Makətūbə̄ kə́ ta kəga dɔ yā Mban̄g gə̄ 1
1
Adonia sāā kadə̄ əndānən̄ mban̄g
1Dan ń noō tə́ ní mban̄g Dabid tɔgə ɓə́gá ngá̰ý kɔ̄ɔ́. Tə́nīn̄ kūbə̄ dɔn tə́ ngá̰ý ɓá tā ba kūl̄ a o̰o̰n i mbéé ɓáý. 2Anī ngé kəla yān gə̄ ədanən̄ na majə kadə̄ kə n-sāān̄ ngōn̄ kə́ dəyá̰ kə́ ger̄ dəngam aĺ ɓáý kə n-adə̄nən̄ kadə̄ rāā kəla yān ō, a̰a̰ gōn ō, to kadən tə́ kadə̄ loo təngān ō. 3-4Ngé kəla gə̄ ní sāān̄ ngōn̄ kə́ dəyá̰ kə́ mandə ngá̰ý dɔ nang kə́ *Israel tə́ malang ba əngen̄ i kem ɓē kə́ Sunem tə́. Rī ngōn̄ kə́ dəyá̰ ní na i Abisag. Nin̄ reēn̄ seneé adə̄nən̄ kə mbangāá adə̄ rāā kəla yā mban̄g ō, a̰a̰ gōn ō, banī mban̄g ɓīī seneé alé.
5Dan ngeé n noō tə́ ní Adonia kə́ ngōn̄ Dabid ń ojən kə Hagit ní, ɔsə rɔ̄n kə̄ dɔɔ́ əda na i ni n n-a n-o̰o̰ ɓē ní. Ni sāā púsə́ sə́nda ō, sə́nda gə̄ ō, ɔy de gə̄ kutə mí adə̄ a ngɔ̄də̄n̄ kété non tə́ ō. 6Nəkɔ́ ń kó̰o̰n ojən jóo noó bɔbə̄n gákə̄n aĺ ɓáý. Kadə̄ ədan na ī-rāā yá̰a̰ beé i tām̄ rí tə́ wa ní gətóo. Tá ni balsáá ngá̰ý ō, ojən̄ Absalom pá tá kó̰o̰n ojən ɓáý ō. 7Adonia oōn̄ naā kə Joab kə́ ngōn̄ Seruya ō, Abiatar kə́ *nge tun̄ yá̰a̰ ō, adə̄ nin̄ tetən̄ rɔ̄də́ gōn tə́. 8Ba Sadok *nge tun̄ yá̰a̰ ō, Benaya kə́ ngōn̄ Yoyada ō, Natan *nge koō ta yā Nə́ɓā ō, Simei ō, Rei ō, go̰ rɔ̄ɔ̄ yā Dabid gə̄ ō, tá nin̄ i gōn tə́ alé.
