Gōsə̄ najə̄ gə̄ 1
1
Yá̰á̰ ń ndangən̄ makətūbə̄ ń toō najə̄n tə́ ní
1I gōsə̄ najə̄ gə̄ yā Salomo̰ kə́ ngōn̄ Dabid, mban̄g kə́ *Israel tə́,
2yā kadə̄ kum deē edə̄ń ō, deē ngáań ō, gerə̄ń kum najə̄ kə́ kun gidə kə̄ gogə́ gə̄ ō, 3kadə̄ deē əngeń yá̰á̰ ndóō kə́ ngáā, adə̄ i háĺ kə́ gōtə́ ō, yá̰á̰ kə́ gōtə́ ō, yá̰á̰ kə́ súmūú ō, 4kadə̄ ɔjənə̄ń de gə̄ kə́ kumdə́ gān̄g aĺ gə̄ loo gōn̄g yá̰a̰ ō, kadə̄ balsáa gə̄ kə mandə gə̄ gerə̄nneé yá̰a̰ ō, əndān̄neé ma̰ȳ yá̰a̰ ō. 5Nge kum kedə̄ oō anī ənī kum kedə̄ yān dɔ madə̄ tə́ ō, de kə́ nge ger̄ kum najə̄ oō anī a rāā yá̰a̰ kə gosə̄neé njə̄rā kadə̄ gōtə́ ō. 6I kadə̄ deē gerə̄ń kum gōsə̄ najə̄ gə̄ ō, kum najə̄ kə́ to loo ɓɔ̄ɔ̄ tə́ gə̄ ō, kadə̄ deē gerə̄ń kum najə̄ kɔr̄ ngé kum kedə̄ gə̄ ō, kum səngó yādə́ gə̄ ō.
7Ɓōĺ ndíĺ Kɔ́ɔ̄ɓē i ta kəla gír ger̄ yá̰a̰. I de kə́ ngáā aĺ gə̄ n a rāān̄ yá̰á̰ ndóō ō, kum kedə̄ ō mbóó tə́ ní.
Tāā kə́ dɔ ngáń kə́ nujə kɔ̄ɔ́ gə̄ tə́
8Ngōnə̄ḿ, ōō yá̰á̰ ń bɔbí ɔjiī ní ō, ī-lōō mbātə́ kɔjə̄ yā kó̰ó̰í ō. 9Tɔdɔ̄ nge ń noō i *jākā mbang kə́ majə kə́ dɔí tə́ ō, i məde kə́ kɔ́ɔ́í tə́ ō. 10Ngōnə̄ḿ, ré ngáń kə́ nujə kɔ̄ɔ́ gə̄ sāān̄ kadə̄ āw̄ loo sedə́ anī ī-mbātə́ kɔ̄ɔ́! 11Ngáń kə́ beé gə̄ a ə́daīn̄ na kə āw̄ sedə́, kə ī-gāngī de gə̄ róbó, kə ī-tɔ̄līdə́, ká i de gə̄ kə́ najə̄ gətóo dɔdə́ tə́ gə̄gē anī, kə ī-teēī sedə́ rétə́ gēé kə ə́hɔīdə́ dɔ jīdə́ tə́ kanjə̄ kumən, anī ī-mbātə́ kɔ̄ɔ́! 12Ká ré na ā ī-túrīdə́ kə kumdə́ tītə̄ ń loo kə́ ɓádá a rāań ní, na ā ī-túrīdə́ na i kə taá taá tītə̄ ngé gə̄ ń əlan̄də́ kə̄ bāá ní, 13na ā ə́ngeī yá̰a̰ kənge gə̄ kə́ gātə̄də́ i ngá̰ý gə̄ kə́ tayā tayā gə̄, na ā ɔ́yiī yá̰a̰ kadə̄ na a rosə kem kújə yāsí gə̄, 14kə āw̄ sedə́ na ā ə́ngé núsən yāí, tɔdɔ̄ ā ī-ɓōkíī nar na i dɔ naā tə́ loo kógə̄ḿ kem ngong nar kə́ kógə̄ḿ beē tə́ gə̄gē! 15Anī ngōnə̄ḿ, ī-lōō kaw̄ sedə́, ī-tūr̄ ta njaí kɔ̄ɔ́ dɔ róbə́ ń nin̄ i tū tə́ ní tə́. 16Tɔdɔ̄ nin̄ a̰ȳn̄ ngɔ̄də̄ a aw̄n̄ i kə̄ rāā yá̰á̰ kə́ majaĺ tə́, nin̄ nāgə́n̄ i yā ɓōkə́ mósə deē nang tə́. 17Dan ń yel̄ a̰a̰ nge ndo̰ kɔ̄ɔ́ ɓá ní, nge ndo̰ a əyā gūmbə̄ i ndāńg. 18Banī nin̄ əyān̄ gūmbə̄ i yā kəhɔń rɔ̄də́ nin̄ kɔ́ gə̄ ō, koō naā yādə́ kə́ jəke loo mundə̄ tə́ a tél yā kəsō i dɔdə́ nin̄ kɔ́ gə̄ tə́ ō. 19Tām̄ ta tɔ̄l̄ ta ngé ɓogə gə̄ a to i tītə̄ ń noō: Ngé ɓogə gə̄ a oyn̄ i yo ɓogə.
