Pā kə́ majə tɔȳ pā gə̄ 7
7
(Dəyá̰ gə̄ ō, ngán kə́ dəyá̰ gə̄ ō, ədan̄ na)
1Dəyá̰ Sulamitə, ī-tél ī-reē, ī-tél ī-reē!
Ī-tél ī-reē, ī-tél ī-reē ādə̄ j-a̰a̰ majií!
Dəyá̰ Sulamitə ń udə dan ndām̄ kə́ de gə̄ ran̄ tū tə́ dām̄ jōó ní,
loo kadə̄ á̰a̰niī i ba̰ý?
(Dəngam əda na)
2Ngōn̄ kə́ dəyá̰ yā de kə́ bo,
njaí gə̄ majən̄ ngá̰ý kem sākə̄rāá!
Gírí to tītə̄ məde kə́ kɔdə̄ rāā kə jīneé beé.
3Gír kemií i bay kə́ to tītə̄ gájə nāā
kə́ kasə *nduú kə́ yá̰á̰ kə́ kotə majə i kum tə́ lōō kem aĺ beē!
Kemií to tītə̄ kōō gémē kə́ kán̄ dɔ naā tə́ ō,
kə́ hútə̄ ndə́já lis gə̄ gīrə̄n̄ gidə ō.
4Mbaaí gə̄ ton̄ tītə̄ ngán kāl̄ gə̄,
ton̄ tītə̄ ngán ndəngā gə̄ yā kó̰o̰ jal̄ beé.
5Míndí to tītə̄ kújə ngɔ̄m̄ dɔ ɓē kə́ rāā kə ngān̄g kedēé.
Kumií gə̄ i dang man̄ gə̄ kə́ i ngɔr kə ɓē kə́ Hesəbon,
kadə ta róbə́ ń a ɓārə́n̄ na i De gə̄ i ngá̰ý kemeé tə́ ní.
Kó̰ní to tītə̄ kújə kə́ ngāl ɓururu kə́ mbal̄ Liban tə́
kə́ ra a ngɔ̄m̄ loo kumən sɔɔ̄ ɓē kə́ Damas beé.
6Dɔí ndi ta míndí tə́ tītə̄ mbal̄ Karmel,
nənga kə́ tū tə́ kərē ning.
Nənga dɔí kə́ kuú əhɔ mban̄g kógə̄ḿ do̰ō̰n.
7Kó tár yāḿ, ngōn̄ kə́ dəyá̰ kə́ nelə̄m̄ seí ngá̰ý,
ī-mandə ngá̰ý ō, ī-to ro̰ ngá̰ý ō!
8Kāgə̄ rɔ̄í to tītə̄ kāgə̄ túmbur ō,
mbaaí gə̄ i dɔ bəra kanə̄n gə̄ kə́ tū tə́ ō.
9Adə̄ m-ə́da na: M-ā m-āl̄ dɔ kāgə̄ túmbur tə́,
m-ā m-ə́hɔ ta jīn gə̄ ń kanə̄n gə̄ i tū tə́ ní:
Ādə̄ mbaaí gə̄ ton̄ tītə̄ dɔ bəra kan̄ *kāgə̄ nduú gə̄ ō,
koō kə́ taí tə́ otə̄ majə tītə̄ kan̄ kāgə̄ póm gə̄ ō,
10nga ngaāí to tītə̄ kasə *nduú kə́ majə ō!
(Dəyá̰ əda na)
A̰á̰ā̰, kasə *nduú kə́ majə kə́ ngɔ̄m̄ tām̄ yā kó tár yāḿ tə́ ō,
kə́ a də̄yā̰ tají tə́ dan ń j-a jə-ɓīī ní ō.
11Mā i tām̄ yā kó tár yāḿ tə́ ō, ɓōḿ rāān ō.
Rɔ̄nel̄ yā de kə́ tárnən̄
(Dəyá̰ əda na)
12Kó tár yāḿ, ī-reē, j-aw̄ njə̄rāá bembeé,
j-aw̄ jə-ɓīī ngōn̄ ɓēé.
13J-a j-aw̄ kem ndɔr̄ *kāgə̄ nduú gə̄ tə́ kə gír looí ɓatə.
J-aw̄ j-a̰a̰ ké kāgə̄ nduú sitə ō,
ké ta júūmbún teē tan ō,
ké kāgə̄ gərenadə gə̄ hútə̄n̄ ō wa.
M-ā m-ɔ́jī tár yāḿ loo ń noō tə́.
14Sēē kan̄ mandəragor gə̄ otə mbo̰o̰.
Kan̄ yá̰á̰ kə́ nel̄ kə́ tayā tayā gə̄ malang
ton̄ ta róbə́ kújə yājí gə̄ tə́.
Kan̄ yá̰á̰ kə́ teē kijə gə̄ ō, kə́ jóo gə̄ ō ní,
kó tár yāḿ, m̄-ngɔ̄m̄də́ i tām̄ yāí tə́.
Currently Selected:
Pā kə́ majə tɔȳ pā gə̄ 7: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad