Nnwẹr s'Osenga 40

Ittima ch'ibyirukhasẹ s'Ubinọkpaabyi

1Ma wọ, Ọvaar Ubinọkpaabyi obeni Mosẹs bẹ́, 2“K'echedenwu ch'ocheden-phye, ttima ibyirukhasẹ s'Ubinọkpaabyi kw'ode ukkira kw'etobha. 3Chok Ikwukwur nnọ s'Echekha ma ẹtaanga, abạra akpạna ivạra s'ẹchọhmma abubha sẹ. 4Tima okpokkro nwọ nwa k'ẹtaanga, anạna ekpo py'ẹbaan bẹ́, anạna ma. Atima itukkạng-chi anwa ma, atạkha attukkạng anạna. 5Chok ijabyi s'insẹns sabẹ atim gol asi, k'ititikha s'Ikwukwur nnọ s'Echekha, abạra akpạna ivạra s'ẹchọhmma abubha sẹ. 6Chok ijabyi s'ẹnạnga ẹkkạmachẹ k'ititikha s'ẹchọhmma ch'ibyirukhasẹ s'Ubinọkpaabyi, k'ukkira kw'etobha; 7abạra age asi k'okpobhu-mbọhk abera k'ottemkwẹ kw'ukkira kw'etobha ọttạra ijabyi. 8Si eterttem baabha sẹ, abạra akpạna ivạra k'ẹchọhmma ch'eterttem njọ. 9Tạkha ana p'abẹ n'abyenga anạng k'echo, byenga ma ibyirukhasẹ nnọ, ọttạra ọttọhk fidede f'uning ma ẹtaanga; si sẹ, ọttạra ekpo py'ẹnnya phyi-phyibh iwur, mạnna wọ asẹ m'iwur. 10Gba byenga ana p'abẹ n'abyenga ọnạng k'echo ma ijabyi s'ẹnạnga ẹkkạmachẹ, ọttạra k'ekpo pyẹ phyibh, asi asẹ iwur, ọfha asẹ ide ibyi s'awurada p'ayọhng awurada. 11Gba byenga ana mbọ k'ọgbangbang ọttạra k'ẹnạna chẹ, abạra asi apyẹ iwur. 12Tima Aarọn ọttạra ajunungva pẹ akwu ma ẹchọhmma ch'ukkira kw'etobha, atima asi akpobhu bẹ. 13Ge Aarọn nnya nnọ s'awurada, abạra abyeng-ẹ ana k'echo, abạra asi-ẹ uwur, ọfha usi ọtọhm f'ọfọhnẹja. 14Gba tima ajunungva pẹ kwu, age bẹ nnya s'afọhn-nja. 15Byenga bẹ ana k'ẹcho, k'oche kw'uwa abyeng otte kwabẹ, ọfha abẹ agba asi ọtọhm masẹ afọhn-nja paam. Ẹna-byenga njọ m'isi abẹ ade afọhnọ-ẹja tạrr ipimmanitor.” 16Wa Mosẹs usi udik kwidede otor k'oche kw'Ọvaar Ubinọkpaabyi oben-ẹ bẹ́, usi. 17Ma wọ, wa abẹ attim ibyirukhasẹ nnọ k'echedenwu ch'ocheden-phye, k'cho kw'ottong afa. 18Masẹ Mosẹs utim ibyirukhasẹ nnọ, wa abẹ achi eden asi arin pẹ, abẹ afo mkpọmmachi, abẹ age nsemachi, abạra abina ntùmú sẹ abe. 19Mosẹs ukwu ọmmaama ukkirakpa ububha kẹrạng-ẹrạng kw'ibyirukhasẹ nnọ, ọbạra ububha ẹrạng-ẹrạng kw'ukkira nwọ otor k'oche kw'Ọvaar Ubinọkpaabyi ọtọhn-ẹ. 20Ọtạkha ata p'nnyina oge k'Ikwukwur s'Echekha, ọtạkha nsemachi ọnọhma ma Ikwukwur s'Echekha, ọbạra ọtạkha ikwukwurkpa ch'epfokhu ububha sẹ. 21Ma wọ Mosẹs, utim Ikwukwur nnọ s'Echekha ọnwa k'ibyirukhasẹ ẹtaanga, ọkpạna ivạra s'ẹchọhmma ọkpa sẹ ọmaana ma ẹtaanga, ọbạra ọkpa Ikwukwur s'Echekha ọmaana ma, otor k'oche kw'Ubinọkpaabyi ọtọhn-ẹ. 22Wa Mosẹs ober okpokkro k'ẹtaanga kw'ukkira kw'etobha k'ukhubha kw'okkeri ibir-ibira, k'iyaan-iyaan s'ivạra s'echọhmma nnọ, 23Mosẹs ọtạkha brẹd ọnạna ma okpokkro k'ẹrạng k'ititikha s'Ọvaar Ubinọkpaabyi, otor k'oche kw'Ọvaar Ubinọkpaabyi ọtọhn-ẹ. 24Ochok itukkạng-chi k'ibyirukhasẹ ininga ekkeri okpokkro ititikha k'ẹrạkh-ẹrạkha kw'ibyirukhasẹ nnọ, 25Mosẹs ọbạra udira attukkạng mbọ obera ma ititikha s'Ọvaar Ubinọkpaabyi, otor k'oche kw'Ovaar Ubinọkpaabyi ọtọhn-ẹ.