Natan ō, Batəseba ō, ndigən̄ i Salomo̰
9Ndɔ̄ kə́rēý tə́ Adonia tun̄ yá̰a̰ kadə mbal̄ Johelet tə́, ngɔr kə̄ ta kəɓa man̄ yā ngé rāā kəla kūbə̄ gə̄ tə́. Ni tun̄ i batə̄ gə̄ ō, man̄g gə̄ ō, duĺ man̄g kə́ yḛmbə gə̄ ō. Ni mēr̄ ngán mban̄g Dabid gə̄ ń i ngákó̰o̰n gə̄ ní ō, de kə́ bo gə̄ kə́ gō nang yā *Juda tə́ kə́ ngé rāā kəla yā Dabid gə̄ ō, malang reē loo ní tə́. 10Banī ni mēr̄ Natan kə́ *nge koō ta aĺ ō, mēr̄ Benaya aĺ ō, gō rɔ̄ɔ̄ yā Dabid gə̄ aĺ ō, mēr̄ ngōkó̰o̰n Salomo̰ aĺ ō. 11Anī Natan əda Batəseba kó̰o̰ Salomo̰ na:
Adonia ngōn̄ Hagit ndi mban̄g kanjə̄ kadə̄ kɔ́ɔ̄jí Dabid ger̄ gō ní ḭ̄ ōō aĺ a? 12M-ā m-ādī kɔjə̄ kógə̄ḿ laā kadə̄ ájəń rɔ̄í ō, ajəń ngōnīí Salomo̰ ō. 13Āw̄ rɔ̄ mban̄g Dabid tə́ ī-dəjen ké i ni Kɔ́ɔ̄ɓē yāí n ənī míndən adī ədaī na ngōnīí Salomo̰ na a o̰o̰ ɓē gotən tə́ ō, na a ndi dɔ kōr̄ kāgə̄ mbang yān tə́ ō ní aĺ wa. Ba ké i ba̰ý á i Adonia n ndi mban̄g ní wa. 14Ba dan ń ā ɔ̄r̄ najə̄ kə mbangāá ɓáý anī, mā m-ā m-údə gōí tə́ yā kadə̄ m-ā m-ɔ́sə́ gír najə̄ yāí kə̄ dɔɔ́.
15Batəseba aw̄ rɔ̄ mban̄g tə́ kem kújə yān tə́. Mban̄g tɔgə ɓə́gá ngá̰ý kɔ̄ɔ́ adə̄ Abisag kə́ Sunem ra a rāā kəla yān. 16Batəseba ɔsə non nang tə́ no mban̄g tə́. Anī mban̄g dəjen na ké i rí wa. 17Anī ni-tél əda mban̄g na:
Kɔ́ɔ̄ ɓē gə̄, i ḭ̄ n ə̄nī míndí kə rī Kɔ́ɔ̄ɓē Nə́ɓā yāí ādə̄m̄ mā nge kəla yāí kadə̄ ngōnə̄ḿ Salomo̰ a o̰o̰ ɓē gotií tə́ ō, a ndi dɔ kōr̄ kāgə̄ mbang yāí tə́ ō ní aĺ a? 18Ba ń toō ɓáa i Adonia n ndi mban̄g gotií tə́ kanjə̄ kadə̄ ī-ger̄ gō ní. 19Ni tun̄ man̄g kə́ bəra gə̄ ō, duĺ man̄g kə́ bo majə gə̄ ō, batə̄ gə̄ ngá̰ý ō, ba mēr̄ ngání gə̄ malang ō, Abiatar kə́ *nge tun̄ yá̰a̰ ō, ngol ngé rɔ̄ɔ̄ gə̄ ń i Joab ní ō, kaw̄ *loo tun̄ yá̰á̰ ní tə́, banī mēr̄ ngōnīí Salomo̰ alé. 20Ba ngɔlaā ní, kɔ́ɔ̄ ɓē gə̄, *Israel gə̄ malang ndin̄ a nēlə̄n̄ mbīdə́ i kə̄ rɔ̄í tə́ kadə̄ ə́dádə́ rī deē ń kadə̄ o̰o̰ ɓē gotií tə́ ní. 21Ré kɔ́ɔ̄ ɓē gə̄ oy aw̄ gō bɔbə̄n gə̄ tə́ kɔ̄ɔ́ anī, mā ō, ngōnə̄ḿ Salomo̰ ō ní, a rāān̄jí yá̰á̰ ń a rāān̄ de kə́ ngé rāā majaĺ gə̄ ní.
22Batəseba ra a ɔr̄ najə̄ kə mbangāá ɓáý anī, Natan kə́ *nge koō ta udə ndogó mbangāá. 23Ədan̄ mban̄g na Natan kə́ *nge koō ta na ra ndágá laā. Ni udə gō mban̄g tə́, ɔsə̄ non nang tə́ non tə́, 24ba ədan na:
Kɔ́ɔ̄ ɓē gə̄, i ḭ̄ n ə́da na kə Adonia kə o̰o̰ ɓē gotií tə́ ō, kə ndi dɔ kōr̄ kāgə̄ mbang yāí tə́ ō ní a? 25Tɔdɔ̄ ɓōólaā ni-aw̄ ta kəɓa man̄ kə́ Rogel tə́ aw̄ tun̄ man̄g kə́ bəra gə̄ ō, man̄g kə́ bəra kə́ bo majə gə̄ ō, batə̄ gə̄ ngá̰ý ō, ba mēr̄ ngání gə̄ ō, ngol ngé rɔ̄ɔ̄ gə̄ ō, Abiatar kə́ *nge tun̄ yá̰a̰ ō, kaw̄ *loo tun̄ yá̰á̰ ní tə́. Ndi a əsan̄ yá̰a̰ ō, a a̰ȳn̄ ō, seneé noō ba əga kɔŕ əda na kadə̄ dɔ mban̄g Adonia kə ngan̄g májə́ májə́! 26Banī ni mēr̄ Sadok *nge tun̄ yá̰a̰ aĺ ō, Benaya ngōn̄ Yoyada aĺ ō, ngōnií Salomo̰ aĺ ō, mērə̄m̄ mā aĺ ō. 27Kɔ́ɔ̄ ɓē gə̄, loo kadə̄ ī-gə̄rā de kə́ kadə̄ ndi gotií tə́ kanjə̄ kadə̄ ə́dájí jḭḭ ngé kəla yāí gə̄ ní i ba̰ý?
Dabid ɔjə dɔ Salomo̰ kadə̄ un gotən
28Loo ń noō tə́ mban̄g Dabid əda na kə ɓārə́n̄ Batəseba kə adə̄nən̄. Dan ń Batəseba tél reē rɔ̄n tə́ anī 29ədan na: Kété m-ə̄nī míndə́ḿ m-ādī m-ə́da na i ngōnīí Salomo̰ n a o̰o̰ ɓē gotəḿ tə́ ō, a ndi dɔ kōr̄ kāgə̄ mbang yāḿ tə́ ō ní. Tītə̄ ń Kɔ́ɔ̄ɓē kə́ nge gān̄g dɔḿ kem wur kɔl gə̄ tə́ ngándáńg ndiń kə kumneé noō, 30m-ā m̄-rāā yá̰á̰ ń m-ə̄nī míndə́ḿ ta kum Kɔ́ɔ̄ɓē Nə́ɓā yā *Israel gə̄ tə́ m-ādī najə̄n tə́ ní ɓōólaā.
31Batəseba ɔsə non nang tə́ ō no mban̄g tə́ ō, ba əda na:
Ādə̄ dɔ kɔ́ɔ̄ ɓē gə̄, mban̄g Dabid, ngan̄g májə́ májə́!
32Loo ń noō tə́ mban̄g Dabid əda na kə ɓārə́n̄ Sadok kə́ *nge tun̄ yá̰a̰ ō, Natan kə́ *nge koō ta ō, Benaya ngōn̄ Yoyada ō, kə adə̄nən̄. Dan ń nin̄ reē ran̄ non tə́ anī, 33ni ədadə́ na kə ɔyn̄ ngé kəla yān gə̄ ō, kə əndān̄ ngōnən Salomo̰ dɔ kərō rapáy yān nəkɔ́ Dabid tə́ ō, ba kə aw̄n̄ seneé ta kəɓa man̄ kə́ Gihon tə́.
34Sadok kə́ *nge tun̄ yá̰a̰ ō, Natan kə́ *nge koō ta ō, a urən̄ yibə̄ dɔn tə́ loo ń noō tə́ yā kəndānneé mban̄g dɔ *Israel gə̄ tə́. Gō tə́ anī ī-kɔ̄ríī tōw̄ gə̄ ō, ə́daī kə ndū boó na kadə̄ dɔ mban̄g Salomo̰ ngan̄g májə́ májə́ ō. 35Loo ń ā ī-téliī ní a, ī-njə̄rāī gōn tə́. Ni a reē yā ndi dɔ kōr̄ kāgə̄ mbang yāḿ tə́. I ni n a o̰o̰ ɓē kum gotəḿ ní. Tɔdɔ̄ i ni n m-ə̄ndān dɔ Israel gə̄ tə́ ō, dɔ *Juda gə̄ tə́ ō, kadə̄ ni i ngār yādə́ ní.
