Makətūbə̄ kə́ nge ko̰ jōó yā Samuel 24
24
Dabid tə́da kutə Israel gə̄
(Á̰a̰ī 1 Yá̰a̰ 21.1-6)
1Wōn̄g rāā Kɔ́ɔ̄ɓē kə ngán *Israel gēé ɓáý to̰. Ni sə̄lā Dabid dɔdə́ tə́. Mērən tə́da kutə *Israel gə̄ ō, *Juda gə̄ ō, 2adə̄ Dabid əda Joab ń i ngol ngé rɔ̄ɔ̄ gə̄ ń ra kadən tə́ ní na kə njə̄rān̄ kə gō gír ɓē gə̄ malang kə́ Israel tə́, kə əlan̄ gír Dan bátə́ Beer Seba. Kə tə́dan̄ de gə̄ malang kadə̄ n-gerə̄ń kutədə́. 3Joab tél əda mban̄g na ndə̄ngā yān i kadə̄ Kɔ́ɔ̄ɓē Nə́ɓā yā kɔ́ɔ̄n mban̄g kə rāā kadə̄ ngán Israel gə̄ bəlan̄ ngá̰ý, kadə̄ kutədə́ tɔȳ nge kə́ ngɔr ń toō tə́ nja ɓú ō, kadə̄ kɔ́ɔ̄n mban̄g a̰a̰ kutədə́ ní kə kumneé ō. Ba Joab tél dəje Dabid na ké ndigə rāā yá̰á̰ kə́ tītə̄ ń noō i najə̄ rí tə́ wa. 4Banī Joab nin̄ kə ngol áskar gə̄ yā mban̄g gēé asən̄ mbātə́ rāā yá̰á̰ ń mban̄g əndā dɔdə́ tə́ kadə̄ rāān̄ ní alé, adə̄ teē əsōn̄ róbó aw̄n̄ kə̄ tə́da kutə ngán Israel gə̄ tə́. 5Nin̄ teēn̄ bā Jurdḛ ba əlan̄ gír dɔ ɓē kə́ Aroer tə́ ō, ɓē ń ndi wól loo tə́ ní ō. Nin̄ əndan̄ dan de gə̄ kə́ gír kaa yā Gad tə́ gə̄ mānə̄n̄, ba aw̄n̄ kumdə́ kə̄ Yajer. 6Nin̄ ugə̄n̄ dɔ nang kə́ Galaad tə́ ba aw̄n̄ kem ɓē yā Het gə̄ tə́. Aw̄n̄ Kades ō, Dan Yaan ō, kem ngán ɓē gə̄ ń ndin̄ kə́ gō gidií ní ō, aw̄n̄ Sidon ō. 7Tir ń i ɓē kə́ ngan̄g ń ndogə̄ mbal̄ gīr̄ gidə ní ō, aw̄n̄ kem ɓē gə̄ ń kété i ɓē yā Hibi gə̄ ō, Kanaan gə̄ ō, ní malang ō, aw̄n̄ Beer Seba ń i ɓē kə́ gō nang kə́ Negeb yā *Juda tə́ ní ō. 8Unən̄ gō ɓē gə̄ malang, rāān̄ nāā ndōhó kə ndɔ̄ kutə jōó pá tá kadə̄ tél ɔtə̄n̄ gogə́ Jerusalem ɓáý. 9Joab adə̄ mban̄g kutə de gə̄ ń tə́dan̄ ní: *Israel gə̄ kə́ asən̄ kaw̄ ta rɔ̄ɔ̄ tə́ gə̄ i deē 800 000 ō, Juda gə̄ i deē 500 000 ō.
Nə́ɓā rāā Dabid yá̰á̰ kə́ tōr̄
(Á̰a̰ī 1 Yá̰a̰ 21.7-17)
10Kem Dabid əgan biting biting najə̄ tə́da ń ni tə́da kutə ngán Israel gə̄ ní tə́. Ni-əda Kɔ́ɔ̄ɓē na n-rāā i yá̰á̰ kə́ majaĺ ngá̰ý, ba ngɔlaā ní kə mā̰ȳ rɔ̄n dɔn tə́, tɔdɔ̄ n-rāā yá̰a̰ i tītə̄ de kə́ kur̄ dɔn gətóo beé.
11Loo ń noō tə́ Kɔ́ɔ̄ɓē ɔr̄ najə̄ kə nge ka̰a̰ yá̰a̰ yā Dabid ń i Gad kə́ *nge koō ta yā Nə́ɓā ní ədan na: 12Kə aw̄ kə əda Dabid na najə̄ ń Kɔ́ɔ̄ɓē ədan ní n toó: M-ɔ́jiī yá̰á̰ kə́ tōr̄ gə̄ mətá kə́ tām̄ yā majaĺ ń ī-rāā tə́ ní kadə̄ ī-gə̄rā kógə̄ḿ danaá. Nge ń ā úń ní, m-ā m-ādə̄ a rāāī. Teē bírí dəloí dan ń Dabid ndōĺ dɔ ɓīī tə́ anī, 13Gad aw̄ ədan kəla yā Nə́ɓā ní. Ni dəjen na ké ndigə i kadə̄ ɓō əsō kem ɓē yān tə́ ɓāl̄ sīrí, aké i kadə̄ madə̄ ba̰ā̰n gə̄ ngɔ̄də̄nən̄ ba kə a̰ȳ nodə́ tə́ nāā mətá, aké i kadə mo̰y ngāl̄bɔ̄gīí əsō kem ɓēé ndɔ̄ mətá wa. Kə gír̄ dɔ tə́ ba kə ədan najə̄ ń kadə n-tél n-aw̄ n-əda nge kəlan ní. 14Dabid əda Gad na n-sɔ̄l̄ ngá̰ý. Ɓá tá ba kəsō kem jī Kɔ́ɔ̄ɓē tə́ i só tə́ tɔȳ kəsō kem jī deē ndul gə̄ tə́. Tɔdɔ̄ Nə́ɓā i de kə́ kumən o̰o̰n seí ngá̰ý.
15Adə̄ Kɔ́ɔ̄ɓē əla kə mo̰y ngāl̄bɔ̄gīí dɔ nang kə́ *Israel tə́ dəloí ndɔ̄ nəkɔ́ ń noō tə́ bátə́ kadə̄ asə kum yān. De gə̄ ń mo̰y ngāl̄bɔ̄gīí tɔ̄l̄də́ Dan bátə́ ugə̄ Beer Seba ní kutədə́ malang i deē dūbú kutə sīrí. 16*De kə́ dɔ rā̰ tə́ əla jīn kə̄ dɔ ɓē kə́ Jerusalem tə́ yā nujəń kɔ̄ɔ́ anī Kɔ́ɔ̄ɓē lōō gír nujə loo tə́ ba ədan na: Asə beé, ī-tetə jīí kə̄ nang tə́. Nge kəla ní ra i kadə loo kənda kōō gémē yā Arona kə́ Yebus tə́.
17Dan ń Dabid a̰a̰ *de kə́ dɔ rā̰ tə́ loo tɔ̄l̄ de gə̄ tə́ anī, əda Kɔ́ɔ̄ɓē na i ni Dabid n n-mān̄ dɔ *ndū najə̄ yā Nə́ɓā ō, n-rāā yá̰á̰ kə́ gōtə́ aĺ ō ní, ba ké batə̄ gə̄ ń noō ké rāān̄ yādə́ i rí wa. Ní kadə̄ kə Kɔ́ɔ̄ɓē kə rāān nəkɔ́ ō, gír kojə yān ō, yá̰á̰ kə́ tōr̄.
Dabid rāā loo tun̄ yá̰a̰ tām̄ yā Kɔ́ɔ̄ɓē tə́
(Á̰a̰ī 1 Yá̰a̰ 21.18-26)
18Ndɔ̄ nəkɔ́ ń noō tə́ Gad aw̄ ənge Dabid ba ədan na kə aw̄ kə rāā *loo tun̄ yá̰a̰ loo ń Arona a ənda kōō yān tū tə́ ní tə́, kə adə̄ Kɔ́ɔ̄ɓē. 19Anī Dabid aw̄ loo kənda kōō ní tə́ tītə̄ ń Kɔ́ɔ̄ɓē ədań Gad ní. 20Dan ń Arona a̰a̰ mban̄g nin̄ kə ngé kəla yān gēé a reēn̄ kum kə̄ rɔ̄n tə́ anī, ɔtə tə́nī tadə́ ba aw̄ ɔsə non nang tə́ no mban̄g tə́, 21ba dəje kɔ́ɔ̄n mban̄g na ké reē i ba̰ý wa. Anī Dabid tél ədan na n-reē i mangən loo kənda kōō yān tə́, yā rāā loo tun̄ yá̰a̰ tū tə́ yā kadə̄ Kɔ́ɔ̄ɓē, kadə̄ gíŕ yá̰á̰ kə́ tōr̄ ń reē dɔ de gə̄ tə́ kem ɓēé ní gāngəń. 22Anī Arona əda Dabid na: Kɔ́ɔ̄ ɓē gə̄, yá̰á̰ ń kemií gḛy ní ī-taā ī-ndējəń Nə́ɓā *yá̰a̰ tun̄ kə́ róō horoó. Man̄g yāḿ gə̄ n toó kadə̄ ī-rāādə́ *yá̰a̰ tun̄ kə́ yā róō horoó tə́ ō, púsə man̄g kə yá̰á̰ kə́ yā rákə̄ kɔ́ɔ man̄g tə́ gə̄ n toó kadə̄ ī-rāā kīr̄ tə́ ō. 23M-ādī yá̰a̰ gə̄ ń noō malang ō, ndə̄ngā yāḿ i kadə̄ Kɔ́ɔ̄ɓē Nə́ɓā yāí ndigə *yá̰a̰ ndējə̄ yāí ō. 24Banī mban̄g ɔdə aĺ gō Arona tə́. Ni ədan na n-sāā i mangən kə gātə̄ ń a ɔjə ní, tām̄ n-gḛy ndējə̄ Kɔ́ɔ̄ɓē Nə́ɓā yān yá̰á̰ kə́ n-adə̄ yá̰á̰ gírí aĺ alé. Adə̄ Dabid mang loo kənda kōō ní ō, man̄g gə̄ ní ō, kə njáŕ sélə̄ arjā̰a̰ kutə mí. 25Ni-rāā *loo tun̄ yá̰a̰ loo ní tə́ ba ndējə̄ Kɔ́ɔ̄ɓē *yá̰a̰ tun̄ kə́ róō horoó gə̄ ō, *yá̰a̰ tun̄ kə́ tām̄ yā kem kógə̄ḿ tə́ gə̄ ō. Loo ń noō tə́ Kɔ́ɔ̄ɓē ɔjə kem majə yān kə́ tām̄ yā ɓē tə́ kə̄ ndágá, adə̄ gíŕ yá̰á̰ kə́ tōr̄ ń reē dɔ de gə̄ tə́ kem ɓē kə́ *Israel tə́ ní gān̄g.
Currently Selected:
Makətūbə̄ kə́ nge ko̰ jōó yā Samuel 24: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad