Akpaar-aponga 1
1
Anạng p'Israẹl arim anạng p'Kenaan p'arikh-urik abẹ
1K'okpe kw'uwa Joshua kk'upua, anạng p'Israẹl abạbhọ Ọvaar Ubinọkpaabyi bẹ́, “Bạng ẹkhạma ch'amạna jọ m'ichi eden ẹta irima anạng p'Kenaan abẹ?”
2Wa ọvaar Ubinọkpaabyi ubhin bẹ́, “Ẹkhạma ch'Juda ẹjọ m'ichi eden; amma k'isisek nnọ ntạkha nge bẹ k'mbọhk.”
3Ma wọ, anạng p'ẹkhạma ch'Juda abeni anạng p'ẹkhạma ch'Simeọn, p'ade ayok-ofhon pabẹ p'ade Israẹl bẹ́, “Abạnga akwu atwạn mạna abẹ, amfona k'ẹkhạma ch'abẹ akhebhi anạng mạna, anta anima anạng p'Kenaan abẹ. Amạna mba m'ambạra antwạn bạnga abẹ amfona k'abạnga k'ukhukbha.” Mạnna wọ kw'anạng p'Simeọn atwạnọ bẹ abẹ afona.
4Mạnna wọ kw'anạng p'Juda ata arima ekpong njọ. Ọvaar Ubinọkpaabyi usi anạng p'Juda akhema anạng p'Kenaan, ọttạra anạng p'Pẹriz. Wa abẹ afhọ anạng nnọhna ẹrạbh ukuma nsen kha Bẹzẹk. 5Ma wọ wa abẹ ase Adoni-Bẹzẹk kw'ode ọvaarnạng kw'Bẹzẹk, abạra arima abẹ, abẹ abhạkhẹ akhema anạng p'Kenaan ọttạra anạng p'Pẹriz. 6Wa Adoni-Bẹzẹk ọrạbhọ, abẹ akhubh-ẹ avạkha, abẹ akpaar-ẹ nnọhna-dim s'mbọhk ọttạra s'mfhok.
7Osenga ma, Adoni-Bẹzẹk oben bẹ́, “Avaarnạng arạbh attaan ukuma jobh p'abẹ akpaar nnọhna-dim s'mbọhk ọttạra s'mfhok, kk'adang-khạbhọ adwunga k'okpokkro kwaam isekh-isek. Mantọhmma, Ubinọkpaabyi kk'aam usia k'oche kw'uwa nsi bẹ.” Wa abẹ atim-ẹ afona kha Jẹrusalẹm, ọta ope kha.
8Wa ajunung p'ẹkhạma ch'Juda abạra arima anạng p'Jẹrusalẹm abẹ, akhema bẹ. Wa abẹ atim ọkkangkkang-kkro afhọ anạng p'efhondiden njọ, abẹ abạra age kwẹ ekpon.
9Ayongu ma, anạng p'ẹkhạma ch'Juda asạk ata arima anạng p'Kenaan p'arukhu k'ukhubha kw'akpecho, kha Nẹgẹv, ọttạra k'ukhubha kw'akpecho p'atẹrẹ-ọtẹrẹ, k'ukhubha kw'okpebhadudon abẹ. 10Wa anạng p'Juda ata arima anạng p'Kenaan p'arukhu k'Hẹbrọn (kw'uwa okpen Kiriyat-Arba) abẹ. Abẹ abạra akhema Shẹshayi, ọttạra Ahiman, ọttạra Talmayi. 11Abẹ abina ma ata arima anạng p'arukhu k'Dẹbir (kw'uwa okpen Kiriyat-Sẹphẹr) abẹ.
12Wa Kalẹb obeni bẹ́, “Ujunung kwidede kw'urim Kiriyat-Sẹphẹr abẹ, ọbạra okhem-ẹ, amma m'nạng-ẹ Aksa kw'ode uminannwa kwaam k'ọbada.” 13Wa Otniyẹl kw'ode ujunung-nwa kw'Kẹnaz, kw'uwa ode nnwotte kw'isạsạkhẹ kw'Kalẹb okhem ofhon ngwọ. Mạnna wọ Kalẹb ọtạk uminannwa kwẹ, Aksa ọnạng-ẹ k'ọbada.
14Wa iwu jạnẹ, Aksa ukwu okhebha Otniyẹl, ọchọhm-ẹ bẹ ọta ophyem otte kw'ẹma Aksa isisek. Masẹ Aksa ọsạk k'ẹnyạnyaang chẹ, Kalẹb ọbạbh-ẹ bẹ́, “Mbạng vọ aroru bẹ́, nsi nnạng-ọ?”
15Ma wọ Aksa ọpọhn otte bẹ́, “Yọhbh-m itta. Masẹ kk'aam isisek anạnga kha Nẹgẹv, bạra nnạng-m afobhcho.” Ma wọ Kalẹb ọnạng-ẹ afobhcho p'ibir-ibira ọttạra p'ẹrạkha-ẹrạkha.
16Wa iva p'iva p'Ken, kw'ode ọnyẹ kw'Mosẹs, ọttạra anạng p'Juda abin k'Efhondiden ch'Aji, ata aruk attạra anạng p'Juda k'ukhubha kw'uminkpa, kha Nẹgẹv ọbaanga Arad.
