Marka 11
11
Awngtyagnyak Kyng Jerusalem Luh aa Voangnyak
(Matthai 21.1–11; Luka 19.28–40; Jawhen 12.12–19)
1Jerusalem lyaam ym phawe luu theiawlaa Bethphage naam laa Bethani naam Olive cung lyaam maa, Jesuh naa y hngulawnglyk pahngih y tuːh, 2yn haeyng y hyau, “Nym mawe lyaam maa kuːh naam maa zettyt. Yn naam nym phawe hnguva, u naa khy dyang ngeinyak hyaam khaw khang saa syangzawe a khuunneitih nym hnguh eyy. Yn shut theila luu byih jyt. 3Ibawthawnyng nym cai maa tilaa khyang pahuat naa y hngi jyng cee? Mawhpaw#11.3 Mawhpaw; sikawvyngcee kuːhmawh. naa y lyvei tijyng hyau byih jyt, yn bawva nym tiinyak kyng cee ym bei luu hlyi jy,” tilaa y shin.
4Ym zet hnguva pumthua lyaam kaava, ssaa syangzawe a khuun khang ym hnguh, yn saa joii ym shuh. 5Yn duːn nyng tungtih ycya khyang hanaa, “Ibawthawn nyng saa joii nym suh maa?” tilaa ym hngi.
6Jesuh naa y shin bawva ym hyau bua, pynng yn hanaa ym hluːh. 7Ynhnguva Jesuh cenga saa songzawe ym lu, ssaa huannaa ym suisyak tyang awla, Jesuh khy ssaa huannaa y dyangngei. 8Ynhnguva Khyang hanaa ym suisyak lyaam myng ym phawh, ycya hanaa cee thiing kang eek awlaa lyaam myng ym phawh. 9Y hngu laa mawe lyktih khyang hanaa “Hosanna Mawhpaw ming ngyng komlutih khunkhyi myi seh!” tilaa ym paang. 10“Mymi pawe David teengpee khunkhyi myi seh! Huankhuva hluːngduː tih Hosanna!” myiseh tilaa ym pang.
11Jesuh cee Jerusalem luh duk voang theila biatimm dukka y zet. Y pingpyang tomti y to jok, khumuː hngyh khianyng, hngulawnglyktih kulaihngih dy Bethani naam lyaamma y zet.
Jesuh Naa Theei Thiing Y Juaan
(Matthai 21.18,19)
12Athaa hnguːp paa Bethani naam kuːh ym zetbua hnguva, Jesuh y zoijei. 13Ynhnguva asei yptih theii thiing y paannawva kuːhthuh y hnguh, atheih suijei haijaa y zet. Yn duːn phaw hnguva atheih ikhy hngu jo, asei pytjyang y hnguh, ibawthawnnyngmaatijyngcee theei thiing tawk acuːn sikaw khiannyng asi. 14Jesuh naa thiing y juan, “Tuh aa kuːhthuh nyang theih ihngukhy unaa khy eilawh tikaw seh!,” y tinyak.
Yn bawva y juan khang hngulawnglyk hanaa khy ym jyak.
Jeush Naa Biatim Singsaa
(Matthai 21.12–17; Luka 19.45–48; Jawhen 2.13–22)
15Jerusalem luh ym phawhlu hnguva, Jesuh biatimm dukka voang theila, biatimm dukka hlei tih laa jytih haa tomti y puːklawk giah. Hawkhu jytih haa laa tyangkaw thua tihaa ngoah nyak khung hakhy thuataai kiah. 16Biatimm dukka lawklaa jyh khyang u naa khy puhcai kawh byih jyt tilaa y kat. 17Yn pynnyng yn haa eyng, “Yn cee jok hnguːt jo vei: ‘Keei imm cee khyang juː taga hngihminnei nyak imm tijyng ym hyau vy.’ Ynbawlakhy nyangmi naa yn imm cee hutteitih khyangsee immaa jyang nym puh,” y tinyak.
