Ceepaw 14

Inconium Luh A

1Pawluh la Barnabas ce Iconium luh a y hngih susaih shoi baw tyng nga Judah sinakok dukka voang theila khiannyng Judah khyang la Griik khyang panukung ha ce jummeitih a ym thawnlu. 2Ynbawlakhy jummeitih kaw Judah ha na aciya khyang juː ha kok theila benautih ha huanna myangshing lung tawvei haija ym thooh. 3Yn hnguva Pawluh la Barnabas ce acuːn byangveih myi awla, Mawhpaw tala khyaukhaw kyh kawva ym susaih. Mawhpaw na khy yn hyih kut tyng mikhnguh nyak la muːnawseetih ha duan shyak theila, ynih khunkhyi jyng cyptih tala khyaukhaw sitinyak khyang saksi ym duan. 4Ynbawlakhy luh a kuːh khyang ha cee khoijei awla; aciya ce Judah lyamma pui theila aciya ce ceepaw ha eyng ym pui.

5Yn hnguva khyang juː ciya la Judah ha na yn ha khyanglian ha dy ceepaw ha phehphaei awla lung ngyng khong ngy yn ha ym cijang. 6Ynbawlakhy yn bawng yn ha na ym hnguat hnguva, Lycaonian pe ja myitih Lystra luh la Derbe luh eyng lawijeitih kika duːn na zenzun awla, 7yn duːn ha khy sityang poai ym susaih.

Lystra Luh La Derbe Luh A Susaih Nyak

8Lystra luh a y myihngu kuːhthuh lyam zet nyn tihkaw khyang pahuat myi. 9Yn na Pawluh susaih khyang y ngei. Pawluh na y do hnguva ynih na kaangsa bya hluː khyang jummeinyak y tyakkei khyang y hnguh. 10Yn hnguva, “Thoo theila tung!” tila y hyau. Yn hnguva yn khyang ce dawng theila zet ty y phun. 11Khyang ha na Pawluh cai khyang ym hnguh hnguva, “nuatpaw ha khyang nga shawngei theila mymi cenga kom lu pyn,” tila Lycaonian be jaa ym pang. 12Yn ha na Barnabas ce Griik nuat Zeus tila ming ym sui, Pawluh ce susaih nyak kyng liantih a thawn khiannyng Hermes tila ming ym sui. 13Zeus jahenpaw biatimm ce luh tua a myi. Yn nuat jahenpaw ce khyangpuː ha dy huattyng ceepaw hyih ja thawntih Pawluh la Barnabas tyng henbawn ny ym luː khiannyng, shyashyang la papar shawm luh kyt cenga ym lu.

14Ynbawlakhy ceepaw Barnabas la Pawluh na yn ym jyak hnguva, y hngih suishyak shut tiak theila khyang ha puːm dukka zun theila y hngih pang. 15“Khyi tih ha aw, ibawthawnnyng ni byang nym cai ma? Keimi khy cee nyangmi bawva khyang kym si. Nyangmi ce a khyngtih kaw ha dyyi zawla huankhu, somdek, panglai, la yn ha dukka myitih kuːmkuːt comoatih syak hiyang tih Nuatpaw cenga lu bya ey tawk keimi ce nyangmi jyng sityang poai susaih haija kym lu. 16A pyih hnguːt tih acuːn nyng khyang juː tomti ym pumhngaw lyam zetty Nuatpaw na y hluːh. 17Ynbawlakhy Nuatpaw ce nyangmi jyng maannei nyak kyng huankhu kuːh khuaw shyak theila acuːn tyngngyng eiawk ky oansee ha athawn shyak. Eiawk khy ha khy panukung bei theila nyangmi lungbawng jyjo nyak kyng y kuːm shyak. Yn bawva Nuatpaw na y pumhngaw myi khyang a hnguː hnguːi saksi jyng y duan hnguːt,” tila pang awla y hngih hyau. 18Yn khyaukhaw hyau lakhy, yn pumhngaw vyng henbawn kaw haija khyang puː ha kaei tih a y hngih kawkat lawh.

19Yn hnguva Judah khyang avoang ce Antiawk luh la Iconium luh kuːh ym lu. Pawluh lung ngyng khong theila y byt pyn tijyng taw awla luh tua yn ym lawt tei. 20Ynbawlakhy ynih kika a hngulawnglyk ha dynnei lu awla, Pawluh cee thoo theila luh dukka y zeh bya. Atha hnguːp pyng Barnabas la Pawluh ce Derbe luh kuːh y hngih zet bya.

Syria pee Kuːh Antiawk Luh A Lu bya Nyak

21Yn luh a sityang poai susaih theila hngulawnglyktih ha panukung y hngih tyak. Yn pynnyng Lystra luh, Iconium luh la Pisidia pee kuːh Antiawk luh a ym lu bua. 22Yn ha na, “Mymi ce sanglaicyhei panukung khyam hyak kyng Nuatpaw teengpee ja ym voang lawh ey,” tila hyau theila, yn luh a myitih hngulawnglyktih ha lungbawng cang shyak theila jummeinyak ahngoan nyng myi shoi haiawva yn ha eyng thabei khyang y hngih hyau hnguːt. 23Pawluh la Barnabas na jummeitihpuːpaw pahuat cuːm myng kuːh lianzang tih ha hngyah theila ym yap. Yn pynnyng jahei theila hngihminnei nyak kyng yn ha uːmmei khyang Mawhpaw cenga ym yap.

24Ynpynnyng Pisidia pee lyamma zet theila Pamphylia pee jaa y hngih lu. 25Perga luh a khyaukhaw susaih pynnyng Attalia luh lyamma y hngih zet. 26Yn Attalia luh eyng kuːhthuh lawng ngyng cun theila, Antiawk luh lyamma y hngih zet bua. Yn luh ce tuːh a cyng hnguːt tih Nuatpaw khunkhyi jyng yap hnguːt tih luh a si.

27Ynija y hngih phawe hnguva, jummeitihpuːpaw huattyng dynnei theila yn ha khiannyng, Nuatpaw cai hnguːt khyang ha tomti khy si seh, aciya khyang juː ha na jummei lu haija Nuatpaw na shawt hngawn khyang khy si seh ym susaih. 28Ynpynnyng yn luh a hngulawnglyktih ha dy byangveih kung y hngih myi.

Currently Selected:

Ceepaw 14: NTHTB25

Highlight

Copy

Compare