17Wa ajunung p'ẹkhạma ch'Juda atwạnọ anạng p'ẹkhạma ch'Simeọn p'ade ayok-ofhon p'Israẹl abẹ, ata arima anạng p'Kenaan p'arukhu kha Zẹphat abẹ. Abẹ adimi ofhon kw'Zẹphat kubungu. Osenga ma, abẹ ayeri ofhon ngwọ Horma#1.17 K'eHiburu, Horma oyini ikhibha.. 18Wa anạng p'Juda abạra akhema ifhon s'Gaza, ọttạra Ashkẹlọn, ọttạra Ẹkrọn. Wa abẹ avạk efhondiden chidede ọttạra erem chẹ.
19Wa Ọvaar Ubinọkpaabyi uning ajunung p'ẹkhạma ch'Juda abẹ. Abẹ akhem efhondiden ch'ining k'okpecho, okhenka, wa abẹ anạng p'arukhu k'ipekhuma nákkia akhubh, ukwuru s'abẹ akhaam ijaar s'nnyạnyaang n'itwạr s'ide mbaanga-mbaanga. 20Wa abẹ atạk Hẹbrọn anạng Kalẹb, kw'uwa ukhubhu iva p'iva p'ajunung attaan p'Anak, otor k'oche kw'uwa Mosẹs kk'ochekha. 21Wa anạng p'ẹkhạma ch'Bẹnjamin, anạng p'Jẹbus p'arukhu k'Jẹrusalẹm nákhubha; anạng p'Jẹbus atim arukhu anạng p'Benjamin abẹ tạrr ukpira chemma.
22Wa Ọvaar Ubinọkpaabyi uning ẹkhạma ch'Josẹph abẹ, ma wọ abẹ ata arima anạng p'Bẹtẹl abẹ. 23Masẹ abẹ atọhmọ ajunung bạnọ p'ẹchọhm-fhạr ch'Josẹph bẹ́ ata abaana Bẹtẹl (kw'uwa okpen Luz), 24abaan-ibyi mbọ ase ujunung wạnọ s'ubin kha efhondiden uyin kha, abẹ aben-ẹ bẹ́, “Tibh mạna eden ch'm'ansenga anwa k'ofhon ẹtaanga, amạna mba m'ansi-ọ ẹtaam usi.” 25Ma wọ, ujunung nwọ utibhi bẹ eden, bẹ atima ọkkangkkaang-kkro afhọ anạng p'efondiden njọ. Okhenkha, wa abẹ ujunung nwọ ọttạra ẹchọhmfhạr chẹ náfha. 26Wa n'ofon kha isisek s'anạng p'Het usi efondiden ma, okpe kwẹ Luz, kw'n'ode eche ch'ibyi nnọ tạrr ukpira chemma.
27Okhenkha, wa anạng p'ẹkhạma ch'Manasẹ, anạng p'Bet-Shan, ọttạra p'Taanak, ọttạra p'Dor, ọttạra p'Ibleam, ọttạra p'Mẹgido, ọttạra ifhon s'ining ibaabha ma, nákhubha, ukwuru s'uwa anạng p'Kenaan akhạmọ bẹ́ abẹ m'aruk ma nkhạma nnọ. 28K'okpe kw'anạng p'Israẹl n'akhaam ẹfa, abẹ n'akwa anạng p'Kenaan asi ibira-tọhm. Okhenkha, wa abẹ bẹ woowong nákhubha. 29Wa anạng p'ẹkhạma ch'Ephraim anạng p'Kenaan p'arukhu k'Gẹzẹr nábạra akhubh, okhenka, wa anạng p'Kenaan afon ororo aruk bẹ abẹ. 30Wa anạng p'ẹkhạma ch'Zebulun anạng p'Kenaan p'arukhu kha Kitron ọttạra kha Nahalol nákhubha. Osenga ma, anạng p'Kenaan afon ororo aruk bẹ abẹ. Okhenkha, wa anạng p'ẹkhạma ch'Zebulun n'atima anạng p'Kenaan asi ibira-tọhm. 31Wa anạng p'ẹkhạma ch'Ashẹr anạng p'Kenaan p'arukhu kha k'Ako, ọttạra k'Sidọn, ọttạra k'Ahlab, ọttạra K'Akzib, ọttạra k'Helba, ọttạra k'Aphẹk, ọttạra k'Rohob nákhubha. 32Osenga ma, anạng p'ẹkhạma ch'Ashẹr afona ororo aruk anạng p'Kenaan abẹ, ukwuru s'uwa abẹ nạn bẹ nákhubha. 33Anạng p'ẹkhạma ch'Naphtali anạng p'arukhu k'Bet-Shẹmẹsh ọttạra k'Bẹt-Anat nákhubha. Wa abẹ afon ororo aruk anạng p'Kenaan abẹ. Okhenkha, wa anạng p'Naphtali atim anạng p'Kenaan p'arukhu k'Bẹt-Shẹmẹsh, ọttạra k'Bẹt-Anat asi ibira-tọhm. 34Wa anạng p'Amọr akpa anạng p'ẹkhạma ch'Dan amaana k'ukhubha kw'akpecho, abẹ anạng p'Dan ọbọhk náttia asạkha akwu k'ẹkpẹmẹ. 35Wa anạng p'Amọr akhạmọ bẹ́, abẹ m'aruk k'okpecho kw'Heres, ọttạra kw'Aijalọn, ọttạra kw'Shalbim. Okhenkha, masẹ wa anạng p'ẹkhạma ch'Joshẹph n'akhaam ẹfa, abẹ n'atima anạng p'Amọr asi ibira-tọhm. 36Wa erem ch'ẹkhạma ch'Amọr etạm k'eden ch'Inạnaangẹ, eseng ẹta ittima kha Sẹla tạrr, eseng efona.
Currently Selected:
Akpaar-aponga 1: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
