Makətūbə̄ kə́ ndang adə̄n̄ Hebəro gə̄ 1
1
Nə́ɓā ɔr̄ najə̄ sejí kə ta kūl̄ Ngōnən
1Kété ní Nə́ɓā ɔr̄ najə̄ kə kaají gēé kə̄ nja naā tə́ ō, kə ta róbə́ kə́ tayā gēé ō, i kə ta kūl̄ *ngé koō ta gēé. 2Banī kem ndɔ̄ gə̄ ń toō tə́ ń i ta tɔ̄l̄ ta ndɔ̄ gə̄ ní, ni-ɔr̄ najə̄ sejí i kə ta kūl̄ Ngōnən. Ni-rāā yá̰a̰ malang i kə ta kūl̄ Ngōnən ní ō, i Ngōnən ní n ni gə̄rān kadə̄ ənge yá̰a̰ malang ní ō. 3Ngōn̄ Nə́ɓā ní i *kɔsə gɔn yā Bɔbə̄n kə́ ndə́lē i ndə́lē yā Nə́ɓā ō, i ngarān̄g kum Nə́ɓā Bɔbə̄n nəkɔ́ kə́ ɔjə rɔ̄n kə̄ ndágá ō. Ni-rāā adə̄ yá̰a̰ gə̄ malang ndin̄ ngan̄g kə ta kūl̄ tɔ́gə najə̄ yānneé. Dan ń ni-ɔr̄ majaĺ kə́ kem de gə̄ tə́ kɔ̄ɔ́ ní, ni-ndi dɔ jī ko̰ Nə́ɓā tə́ dɔ rā̰ tə́. Nə́ɓā i tɔ́gə́ kə́ dɔ tɔ́gə gə̄ tə́ malang.
Ngōn̄ Nə́ɓā bo tɔȳ de kə́ dɔ rā̰ tə́ gə̄
4Ngōn̄ Nə́ɓā tél de kə́ bo ngá̰ý tɔȳ *de kə́ dɔ rā̰ tə́ gə̄, tɔdɔ̄ ənge rī kə́ majə ngá̰ý tɔȳ yādə́. 5I náā kə́ dan de kə́ dɔ rā̰ tə́ gə̄ tə́ n Nə́ɓā ədan na:
I ḭ̄ n i Ngōnə̄ḿ ní,
əla gír ɓōólaā ní, mā i Bɔbí.
Tá ni-əda najə̄ ń toō dɔ deē kógə̄ḿ kə́ dɔ rā̰ tə́ alé:
Ndɔ̄ń tə́ anī ni a rāām̄ i Bɔbə̄n tə́ ō,
mā m-ā m̄-rāān i Ngōnə̄ḿ tə́#1.5 K. 5: Á̰a̰ī Pā 2.7; 2 Sam 7.14 ō.
6Banī loo ń əla Ngōn̄ hágə̄n dɔ nang tə́ ní, ni-əda na:
Ādə̄ *de kə́ dɔ rā̰ tə́ gə̄ malang yā Nə́ɓā ɔsən̄ nodə́ nang tə́ non tə́#1.6 K. 6: Á̰a̰ī Pā 97.7.
7Najə̄ ń Nə́ɓā əda dɔ de kə́ dɔ rā̰ tə́ gə̄ tə́ ní n toó:
Nə́ɓā rāā deē yān gə̄ kə́ dɔ rā̰ tə́ i néĺ tə́ ō,
rāā ngé kəla yān gə̄ i ta ndo̰ hor tə́ ō#1.7 K. 7: Á̰a̰ī Pā 104.4.
8Banī tām̄ yā ngōn̄ Nə́ɓā tə́ ɓáa Nə́ɓā əda na:
Kōr̄ kāgə̄ mbang yāí ḭ̄ Nə́ɓā i kə́ kəndān kadə̄ ndi ngándáńg.
Ḭ̄ ā ó̰o̰ ɓē yāí i kə yá̰a̰ rāā kə́ gōtə́.
9Ī-ndigə yá̰á̰ kə́ gōtə́ ba ī-mbātə́ yá̰á̰ kə́ majaĺ,
i tām̄ najə̄ ń noō tə́ n ḭ̄ Nə́ɓā,
Nə́ɓā yāí *ur yibə̄ rɔ̄nel̄ dɔí tə́ ɔrə̄ń kamí tayā ō,
gə̄rāī dan madí gə̄ tə́ ō ní#1.9 K. 9 Á̰a̰ī Pā 45.7-8.
10Ni-əda ɓáý to̰ na:
Kɔ́ɔ̄ɓē, i ḭ̄ n ə̄ndā dɔ nang ta kəla gíŕ yá̰a̰ gə̄ tə́ ní ō,
dɔ rā̰ i kəla kə́ ī-rāā kə jīí ō.
11Yá̰a̰ gə̄ ní a udən̄ kɔ̄ɔ́, ba ḭ̄ ā ī-ndi kə ndɔ̄ gə̄.
Dɔ nang ō, dɔ rā̰ ō, a əsōn̄ ngísə tītə̄ yā kūbə̄ beé.
12Ā ī-ɓír̄də́ tītə̄ loo ɓír̄ kūbə̄ kūl̄ beé ō,
a tūrə̄n̄də́ kɔ̄ɔ́ tītə̄ kūbə̄ ō,
ba ḭ̄ ī-ndi tītə̄ kə́ kété ngándáńg ō,
ɓālīí gə̄ a təgān̄ aĺ bátə́ ō#1.12 K. 12: Á̰a̰ī Pā 102.26-28; Pā 22.23.
13Nə́ɓā əda deē yān kə́ dɔ rā̰ tə́ kógə̄ḿ najə̄ ń toō alé:
Ī-reē ī-ndi dɔ jī ko̰ḿ tə́,
bátə́ kadə̄ m-ə́lań madə̄ ba̰ā̰í gə̄
tītə̄ kōr̄ kāgə̄ beé gír njaí tə́#1.13 K. 13: Á̰a̰ī Pā 110.1.
14*De kə́ dɔ rā̰ tə́ gə̄ malang i ndíl gə̄ kə́ ngé rāā kəla yā Nə́ɓā ō, Nə́ɓā əladə́ kadə̄ rāān̄ kə ngé gə̄ ń majə kadə̄ ajən̄də́ ní ō.
Currently Selected:
Makətūbə̄ kə́ ndang adə̄n̄ Hebəro gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad