Matt 9
9
temeḥliwt n umeclul
1wembeƹd yuli yesuwƹ af leflukeṯ yeqdeƹ iylel yeḏwel al lḥumtis. 2yaxy usend midden uγend meclul yezzel. mniyn yezra yesuwƹ liymanesen, yuwa y umeclul: «witteggec ay memmi. rahiy ttweγferen ibekkaḍniḵ.» 3uwan lbeƹḍ n lliy seḥfeḍen g cceriyƹeṯ y imanesen: «rahiy yeṯƹedda af rebbiy.» 4yefhem yesuwƹ lliy txemmemmen diyes, ysestnin: «maγer ulawnewem txemmemmen g ccer? 5mantan yezhel iṭer immal ttweγfereneḵ ibekkaḍniḵ naγ immal n kker yyur? 6lekenti uwiγ ayuh bac asnem lliy tqudduγ neči lliy yeḏwel d bnaḏem aγfreγ bekkeḍu g tammurt.» lweqt ḏḏin, yuwa y umeclul: «kker qam tesuytiḵ truḥeḏ al lḥuciḵ.» 7yekker, iruweḥ al lḥucis. 8mniyn zren midden aydin, fehhen aḏ mejden rebbiy lliy yuca y bnaḏem am ayuh n uquddu.
yesuwƹ yesγuyu af metta
9iƹedda yesuwƹ tman mkan n ulayem n ḍḍereyeb, yezra yjen seg indin lliy tlayemen g ḍḍereyeb, ismis metta ygaƹmez dinet. yaxy yuwayas: «ḏbeƹiḏ.» yekker yeḏbeƹi. 10mniyn yusi yesuwƹ yenneḍ af ṭṭewleṯ netta aḏ midden gi tzaqqa n metta, usend ggeṯ seg indin lliy tlayemen ḍḍereyeb aḏ lliy wiḥlin nnaḍḍen yid yesuwƹ aḏ tlamḏes af ṭṭewleṯ bac ačan. 11zren iferysiyyen aydin, uwan y tlamḏes: «maγer itet lmuƹelmewem yid indin lliy tlayemen g ḍḍereyeb, aḏ wiḥlin.» 12yesla yesuwƹ dwiysen, yuwa: «muc lliy wuḍinenc xsen ḍbib amma lliy uḍennen. 13berreṯ ḥfdeṯ lmeƹna n dwiy n rebbiy: < rahiy neči xseγ rreḥmeṯ muc lweƹdeṯ. > neči widdusixc bac aṣelḥeγ lliy tḥasben imanesen d ṣbiḥen, amma usiγd bac aṣelḥeγ lliy sennen imanesen γalṭin.»
dwiy af uzum
14wembeƹd yyuren tlamḏ n yaḥya al yesuwƹ sestunen diyes: «maγer witẓwumenc tlamḏeḵ aḏ neccin aḏ iferysiyyen netẓwumu.» 15yuwayasen yesuwƹ
«ẓeƹma lliy g temeγra tẓwumen madam laƹrus jaresen? lekenti tadesen ussan aydel disen laƹrus yemqam seg jaresen lweqt ḏḏin taẓwumen.
16ḥetta d yjen wiyetreqqeƹ ḥaja teqdimt s lqmac jdiḏ afelxaḍert truqƹet tejdit tatenzeγ qdim we ayeḏwel burriƹ d meqqar iṭer.
17midden witeggenc crab jdiḏ g lmezweḏ d qdim afelxaḍert ttegeḏen ayekkeṣ lmezweḏ we ayefseḏ aḏ aywezzeƹ crab. lekenti tteggen crab jdiḏ g lmezweḏ jdiḏ bac asteḥfden af crab aḏ lmezweḏ jmiyƹ.»
yesuwƹ yesseder yellis n yjen seg imeqqaren
18mniyn netta yemmal g ayuh n dwiy, yusesd meqqar n lmjameƹ yesjeḏ zzeṯis yuwa: 19«yelli turuh temmuṯ, amma sed agg felles fusiḵ adj atekker.» yekker yesuwƹ yeḏbeƹƹi aḏ yiḏes tlamḏes.
temeḥliwt n lliy iḏemnis ttezelen
20diyes temeṭṭuṯ γares 12 d isuggasen iḏemnis tezzalen. tusesd al yesuwƹ teṭṭef g temma n rdis s deffer, 21afelxaḍert tuwa y imanis: «lukan aṭfeγ ḥetta g temma n rdis aḥliγ.» 22yaxy yenneḍ yesuwƹ yezriṯ, yuwa: «ay yelli, witteggec. rahiy liymanim yseḥlayem.» teḥla temeṭṭuṯ seg lweqt ḏḏin. 23mniyn yuḏef yesuwƹ al tezeqqa n umeqqar n lmjemeƹ aḏ yezra lliy čeṯen g tcebbebt aḏ lliy sgujduren. 24yuwa: «rewḥeṯ. rahiy tefruxt wittemmuṯc lekenti teṭṭes.» ṣṣen felles. 25ysefγ midden aḏ yuḏef yeṭṭef tefruxt seg fusis tekker. 26aḏ slen s ayuh midden lkul g aydin n lblad.
yesuwƹ yesseḥla sen ileƹmayen
27mniyn yesuwƹ yekker tayreweḥ s yin ḏbeƹƹent sen ileƹmayen tṣeyḥen mmalen: «reḥmaneγ ay memmis n dawud.» 28ḏbeƹent ḥetta mniyn yuḏef al lḥuc. yaxy ysestnin: «tetemnem lliy neči tqudduγ aggeγ ayuh?» uwanas: «ayya, ayya siydneγ.» 29yeggi ifesnis af ṭiṭewinesen yuwa: «tafenyuc rebbiy af lḥsab n liymanuwem.» 30yaxy mirneṯ ṭiṭewinesen. aḏ yesuwƹ yuwayasen: «rreṯ lbaluwem ammelem y ḥed.» 31lekenti reḥḥen uwan y midden lkul g aydin n lblad.
bekkuc lliy yufley
32mniyn seddiγ ffeγen yen n sen, uγennesd midden bekkuc yeskenni cciyḍan. 33yesuwƹ izeƹzeq cciyḍan yuflay bekkuc. yaxy fehhen midden uwan: «ƹemris winezri am ayuh xlaṣ g israyil.» 34amma iferysiyyen uwan: «rahiy netta yezzeƹzeq g cyaḍen s rreys n cyaḍen.»
ṣṣabeṯ temeqqart aḏ ixeddamen d fercu
35yesuwƹ iṭenneḍ g itmurewin aḏ lḥumaṯ lkul. yesseḥfaḍ g lmjameƹ n wuḏeyen aḏ yetbeccer s lmelekuwt aḏ yesseḥla g midden seg ṭṭan lkul. 36yezra midden yesxef fellesen afelxaḍert wsiyn weddren tumexujen am tulli lliy widdic mam aysefreḏ sisneṯ. 37lweqt ḏḏin yuwa y tlamḏes: «diyes midden ggeṯ sugumen mam ateniwi al lmelekuwt n ujenna am ṣṣabeṯ n timzin lliy tejra y tmira γiyr widdic mam atetilayem. 38ḍlbeṯ s rebbiy asenyenkiy lliy lhan sisen we asensiḵnen abriyḏ n lmelekuwt n ujenna.»
Currently Selected:
Matt 9: IGJ
Highlight
Copy
Compare
Share
Want to have your highlights saved across all your devices? Sign up or sign in
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).