Gōsə̄ najə̄ gə̄ 2
2
Kum kedə̄ ngɔ̄m̄ deē ta yá̰á̰ kə́ majaĺ tə́
1Ngōnə̄ḿ, ré ī-ndigə najə̄ kɔrə̄ḿ ō,
ré yá̰a̰ gə̄ ń m̄-ə́daī kadə̄ ī-rāā ní
ton̄ i tītə̄ yá̰a̰ ɓɔ̄ɔ̄ kə́ gātən̄ i ngá̰ý beē ta kumií tə́ ō,
2ré ī-nēl̄ mbīí majə ōoń yá̰á̰ ndóō gə̄ yā kum kedə̄ ō,
ī-sāā kum ī-ger̄ ō,
3rɔ̄kum, ré ī-ɓāŕ ger̄ kum najə̄ kadə̄ rāā seí ō,
ré ī-ɓāŕ kəndā ma̰ȳ yá̰a̰ kadə̄ dḭḭ̄ ō,
4ré ī-sāān i tītə̄ loo sāā nar beé ō,
ré ɔ̄rən i tītə̄ loo kɔr̄ yá̰á̰ kə́ gātə̄n i ngá̰ý beē gíŕ nángāá ō,
5anī ā ī-ger̄ loo ɓōĺ ndíĺ Kɔ́ɔ̄ɓē ō,
ā ī-ger̄ Nə́ɓā ō.
6Tɔdɔ̄ i Kɔ́ɔ̄ɓē n i nge kadə̄ deē kum kedə̄ ní.
Yá̰a̰ ger̄ ō, ger̄ kum najə̄ ō, a teēn̄ i tan ni tə́.
7Ni i nge rāā kadə̄ kəla rāā de kə́ súmūú gə̄ teē majə.
Ni to i tītə̄ der beé tām̄ yā nge rāā háĺ kə́ gōtə́ tə́.
8Ni i nge ngɔ̄m̄ gō róbə gə̄ kə́ súmūú ō,
nge kəndā kumən gō hál deē yān gə̄ kə́ ngé ran̄ dɔ ndūdə́ tə́ ō.
9Loo ń noō tə́ ā ī-ger̄ yá̰á̰ kə́ gōtə́ ō,
yá̰á̰ kə́ kə gō róbəneé ō, yá̰á̰ kə́ súmūú ō,
adə̄ i yá̰a̰ malang ń a rāā tá deē a ndi kə rɔ̄nelēé ní.
10Loo ń noō tə́ kum kedə̄ a udə kemií tə́ ō,
ger̄ yá̰a̰ a adī rɔ̄nel̄ ō,
11kəndā ma̰ȳ yá̰a̰ a ngɔ̄mī ta yá̰á̰ kə́ majaĺ tə́ ō,
ger̄ yá̰a̰ a a̰a̰ gōí majə ō.
12Yá̰a̰ gə̄ ń noō a ɔgə̄nī rāā yá̰á̰ kə́ majaĺ ō,
a ɔr̄nī kɔ̄ɔ́ jī ngé kɔr̄ najə̄ kə́ rɔ̄kum aĺ gə̄ tə́ ō,
13jī ngé kəya̰ róbə́ kə́ súmūú kɔ̄ɔ́
ba kunəń róbə́ kə́ súmūú aĺ gə̄ tə́ ō.
14Nin̄ ń nel̄də́ rāā yá̰á̰ kə́ majaĺ ō,
nin̄ rāān̄ walya dɔ yá̰a̰ rāādə́ kə́ kə kem nduluú tə́ ō ní.
15Háĺdə́ nujə kɔ̄ɔ́ ō,
gō róbə yādə́ gə̄ i kə́ rúgə̄ gə̄ ō,
16i beé n ā ī-teēń kɔ̄ɔ́ jī kaya dəyá̰ tə́ ní,
jī nə̄yá̰ de kə́ najə̄ gól̄ loo kə́ tan tə́ nel̄ ngá̰ý tə́ ní.
17Ni əya̰ ngaa mandən kɔ̄ɔ́ ō,
dɔn ndígə̄nal dɔ *madə̄ naā yā Nə́ɓā yān tə́ kɔ̄ɔ́ ō.
18A̰á̰ā̰, kújə yān a aw̄ i kə̄ kəsōó kum kə̄ dām̄ yā yo tə́ ō,
hálən kə́ majaĺ gə̄ a aw̄n̄ seneé i kə̄ loo ń ndíl ngé koy gə̄ i tū tə́ ní tə́ ō.
19Deē ń aw̄ ɓēé looneé ní a tél aĺ ō,
a ɔtə̄ dɔ róbə ndi kə kumuú tə́ aĺ ō.
20Adə̄ ī-gə̄rā hál de kə́ ngé rāā yá̰á̰ kə́ majə gə̄ ún ō,
ī-ndájə̄ yá̰a̰ rāā de kə́ gōtə́ gə̄ ō.
21De kə́ súmūú gə̄ a ndin̄ dɔ nang tə́ ō,
de kə́ najə̄ gətóo dɔdə́ tə́ gə̄ a ndin̄ tū tə́ ō.
22Banī a ɔrə̄n̄ ngé kem ndul gə̄ kɔ̄ɔ́
dan deē madə̄də́ gə̄ tə́ dɔ nang tə́ ō,
a ró̰ȳn̄ de kə́ sew aĺ gə̄ kɔ̄ɔ́ dɔ nang tə́ ō.
Currently Selected:
Gōsə̄ najə̄ gə̄ 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad