Pā kə́ majə tɔȳ pā gə̄ 8
8
1m̄-sāā kadə̄ ḭ̄ i ngōkó̰ó̰ḿ kə́ dəngam,
kə́ íl mbaa kó̰ó̰ḿ!
Kadə̄ ré m-ə́ngeī ndágá anī m-ə́hɔī kə̄ rɔ̄ḿ tə́
kanjə̄ kadə̄ deē kídə̄m̄.
2M-ā m̄-ndɔ́rī yā kaw̄ seí kújú ɓē kó̰ó̰ḿ.
Ā ɔ́jəm̄ yá̰a̰.
M-ā m-ādī kasə *nduú kə́ rāā ítər tū tə́ kadə̄ ā̰ȳ ō,
m-ā m-ādī man̄ kan̄ gərenadə yāḿ gə̄ kadə̄ ā̰ȳ ō.
3Ni-taā gír dɔḿ kə jīn kə́ geleé ō,
kuú ɓōdə̄ḿ kə jīn kə́ ko̰ó̰ ō.
4Ngáń kə́ dəyá̰ kə́ Jerusalem gə̄, m̄-rāāsí ɓɔ́ kə ngangá ngá̰ý,
ī-lōōī ndól̄ Kó Tár yāḿ, ī-lōōī tūrə́n dɔ ɓīī tə́,
bátə́ kadə̄ ré i nəkɔ́ n ndigə tá.
(Ngáń kə́ dəyá̰ gə̄ ədan̄ na)
5Dəyá̰ ń ḭḭ dəla loo tə́
ba ndə̄nā rɔ̄n rɔ̄ kó tár yān tə́ a reē noó i náā?
Tɔ́gə́ tár
(Dəyá̰ əda na)
m̄-ndólī gír kāgə̄ jīm̄ tītə̄ tə́,
loo ń kó̰ó̰í ndānī tū tə́ ní tə́, loo ń dəyá̰ ń ojiī ní ndānī tū tə́ ní tə́.
6Ə̄ndām̄ dan wurií tə́ ō, dɔ jīí tə́ ō tītə̄ *tambō̰o̰ beé.
Tɔdɔ̄ tár i yá̰á̰ kə́ a ɔsə kə deé kə ngangá ngá̰ý tītə̄ yo ō,
nii i yá̰á̰ kə́ a rāā háĺ kə́ ngan̄g ngá̰ý kə deé tītə̄ loo kə́ ɓádá beē ō.
Nii i ta ndo̰ hor kə́ təngā ō,
a ndang deē tītə̄ man̄ beé ō.
7Man̄ kə́ bo ngá̰ý gə̄ asən̄ tɔ̄l̄ hor tár aĺ ō,
bā gə̄ asən̄ tíbə dɔn aĺ ō.
Ká ré deē ɔyń yá̰a̰ kənge yān kə́ kem kújú malang
adə̄ gíŕ tárá gə̄gē anī, a kídə̄nən̄.
(Ngákó̰o̰ dəyá̰ kə́ dəngam gə̄ ədan̄ na)
8Ngōkó̰ó̰jí kə́ dəyá̰ kə́ dūú i noó, mbaan gətóo.
Ndɔ̄ ń a ɔrə̄n̄ najə̄ yān tə́ ní j-a jə-rāā i ba̰ý seneé?
9Ré ni i ndogə̄ mbal̄ kə́ bo anī,
j-a jə-rāā loo kə́ yā ra gidə tə́ rɔ̄ɔń gə̄
dɔ tə́ kə gində̄ arjā̰a̰á̰.
Ré ni i ta róbə́ kə́ ra kə wōyōó anī,
j-a j-utə̄ ta kɔ̄ɔ́ kə kāgə̄ sédər kə́ laaá.
(Dəyá̰ əda na)
10Mā i ndogə̄ mbal̄ kə́ bo ō,
mbaaḿ gə̄ i kújə́ kə́ ngāl̄ ɓururu kə́ dɔ tə́ gə̄ ō rɔ̄kum a?
Loo ń noō tə́ m̄-to tītə̄ dəyá̰ kə́ ənge kem sɔl̄ beé ta kumən tə́.
(Dəngam əda na)
11Salomo̰ aw̄ kə ndɔr̄ *kāgə̄ nduú kógə̄ḿ Baal Hamon#8.11 Baal Hamon: I rī loo kógə̄ḿ kə́ deē ger̄ alé. Kə́ kə ta Hebəro kumən na i de kə́ aw̄ kə kósə de gēé..
Ni un ndɔr̄ ní adə̄ ngé kəndā kumdə́ gírí gə̄.
A adə̄də́ sélē arjā̰a̰ dūbú kə dɔdə́ gēé kógə̄ḿ kógə̄ḿ gír kanə̄n tə́.
12I mə̄kɔ́ n m-ā m̄-ngɔ̄m̄ ndɔr̄ kāgə̄ nduú yāḿ ní.
Ngé kə́ dūbú gə̄ i yāí ḭ̄ Salomo̰,
banī kə́ ɓú jōó gə̄ i yā ngé kəndā kumdə́ gír kanə̄n gə̄ tə́.
13Dəyá̰ kə́ ndi dan ndɔr̄ gə̄ tə́,
madə́ḿ gə̄ ran̄ a nēlə̄n̄ mbīdə́ yā koōń ndūí.
Ī-rāā ndūí ādə̄ m-ōō.
(Dəyá̰ əda na)
14Kó tár yāḿ, ā̰ȳ āw̄! Ba ī-to tītə̄ kāl̄ aláa tītə̄ ngōn̄ dul
dɔ mbal̄ gə̄ kə́ rāān̄ ítər tū tə́ tə́.
Currently Selected:
Pā kə́ majə tɔȳ pā gə̄ 8: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad