Ceepaw 25

Pawluh ce Festus Myang Hngoaimawva Hngica Khyam Nyak

1Festus myang ce yn pe ja phaw theila khuhnguːp hnguːp thum diev hnguva, Caesare luh kuːh Jerusalem luh a y zet. 2Yn hnguva jahenpaw lian la Judah khyang lian ha ce Festus myang cenga Pawluh ym biatnyak. 3Yn ha na luhngoai ym lawhei hluː khiannyng Festus myang ngyng Jerusalem luh a Pawluh tuːhlu haija ym bih. Ynbawva ym bih khyang ce yn ha na Pawluh lyam myng khiangvoi theila ynih tuk ky ym luː khiannyng a si. 4Yn hnguva Festus myang na, “Pawluh ce Caesare luh a muan theila kei khycee yn luh a diev hlawn na kei pumhngaw ky zet bya ey. 5Nyangmi dukkuːh khyanglianzaw tih ha ce kei dy huattyng lu theila yn khyang eyng a pet juːhuat huat myi jyngcee ynih biat nyak tyiv byih jyt,” tila y hyau.

6Festus myang ce yn ha cenga hnguːp shat sikawvyngcee hnguːp hngaa thua kawva myi pynnyng, Caesare luh a y zet. Atha hnguːp pyng tala duːn nyng ngoa theila Pawluh lu hai awva y hyau. 7Pawluh lu hnguva, Jerusalem luh kuːh kom lutih Judah ha na ynih voidum theila ajyhtih biat nyak kyng ynih ym biat nyak, ynbawlaakhy yn ajyhtih biatnyak khyang yn ha na saksi duan nyn joaw. 8Ynbawlakhy Pawluh na khy: “Kei ce Judah tala khy siseh, biatimm khy si seh Caesar syamphalyang khy si seh sunnei nyak pet pahuat huat khy cai hnguːt jonga,” tila y shyakkei bya.

9Yn hnguva Festus myang ce Judah ha luhngoai y lawh hluː khiannyng, Pawluh eyng, “Nyang ce Jerusalem luh a zet theila yn luh a kei hngoaimawva myn pet tyang khyang eyng cyppei theila hngica ny khyammei hluːei,?” tila y hngi.

10Pawluh na, “Kei ce Caesar syamphalyang jung duːn nyng adyih khyam khiannyng mynija jyang hngica nyak ky khyammei duan. Nyang na a khyng nga ny hnguat bawva, Judah khyang ha eyng kei na ikhy sak hnguːt naw jonga. 11Yn khiannyng kei ce kha theila byt khyam nyak tuan pet pahuat huat sak nyak hnguːt tyng ce byt khyammy khyang cah jonga. Ynbawlakhy kei huanna myn khyang ha a coihngiammei khyang ha pahuat khy sikawvyngcee kei yn ha kuːt tyng kuːh ym hluːh piat lawh ey, Caesar syamphalyang cenga kei adyih ky khyam,” tila y syakkei.

12Festus myang ce y pumhngaw hngica nyak khy khyang ha dy hngica theila, “Nyang ce Caesar syamphalyang cenga adyih ny khyam khiannyng yn cenga ny zet lawh ey,” tila y hyau.

Pawluh Hngoaimawva Berince La Agrippa

13Yn pynnyng khuhnguːp meihzaw diev pynnyng Agrippa syamphalyang la y pihia Barnis hyih cee Festus myang tovei haija Caesare luh a ym phawlu. 14Yn luh a yn ha cee khuhnguːp byangveih myi khiannyng, Festus myang ce Pawluh bawng syamphalyang cenga y susaih. Festus myang na, “Palestine uptih Felix myang tyak hnguːt khyang thawngshaw pahuat y myi. 15Kei Jerusalem ma ky zet hnguva, jahenpaw lian ha la Judah khyang lian ha na a coihngiammei tyang theila ynih pet bei jy ym bih. 16Ynbawlakhy Kei na yn ha eyng, coihngianmei khyammei lawh tih pahuat ce coihngianmei tih dy hngoai cyppei theila coihngianmei khyang y pumhngaw na shyakkei bua khyang lawh hlawn na ynih yap khyang ce Roma thumcian si jo tinyak khyang, ky syakkei bua hnguːt. 17Mynija yn ha ce kei dy myn luh a kym hnguva, kei ce diev kawva atha hnguːp pyng tala duːn na ngoa theila yn khyang lu haija ky hyau. 18Yn hnguva ynih a coihngiammei tih ha ym thoo hnguva, kei uːtnyak hawh seetih pet ha suduan hnguːt joaw. 19Yn ha cahei thong khyang bawng ha ce yn ha pumhngaw jummei nyak la byttih Jesuh bawng a si. Yn Jesuh cee byt pyn lakhy syak hiyang tila Pawluh na y hyau. 20Kei ce myn cahei tong khyang ha eyng cyppei theila ibawva hngica ey tinyak khyang khindyang nyn kawva thawn khiannyng Pawluh eyng, Jerusalem luh a zet tila myn a coihngiammei khyang ha tawk hngi khyang ny khyammei hluːei, tila y hngi. 21Ynbawlakhy Pawluh na Caesar syamphalyang cijang khyang y khyam hluː khiannyng, y pumhngaw thawng dukka jyng tyak ky y hngihei khiannyng, yn Caesar syamphalyang cenga thyak cyp tyak hai mawvy kei na ynih ky hyau,” y tinyak.

22Yn hnguva Agrippa myang na Festus myang ngyng, “Kei pumhngaw na yn hyau khyang ky jyak kyy ky luː,” tila y hyau.

Festus myang na khy, “Sangu va nyang na ynih khyaukhaw ny jyak lawh ey,” tila y shyakkei bua.

23Yn khiannyng atha hnguːp pyng Agrippa myang la y pihia Barnis hyih cee poailem nuva jaapuː lian ha la luh a ming liantih khyanglian ha dy huattyng dynnei nyak ka ym phawlu. Yn hnguva Festus myang na Pawluh lupui nyak ky y hyau. 24Festus syamphalyang na, “Agrippa myang dy huattyng kunglu tih ha tomti vo, myn khyang nym hnguhei! Judah khyang tomti na Jerusalem luh a khy si seh, Caesarea luh a khy si seh, myn khyang ce syak hiyang tuan jo tila pang theiawla ym bih. 25Ynbawlakhy yn ce byt nyak khyam tuan khyang pet pahuat khy pet hnguːt nyak kaw khyang kei na ky hnguat. Y pumhngaw kung Caesar syamphalyang cenga adyih khyammei jy y kawhei khiannyng yn ce Roma luh a thyak ky kei na ky khuːnkawh. 26Ynbawlakhy yn nyng behei tih caw Caesare syamphalyang cenga jok ky kei jyng ahngoan tih bawng pahuat khy myi jo. Yn khiannyng myn hngica khyang pyih hnguva kei ce kawhei khyang bawng pahuat huat jok nyn ny tawk ynih mawhpaw tomti hngoaimawva la Agrippa myang hngoaimawva kei na ky lytlu shyak. 27Ibawthawnnyngma tijyngcee thawngshaw pahuat a coihngiammei khyang bawng pahuat huat duan kawva thyak khyang ce tuannei jo tila kei ce ky uːtnyak,” tila y hyau.

Currently Selected:

Ceepaw 25: NTHTB25

Highlight

Copy

Compare