Walumi 7
7
Mulinganyo wa zengele
1Ndugu zangu, humanya namuyakombaganye yano hulonda kuyalonga, kwavila humanya hulonga na want'hu wayamanyile Malagilizo. Malagilizo yakumtalamila mnt'hu hala akawa mgima. 2Gesavila, Mwanamke asoligwe akutalamilwa na malagilizo hala mulumake akawa mgima. Mbali mulumake akadanganika mwanamke iyo hakutalamwa mbwi na malagilizo ya zengele. 3Ivoelo, ikawa mwanamke iyo akasoligwa na mwanamulume imwenga na kuno mulumake mgima naatangigwe muhank'hu. Mbali mulumake akadanganika mwanamke iyo hakutalamwa kaidi na malagilizo ya zengele na want'hu sekewamtange muhank'hu akasoligwa na mwanamulume imwenga. 4Vilavila na mweye ndugu zangu, mulavigwa kulawa muutwana wa malagilizo ya umwaka ivomdanganikile hamwenga na Kilisiyo. Haluse ninyi ni want'hu wa Kilisto. Chose ni want'hu wa Kilisito ili chitende yala yakumbwedeza Mulungu. 5Kwavila ivochikalile chikukala gesa want'hu ivo wakukala, nk'hwina ya kutenda zambi ikalile ikusongezigwa na malagilizo, ikala ikusank'hana mmitufi yetu, na nk'homelezo yake ingi chihelele muukudanganika. 6Umwaka chikala chifungigwa na Malagilizo, mbali haluse chidanganika hamwenga na Kilisito, ivo chifunguligwa kulawa Mmalagilizo. Elo hachikumsank'hanila Mulungu kwa kutoza Malagilizo yaandikigwe, bali chikumsank'hanila Mulungu kwa nzila mpya ya kulongozigwa na Muhe wake.
Malagilizo na zambi
7Elo chilonge bwani, vino malagilizo ni zambi? Bule! Bali kufosela malagilizo yanidahiza nimanye zambi ni chint'hu cha vilihi. Gesa malagilizo ingi hayalongile, “Use kumelela mate chint'hu cha miyago.” Silondile kumanya kumelela mate ni chint'hu cha vilihi. 8Mbali ivonidimanyile lagilizo dino, zambi ipata nzila ya kunitenda niinukilwe kumelela mate kila chint'hu kihile mgati yangu. Kwavila kukawa kubule malagilizo, zambi ikuwa chint'hu chidanganike. 9Umwaka ivonikalile siyamanyile malagilizo nikala hukala ivohulonda. Mbali ivoniyamanyile malagilizo, nio nikamanya kuwa nie nitenda zambi. 10Nie nimanya kuwa yala malagilizo yalondigwe kugala ugima, kumwangu nie yatenda nilamuligwe kudanganika. 11Ivoelo zambi ikanihunila nzila malagilizo ayo na ikanitenda nidanganike. 12Ivoelo, ikulagisa Malagilizo yalawa kwa Mulungu. Malagilizo ayo yadamana na ya gesa ivo ikulonigwa. 13Vino, ino ikulagisa kuwa kila nikionile kidamana kigaluka na kinigalila ulamuzi wa kudanganika? Bule! Mbali ili zambi itangigwe zambi ikufosela kila kidamane na kunigalila kudanganika kwangu. Ivo Malagilizo yakulagisa kweli zambi ivo ihile nk'hani.
Kunyutana kwili mgati mwa mnt'hu
14Chikumanya kuwa Malagilizo ni ya Kimuhe, mbali nie sio mnt'hu wa Kimuhe, niguligwa niwe mtwana wa zambi. 15Sichimanyile icho huchitenda, kwavila kila hulonda kuchitenda sikuchitenda, mbali kila sikuchilonda nio huchitenda. 16Ivo, ikawa hutenda yala sikuyalonda, ikulagisa kuwa nikuyatogola kuwa yala malagilizo yadamana. 17Sio nie hulonda kutenda mbuli zihile, mbali zambi ila ikukala imgati yangu. 18Humanya kuwa mgati mwa mtufi wangu mbule mbuli yoyote idamane ikukala, kwavila ingawa hulonda kutenda mbuli idamane mbali sikudaha kuitenda.
19Ivo, sikudaha kuitenda mbuli idamane ila hulonda kuitenda, mbali ila mbuli ihile sikulonda kuitenda ndo huitenda. 20Ikawa huzitenda mbuli zila sikuzilonda kuzitenda, mbuli iyo ikulagisa kuwa sio nie huzitenda mbuli izo, mbali ni ila zambi ikukala mgati yangu.
21Ivo, niitola mbuli ino, hulonda kutenda mbuli zidamane, mbali huifika nisagula mbuli ila ihile sikuilonda. 22Mgati muumoyo wangu hudenk'helela Malagilizo ya Mulungu. 23Mbali huona kuwa kuna malagilizo yamwenga yakusank'hana mumtufi wangu, malagilizo ayo yakunyutana na magesa yangu yadamane, Malagilizo ayo yakutenda niwe mtwana wa zambi ikukala mgati mmwangu. 24Mbuli ino ikunitenda nisekuwa na denk'ho! Vino, niyani naanihonye kulawa mumtufi uno ukunigala mukudanganika?
25Mbali, chimwink'he hewala Mulungu, achihonyile kufosela Yesu Kilisito Mndewa wetu!
Kwa ivonili, umanyi wangu ukusank'hanila Malagilizo ya Mulungu. Mbali mtufi wangu ukusank'hanila mbuli za zambi.
Currently Selected:
Walumi 7: DBV
Highlight
Share
Copy
Want to have your highlights saved across all your devices? Sign up or sign in
The New Testament in Dowe @The Word for The World International and Dowe Language translation. All rights reserved.