36Benaya kə́ ngōn̄ Yoyada tḛ́l əda mban̄g na:
Kɔ́ɔ̄ ɓē gə̄, ādə̄ i tītə̄ ń noō! I Kɔ́ɔ̄ɓē Nə́ɓā yāí nəkɔ́ n əndā najə̄ taí tə́ toō! 37Ādə̄ ni i naā tə́ kə Salomo̰ó̰ tītə̄ ń ni i naā tə́ seí ní ō, ādə̄ ni-rāā adə̄ ɓē ko̰o̰ yā Salomo̰ bo tɔȳ yāí ō!
Əndān̄ Salomo̰ mban̄g
(Á̰a̰ī 1 Yá̰a̰ 29.21-25)
38Anī Sadok kə́ *nge tun̄ yá̰a̰ ō, Natan kə́ *nge koō ta ō, Benaya kə́ ngōn̄ Yoyada ō, naā tə́ kə Kereti gə̄ kə Peleti gə̄ ń i ngé ngɔ̄m̄ dɔ mban̄g gə̄ ní ō, aw̄n̄ rɔ̄ Salomo̰ tə́. Nin̄ əndān̄ Salomo̰ dɔ kərō rapáy yā mban̄g Dabid tə́, ba aw̄n̄ seneé ta kəɓa man̄ kə́ Gihon tə́. 39Sadok *nge tun̄ yá̰a̰ un gajə dā̰ kə́ kem kújə tandā tə́ ń *yibə̄ kə́ táĺ i kemeé ní jīn tə́. Ni ur yibə̄ ní dɔ Salomo̰ tə́ əndānneé mban̄g. Loo ń noō tə́ kɔ̄rə́n̄ tōw̄ gajə dā̰ ō, de gə̄ malang ədan̄ kə ndū boó na ādə̄ dɔ mban̄g ngan̄g májə́ májə́ ō. 40Gō tə́ anī de gə̄ malang njə̄rān̄ gō Salomo̰ tə́ tél aw̄n̄neé seneé gogə́ kem ɓēé. Nin̄ kɔ̄rə́n̄ yá̰a̰ gə̄ ō, rāān̄ rɔ̄nel̄ ngá̰ý ō. Nin̄ urən̄ kɔĺ ngá̰ý tītə̄ kə́ yā kadə̄ dɔ nang njar beé.
Salomo̰ mā̰ȳ rɔ̄n dɔ Adonia tə́
41Dan ń Adonia nin̄ kə ngé gə̄ ń ni mēr̄də́ kəsa yá̰á̰ ní əsan̄ yá̰á̰ gír gān̄g anī, oōn̄ ká̰a̰ de gə̄ ń a ɓār̄ gijə gijə ní. Joab oō kōō tōw̄ anī, dəje na ké i rí n rāā yá̰á̰ áké loo ndir nji kem ɓēé beé wa. 42A ɔr̄ najə̄ ɓáý anī, Jonatan kə́ ngōn̄ Abiatar *nge tun̄ yá̰a̰ reē ugə̄. Adonia ədan na:
Ī-reē kə̄ laā tɔdɔ̄ ḭ̄ i de kə́ ngáā, adə̄ ī-reē i kə najə̄ kə́ majaá yā kədají.
43Jonatan tél əda Adonia na: Kógə̄ḿ aĺ bátə́!
