Marka 12

Dyya Congtih Khyaucypnyak

(Matthai 21.33–46; Luka 20.9–19)

1Ynpynnyng Jesuh naa khyaucypnyak summei theila khyauhyau, “Khyang pahuat naa miksu dyya y cai. Hongka kikaa khy y voan, miksu theih cyah nyakky voam khy y coh theilaa zongnyak pahuat y syak. Ynpynnyng ycya lopitih eyng dyya zongsyak theila ahngaw aa y zehtyak. 2Shih cuːn phaweluu hnguva dyya cong nawva acya theih haa dyyn haijaa miksu dyya aa maa pahuat y tuːh. 3Ynbawlakhy lupcaptih hanaa yn maapawe muan theilaa shuatkuk awla honggak nuva ym tuːh bua. 4Atha mokhuat ycya maapawe pahuat ynhaa cengnga tuːh; yn khyang khy y luugee ym tuaak theiawla luupimtih aa ym tuːh bua. 5Dyya mawh naa ycya maan pahuat y tuːh bua tuːh hnguva ym tukkyeu. Panuukung acya haa y tuːh; yn haa dukkuːh avoang cee ym sawh, avoang cee ym tuk. 6Ynkhianyng dyya mawh naa, y khiat duː khyang zawepawe hlymbyih pahuat jyng y tyakkei tii. ‘Ky zawepawe hngawe cee ym kyhkhiat tyngngy, tijyng ahngu duː aa y tuːh.’ 7Ynbawlakhy dyya congtih hanaa, ‘Ni dikzawe cee hngei lawh hai y si. Luuvyt, ynih muan pawla tuky, ynpynnyng y hngeicya haa tomti cee mymi naa my lawhei kiah ey’ tilaa pahuat laa pahuat ym hyauvei tawng. 8Ynhnguva ynih cee muan theiawla ym tuk, ynpynnyng dyya daiithua aa ynih ym dyeuvei.”

9Ynbaw hngucee “Dyya mawhpaw naa ibaw y puh voaih maa? Yn lu theila dyya congtih tomti y tukkyieu theilaa yn khy acya haeyng dyya bei jy. 10Myn talagamcaw vyng,

“ ‘Uk imm sawtih hanaa ym dyyi khyang lung khy

athaa uk kie huan duː aa ym summei bua.

11Yn cee Mawhpaw puhcai khyang

mymi mik kyng khy muːnnawsee tih asi’ tijyng phuat sai jo zawvei?” y tinyak.

12Jahenpawe lian, tala cawkhyau tih laa liancang hanaa yn khyaucyp nyak hacee ym pumhngaw hnguːn theilaa y hyau khyang asi tinyak khyang ym hngoat khianyng Jesuh tukky ym khiangvoai. Ynbawlakhy khyang puː haa ym kyh khianyng ynih cengkuːh ym zet bua.

Khawn Bei Khyang Hnginyak

(Matthai 22.15–22; Luka 20.20–26)

13Yn pynnyng Jesuh ym muan nynny tawk ynih khyaukhaw akhaeitih ngei haijaa Pharisee avoang laa Herod khyang avoang ym tuːh luu. 14Yn hacee ynih cenga luu theiawla ym hyau, “Cawkhyautih vo, nyang cee ny setcaw myi tih khyang tinyak khyang kym hnguat. U khy kyh joti, ibawthonnyngmaa tijyngcee khyang hngoai suvei kawva Nuatpaw tala lyaam ahngoan tih ny shuduan khyang kym hngoat. Kesar syamphalyang nyng akhawn kym bei duan nei bei duan jovei?” tiawla ym hngi.

15Ynbawlakhy Jesuh naa yn haa khyang poai jaa syhei khyang y hnguat. “Ibawthawnyng keei nym hlumhlik maa? tilaa y hngi. Keei jyng tyangkhaw luvyt ky to vy,” y tinyak.

16Yn hanaa phyihsa ym luu, pynnyng yn haeyng, “Myn luːp laa ming cee u maa?” y tinyak hnguva.

“Kesar luːp laa ming asi,” ym tinyak.

17Jesuh naa yn haa eyng, “Caesar kuːh cee Kesar eyng bei jyt. Nuatpaw kuːh cee Nuatpaw eyng bei jyt,” y tinyak.

Yn bawva hyau khyang yn hanaa muːnnyak.

Bytnyak Kuːh Thoo Bua Khyang Hnginyak

(Matthai 22.23–33; Luka 20.27–40)

18 # Cee 23.8 Ynpynyng Saddusee haa y cenga ym luu. Yn hacee byt nyak kuːh thoo bua nyn jo tijyng hyau tih haa ym sii. 19“Cawkhyautih vo, Mymi tawk Mosee jok hnguːt khyang ngyng putawe pahuat zawe myi kawva byt theila y pihia myijei hnguːt tyngcee, y nau naa yn hngutawe lovei theila y bee juː kuːk kaw haija ynih tawka y suu lawh eyy tijyng amyi. 20Beenau syyh ym myi. Acuːknyak pahuat pihia lawhei theila zawe kawva y byt. 21Ynih pihia ahngihnyak y nau naa yn hngeinuu pihia nawe theila zawe kawva y byt bua tuːh. Pathumnyak y nau khy ynbaw cejaa y thawn. 22Ynbaw cejaa acya haa khy ym thawn kiah theilaa zawe zawnawhuːt jo. Apyihnaw vaa cee, yn hngeinuu khy y byt. 23Ynkhainnyng syyh dy lawhei hnguːt theila thoo bua cuːn nyng yn haa byt nyak kuːh thoo bua hnguva yn hngutawe cee u pihia asi jy maa?” tijyng ym hngi.

24Jesuh naa yn haa eyng, “Nyangmi naa tala caw nym jyakcawk khaw khainnyng si jo vei? ibawthonnyngmaa tijyngcee talagamcaw hnguat khaw theizawlaa Nuatpaw phungan khy hnguat nyn jozaw. 25Bytnyak kuːh thoo bua hnguva, nawe ommei khyang myijo, tomti huankhu kuːh hlizawe haa bawva myi giah eyy. 26Thuh aa byt tih haa ym thoo bua khyang tinyak cee — Mosee cawuk kyng phuat sai jo zawevei, nyng yn tala eyng meei thootih biapuːp pyng, ‘Nuatpaw naa, keei cee Abraham Nuatpawe, Isaac Nuatpaw, Jacop Nuatpaw’ y tinyak. 27Nuatpaw cee byttih haa Nuatpaw sijo, syak hyang tih haa Nuatpaw y si. Yn khainnyng dekkuːt hnguva seetih lyaamaa nym khindyang!” tilaa y hyau.

Alianduːtih Hnguisin

(Matthai 22.34–40; Luka 10.25–28)

28 # Luk 10.25–28 Ynhnguva tala cawkhyautih pahuat luu theilaa ynhaa cot khyang y jyak. Jesuh naa poaijaa hyau bua khyang hnguh hngut theila, “Hnguishin tomti duːkka, ibawng cee y lainduː maa?” tilaa y hngi.

29Jesuh naa, “Luːvei duːtih cee myn, ‘Aw Isreal khyang juː havo ngei byih jyt: mymi Mawhpaw my Nuatpaw cee Mawhpaw pahuat pyt jyang y si, #12.29 mymi Mawhpaw my Nuatpaw cee Mawhpaw pahuat pyt jyang y si; yn kawvyngcee Mawhpaw cee mymi Nuatpaw y si, Mawhpaw pahuat pyt. tilaa y hyau. 30Mawhpaw hiyangtih ny Nuatpaw ny lungbawng tomti, ny muikhaw tomti, ny lungkin tomti, ny jungtha tomti jyng khiat byih tinyak khang cee acuːk tala y si,’ y tinyak. 31Ahngihnyak cee myn asi ‘Ny immcengpui khyang ny pum hngaw bawva khiat byih.’ Ni tala thyakka a lian duːtih hnguishin myi tijo,” Y tinyak.

32Tala cawkhyautih naa y hyau bua. “Ny hyau ahngoan cawkhyautih vo! Nuatpawe cee pahuat pyt jyang, yn tua acya nuat myiti jo. 33Yn Nuatpawe ny lungbawg tomtii dy, ny jyakcawk nyak nyn tomti dy, ny jungtha tomti dy khiat tilaa, ny immcengpui hakhy ny pumhngawe bawva ny khiat dy khyang cee henbawn thyak kyng khyng duːtih asi,” tilaa y hyau.

34Jesuh naa thiamvaatih aa y syakkei khyang y hnguattei, yn nyng y hyau, “Nyang cee Nuatpaw huankhuː teengpee jyng paan nei jotii.”

Athaa mokhuat u naa khy hngi voom ti joaw.

Jesuh U Zawe Maa Tilaa Hnginyak

(Matthai 22.41–46; Luka 20.41–44)

35Jesuh naa Biatimm dukka y cawkhyau hnguva, “ibawthawnnyng tala thumcian cawkhyautih hanaa Messiah cee David zawpawe ym ti maa? tilaa ym hngi. 36David pumhngaw vyng, Muikhaw Cim naa y hyau:

“ ‘Mawhpaw naa keei mawhpaw vyng y hyau:

keei naa Nyang shunpui haa nyang khuco dyangnga tyakkhy

Keei kheplyaam kut huan naa ngoa byih’ y tinyak,

37David pumhngaw naa ynih eyng ‘Mawhpaw vo y tinyak.’ Ibawva Jesuh cee David zawe y sijy maa?” tijyng y hngi.

Tala Cawkhyautih haa Phennei Haijaa Sathiih Beinyak

(Matthai 23.1–36; Luka 20.45–47)

Khyang puː hanaa jyyjonyak kyng ynih khyau ym ngei. 38Jesuh naa, y cawksyang bawva hyau bua tuːh, “Tala cawkhyautih haa sathih taw byih jyt. Yn hacee phaang syau vuei theiawla tukjyh nyak duːn naa ym zetjok hnguva, kyhkhiat nyakkyng shawtpiattei ym luːvei, 39ynpynnyng sinakok dukka kuːh ngoahnyak duːn, pyipap, kyhkhiat nyak duːn hlyi jaa ym luːvei. 40Ynhaa cee hngeinue haa imm duk kuːh ym lawklaa huttei awla khyang jyakhluː aa saupawetih aa shuh ym hngihminnei. Yn hacee apet lian duːtih ym khyam lawh eyy,” y tinyak.

Hngeinue Kutpuan

(Luka 21.1–4)

41Ynhnguva Jesuh cee Biatimm ahlu ym san nyak phyihsa gok cenga ngoa theila khyang panuu naa ahlu tyangkhaw ym san khyang y to. Bawi tih hanaa cee thawngkhaw panuu ym san. 42Ynbawlakhy sanglaitih hngeinue pahuat lue theila voakhuat myitih gii phyihsa dik pahngih y san. 43Jesuh naa, y hngulawnglyktih haa pannei theila, “keei ahngoan naa ky hyau vy, ni phyihsaa gok kyng san tih haa tomti thyak kyng yn sanglai tih hngeinue naa y san khyang ahlu cee akawng. 44Ithawnyngmaa tijyng cee, yn cee ym bawih thua hleei tih ym hlu; yn hngeinuu naa cee, amyi tihkaw duk kuːh, y tyakkei khyang tomti y bei kiah,” tijyng y hyau.

Currently Selected:

Marka 12: NTHTB25

Highlight

Copy

Compare