch'Aji ode Jeriko. 14Wa anạng p'Israẹl aning k'isekh-isek kw'ẹfa ch'Eglọn kw'ode ọvaarnạng kw'Moab k'icho chikhanttaan.
15Wa anạng p'Israẹl abạra agạma ayeri Ọvaar Ubinọkpaabyi. Ọvaar Ubinọkpaabyi ọnạngẹ bẹ Ehud kw'usi ubhiribọhk, ode ọkkaana kwabẹ. Ehud wa ode nnwa kw'Gẹra kw'ubin k'ẹkhạma ch'Bẹnjamin. Wa anạng p'Israẹl atọhmọ Ehud bẹ́, okkena ọvaar Eglọn kw'Moab ntum. 16Wa Ehud kk'ọkkangkkang-kkro kw'ọjaabhẹ nnạm mfa usia, kw'adum pẹ akpir ọttọhk masẹ ẹtwạkhọ jạnẹ. Ọtạkha wẹ ọdạbh k'udim-kpok k'ekpo py'oge k'ifor. 17Ọtạkha ntum nnọ ọnạng ọvaar Eglọn kw'Moab, kw'uwa ode ọnạng kw'ọbạrẹ ẹfa mororo. 18K'okpe kw'Ehud kk'oyok ntum nnọ ọnạnga, oben anạng p'wạra atọhk ntum nnọ bẹ́, abẹ abhạna. 19Okhenkha, masẹ abẹ akpir k'akpatava p'abẹ atim nta agwa ọbaanga k'Gilgal, Ehud oyeni okkeri ma, ọkpa nnạm okhebha Eglọn, oben-ẹ bẹ́, “Ọvaarnạng o, amma nkhaam ẹkkaabha idubha-idubha ch'n'mben bẹ́, mkpaakh-ọ.”
Ma wọ ọvaarnạng obeni atọhmnạng pẹ bẹ́, “Arik mạna ẹbhaang!” Mạnna wọ abẹ abin afona.
20Ma wọ Ehud oseng okhebha Eglọn kha ibyi s'uning ẹyạr mạnkkeni kha ẹnyạng ch'ọvaarter kwẹ, oben bẹ́, “Amma ntim ẹkkaabha ch'Ubinọkpaabyi bẹ́, nkken-ọ e.” Masẹ ọvaarnạng ubin kha ibyi s'uning ẹyạr, 21ma wọ Ehud utim ọkwabọhk kwẹ ọtwạr ọkkangkkang-kkro kw'ọdạbhẹ k'okpok. Utima wẹ ukhum ọvaarnạng k'ẹfhạr. 22Tạrr oseng s'nter s'ọkkangkkang-kkro nwọ inwẹ-ẹ k'ẹfhạr, tạrr afhạrọ pẹ amạnọ ayin, wa Ehud ọkkangkkang-kkro nwọ nọ́rạbha. Ma wọ iyaak ibubh ọkkangkkang-kkro nwọ. 23Wa Ehud osengi uyin k'iyaan, ọtạkha ammakhubh p'ẹmaanggọ njọ ch'ẹnyạng ọkpạkha.
24Masẹ Ehud kk'osenga ofona, ma wọ atọhmnạng p'ọvaarnạng avur ata ase bẹ́ ammakhubh p'ẹmaanggọ ch'ẹnyạng kk'akpạkha. Abẹ n'abeni bẹ́, “Nse bẹ́, ọtạ okwokha ọyọhng kha ẹmaanggọ ch'ẹtaanga-ẹtaanga ch'ọvaar-chọhm.” 25Wa abẹ aning atik tạrr, eden ibhir. Okhenkha, ọvaarnạng ammakhubh p'ẹmaanggọ njọ núgwunga. Abẹ atạkha ọgbạkhọrọ agwunga ammakhubh mbọ. Ma wọ abẹ n'ase bẹ́ aro kwabẹ kk'uttia kha ọgbaarẹ, ope.
26Masẹ abẹ n'aninga ma atik, Ehud ọrạbh ofona. Wa osengi k'ukhubha kw'akpatava p'abẹ atim nta agwa, ọrạbh ofona kha Seira. 27Masẹ ukpir kha, oge ubukpọhng k'ukhubha kw'akpecho p'Ephraim. Wa Ehud utim anạng p'Israẹl eden, abẹ aseng asạkha k'ukhubha kw'akpecho.
28Ehud obeni bẹ́, “Ator-m nnạm, khiri Ọvaar Ubinọkpaabyi kk'anạng p'Moab, p'ade awawuna-nạng pabạnga, ọtạkha oge bạnga k'mbọhk.” Mạnna wọ wa abẹ ator-ẹ nnạm asạkha, ata atạkha ukhubha kw'igbin-igbin kw'Ọraanga kw'Jọrdan, kw'oten k'Moab. Abẹ ọnạng wạnọ-wạnọ ọbọhk náttia ojekha. 29Wa ma okpe ngwọ, abẹ afhọ anạng p'Moab p'akpir nnọhna ẹrạbh ukuma nsen. Wa akkemkpa ọttạra afanạng phyi-phyibh, ọnạng kw'ọnnaang kòde. 30Tạma ma iwu njọ, anạng p'Moab n'aning k'isekhisek kw'ẹfa ch'anạng p'Israẹl. Wa ẹkhạma ch'Israẹl ining k'ẹmẹm k'icho arạbh annebung.
Shamgar ode ọkpaar- aponga kw'Israẹl
31Masẹ okpe kw'Ehud kk'osenga, Shamgar kw'ode nnwa kw'Anat, kw'ọbạra ode ọnạng kw'utim ukwurachi kw'utik-mmaam, ọfhọ anạng p'Philistiya p'akpir ẹnọhna ukuma arạbh jobh. Wa ẹma Shamgar, ọgba ọkkaana anạng p'Israẹl.
Currently Selected:
Akpaar-aponga 3: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
