Efesiɛ́ŋ 5
5
1Bígédényénénu Uhaluá haná núnya baán ɔbɔɔ́ wɔ́yɔnɔ́. 2Ánaá núsɔ́dɔn uguá ginɔ́nɛ́n hana Klístus: Umɔdíɔ́yá uwond uwodóŋinye nusɔ́da nuég gásɔ gá busió hana nusámb, nusámb unúnya ohind agá buáyɛ buá Uhaluá. 3Nunyɛ buán buá Uhaluá, buendéndi, biíle na yaág múdigódi áneé bómon muɔ́ uguánɔ guá ɔlɔŋ. 4Nudihéményé dugálɔ duá nsesi, duá buegubuegue, dúa duhɔ́n búdibá beseé gɔgaá, ánaá núbídóŋonye gá mbísógóli siá mbíyigie. 5Linsánánɔ beseé na beseé áneé buendéndi, biíle naá ɔbɔ́hɔgɔnɔ́ muand muá bɔsɔ́gá, bádianádáŋáab bigínd biá Niguili niá Klístus na Uhaluá. Ɛɛ́ɛ, guamba gubia buá gidigid gɔ́b, búnyɛ gubúlúgenye bilɔg biá buhaluá. 6Ta mɔndɔ udinúfúmíe na dugálɔ duá mɔnɔŋɔna, búnyɛ bilɔga ibigányɛ ibígɔ́gɔnɔ́ ilúnd hiá Uhaluá uguá bandɔ abámal yɔ́ idú. 7Nudiála gɔg hana bámuanyɛ. 8Nsuá numabá uguá mbíne, gɔgaá dabdab uguá buláda buánɔ na Ɔgúna nuganyɛ uguá gise. Ánaá núsɔ́dɔn gɔg hana baán abánya uguá gise. 9Gá giagiá, gise gíéhúme ubúnya beseé, gindényé na hómohómue. 10Linsánánɔ gusaluna ubúɔ́bígɔnaá Ɔgúná. 11Nudiágán imbɔ́g uguá melélíe má gihóhóle giá mbíne, gɔgaá bálánánɔ mɔ́. 12Muand umuɔ́ bandɔ abagányɛ bálanɔ́ uguá ninamba, múnyɛ ɔduá gunɔ́h gá guɔya muɔ́, 13gɔgaá, buand gidigid ubuɔ́ básábal búébídíyenye agá gise, 14gá giagiá buand gidigid ubúsébídíye búáguáyan gise. Buand buáguɔ́ bɔ́yɔnɔ́ áneé:
Hunyɛ́g, aŋuá abídímanaá,
adígɛ́n agá ɔdɛ́m huá bunyɛ nnyɔlɛ,
guond Klístus ugubunya na gise giég.
15Ánaá núbídédínye na bilɔŋ biánɔ biá sɔ́dɔn, nudibígɔ́lɔn hana bandɔ bá kanda meéne gɔgaá, hana bandɔ bá nugedie, 16abálinsanaá gugɔ́l gidɔga na mɔɔ́sɛ ɔmɔɔ́ Uhaluá úhúánaá bɔ́, gá giagiá, mɔɔ́sɛ ɔmɔɔ́ dísɔ́dɔnaá gá mɔ́ mányɛ gilɔg. 17Nudinímíe meéne gɔgaá, ánaá núbínuanan gá guɔ́b guɔyɛd guá Ɔgúná uguá sig buand ubuɔ́ núgódionu áneé nual. 18Nudíayán bihuɔ́gíba, mbɔ́m yɔɔ́núgɔ́ga uguá ŋŋil ya gilɔg gɔgaá, ánaá núbá obóhónón na Gileénde giá Budányɛ. 19Ánaá núgínyigínyinye na isag isínya uguá yubu hiá Uhaluá na isag siá beédébi, bilɛ́l. Ánaá núdɔ́ŋa isag isiɛ́ Gileénde giá Budányɛ gíáganaá uguánɔ guá idɛ́m, dɔ́ŋɔ́nɔ́n nubíne gá busió buá Ɔgúná na ɔdɛ́m gidigid. 20Ánaá núéŋen Uhaluá Síe, mbíyigie binɛŋ gidigid naá gá buand gidigid uguá ɔhɛ́n huá Ɔgúna wasɔ Yésuse Klístus.
Na ugányɛ na ɔnɛ́m
21Banuá nudínenú Klístus, ánaá núbia ŋŋɔ́bina banuá na banuá. 22Gánɔ bagándɔ, ánaá nuɔ́bɔnɛn banɛ́m bánɔ hana núɔ́bɔninaá Ɔgúná. 23Gá giagiá, ɔnɛ́m unyɛ ɔduá huá ugándɔ, hana Klístus únya ɔduá huá Gimbi giá beédébi bá Klístus. Klístus unyɛ osódie wa Gimbi giá beédébi bá Klístus igínya nuɔ́l nuég. 24Bagándɔ bógódi gɔg áneé bɔ́bɔnɛn banɛ́m bɔ́b uguá buand gidigid, hana Gimbi giá beédébi bá Klístus gíɔ́bɔninaá Klístus. 25Banɛ́m, ánaá sig ɔnúmɔndɔ wɔya ugányɛ weg hana Klístus úmɔyɛ́d Gimbi giá beédébi bá Klístus, uwond uwodóŋinye nusɔ́da nuég úmuanyɛ mbánan gá giɛ́. 26Umambá áneé Gimbi giá beédébi bá Klístus giɔ́bɛ́n Uhaluá busió gidigid, egélém gá guélígie giɛ́ na mimbi na nugálɔ. 27Umɔyá áneé ubídahigɛn bunɔ́g buá giɛ́ úmuanyɛ mbánan, kanda biíle, kanda bidési, níŋíláníŋílá ta gilid ta buand buá sigɛd giɛ́. 28Anagányɛ, ɔnúmɔndɔ ugódi áneé wɔya ugányɛ weg hana nuɔ́l nuég mbánan. Mɔndɔ uwɔyɔnɔ́ ugányɛ weg wɔɔ́bíɔya úmuanyɛ mbánan. 29Ɛɛ́ɛ, mɔndɔ umadibɛn nuɔ́l nuég gɔgaá, woóguoye nuɔ́ uhánda nuɔ́ hana Klístus wálanɔ́ gá Gimbi giá beédébi bá Klístus. 30Didibá maláŋ má nuɔ́l nuég a? Ŋŋɔ́ŋɛ síɔ́guɔya áneé: 31«Buand buáguɔ́ ɔnúmɔndɔ wónólígienú agá buáyɛ buá síe na noódíe gá guɛ́d gá bígɔ́d na ugányɛ weg, bem báandɛ bónónd mmegu imoómi.» 32Giandá giá giseyi gínyɛ uguá ɔlɔŋ huá ŋŋɔ́ŋɛ igányɛ, yaŋuá yɔɔ́guɔya áneé gíábíyigan Klístus na Gimbi giá beédébi bá Klístus.
33Gɔgaá, búánúbíyigan, sig ɔnɛ́m ugódi áneé wɔya ugányɛ weg hana úmuanyɛ mbánan, ugányɛ wɔɔ́bɔnɛn ɔnɛ́m weg.
Currently Selected:
Efesiɛ́ŋ 5: EKM
Highlight
Share
Copy
Want to have your highlights saved across all your devices? Sign up or sign in
