Nnwẹr s'Osenga 5
5
Mosẹs ọttạra Aarọn ata akhebha Phero
1Masẹ idik nnọ kk'ittia iseng, Mosẹs ọttạra Aarọn ata akhebha Phero aben bẹ́, “Ọvaar Ubinọkpaabyi kw'ode Ubinọkpaabyi kw'Israẹl obeni bẹ́, ‘Tte anạng paam ọbọhk abẹ afona, ọfha abẹ ata asi erobha ch'ikpukpobha kha ibyi s'anạng nạnạ́rukha, anạng-m.’ ”
2Ma wọ Phero ọbạbhọ bẹ bẹ́, “Anẹ wọ ode Ọvaar Ubinọkpaabyi nwọ kw'amma m'nnạbh k'ichen ntte anạng p'Israẹl ọbọhk abẹ afona? Amma Ọvaar Ubinọkpaabyi kạ́nsong, anạng p'Israẹl ọbọhk mạ́mbạra ntte abẹ afona.”
3Ma wọ Mosẹs ọttạra Aarọn aben-ẹ bẹ́, “Ubinọkpaabyi kw'aHiburu kk'mạna okhebha. Totokhạn, tte mạna ọbọhk ambina osenga kw'iwu ittaan, amfona k'ibyi s'anạngn'nárukha, ọfha anta amfọhnọ nja annạng Ọvaar Ubinọkpaabyi, kw'ode Ubinọkpaabyi kwamạna, deja m'ọnạngẹ mạna ikhạmana k'ukhira-k'ukhira, oyongu ma, m'ọbạra utima ọkkangkkang-kkro ọfhọ mạna.”
4Okhenka, ọvaarnạng kw'Ijip n'ọbạbhọ Mosẹs ọttạra Aarọn bẹ́, “Ode yạn kw'abạnga awọhkhọ anạng mbọ akuma ọtọhm fabẹ sisi o? Abạnga akpa nnạm k'itọhm sabạnga ẹbhạr-ẹbhạrẹ!” 5Ma wọ Phero obeni bẹ́, “Akker o, anạng p'isek nna kk'asaabha aseng eden, bạra abạnga akkeri ma, akuma bẹ ọtọhm sisi.”
6Ma iwu njọ jạnẹ, Phero ọnạngẹ akker-atọhmnạng, ọttạra akker-itọhm ẹfa, ọbẹ: 7Abạnga dạkhẹ anạng mbọ asạsaarẹ-bukhu p'abẹ n'atima abạnga ata kánạng, tte abẹma oyeni asenga mfhok ata aror asạsaarẹ-bukhu p'abẹ m'atima abạnga ata. 8Okhenka, abạnga asi bẹ abạnga ọta-bhik kw'abẹ atạm-ọtạma abạnga, kayekhi. Abẹ agọhbh-ọgọhbhọ e, ẹgwọ usi abẹ n'agạma bẹ, ‘Tte amfona, anta anfọhnọ ẹja annạng Ubinọkpaabyi kwamạna.’ 9Abạnga akhaankẹ asi ọtọhm mvọ apfẹ odo ọkpọhkh-ọkpọkhọ anạng ajunung mbọ, ọfha abẹ nạngẹ okpe akhaam kw'abẹ m'akhọhmọ itọhng k'idik-kpaakha ch'afhạra.”
10Ma o, akker-atọhmnạng ọttạra akker-itọhm p'Israẹl, afon ata akpaak anạng mbọ bẹ́, “Maa wọ ode udik kw'Phero ọkpaakhẹ: ‘Amma dạkhẹ bạnga asạsaarẹ p'abẹ n'atima abạnga ata mạ́nnạng. 11Asọhng ata aror asạsaarẹ p'abẹ n'atima abạnga ata k'ibyi s'abạnga m'aror, okhenka, ọtọhm fabạnga mesese móyekhi.’ ” 12Mạnna wọ anạng n'asenga akpaanga Ijip, n'aror asạsaarẹ-bukhu p'abẹ m'atima abạnga ata. 13Akker-atọhmnạng mbọ afon ororo n'annunu bẹ k'ẹfa, aben bẹ́, “Khiri kha, abạnga asi ọtọhm fabạnga f'iwu, oche kw'abạnga n'acheden asi k'okpe kw'abẹ n'anạng bạnga asạsaarẹ o.” 14Akker-atọhmnạng mbọ p'Phero otek, avạk akhebh-itọhm p'Israẹl avun nkwur, abạra abạbh bẹ bẹ́, “Ode yạn kw'ọta-bhik kw'abạnga abạngẹ chạnachẹ ọttạra chemma nạnúkpira k'ubhik kw'abạnga n'acheden abạnga?”
15Ma wọ akker-itọhm p'Israẹl, ata agạma akpẹkhẹ Phero, aben-ẹ bẹ́, “Attitte, ode yạn kw'n'asi atọhmnạng pọ oche ngwọ o? 16Abẹ atọhmnạng pọ asạsaarẹ-bukhu p'abẹ n'atima abạnga ata dạk kạnánạng. Okhenka, abẹ n'aben mạna bẹ́, ‘Abạnga abạnga ata!’ Abẹ n'avun atọhmnạng pọ nkwur, abhaang, ipyima ede ch'anạng pọ oyeni o.”
17Ma wọ, Phero ubhin bẹ bẹ́, “Agọhbhọdọ bọ e, abạnga agọhbhọ aseng eden! Akwẹma gwọ usi abạnga n'achona bẹ́, ‘Tte mạna ọbọhk anta amfọhnọ ẹja annạng Ọvaar Ubinọkpaabyi.’ 18Abạnga akpa nnạm k'ọtọhm. Abẹ dạkhẹ bạnga asạsaarẹ p'abẹ n'atima abạnga ata m'anạng, okhenka, oyonga abạnga m'abạnga ubhik f'ata, f'abạnga n'acheden abạnga.”
19Akker-itọhm p'Israẹl akwu atin bẹ́, abẹ n'aning k'ọmaphyaangẹ kwididen, sabẹ abeni bẹ́, “Abạnga nạngẹ ọta-bhik kw'iwu ayekhi o.” 20Masẹ abẹ abin arik Phero, abẹ ata akhebha Mosẹs ọttạra Aarọn sabẹ n'abe atik bẹ. 21Abẹ aben bẹ bẹ́, “Tte Ọvaar Ubinọkpaabyi ọkpaara iponga otor k'usisi kwabạnga. Abạnga kk'mạna asia ampyibh k'ititikha s'Phero ọttạra atọhmnạng pẹ, abạnga abạra age bẹ ọkkangkkang-kkro k'mbọhk bẹ, abẹ afhọ mạna.”
Ubinọkpaabyi ochekhi bẹ́, m'ọrạbha anạng p'Israẹl k'ibira
22Ma wọ, Mosẹs ọkpa nnạm k'Ọvaar Ubinọkpaabyi oben bẹ́, “O Aro, ukwuru yạn kw'age anạng pọ k'udik kw'obeng maa o? Ẹgwọ usi attọhm-m o? 23S'mbobe mkpaak Phero udik k'akhọ k'eche, kk'anạng mbama ugia k'irem, ọma anạng pọ oyeni kákke akkaana mesese.”
Currently Selected:
Nnwẹr s'Osenga 5: mfn-x-os
Highlight
Share
Copy
Want to have your highlights saved across all your devices? Sign up or sign in
©️2025 West Africa Christian Mission