18Jahenpaw lian laa tala cawkhyau tih hanaa ym jyak hnguva Jesuh tukky ym khiangvoai, ibawthonnyngmaa tijyngcee khyang puː naa y cawkhyau khyang ym muːnnyak khiannyng yn haa naa Jesuh ym kyh.
19Khuumuː lyamm phaweluu hnguva, Jesuh laa ynih hngulawnglyk haa luh aa kuːh zet bua.
Theei Thiing Ngyng Kuːh Nuːtnyak
(Matthai 21.20–22)
20Khuthuai theila, lyamma ym zet bua hnguva, theii thiing aphung ngyng kuːhthuh azaalak khyang ym hnguh. 21Pitar naa nuːttei theila Jesuh eyng y hyau, “to Rabbi vo!, Ny juan khyang theii thiing azaalak pyn!” y tinyak.
22Jesuh naa, “Nuatpaw jumnyak dovei byih jyt, 23#Mat 17.20; 1 Kor 13.2Ahngoan naa nyangmi jyng ky hyauvy, unaakhy jumkha khyang lung myi kawva y pumhngaw hnguːn bawtynga thawnny tijyng jum theila, ‘yn cung thyih panglaai jaa kawh veih,’ tilaa y hyau vyngcee ym hyau baw tynga athawnny. 24Ynkhainyng nyangmi jyng ky hyau, ibyangkhysiseh hngihminnei tomti cee nym lawh pyn tijyng jum zawlaa yn cee nyangmi kuːh ey jyng asi. 25#Mat 6.14,15Nym hngihminnei jy hnguva, khyang cya eyng pet nym tyang khyang myi jyngcee, ynhaa hluːhpiat byih. Nym hluːh eyngcee huankhu va myi tih nyangmi Pawe naa nym pet haa y hluːh ey,” y tinyak. 26#11.26 Acya kutjokcaw vyng ym bawng akhyndik 26: Acya haa pet ny hluːh kaw vyngcee, huankhuu vaa myi tih ny Nuatpawe naa nyang pet hluːh jo (tovyt Mat 6.15).
Jesuh Uːtawng Ym Hngi
(Matthai 21.23–27; Luka 20.1–8)
27Yn hnguva Jerusalem luh ym lu bua tuːh, Jesuh cee biatimm dukka y zetjok hnguva, Jahenpaw lian haa, tala cawkhyautih haa laa lianzang haa cee ynih cenga ym luu. 28“Yn haa naa ni byang uːtyang haa ny cai maa? Pynnyngcee ni cai jytawk u naa utawng bei maa?” tijyng ym hngi.
29Jesuh naa yn haa eyng hyaubua, “Nyangmi jyng pahuat ky hngi jy. Keei jyng hyaucammyt, nym hyau vyngcee keei naa ni byang uːtyang ngyng ky caai tinyak khyang ky saih jy. 30Jawhan bei khyang baptisma cee Nuatpawe cengkuːh ei, sikawvyngcee khyang cengkuːh ei? Myn hngi khyang keei jyng hyaucammyt!” y tinyak.
31Ynhnguva yn hanaa pahuat laa pahuat cinjang theiawla ym hyau, “ ‘Nuatpawe cengkuːh’ my tinyak kyngcee, nyangmi naa, ‘ibawthawnnyng ynih jum jo zaw maa?’ tilaa y hngi jy, ym ti. 32‘Khyang ngyng kuːh my tinyak kyngcee’ ” (Khyang tomti naa Jawhan cee hngawpawe pahuat tijyng ym yt nyak khiannyng khyang haa ym kyh.) 33Yn khiannyng yn haa na Jesuh eyng “Keeimi naa hnguat jo awnga,” ym tinyak.
Jesuh naa, “Ni haa ibyang uːtyang nyng ky puhcai tinyak khyang saih nyn jonga,” y tinyak.
Currently Selected:
Marka 11: NTHTB25
Highlight
Copy
Compare
Share
Want to have your highlights saved across all your devices? Sign up or sign in
© 2025 by the Word for the World International