26Mosẹs utim ijabyi s'gol k'ibyirukhasẹ ẹtaanga k'ititikha s'ivạra s'ẹchọhmma, 27Mosẹs ọbạra ọkkạmọ insẹns kw'orebhi iruk ma, otor k'oche kw'Ọvaar Ubinọkpaabyi ọtọhn-ẹ. 28Ma wọ, n'ọtạk ivạra s'ẹchọhmma ọkpạna k'ẹchọhmma ch'ibyirukhasẹ nnọ. 29Mosẹs Utim ijabyi s'ẹnạnga ẹkkạmachẹ ọbaanga ẹchọhmma ch'ibyirukhasẹ, s'ide ibyirukhasẹ s'Ubinọkpaabyi, ọttạra ẹnạnga ch'agwu ma, otor k'oche kw'Ọvaar Ubinọkpaabyi ọtọhn-ẹ.

30Obera ọgbangbang nwọ k'ottemkwẹ kw'ibyirukhasẹ s'etobha, ọttạra ijabyi nnọ, oge asi p'mbọhk ọttạra mfhok-kpukpobhu ma ọgbangbang nwọ, 31ma wọ Mosẹs ọttạra Aarọn ọttạra ajunungva p'Aarọn akpobhu mbọhk ọttạra mfhok sabẹ. 32Wa abẹ n'akpobhu mbọhk ọttạra mfhok sabẹ k'okpe kwidede kw'abẹ m'anwa k'ibyirukhasẹ nnọ, ọttạra k'okpe kw'abẹ kk'afora k'ijabyi, ator k'oche kw'Ọvaar Ubinọkpaabyi obeni Mosẹs. 33Ma wọ Mosẹs utim eterttem ọbaabha ibyirukhasẹ nnọ, ọttạra ijabyi, ọtạkha ivạra s'ẹchọhmma ọkpạna k'ẹchọhmma ch'eterttem njọ. Wa Mosẹs okke ọtọhm mvọ phyibh.

Abạrada p'Ọvaar Ubinọkpaabyi

34Ma wọ, ebona ibubh ibyirukhasẹ nnọ, abạrada p'Ọvaar Ubinọkpaabyi abạra asạkha afu ibyirukhasẹ nnọ bẹ́ byẹr. 35Wa Mosẹs k'ibyirukhasẹ nnọ ẹtaanga dạk nókke ọnwa, ukwuru s'ebona njọ kk'ẹsạkha ininga ma, ọttạra s'uwa abạrada p'Ọvaar Ubinọkpaabyi ifu ma ibyirukhasẹ nnọ ẹtaanga.

36K'osenga kw'anạng p'Israẹl asi phyi-phyibh, okpe kwidede kw'abẹ ase s'ebona eyebhi k'ibyirukhasẹ, abẹ abina osenga; 37okhenka, de ebona nạn néyebha, abẹ osenga mábina, tạrr iwu ch'achẹ eyebhi. 38Ma wọ, wa ebona njọ ch'Ọvaar Ubinọkpaabyi n'ibuhba ibyirukhasẹ nnọ k'ẹya, k'irungu, m'ase ekpon ch'n'ẹyạma ma. Wa anạng p'Israẹl phyi-phyibh n'asẹ idik nnọ k'osenga kwabẹ phyi-phyibh.

Currently Selected:

Nnwẹr s'Osenga 40: mfn-x-os

Highlight

Copy