Ceepaw 21

Jerusalem Ma Pawluh Zetnyak

1Keimi ce yn ha dy ka pynnyng, tuiisamphua eyng Kos khongphai lyamma kym zet hlyi. Atha hnguːp pyng yn khongphai ja kuːhthuh Rhodes khongphai lyamma zet theila, yn nyng kuːhthuh Patara luh lyamma kitawlawng ngyng kym zet bya thuːh. 2Yn nyng kuːhthuh keimi ce Phoenicia pee lyamma hlei bya hai, tuisamphua pahuat hngu theila yn tuisyamphua dyangei awnga kym joon. 3Cyprus khongphai jaa suttei theila aping lyam zehtaw awnga, Syria lyamma tuisyamphua eyng kym zet bya thuːh. Tyre luh a lawkla ha kyak ky tawk tuisamphua yn luh a kym hap. 4Ynija keimi na hngulawnglyktih yciya ha khawmmei theila yn ha dy hnguːp syh kym myi. Yn ha na Muikaw na duan khiannyng Pawluh eyng Jerusalem luh a zet kaw haija ym hyau. 5Yn khiannyng zet bya ey acuːn phawlu hnguva, keimi ce lyam kym zet bya thuh. Yn ha tomti ce ym pihia la ym zaw ha dy keimi luh thua cyp ym thyaak lu, ynpynnyng tuiikhyam cyp kym phaw hnguva keimi ce khukdya theila kym hngihminnei. 6Yn pynnyng pahuat la pahuat ga theila, keimi ce tuisyamphua huanna khuai theiawnga yn ha khycee ym imm hngaw a ym zet bya.

7Tyre luh kuːh Ptolemais luh a kym phaw hnguva, zeh nyak panglai lyam khy apyih. Yn luh a myitih jummeitih ha eyng tyammeijei tijyang hyau theila yn ha cenga hnguːp huat kym om. 8#Cee 6.5; 8.5Atha hnguːp huat tyng keimi ce yn luh a khuːh zet theila Caesare luh a kym phaw pynnyng, khyang syh dukkuːh sityang poai saih tih pahuat ta thawntih Philip imm ma voang theila kym awm. 9Yn na putaw lawh hyamtih kaw hngawei nyntih nguakhnguzaw pahli y tyakkei. 10#Cee 11.28Yn imm ma khuhnguːp diev va kym awm hnguva, Agapus mingnawtih hngawpaw pahuat Judah pe ja khuːh y komlu. 11Yn ce Keimi cenga y lyng lu, yn ce Pawluh ziang joii lovei theila y pumhngaw kuːt la khu vyng khawnn theila, “Muikhaw Cim na, Judah ha na myn ziang jooi mawh ce Jerusalem luh a ynbawva khawnn theila khyang juː ciya ha kuːt tyng ym yappy,” tila y hyau.

12Yn kym jyak hnguva, keimi la ynija myitih khyang ha na Jerusalem luh a zet kaw haija Pawluh eyng khawhei awnga kym hyau. 13Yn pynnyng Pawluh naa, “Nyangmi ce gap theila kei lungbawng ngiamiang nyak ky ibawthawnyng nym cai ma? Kei cee Jerusalem luh a phehimm kyak khyam my ce kawm cyang la Mawhpaw Jesuh ming tawk byt khyam my jyangjyai ky myi,” y tinyak.

14Keimi na Pawluh eyng khawhei jy lawh kaw hnguva, keimi na kawhlak theila, “Mawhpaw luː tyng si seh,” kym tinyak.

15Yn pynnyng, keimi cee Jerusalem luh lyamma kym zet. 16Caesare luh kuːh hngulawnglyktih acya ha ce keimi dy huattyng lyk lu theiawla, yn ha na hngulawnglyk pyam pahuat ta thawn tih Cyprus khongphai zaw Mnason#21.16 Mnason imm ma awm my tawk y zehpui nyak; sikawvyngcee yn khyang imm ma awm my tawk imm mawh dy keimi zehpui nyak. imm ma awm my tawk y zehpui nyak.

James cenga Pawluh Lyngei Nyak

17Keimi Jerusalem luh a kym phawlu hnguva, jummeitih ha na keimi poaija ym dovei. 18Atha hnguːp pyng Pawluh cee keimi dy huattyng James khawmmei jy kym zet hnguva, jummeitihtpuːpaw khyanglian tomti khy ym kunglu. 19Pawluh ce yn ha eyng tyammeijei tinyak pynnyng, y pumhngaw khuːtbi khyang, khyang juː cya ha huana Nuatpaw puhcai khyang pahuat pynnyng pahuat y susaih. 20Yn ym jyak hnguva, yn ha na Nuatpaw ym khuːhbia nyak. Yn pynnyng Pawluh na, “Nau tih aw, Judah dukka myitih jummeitih ha a thawng shawng nga myi theila, yn ha tomti ce tala ym lung ngyng einawtih ha ym si. 21Nyang ce khyang juː cya eyng myitih Judah tomti jyng Mosee tala dyyi zawla, yn ha dikzaw ha eyng vuːnnmonghleih cai kaw haija mymi thumcian tyng nga lyklyam kaw haija cawkhyau khyang yn ha na ym jyak pyn. 22Mymi na ibaw my cai tuan ma? Nyang lu khyang yn ha na ym jyak tengteng ky, 23yn khiannyng keimi na nyang ngyng hyau baw tyng nga cai byih. Keimi jyng setzaw tawtih khyang pahli ym myi. 24Yn khyang ha pannei theila, nyang khycee yn ha huattyng cimcyang nyak cai byih. Yn ha lu viuh#21.24 Yn ha lu viuh: To 18.18. nyak ky khy apyih tih tomti khy nyang na bei byih. Ynbawva nyang kawng khy yn ha na ym hnguat khyang sityang cee ahngoan kawva nyang pumhngaw na jyang tala lyklyam khyang, khyang tomti na ym hnguat lu vy. 25#Cee 15.29Jummei lutih khyang juː cya ha tawk ce, yn ha ce luːpcom khyang ngyng hluhbawn nyak meh ei khyang, thii ei khyang, hngyaa hak theila tuk khyang hyangsei shawei khyang, la tala eyng cyppei tih kaw byiunyak khyang ha phenphaei jy, keimi na hnguːncap theila cawjok theiawnga kym bei pyn,” tila ym hyau.

