Ceepaw 22

1“Ky benau la paw tih ha aw, tuːh a kei hyau bya ey khyang ngei jyt,” tila y phun.

2Yn ha eyng Hebre be ja y hyau khyang ym jyak hnguva, yn ha ce byakkhy tii kawva ym myi voih.

3 # Cee 5.34–39 “Pawluh na Cilicia pe Tarsus luh a myitih Judah ky si, ynbawlakhy ni luh ky lianlu. Mymi shyakai ha tala bawtyng nga Gamaliel cenga cawkei tih ky si. Tuhnguːp pa nyangmi tomti na Nuatpaw tawk lung na eijei nyak bawva, kei khycee ky lung na eijei. 4#Cee 8.3; 26.9–11Kei ce myn Nuatpaw Lyam lawnglyktih ha byt hnguna phehphaei theila hngutaw la putaw ha muan theinga phehimm dukka ky kyak hnguːt. 5Jahhenpaw Lian la kongci lian tomti na saksi ym duan nyn. Kei ce Damascus luh a myitih benau ha cenga jok khyang caw ha lovei theila ynija myitih yn ha khy khawnhyan theila Jerusalem luh a lu theinga pet bei jy tawk Damascus luh a ky zet.

Pawluh Saksi Khyam Nyak

(Ceepaw 9.1–19; 26.12–18)

6“Kei ce Damascus luh ka a ky lu hnguva, Khusun nyng catnyaknawva kei kika huankhu kuːh ava anglu. 7Kei ce dekkyng gu theila kei jyang hyau khyang thai pahuat ce, ‘Sawluh, Sawluh! Ibawthawnnyng kei ny phehphaei ma?’ y tii. 8‘Kei na, Mawhpaw aw, nyang u ma?’ ky tinyak hnguva, ‘Kei ce nyang phehphaei khyang Nazareth luh zawpaw Jesuh ky si,’ tila y hyau. 9Kei bawngpui ha na ava ym hnguh, yn bawlakhy kei jyng ynih hyau khyang thai ce yn ha na jaw joaw. 10‘Kei na, Mawhpaw aw, Kei na ibawva ky cai lawh ey ma?’ tila ky hngi. ‘Mawhpawe na, Thoo, Damascus luh dukka zet. Yn luh a nyang cai jy khyang ha nyang ngyng y saih jy,’ tila y hyau. 11Ky bawngpui ha na ym kuːt tyng hyi theila Damascus luh lyaamma ym zehpui nyak, ibawthawnnyngma tijyngcee yn eangtih ava khiannyng kei ce ky mik hung.

12“Yn hnguva Ananias mingnawtih khyang pahuat ce kei to haija kei cenga y lu. Yn ce tala kyhkhiat theila yn luh a myihtih Judah khyang tomti cenga kyhkhiat khyang y khyam lawh. 13Yn khiannyng kei cenga y lu, kei ka tung theila, ‘Ky nau Sawluh aw, ny mik va seh!’ tila kei jyang hyau hnguva, yn kikawvyng kei ce yn ky hnguh. 14Yn pynnyng yn na, ‘Mymi shyakai Nuatpaw ce y pumhngaw luː hnguat ty tawk, Puːnpoktih mawhpaw hnguh lawh ey tawk la y mong ngyng kuːh khyaukhaw jyak ky tawk nyang hngyahei hnguːt pyn. 15Nyang ce ny hnguh lawh, ny jyak lawh khyang ha tawk khyang ha hngoaimawva yn mawhpawe tawk saksi a thawn lawh ey. 16Tuh a khy nyang ce ibawthawnyng ny zong ma? Thooh, baptisma khyammei byih. Ynih ming pannei tila nyang pet ha pattei byih,’ tila y hyau.

Khyang juː cya eyng Susaih haija Pawluh pan khyammei Nyak

17“Kei Jerusalem luh kuːh zet bya theinga biatimm ma hngihminnei nyak ky cai hnguva lunghnguːn khyang ky hnguh. Yn lunghnguːn ngyng Nuatpaw na kei jyng, 18‘ni luh saw ha na kei bawng nyang ngyng saksi khyam khyang ym dynnei jy kaw khiannyng, nyang Jerusalem luh kuːh ajyanga zet,’ tila y hyau. 19Kei na, ‘Mawhpaw aw, kei ce sinakok pahuat pynnyng pahuat zet theinga nyang jummeitih ha thawng khaw theinga phehphaei khyang yn ha na ym hnguat. 20#Cee 7.58Nyang saksi khyamtih Stephen tuk khyammei lawh hnguva, kei khy ynija tung theinga y shawphawtu tih a thawn theinga yn tutih suishyak ha ky zong hnguːt,’ tila y hyau bya. 21Ynhnguva Mawhpawaw na, ‘Zet; kei na nyang khyang juː cya ha cenga apan nawva ky tuːh ey,’ ” y tinyak.

22Khyang puː ha na Pawluh hyau khyang cyp ym ngei. Pawluh susaih khyang ym jyak hnguva, ym thai jyau tih a pang theila, “Ni byang khyang, myn somdek huanna tukyiv paw! yn ce syak hiyang tuan jo,” tila ym hyau. 23Yn ha ce pang theila ym suishyak sut theila dyyi theila dek hnguːuːn ha ki huanna jawngpai jok, 24theila, yn hnguva jaapuː lian na Pawluh junga zeh ey khyau y shin. Yn na “Khyang puː ha ce ibawthawnnyng ynbawva luːvei kawva ym pang khyang hnguat ty tawk, yn jooi jyng shuat theila hngi byih,” tila y hyau. 25Yn ha na ynih joii jyng ym khawnn hnguva, Pawluh na y ka tungtih khyang lianzaw eyng, “Nyangmi ce Roma pe shaw pahuat hngi kawva jooi jyng nym shawh khyang tala eyng cyppei jei,” tila y hngi.

26Yn khyang lian na y jyak hnguva, yn ce jaapuː uptih cenga zet theila y saih jei. “Ibawva ny puhcai jy ma? Ni khyang ce Roma luh shaw y si,” y tinyak.

27Yn hnguva jaapuː uptih ce Pawluh cenga zet theila, “Kei jyng hyau cyam, nyang ce Roma luh shaw vei,” tila y hngi.

“Yih ky si,” y tinyak.

28Jaapuː uptih na, “kei ce luh shaw ey tawk tangkaw panu ky bei lawh,” y tinyak.

Ynbawlakhy Pawluh na, “kei cee Roma luh shaw a ky myi hnguːt,” y tinyak.

29Yn khiannyng Pawluh hngica hai ha khy yn cengkuːh ym gajyaang hlyi. Pawluh ce Roma luh shaw thawn khyang jaapuː uptih na y hnguat hnguva yn khawnhyan haija ky hyau khyang ky kyh.

Kongci Hngoaimaw va Pawluh Phaw Nyak

30Jaapuː uptih na Pawluh ce ibawthawnnyng Judah ha na ym uːtnyak khyang hnguat ty y luː. Yn pynnyng atha hnguːp pyng Pawluh khawnhyan khyang sut theila Jahenpaw lian ha la kongci bawng ha na dynnei jy y hyau. Yn pynnyng Pawluh lu theila yn ha hngoaimaw va y tung shyak.

Currently Selected:

Ceepaw 22: NTHTB25

Highlight

Copy

Compare