Ceepaw 24

Pawluh Hngica Khyammei Nyak

1Hnguːp pahngaw diev pynnyng Jahhenpaw Lian Ananias cee Caesare luh a zet theila talatuat tih Tertullus la ycya aliancang ha lu theila Felix myang cenga Pawluh ym biatnyak. 2Yn hnguva Pawluh pannei pynnyng, Tertullus na a liantih Felix myang ngyng y hyau khyang ce: “Keimi ce nyang mawhpaw hngoaimaw va hlyija jaadyam nyak kyng kym myijei lawh.

“Yn ce khawmcyang la mawhpaw hnguh hnguat lian khiannyng myn pee ja a hleijei tih ha khy podyang lu pyn. 3Yn bawva puhcai khiannyng aduːn tyng nga ahlyija tyaknaw theila ym do vei. 4Ynbawlakhy Kei ce mawhpaw a diev va hlumhlik hluː kaw khiannyng a tawija biatnyak khyang duːppei tila ngei piat ty ky khawhei. 5Myn khyang ce somdek tomti jyng myitih Judah ha lingso haija thukthawn theila thukthawn khyaammei tih pahuat thawn khyang kym hnguh pyn. Yn ce Nazareth luh zaw khyanglian pahuat y si. 6Yn pynnyng biatimm khy bu haija puhcai khiannyng keimi na ynih kym muan hnguːt. 7#24.6–8 Aciya kutjokcawvyng a dik 6b–8a: Kym pumhngaw tala bawva ynih kym cijang hnguːt, 7 ynbawlakhy jaapuː lian Lysias lu theila, keimi cengkuːh hluːei kawva ynih y zehei. 8 Ynpynnyng Lysias na ynih buːngiang tih ha nyang hngoaimawva lu haija y shin, tijyng bawngei. 8Yn pynnyng yn bungiang tih ha eyng nyang cenga lu haija ky hyau hnguːt. Nyang pumhngaw kungna ny hngica eyngcee keimi na bungiang khyang bawng ha ny hnguh hnguat lu vy,” y tinyak. 9Yn hnguva yn duːn nyng myitih ycya judah ha na khy tala tuattih Terullus hyau tomti ce a hngoan tila ym hyau.

Felix Myang Hngoaimawva Pawluh Na Shyakkei Bya

10Yn hnguva Felix myang na Pawluh eyng y hyau vy suduan theila Pawluh na,

“Nyang ce myn teengpee khukum byangveih cijangtih thawn khyang ky hnguat khiannyng, kei bawng nyang ngyng jyjo tih a ky shyakkei bya vom. 11Kei ce khuːhbia vy tawk Jerusalem luh a ky zet khyang ce hnguːp khulaihngih khy myi hyam kaw khyang, nyang na ny hngica nyn. 12Kei ce biatimm ma khy si seh, Judah ha sinakok ka khy si seh pahuat huat dy cahei khyang khy siseh, khyang ha eyng lingso haija hyau khyang khy si seh yn ha na hngu joaw. 13Kei jyng ny buːngiang khyang ha cee yn ha na saksi duan nyn joaw. 14Yn hnguva a khaei tih lyaam tijyng nym uːtnyak khyang mymi shyakai tih Nuatpaw ky khuːhbia khyang ahngoan tijyng nyang ngyng ky hyau. Kei ce tala eyng suduan hnguːt khyang ha la hngawpaw ha jok hnguːt khyang ngyng phuitih tomti ky jum y tinyak. 15Puːnpoktih la thaaniav tih hyih ce byt nyak kuːh thoo bya ey tijyng yn ha na ym zong bawva, kei naakhy Nuatpaw uːmnaw theila uːtnyak kyng ky zong. 16Yn khiannyng ky ce ky hnguat nyak kyng khyang la Nuatpaw hngoaimawva ahngoan nyak ky tawk ky cai shoi.

17 # Cee 21.17–28 “Khukum byangveih diev pynnyng, khyang juː hngaw tih ha tawk kutpuan la henbawn nyak ha lu haija Jerusalem luh a ky phawlu. 18Kei ce cimcyang khuːhbia nyak cai pynnyng biatimm dukka hluhbawn nyak la bei khyang ha yn ha na kei ym hnguh hnguːt. Yn hnguva kei dy huattyng khyang puː ha khy myi jo, lingso khy myi jo. 19Yn bawlakhy Asia pee kuːh Judah khyang cya ha ym myi. Yn ha ce kei jyng buːngiang ngy khyang myi jyngcee mynija lu theila nyang hngoaimawva buːngiang tuan. 20Sikawvyngcee kei ce tuh a tala tuat tih hngoaimawva ky tung hnguva kei jyng ibyang pet khy hnguh lawh khyang myn duːn nyng myitih ha pumhngaw na suduan seh. 21#Cee 23.6Kei ce yn ha hngoaimawva tung theila, ‘Byttih ha thoo bya khyang cyppei theila kei hngica nyak ky khyammei lawh, tinyak khyang khyaukhaw pahuat pyt jyang pang theila ky hyau hnguːt,’ ” tila y hyau.

22Ynbawlakhy Jesuh tala lyam poaija ky hnguat khiannyng Palestine uptih Felix myang naa, “nyangmi bawng jaapuː lian Lysias phawlu hnguva, kei na hngica theila ky cijang ngy,” tinaw theila yn bawng y khuːnkawh. 23Yn pynnyng yn na khyang lian nyng Pawluh to haija meihzaw shyaksa nyak bei theila y juːjawng ha na lupan lu nyak khyang kawkat kaw haija y hyau.

Pawluh Ce Felix Myang la Drusilla Myang Hngoaimawva

24Khuhnguːp meihzaw diev hnguva palestine uptih Felix myang ce y pihia thawntih Judah juː hngutaw Drusilla dy y lu. Yn pynnyng Pawluh pannei theila Pawluh susaih khyang Jesuh Khrit bawng y hngih ngei. 25Ynbawlakhy Pawluh ce puːnpok nyak tala bawng, y pumhngaw cuːmkyn nei khyang ha la thawnlu hai talacijang nyak ha y hyau hnguva, palestine uptih Felix myang na kyh theila, “Tuh a nyang zet bya. Atha mok huat cuːn myi hnguva ky pan bua ey,” y tinyak. 26Ynhngu kunga y pumhngaw vyng Pawluh na kutpuan y bei jy tila uːtnyak khiannyng, yn diev kawva pannei theila khyau y hyau.

27Kum hngih diev pynnyng Porcius Festus myang ce Palestine uptih Felix myang duːn y lovei bya. Felix myang na Judah ha cenga hngoai lawhei hluː khiannyng Pawluh phehimm dukka ym kyak.

Currently Selected:

Ceepaw 24: NTHTB25

Highlight

Copy

Compare