26Atha hnguːp pyng Pawluh ce yn khyang pahli pannei theila yn ha dy huattyng cimcyang nyak y cai. Yn pynnyng biatimm ma zet theila, yn ha pahuat cuːm tawk, hluhbawn ny acuːn thawn khiannyng, cimcyang nyak cai khyang khuhnguːp pyih jy acuːn y hnguat jyak shyak.

Biatimm Dukka Pawluh Muan Nyak

27Khuhnguːp hnguːp syh phawlu hnguva asia lyamma khuːh luutih Judah ciya ha na biatimm dukka Pawluh hngu theila khyang ha tomti vyng ym thukthawn. Ynpynnyng yn muan theiawla, 28“Israel khyang ha aw!” phuimaw paw. “Ni khyang ce mymi khyang juː ha khy si seh, tala la ni biatimm khycee khymka theila duːn tyng ngyng myitih khyang tomti eyng cawkhyau tih y si. Yn tuan kawva Greek khyangjuː ha biatimm dukka lu theila ni cimcaih tih duːn y coplap shyak,” tila pang theila ym hyau. 29#Cee 20.4(Yn bawva ym hyau khyang cee yn ha na pawluh ce acuːkka Ephesus luh shaw Trophimus dy luh dukka pawluh ym hngu khiangnyng, pawluh ce yn ha biatimm dukka y zehpui nyak tila ym uːtnyak khiangnyng a si.)

30Ynhnguva luh duk tomti lingso khiangnyng khyang ha ce ym lawh nyak lyamma ym zen. Yn khiannyng pawluh khy muan theiawla biatimm pumtua shyt awla shawt ha khy saisikung ym khah giah. 31Yn ha na pawluh tuk ky ym cai hnguva, Jerusalem luh tomti lingso theila sityang ce Roma jaapuː uptih pahuat khyanglian cenga a phawei. 32Jaapuː uptih na jaapuː khyanglian ha la jaapuː ha pan theila khyang puː ha cenga zon theila y kommei. Khyang puː ha na jaapuː uptih ym hnguh hnguva Pawluh ym shawhciau khyang ym duːmmei. 33Ynhnguva jaapuː lian ce yn ha cenga lu theila pawluh ym muan khyang thijoii pahngih eyng khawnny y hyau. Yn pynnyng y na pawluh ce u ma tinyak khyang la i y cai hnguːt ma tila khyang puː ha eyng y hngi. 34Ynbawlakhy khyangpuː dukkuːh pahuat juːhuat cija paang awla khuhlingkhucing thawn khiannyng, jaapuː lian na ahngoan tih hnguat nyn jo. Yn khiannyng pawluh jaapuː ha myih nawva zeh ey y hyau. 35Yn hnguva Pawluh ce hlyak ceng y phaw hnguva, khyang puː lingso khyang ce khonglu khiannyng, jaapuː ha na Pawluh juːk awla ym zehei. 36Ahnguva lyklu tih khyang puː ha na, “Yn tu vyt” tila ym pang.

Pawluh Na Khyangpuː ha eyng Khyau Nyak

37Jaapuː ha na Pawluh jung nga ym zehei hngyhtian hnguva, Pawluh na jaapuː lian nyng, “Nyang la kei khyau meihzaw hyau maw vy,” tila y bih. Jaapuː lian na, “Nyang na Griik be ny hyau tuattei?” y tinyak.

38“Cuːkka lingso tih ha sunnei tih khyang thawng pahli khongkhuca a zehpui naw tih Egypt khyang juː cee nyang si jo ti jei,” tila y hngii.

39Pawluh na, “Kei ce Judah khyang juː ky si, Cilicia pee Tarsus luh shaw pahuat ky si. Khyang puː ha eyng khyauvei jy tawk kei na ky bih,” y tinyak.

40Jaapuː lian na khyauvei jy bei theila Pawluh cee hlyak huanna tung theila khyang puː ha duːmmei haija y kut duan. Khyang puː ha jaadyam hnguva Pawluh na Hebre be jyng khyau y hyau.

Currently Selected:

Ceepaw 21: NTHTB25

Highlight

Copy

Compare