JEJU KƏ́ NGŌN̄ SIRAK 1
1
Makətūbə̄ kə́ ta kəga dɔ yā yá̰á̰ ndóō gə̄
Yá̰a̰ yā kum kedə̄ kə́ lo ger̄ loon gətóo
1Kum kedə̄ malang ḭḭ i rɔ̄ Kɔ́ɔ̄ɓē tə́,
i ni n aw̄ń ngándáńg ní.
2Nán̄g kə́ kum bā bo gə̄ tə́ ō, man̄ ndī kə́ tə́sō kok kok gə̄ ō,
ndɔ̄ gə̄ kə́ ta kəla gíŕdə́ gətóo ō ta tɔ̄l̄ tadə́ gətóo ō ní, i náā n asə tə́da kutədə́ ní?
3Ngāl̄ dɔ rā̰ kə́ kə̄ dɔɔ́ ō laa dɔ nang ō
ɗúu ɓūl̄ man̄ ō ní, i náā n a aw̄ tū tə́ yā kəndā ma̰ȳ kə gōó ní?
4Rāān̄ kum kedə̄ i kété no yá̰a̰ gə̄ tə́ malang,
ger̄ kum najə̄ to i jōó.#1.4 Kem makətūbə̄ kə́ ngá̰ý gə̄ tə́ ní, kəlān kə́ nge kṵ mí gətóo tū tə́.
6I náā n teēn̄ kumən dɔ ngəra kum kedə̄ tə́ ní?
I náā n ger̄ yá̰a̰ gə̄ ń ni rāādə́ tɔ̄l̄ ta ní?#1.6 Kem makətūbə̄ kə́ ngá̰ý gə̄ tə́ ní, kəlān kə́ nge kṵ sīrí gətóo tū tə́.
8I de kə́ kal kógə̄ḿ beē n i nge kum kedə̄ ní, ni to ɓōĺ ngá̰ý.
Ni i nge ń ndi dɔ kōr̄ kāgə̄ mbang yān tə́ ní.
9I Kɔ́ɔ̄ɓē nəkɔ́ n rāan ní,
ni a̰a̰n ō, mbɔ̄jə́n ō,
tə̄ndā tḭ̄ḭn kə̄ dan yá̰a̰ rāan gə̄ tə́ malang ō.
10De gə̄ malang ní, ni adə̄də́ kum kedə̄ ngá̰ý,
ba i ngé gə̄ ń tárnən̄ ní n adə̄də́ adə̄ mān̄ dɔ yā madə̄də́ gə̄ ní.
Deē a̰a̰ kṵ ɓē yā Kɔ́ɔ̄ɓē ger̄
11Ɓōĺ ndíĺ Kɔ́ɔ̄ɓē i kɔsə go̰n ō, i kənda kadə ō,
i rɔ̄nel̄ ō, i jākā rɔ̄nel̄ kə́ ngá̰ý ō.
12Ɓōĺ ndíĺ Kɔ́ɔ̄ɓē rāā adə̄ kem deē nelə̄n ō,
rɔ̄ deē nelə̄n ō, dɔ kum deē i kə rɔ̄nelé ō, deē ndi dan i ngá̰ý ō.
13Deē ń ɓōĺ ndíĺ Kɔ́ɔ̄ɓē ní, ta tɔ̄l̄ ta yá̰a̰ malang a majə tām̄ yān tə́,
a tɔ́rə̄n̄ tadə́ dɔn tə́ ndɔ̄ yon tə́.
14Ɓōĺ ndíĺ Kɔ́ɔ̄ɓē i ta kəla gír kum kedə̄ ō,
rāān̄ ɓōĺ ndíĺ Kɔ́ɔ̄ɓē i naā tə́ kə ngé kəhɔ gō Kɔ́ɔ̄ɓē gēé kem kṵ́ṵ́də́ gə̄ tə́ ō.
15Ɓōĺ ndíĺ Kɔ́ɔ̄ɓē rāā ɓē yān kə́ to ngándáńg dan de gə̄ tə́ ō,
a ra dɔ ndūn tə́ kə ngáńdə́ gēé ō, ngán kaadə́ gēé ō. 16Kum kedə̄ kə́ ngá̰ý i ɓōĺ ndíĺ Kɔ́ɔ̄ɓē.
Ni adə̄ de gə̄ kanə̄n gə̄ ngá̰ý adə̄ al̄naā.