Kɔ́ɔ̄jí mban̄g Dabid əndā Salomo̰ mban̄g kadə̄ o̰o̰ ɓē gotə̄n tə́! 44Mban̄g mēr̄ Sadok *nge tun̄ yá̰a̰ ō, Natan kə́ *nge koō ta ō, Benaya kə́ ngōn̄ Yoyada ō, Kereti gə̄ ō, Peleti gə̄ ō, dān̄ Salomo̰. Nin̄ əndānən̄ dɔ kərō rapáy yā mban̄g tə́. 45Sadok *nge tun̄ yá̰a̰ ō, Natan kə́ *nge koō ta ō, urən̄ yibə̄ dɔn tə́ əndānə̄nəń mban̄g kadə kəɓa man̄ kə́ Gihon tə́. Gō tə́ anī nin̄ télən̄ dɔ tə́ seneé ta kaw̄ gogə́ ɓēé kə rɔ̄nelēé. Rɔ̄ de kə́ kem ɓēé gə̄ malang nel̄də́, ādə̄ i kōōdə́ n ōōī ní. 46Tá Salomo̰ ndi dɔ kōr̄ kāgə̄ mbang tə́ gə̄gē. 47De kə́ bo yān gə̄ reē tɔ̄ȳn̄ mban̄g Dabid kə̄ dɔ tə́ ɓáý gə̄gē ədan̄ na n-ndə̄ngān̄ kadə̄ Nə́ɓā yān kə rāā kadə̄ rī Salomo̰ kə ɓār̄ tɔȳ yān ō, kə rāā kadə̄ ɓē ko̰o̰ yā Salomo̰ kə bo tɔȳ yān ō. Mban̄g ɔsə non nang tə́ kem tə̄rá yān tə́, 48ba əda na n-ndadə̄ Kɔ́ɔ̄ɓē Nə́ɓā yā *Israel gə̄ ń ɓōólaā adə̄n de kə́ nge ndi gotən tə́ dɔ kōr̄ kāgə̄ mbang yān tə́ ō, rāā adə̄ n-a̰a̰ deē ní kə kumneé ō ní.
49De gə̄ malang ń Adonia mēr̄də́ kəsa yá̰a̰ seneé ní ɓōĺ rāādə́ adə̄ ndewn̄ yakə yakə. Nin̄ ḭḭn̄ dɔɔ́, a̰ȳn̄ naā aw̄n̄ kə̄ loo yādə́ gə̄ tə́ kógə̄ḿ kógə̄ḿ. 50Adonia nəkɔ́ ɓōĺ asən nák adə̄ ḭḭ aw̄ nam̄ kíl *loo tun̄ yá̰á̰ ń rāān̄ adə̄ to tītə̄ gajə dā̰ ní #1.50 K. 50: Deē ń nam̄ kíl loo tun̄ yá̰á̰ ní, deē a rāā yá̰a̰ seneé to̰ alé tɔdɔ̄ nam̄ i Nə́ɓā.. Ni-ɓōĺ i Salomo̰. 51Ədan̄ Salomo̰ na Adonia ɓōlə́n ngá̰ý adə̄ aw̄ nam̄ gajə *loo tun̄ yá̰a̰. Ba əda na ré mban̄g Salomo̰ ənī ndūn yā tɔ̄lən alé pá tá na n-əya̰ loo ń toō ɓáý. 52Salomo̰ tél əda na ré əhɔ hálən sew anī, nənga dɔn kógə̄ḿ gə̄gē na a ɔdə nang alé. Ba ré rāā háĺ kə́ majaĺ sḛ́ý yḛtə anī a oy. 53Mban̄g Salomo̰ əla de gə̄ gō Adonia tə́ kadə̄ risə kɔ̄ɔ́ dɔ *loo tun̄ yá̰a̰ tə́. Adonia reē ɔsə non nang tə́ no mban̄g Salomo̰ tə́. Loo ń noō tə́ Salomo̰ ədan na kə tél kə aw̄ gogə́ ɓēé.
Currently Selected:
Makətūbə̄ kə́ ta kəga dɔ yā Mban̄g gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad