Matt 8
8
yesuwƹ yesseḥla lliy yejdem
1mniyn yezwa seg jbel ḏbeƹƹent ggeṯ d midden. 2yaxy argaz yejdem yusesd. yesjeḏḏas. yuwayas: «ayya siydneγ kan cek texseḏ rahiy tetqudduḏ ltseḥliḏ we altmukkeseḏ njestiw.» 3yaxy yezzel fusis, yeṭṭef diyes, yuwa: «ih xseγ, turuh aḥliḏ.» ƹlewleh imukes ljdam n wargaz. 4aḏ yuwayas yesuwƹ: «arr lbaliḵ wimmal y ḥed, amma barra bac afizer lkahen we ayecheḏ, aḏ uc lweƹdeṯ lliy yuwa felles muwsa bac asennen midden lliy cek teḥliḏ.»
seḥli n xdim n lqayed n 100
5mniyn yuḏef yesuwƹ al tmura n kefrnaḥuwm, yusesd yjen d lqayed n 100 g ljiyc n ruwma yetjeheyas. 6yemmal: «ayya siydneγ rahiy xdimiw yemcul aḏ yuγa mkanis g tzaqqa, aḏ γares ggeṯ d aγenna.»
7yaxy yuwayas yesuwƹ: «tareḥeγ atseḥliγ.»
8yerras lqayed n 100: «ayya siydneγ neči wistehlexc bac aḏeḏfeḏ al tzaqqaw. amma mmel tuflayt akehaw bac ayeḥla xdimiw. 9neči γari mam iḥekkem diyi, aḏ γari zada irgazen ḥekmeγ disen, lemmi mleγ y yjen sisen: < barra. > ayreḥ, naγ y ttani: < sed. > adyas. aḏ y xdimiw: < agg ayuh. > ayeg.»
10mniyn yesla yesuwƹ aydin yeṯƹejjeb aḏ yuwa y lliy debƹen diyes: «lḥeq afenemleγ: wiḏḏufixc ḥetta d yjen seg israyil yesteƹqeḏ diyi am ayuh n argaz.» 11aḏ zada afenemleγ: «ggeṯ d midden iberiyen tadesen s mcerreq aḏ mγerreb we afraḥen yid ibrahiym aḏ isḥaq aḏ yeƹquwb g lmelekuwt n ujenna. 12amma israyiliyen lliy yusi γaresen lḥeq aḏeḏfen al lmelekuwt tamlewḥen gi tellest n barra mani taƹeyyeden we aγezzen cwerbesen s uγenna.»
13yuwa yesuwƹ y lqayed n 100: «barra. rahiy rebbiy tafyuc lliy teḍlebaḏ afelxaḍert tumeneḏ.» aḏ g lweqt ḏḏin, yeḥla xdimis.
temeḥliwt n tensibt n buṭrus
14aḏ ireḥ yesuwƹ al lḥuc n buṭrus, yufa tensibtis tezzel g umkanis γares lḥmu. 15yaxy yeṭṭef g fusis, ireḥ lḥmu fellas, tekker teteggasen matta xsen.
16ina n tfuyt, uγennesd midden ggeṯ seg indin lliy ttwesknen s cyaḍen. aḏ yusi yezzeƹzeq g cyaḍen s tuflayt, aḏ yseḥla imuḍan lkul 17amyuh yentem lliy yuwa felles seg almiy nnabiy icƹeya:
«netta iƹana
aḏ yuḍen g umkanenneγ.»
ssum n weḏbaƹ n yesuwƹ
18mniyn yezra yesuwƹ midden amleymen tmas yuwa y tlamḏes aqedƹen iylel al lḥacit ttani. 19yaxy yeqrebbesd yjen seg lliy seḥfeḍen g cceriyƹeṯ yuwayas: «ayya lmuƹellem, tareḥeγ iḏeḵ mani tareḥeḏ.»
20yaxy yerras yesuwƹ: «ṯƹaleb γarsen iburriƹen, aḏ iciwciwen lliy g ujenna γarsen nguwen amma neči lliy yeḏwel d bnaḏem wiγric mkan aseḏkiγ al γares ixfiw.»
21aḏ yuwayas yjen iḍen seg tlamḏes: «ayya siydneγ djiḏ areḥeγ saƹa anebleγ baba.»
22yaxy yerras yesuwƹ: «yya iḏiy tedjeḏ lliy mmuṯen aneblen lliy mmuṯnasen.»
yesuwƹ yesserkaḥ g aḍu
23wembeƹd yuli al leflukeṯ, aḏ ḏbeƹƹent tlamḏes. 24yaxy yekkerred aḍu d meqqar g iylel almiy ḥeḍerbac tenbelen aman lflukeṯ.
aḏ yusi netta yeṭṭes. 25reḥnas tlamḏes fiseƹ ssekkeren diyes mmalen: «ayya siydneγ semmenƹaneγ rahiy tanemmeṯ.» 26yaxy yuwayasen: «maγer tugeḏḏem? ayya lliy liymanuwem ḍƹiyf.» wembeƹd yekker yezher af aḍu aḏ iylel. yaxy yersa aḍu. 27yaxy ṯƹejben midden uwan: «zeƹma d mam wuhnit bac asyeγ rrey aḍu aḏ iylel?»
zeƹzeq n cyaḍen aḏ aγreq n iḥellufen
28mniyn yuṣel yesuwƹ al lḥacit ttani g lḥumeṯ n ijedriyen laqent sen irgazen skenenten cyaḍen aḏ nihnin ffaγen seg amas n leqbur, aḏ nihnin d iweƹƹeren ggeṯ, aḏ ḥetta d yjen wiyetquddu ayƹedda seg aydin n abriyḏ. 29aḏ fiseƹ ṣeyḥen: «matta texseḏ s γarneγ ay memmis n rebbiy? yaxy tusid al dehnit qebbel lweqt bac aγenteƹeḏbeḏ?»
30aḏ tusi tereslit n iḥellufen tferreḏ tmasen. 31yaxy uwan cyaḍen y yesuwƹ: «kan texseḏ aγenetzeƹzqeḏ, nekyaneγ al ayuh n treslit n iḥellufen.» 32yuwayasen: «berreṯ.» ffaγen aḏ ḥewlen al treslit n iḥellufen. yaxy uzellen iḥellufen fiseƹ aḏ udan s nnaj jbel g iylel aγreqqen diyes.
33aḏ rwellen lliy sefreḏen s iḥellufen al tmura aḏ uwan af mag iṣar lkul y lliy ttwesknen. 34yaxy feγend midden n tmura bac aleqan yesuwƹ. mniyn zrent uwanas ayeffeγ s γarsen.
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).