Walumi 8

Ugima Muhe wa Mulungu

1Ivoelo, haluse kubule kulamuligwa kwa wala wose waiyungile na Kilisito Yesu. 2Kwavila, Lagilizo da Muhe wa ugima ila akupatika kufosela Kilisito Yesu, inilava mvifungo vya malagilizo ya zambi na kudanganika. 3Mulungu katenda mbuli ila Lagilizo dipotigwe kutenda, kwavila kiunt'hu cheye chibule nguvu. Mulungu kamulagiliza mwanake akawa gesa mnt'hu eli na mtufi gesa cheye ivo chili ili aihume zambi kufosela mtufi wake. Kwa mtufi wake uo kawa nt'hambiko ya kuchihalavila zambi. 4Mulungu katenda ivo ili chitende vila malagilizo ivo yakulonda, ili chidahe kumuhulika Muhe wa Mulungu, wala kukola mitufi ivoikulonda. 5Kwavila wala wakukala kwa kukola mtufi ivoukulonda, ao wakugesa mtufi ivo ukulonda, mbali wala wakukala kwa kukola Muhe wa Mulungu ivoukulonda, ao wakugesa Muhe wa Mulungu ivoukulonda. 6Want'hu wakutalamilwa na magesa ya mtufi, yakuwatenda wadanganike, mbali want'hu wakutalamilwa na Muhe wa Mulungu wakuwa na ugima na nt'hindiwalo. 7Ila akulongozwa na magesa ya mtufi ni mnongwa wa Mulungu, kwavila hakudaha kuyakola malagilizo ya Mulungu, kweli hakudaha kuyatoza. 8Ivo, wose wala wakukola mitufi ivoikulonda, hawakudaha kumbwedeza Mulungu vila akulonda.

9Mweye hamkutalamwa na mtufi mbali mkutalamilwa na Muhe wa Mulungu ikawa akukala mgati yenu. Mnt'hu yoyote akawa abule Muhe wa Kilisito, iyo hakuwa mnt'hu wa Kilisito. 10Mbali ikawa Kilisito akukala mgati yenu, mitufi yenu naiwe gesa idanganika kwa mbuli zambi, mbali mihe yenu ni migima kulawana na kutogoligwa kwenu halongozi ha Mulungu. 11Namweye mkawa na Muhe wa Mulungu ila ambwelezile Yesu muugima akukala mgati mmwenu, yeye ambwelezile Yesu muugima ivila nawabwelezele ugima mitufi yenu ila ikudanganika kufosela Muhe wake ila akukala mgati yenu.

12Ivoelo, ndugu zangu china sank'hano ya kutenda, hachikulondigwa kukala kwa kukola mitufi yetu ivo ikulonda. 13Kwavila mkakala kwa kuikola mitufi ivo ikulonda, kweli namdanganike. Mbali kufosela Muhe mkayakoma yala yehile yakutendigwa na mtufi, namkale wagima. 14Want'hu wose wakutalamilwa na Muhe wa Mulungu ao nio wana wa Mulungu. 15Kwa Muhe ila awenk'hile Mulungu hakuwatenda mweye muwe watwana na woga, mbali kwa Muhe iyo mweye muwa wana wa Mulungu, na kwa kufosela Muhe iyo cheye chikumtanga Mulungu, “Abba.” Uko nio kulonga “Tata.” 16Muhe wa Mulungu akaiyunga na mihe yetu, akuchitenda chimanye kuwa kweli cheye ni wana wa Mulungu. 17Ivo, kwavila cheye ni wana wa Mulungu, nachihokele mbuli zidamane za Mulungu awaikile want'hu wake, na nachihokele mbuli izo hamwenga na Kilisito, kweli, chikahenyezigwa hamwenga na Kilisito, vilavila nachipate ukulu hamwenga nae.

Ukulu ukwiza

18Mahenyeko yetu ya haluse, sikuyawaza gesa ni chint'hu cha kulinganiza na ukulu wa Mulungu ula ukulonda kulagisigwa kumwetu. 19Kwavila vint'hu vose viumbigwe na Mulungu vikugozela nk'hani kulagisigwa kuwa wana wa Mulungu ni wali. 20Kwavila viumbe vose vikala havikufaya, mbali si kwa kubweda kwawe, mbali Mulungu mwenyewe nio abwedile iwe ivo, mbali lolelo diyaho. 21Kwavila viumbe ivo navo navihonywe kulawa muna utwana wa ubananzi, na naviikigwe muna utunyo wa wana wa Mulungu. 22Kwavila chikumanya hadi haluse, viumbe vose vikuugulila kwa usungu, gesa usungu wa mwanamke kuvumbula mwana. 23Mbali sio ivo muhala vikuugulila, na cheye vilavila chili na Muhe wa Mulungu chikuugulila mgati yetu, mbali chikulolela kukomboligwa mitufi yetu na kutedigwa wana wa Mulungu. 24Kwavila kwa lolelo idyo na cheye chihonyigwa. Mbali lolelo dibule mana ikawa chila chikukilolela chikuchiona. Vino niani naalolele kuchipata chint'hu eli nacho kale? 25Ivo chikachilolela chint'hu hachina kipata, nachichigozele kwa kufinyiza. 26Ivila, cheye chibule udahi, mbali Muhe wa Mulungu akwiza akuchitaza muukuhungukilwa kwetu. Kwavila hachikumanya kulomba vila akulonda Mulungu, mbali Muhe mwenyewe akuchilombela kwa Mulungu kwa kugutilila kwa usungu ula haukusimulilwa. 27Nae Mulungu akuona mgati mmiyoyo ya want'hu, akumanya vila Muhe akuwaza, kwavila iyo Muhe akuwalombela kwa Mulungu kwa kukola Mulungu ivoakulonda.

28Na cheye chikumanya kuwa mzimbuli zose, Mulungu akusank'hana hamwe na wala wakumbweda na kuwenk'ha yadamane, wala awatangile kuitenda sank'hano yake. 29Want'hu wala Mulungu awasagulile tangu haumwanduso awo nio awaikile wawe wake gesa ivoeli mwanake, ili mwanake awe muelekwa wa mwanduso hagati ha want'hu wengi wamtogole Mulungu. 30Na wala aandusile kuwasagula, ao nio kawatanga, na wala awatangile, ao nio awatogole halongozi hake, na wala watogoligwe halongozi hake, ao nio awenk'hile ukulu.

Ubwedo wa Mulungu kufosela Yesu Kilisito

31Ivo, chilongeki muna ayano? Mulungu akawa ubanzi wetu niyani akudaha kuchilemela? 32Ikawa Mulungu hamulemesile Mwanake na akamulava kwaajili yetu cheye chose, vino, naapotigweze kuchink'ha cheye chint'hu chochote icho chikulonda kumulomba? 33Vino, niani akulonda kuwalaha want'hu wasagulwe na Mulungu? Kwavila Mulungu mwenyewe nio akulonda kuwatogola halongozi hake. 34Vino, niyani akulonda kuwalamula? Ikawa Kilisito Yesu nio adanganike na nio abwelile muugima na akukala ubanzi wa kulume wa Mulungu. Nae nio akuchilombela cheye. 35Niani akudaha kuchibagula na ubwedo wa Kilisito? Vino, magayo egu ziki, egu mahenyeko egu nzala egu sakaza egu nk'hondo egu kudanganika? 36Gesa Mandiko ya Mulungu ivo yakulonga kuwa,

“Kwaajili yako chikulondigwa kukomigwa ichilo na msanya,

kwavila chikuwaziligwa gesa ngoto wakulondigwa kuchinjigwa.”

37Mbali muna zimbuli zose cheye chikuhuma uhumi mkulu, kwa kutazigwa na Yesu Kilisito ila achibwedile. 38Kwavila nimanya kale kuwa habule chint'hu chikudaha kuchibagula na ubwedo wa Mulungu. Sio kudanganika, wala ugima, wala wasank'hani wa Kuulanga egu nguvu zimwenga za kuulanga wala yala yakulonda kulawila vino haluse, wala yala yakulonda kulawila sihakwe, wala ukulu, 39wala yala yeli mchanya, wala yala yeli hasi, wala chiumbe chimwenga chochote hachikudaha kuchibagula na ubwendo wa Mulungu uli mgati ya Kilisito Yesu Mndewa wetu.

Currently Selected:

Walumi 8: DBV

Highlight

Copy