Kum kedə̄ ɓāŕ deē ō tāān ō
20Kum kedə̄ ɔr̄ najə̄ róbə kɔsɔɔ́, un ndūn kə̄ dɔɔ́ dɔ loo gə̄ kə́ kem ɓēé tə́. 21Ni un ndūn kə̄ dɔɔ́ adə̄ mān̄ dɔ ndū kósə de kə́ ngá̰ý gə̄ ɓāŕəń yá̰a̰, ni-ɔr̄ najə̄ yān ta róbə gə̄ kə́ yā kudəń kə̄ kem ɓēé tə́ əda na: 22Sḭḭ̄ de kə́ kum gān̄g aĺ gə̄, a nel̄sí kə kum gān̄g aĺ yāsí i bátə́ ta kə́ rá? Ngé lur loo gə̄ a nel̄də́ lur loo i bátə́ ta kə́ rá ō, de kə́ mbóo gə̄ a mbātə́n̄ yá̰a̰ ger̄ i bátə́ ta kə́ rá ō? 23Ōōī gír kə́ kemḿ tə́. Á̰a̰ī, m-ā m̄-rāā kadə̄ ndílə́ḿ a risə dɔsí tə́, m-ā m-ə́dásí najə̄ yāḿ kadə̄ ī-gerī. 24Banī m̄-ɓāŕsí anī ī-mbātíī ɓār̄ yāḿ ō, m-ə́la jīḿ kə̄ rɔ̄sí tə́ anī de kə́ usən dɔ tə́ gətóo ō, 25ī-mbātíī kɔjə̄ yāḿ gə̄ malang ō, usəsí dɔ tāā ń m̄-tāāsí ní tə́ aĺ ō. 26Beé ɓáa ndɔ̄ ń yá̰á̰ kə́ to kum kaȳ aĺ a teē dɔsí tə́ ní ta i yāḿ mā kadə̄ m-ā m-ə̄gɔ̄sí tā. Dan ń ɓōĺ a rāāsí anī m-ā m̄-mbóo sesí. 27Tɔdɔ̄ ndɔ̄ kógə̄ḿ tə́ yá̰á̰ kə́ to kum kaȳ aĺ a teē dɔsí tə́ tītə̄ nél man̄ kə́ əla kə tɔ́gɔ́ beē ō, ɓōĺ a rāāsí tītə̄ kə́ sḭḭ̄ i kum nél balway tə́ beé ō, sōl̄ ō, wur kɔl ō, a taān̄ tɔ́gə́sí kɔ̄ɔ́. 28Loo ń noō tə́ nin̄ a ɓāŕmə̄n̄, banī m-ā m̄-ndigədə́ aĺ ō, nin̄ a sāāmə̄n̄, banī a əngemə̄n̄ aĺ ō. 29Tɔdɔ̄ nin̄ mbātə́n̄ ger̄ yá̰a̰ ō, gə̄rān̄ kadə̄ kə n-ɓōlən̄ ndíĺ Kɔ́ɔ̄ɓē aĺ ō. 30Dan ń nin̄ gḛyn̄ kɔjə̄ yāḿ gə̄ aĺ ō, kídə̄n̄ tāā yāḿ gə̄ malang ō ɓá ní, 31i beé ní, háĺdə́ a ənī najə̄ dɔdə́ tə́ ō, gír̄ kə́ majaĺ kə́ kemdə́ nin̄ kɔ́ gə̄ tə́ a ndān̄də́ kə́ kəsa tə́ ō. 32Tɔdɔ̄ i mbātə́ kum kedə̄ n tɔ̄l̄ de kə́ mbóo ō, i kusə kə́ usən dɔ yá̰á̰ tə́ aĺ n ta de kə́ kur dɔn gətóo tḭ̄ḭ̄iń ō ní. 33Banī deē ń oō najə̄ yāḿ ní a ndi kanjə̄ sōl̄ yá̰á̰ kógə̄ḿ, a ndi jəke kanjə̄ sōl̄ yá̰á̰ kə́ to kum kaȳ aĺ.
Currently Selected:
Gōsə̄ najə̄ gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad