Makətūbə̄ kə́ ndang adə̄n̄ Hebəro gə̄ 2
2
Kajə kə́ bo ngá̰ý
1I tām̄ najə̄ ń toō tə́ n majə kadə̄ j-əhɔī gō najə̄ gə̄ ń j-oōī ní adə̄ ngan̄g tɔȳ kə́ kété ní, na sōgə́ jə-ndúmī ta róbə yā kadə tají tḭ̄ḭ̄. 2Tɔdɔ̄ ré najə̄ ń *de kə́ dɔ rā̰ tə́ gə̄ ədan̄ ní rāā yá̰á̰ rɔ̄kum, adə̄ ngé gə̄ ń mānə̄n̄ dɔ aláa mbatə́n̄ kun gō ní, əngen̄ ndéý ń asə kadə̄ əngen̄ ní anī, 3jḭḭ̄ ní, ré usəjí dɔ kajə kə́ bo ngá̰ý ń toō tə́ aĺ anī, j-a j-asiī teē karī ta ndéý tə́ i ba̰ý? Kajə ngeé ń toō, Kɔ́ɔ̄ɓē əla gír kɔr̄ najə̄ kə́ dɔ tə́ ō, ngé gə̄ ń oōn̄ ní ədan̄ kadə̄ i najə̄ kə́ rɔ̄kum ō. 4Nə́ɓā ɔjə kadə̄ i rɔ̄kum i kə ta kūl̄ yá̰á̰ kə́ yáā gə̄ ō kə́ to ɓōĺ gə̄ ō, kə́ to kɔr kum gə̄ kə́ gíŕdə́ i ngá̰ý ō, kə ta kūl̄ kadə̄ de gə̄ kadə̄ karī gə̄ yā *Ndíĺ kə́ Táĺ ń ni-nə̄bō kə gō kem ndigə yānneé ní ō.
Nge ń a ajə de gə̄ ní
5Tɔdɔ̄ dɔ nang kə́ kijə kə́ ndɔ̄ń tə́ ń j-ɔr̄ najə̄n ní, Nə́ɓā əladə́ i gíŕ tɔ́gə yā *de kə́ dɔ rā̰ tə́ gə̄ tə́ alé. 6Ba deē kógə̄ḿ əda kem makətūbə̄ yā Nə́ɓā tə́ loo kə́rēý tə́ na:
Nə́ɓā, deē ndul i rí á kadə̄ əga kemií dɔn tə́ ní?
aláa ngōn̄ deē i rí á kadə̄ á̰a̰ gōn ní?
7Ḭ̄ ī-tél seneé kə̄ nang tə́, ādə̄ de kə́ dɔ rā̰ tə́ gə̄ tɔȳnən̄ sḛ́ý.
Ḭ̄ ə́la jākā *kɔsə gɔn ō, jākā rɔȳ ō dɔn tə́.
8Ḭ̄ ə́la dɔ yá̰a̰ malang gír njan tə́#2.8 K. 8: Á̰a̰ī Pā 8.5-7b.
Dan ń Nə́ɓā ə́la dɔ yá̰a̰ malang gíŕ tɔ́gə yān tə́ ní, əya̰ yá̰á̰ kógə̄ḿ kanjə̄ kəla dɔn gíŕ tɔ́gə yān tə́ alé. Ba ngɔlaā ń toō ní, j-a̰a̰ī kadə̄ yá̰a̰ gə̄ i gíŕ tɔ́gə yān tə́ malang aĺ ɓáý. 9Banī j-a̰a̰ī kadə̄ télən̄ kə Jeju kə̄ nang tə́, adə̄ *de kə́ dɔ rā̰ tə́ gə̄ tɔȳnən̄ sḛ́ý. I yā kadə̄ kə ta kūl̄ rajə ń Nə́ɓā rajə de gə̄ ní, ni-oy tām̄ yā de gə̄ tə́ malang. Ba ngɔlaā j-a̰a̰ī kadə̄ əlan̄ jākā kɔsə gɔn ō, jākā rɔȳ ō dɔn tə́, najə̄ koyn ń ni-a̰a̰ tápə̄ bátə́ loon tə́ ní. 10Tɔdɔ̄ i gōtə́ kadə̄ Nə́ɓā ń rāā yá̰a̰ malang ō, əhɔ yá̰a̰ malang gotə kógə̄ḿ ō ní, rāā adə̄ Jeju majə ɔtə̄ kə taá, kə ta kūl̄ ka̰a̰ tápə̄. I yā kaw̄ń kə ngáń Nə́ɓā gə̄ ngá̰ý tū kɔsə gɔn yā Nə́ɓā tə́. Tɔdɔ̄ Jeju i nge kajə de gə̄.
11Jeju nge kɔ̄r̄ kam̄ de gə̄ tām̄ yā Nə́ɓā tə́ ō, ngé gə̄ ń ni-ɔr̄ kam̄də́ tām̄ yā Nə́ɓā tə́ ō ní, ni gē nin̄ gē ní, bɔbə̄də́ i kógə̄ḿ beē. I tām̄ najə̄ ń toō tə́ n rɔ̄n sɔlə̄n loo ɓāŕdə́ ngákó̰o̰n gə̄ tə́ aĺ ní. 12Tɔdɔ̄ ni-əda na:
M-ā m-ɔ́jə́ ngákó̰ó̰ḿ gə̄ rīí ō,
m-ā m̄-ɔ́sə gɔnií ta kum ngé kán̄ naā gə̄ tə́ malang ō.
13Əda ɓáý to̰ na:
M-ā m-ə̄ndā kemḿ dɔn tə́.
Tá əda ɓáý to̰ na:
Mā n toó kə ngán gə̄ ń Nə́ɓā adə̄m̄ ní.
14Ba dan ń ngán gə̄ aw̄n̄ kə dā̰ rɔ̄də́ ō, kə mósə́də́ ō ní, Jeju nəkɔ́ tél to tītə̄də́ ō, adə̄ ni-aw̄ kə dā̰ rɔ̄ tītə̄ yādə́ ō. Ni-rāā tītə̄ noō i yā nujəń *diabəl kə ta kūl̄ koyn. Diabəl i nge ń tɔ́gə yā yo i gír jīn tə́ ní. 15Banī Jeju gān̄g dɔ ngé gə̄ ń ndin̄ tītə̄ ɓəlo gə̄ beé kə dɔ ndɔ̄ ndidə́ kə kumdə́ gə̄ malang ní, tɔdɔ̄ nin̄-ɓōlə́n̄ i yo. 16Tɔdɔ̄ ni-reē i rāā kə *de kə́ dɔ rā̰ tə́ gēé alé, banī reē i rāā kə ngé gə̄ ń nin̄ i de gə̄ kə́ gír kaa yā Abəraham tə́ ní. 17I tām̄ najə̄ ń noō tə́ n i gáŕ kadə̄ ni-tél to tītə̄ ngákó̰o̰n gə̄ tū yá̰a̰ gə̄ tə́ malang ní, yā kadə̄ ni i ngol *ngé tun̄ yá̰a̰ gə̄ kə́ nge ra dɔ ndūn tə́ ō, kə́ nge ka̰a̰ kum tō ndoō yā de gə̄ ō, loo rāā kəla yān tə́ ta kum Nə́ɓā tə́ ní, yā kadə̄ Nə́ɓā mā̰yń rɔ̄n dɔ majaĺ gə̄ yā gír de gə̄ tə́. 18Ba ngɔlaā ní, ni asə rāā kə ngé gə̄ ń yá̰a̰ nāādə́ ní, tɔdɔ̄ yá̰a̰ nāā nāan nəkɔ́ ō, ni-a̰a̰ tápə̄ ō.
Currently Selected:
Makətūbə̄ kə́ ndang adə̄n̄ Hebəro gə̄ 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad