Yelemiya 46
46
Mbuli ya Zumbe Mulungu kwa Wamisii
1Inu nee mbuli Zumbe Mulungu amghambilayo Yelemia, kwa mbuli ya wantu wa mbali zoshe, 2kwa mbuli ya Misii na waghojo woshe wa Neko zumbe wa Misii, watoanawo na Nebukadineza zumbe wa Babeli, wakadahighwa uko Kalikemishi kwe mto Eufulate, mwe vui ja ne ja ugholokezi wa Yehoyakimu ng'wana wa Yosia zumbe wa Yuda.
3“Wagholokezi wa waghojo wa Misii watabiikila kuti,
‘Ighanyai ngao zenyu nkulu na ndodo,
mulawe mukatoane nkondo!
4Ighanyai faashi zenyu na muzikwee,
kia mntu neaikale hantu hakwe na muzwike nkofia za chuma.
Noai maguha yenyu!
Zwikai shuke zenyu za chuma!’”
5Zumbe Mulungu atauza, “Ni mbwai ivi nivyeona?”
“Niona wazagewa wogha, watauya mghongo.
Waghojo wawe wekidaha wazatoighwa,
wataghuuka kwa wogha,
hewawelela mghongo.
6Wantu wedaha kughuuka wazahewa kughuuka,
waghojo hewadaha kusupuuka.
Uko wazu wa kasikazini hehi na mto Eufulate,
watakitoa na kugwa.
7Ni ndai uyo mwekiiva sa mto Nile,
mto wemema mazi yakaingila kwe vidau?
8Ni shi ya Misii yekiiva sa mto Nile umemilewo mazi yakaingila kwe vidau,
sa mto wena makumbo ya mazi.
Misii yaaghamba, ‘Nenimeme na kughubika ngulu ngima,
neniibane mizi na wantu wakwe.
9Kihimei kughuuka inywi faashi
na magai ya nkondo yaite nguzunguzu.
Kihimei inywi waghojo mwekidaha,
inywi wantu wa Esiopia na Libia mutozizewo ngao,
inywi wantu wa Lidia mwedaha kutoa maosa.’ ”
10Uwo mshi, ni mshi wa Zumbe Mulungu mwena nguvu zoshe,
ni mshi wa kuihiiza nkuu,
mshi wa kuwatoa wankuu wakwe.
Uhamba neuwakome woshe mpaka wiighute,
neuvate mpome zawe mpaka ushishiwe.
Kwa kuti Zumbe Mulungu mwena nguvu zoshe atalavya ntogoo
wazu wa kasikazini kwe mto Eufulate.
11Kweai Gileadi inywi wantu wa Misii
mukaonde mizighi!
Muzanywa mizighi mingi miya hemuhonie,
kwa kuti hekuna umihonyizewo.
12Mbali zoshe zizaiva mugeighwevyo shoni,
kiio chenyu chizabula kia hantu.
Waghojo wenyu watatoana vikumbo wenye kwa wenye,
woshe wazagwa.
Zumbe Nebukadineza ataitoa shi ya Misii
13Nebukadineza zumbe wa Babeli ahezaita kweitoa shi ya Misii, Zumbe Mulungu aamghamba Yelemia,
14“Biikia mwe shi ya Misii,
biikia uko Migidoli na Memufisi na uko Tahipanesi,
‘Waghambile wakiighanye,
kwa kuti nkondo neiwakome woshe we hehi na iwe!
15Kwai waghojo wako wekidaha wazaghuuka? Kwai mulungu wako Apisi nkadaha kumiambiza?
Nkadaha kugholoka kwa kuti, imi Zumbe Mulungu nizamkinya!’
16Waghojo wenyu wazakitoa na kugwa,
kia mng'we atamghamba nyiae,
‘Kihime tiuye kaya kwa wandughu weshu,
tinyiike mata ya mnkuu!’ ”
17“Mnkei zumbe wa Misii zina hya,
‘Mtua vuzo mweaza muda.’
18Imi Zumbe Mulungu nena nguvu zoshe, ni miyo zumbe.
Ni miyo Zumbe Mulungu nemoyo.
Sa kitui Taboli chiivyo kitai kuzinka vyoshe
na sa kitui cha Kalimeli chivyeonekea kulawa kwe bahai,
nee ndivyo ziituke nguvu za mweiza kwemitoa.
19Inywi wantu woshe mweikala Misii,
kiighanyei kuita kwe shi ya utung'wa!
Mzi wa Memufisi neubanighwe vigima,
neughaluke mahuzu yashiikalwayo ni wantu.
20Misii ni sa kadama kamoi kaginieko,
miya nekaung'we ni nguha kulawa wazu wa kasikazini.
21Hata waghojo wakwe aombezewo,
hewana uwambizi wowoshe, ni sa vidama viginievyo.
Hewadaha kutoana nkondo,
woshe wazahituka na kughuuka.
Mushi wawe wa kutoighwa uzabula,
muda wawe wa kukong'wa uzabula.
22Waghojo wa Misii watanyiika kwa kusuumuka sa nyoka yeghuuka,
haja wankuu wawe wakiwaizila kwa nguvu,
newawatoe na machoka sa vinga ni wantu weita kwekinya miti.
23Newawashenge wantu wa Misii sa miti,
kwa kuti waghojo wawe ni wangi washitaikawo,
ni wangi sa mpasi.
24Wantu wa Misii newagewe shoni,
newagwiwe ni wantu wa kasikazini.”
Ni miyo Zumbe Mulungu nilongiewo.
25Zumbe Mulungu mwena nguvu zoshe, Mulungu wa Izilaeli aghamba ivi, “Imi nenimtoe Amoni mulungu yevikwa ni wantu wa Sebesi, hang'we na mulungu yoshe ya Misii na wazumbe wakwe. Nenimtoe zumbe wa Misii hang'we na woshe wemualila. 26Neniwaeke wagwiwe ni Nebukadineza zumbe wa Babeli na waghojo wakwe wekunda kuwakoma. Vikibinda, shi ya Misii neiikawe vingi ni wantu sa aho boosi.” Ni miyo Zumbe Mulungu nilongiewo.
Zumbe Mulungu neawavunile wantu wakwe
27“Musheogohe inywi watung'wa wangu wavyawa wa Yakobo,
usheangwe ni moyo iwe Izilaeli.
Kweli nemiuze kaya kulawa shi hale,
neniwauze wavyawa wako kulawa kwe shi ya ugheni.
Nemuuye muikale kwa mpolele,
na hekuna ndiye amigee wogha.
28Imi ni hang'we na iwe nikuvunie.
Hang'we na kuti mbali zosheni nenizikome,
uko kwawe nikuasakanyiizeko,
miya inywi senimikome.
Nenimilahe kwa mbuli ya uhuza mughosholewo,
senimieke bia kumilaha.”
Ni miyo Zumbe Mulungu nilongiewo.
Currently Selected:
Yelemiya 46: SHBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