17Yá̰a̰ gə̄ ń nin̄ gḛyn̄ ní, ni adə̄də́ adə̄ rosə kem kújə yādə́ malang ō,
kan̄ yá̰a̰ yān gə̄ rosə kem mōȳ yādə́ gə̄ ō.
18Jākā mbang yā kum kedə̄ i ɓōĺ ndíĺ Kɔ́ɔ̄ɓē
ń rāā adə̄ lɔm to ō, rɔ̄ ngan̄g to ō ní.
19Ni rāā adə̄ deē ger̄ kum yá̰a̰ gə̄ ngá̰ý.
Ngé gə̄ ń ɓōlə́n̄ ndíĺ Kɔ́ɔ̄ɓē ní, ɓōĺ ndíĺ Kɔ́ɔ̄ɓē ɔsə go̰ndə́.
20Kum kedə̄ to i tītə̄ kāgə̄ kə́ ngəran i ɓōĺ Ndíĺ Kɔ́ɔ̄ɓē ō,
ta jīn kə́ tɔ̄ɔ̄ gə̄ i ndi kə kumuú kə́ dan i ngá̰ý ō. #1.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
Kadə̄ deē tə́gā tan ō, əhɔ kemən ngan̄g ō
22Wūn̄g kə́ gōtə́ aĺ ní, deē asə ndigə najə̄ gōn tə́ alé.
Tɔdɔ̄ yá̰a̰ rāā de kə́ nge wūn̄g a aw̄ seneé i yā tḭ̄ḭ̄ tan.
23Nge tə́gā tan əhɔ rɔ̄n tɔgə ndi jəke, bátə́ ugə̄ kum mbang kə́ majə tə́.
Ta tɔ̄l̄ ta anī, ni tél ənge rɔ̄nel̄ gogə́.
24Yá̰á̰ ń ni gír̄ ní əda alé, bátə́ kadə̄ kum mbang kə́ majə ugə̄ń.
Lo ń nuū tə́ de gə̄ malang a ədan̄ na ni i nge ger̄ kum najə̄ gə̄.
Kə́ yā kadə̄ deē ndɔ́təń ngɔr kə̄ rɔ̄ Nə́ɓā tə́
25Gōsə̄ najə̄ gə̄ yā yá̰a̰ ger̄ i dan yá̰a̰ kənge gə̄ kə́ gātə̄də́ i ngá̰ý yā kum kedə̄ tə́.
Banī kəhɔ gō Nə́ɓā i yá̰á̰ kə́ majə aĺ ngá̰ý tām̄ yā nge rāā majaĺ tə́.
26Ḭ̄ nge sāā kum kedə̄ ī-rāā yá̰a̰ gə̄ ń Kɔ́ɔ̄ɓē əda ní,
anī ni a adī kum kedə̄.
27Tām̄ kum kedə̄ ō, yá̰á̰ ndóō ō, i ɓōĺ ndíĺ Kɔ́ɔ̄ɓē.
Yá̰á̰ kə́ nelə̄n i ra dɔ ndū tə́ ō, i háĺ kə́ sɔl̄ lɔ́ḿ lɔ́ḿ ō.
28Ī-lōō mbātə́ ɓōĺ ndíĺ Kɔ́ɔ̄ɓē.
Ī-lōō reē rɔ̄n tə́ kə kem kə́ jōó.
29Ī-lōō kadə̄ ḭ̄ i de kə́ nge gól̄ lo ta kum de gə̄ tə́,
banī ə̄ndā kumií gír najə̄ kə́ a teē taí tə́ tə́.
30Ī-lōō kɔsə rɔ̄í ḭ̄kɔ́ kə̄ dɔ̄ɔ́ na sōgə́ ə̄sō ō,
ə́la rɔ̄sɔl̄ dɔ rɔ̄í tə́ ō.
Tɔdɔ̄ yá̰a̰ yāí gə̄ ń ton̄ lo mundə̄ tə́ ní Kɔ́ɔ̄ɓē a teēń ndágá ō,
a əla rɔ̄sɔl̄ dɔí tə́ dan ngé kán̄ naā gə̄ tə́ ō.
Tɔdɔ̄ ḭ̄ ī-reē rɔ̄n tə́ i kanjə̄ ɓōĺ ndílən ō,
gól̄ lo rosə kemií ō.
Currently Selected:
JEJU KƏ́ NGŌN̄ SIRAK 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.