JEJU KƏ́ NGŌN̄ SIRAK 9
9
Ger̄ lo ndi kə dəyá̰ gēé
1Ré ī-tár nə̄yá̰í anī, ī-lōō kadə̄ kemií rāāī dɔn tə́,
na sōgə́ ī-ndóōn lo rāā yá̰á̰ kə́ majə aĺ seí.
2Ī-lōō kəya̰ rɔ̄í kadə̄ de kə́ dəyá̰
bátə́ kadə̄ ṵṵ ɓē dɔí tə́.
3Ī-lōō kəla gír njə̄rā kə̄ rɔ̄ ájə́ba kɔ̄r̄ tə́,
na sōgə́ ə̄sō kum réng yān tə́.
4Ī-lōō ndi kadə gōsə̄ pā kə́ dəyá̰ kə́ nge kugə kənde tə́ bátə́ kadə̄ kum mbang mān̄ dɔí tə́,
na sōgə́ ə̄sō kum gól̄ yān tə́.
5Ī-lōō ka̰a̰ ngōmandə ngá̰ý,
na sōgə́ gāngə̄n̄ sarya dɔí tə́ seneé.
6Ī-lōō kəya̰ rɔ̄í kadə̄ ájə́ba gə̄,
na sōgə́ ī-tḭ̄ḭ̄ ta yá̰a̰ ndəbā yāí malang najə̄ yādə́ tə́.
7Ī-lōō ka̰a̰ lo kə̄ lo gə̄ tə́ kum róbə kɔsə gə̄ kə́ kem ɓēé tə́ ō,
dáȳ lo gə̄ kə́ de gə̄ gətóon̄ tū tə́ tə́ ō.
8Ún kumií kɔ̄ɔ́ ta dəyá̰ kə́ mandə ngá̰ý tə́.
Yá̰á̰ kə́ majə ń i yāí aĺ ní, ī-lōō kadə̄ kumií ra gotoó dɔ tə́.
Ta de gə̄ ngá̰ý tḭ̄ḭ̄ najə̄ yā majə dəyá̰ tə́,
tām̄ majə dəyá̰ rāā adə̄ ɓōō dəyá̰ rāā deē tītə̄ hor kə́ mbutə bup a ṵṵ beé.
9Ī-lōō ndi kadə nə̄yá̰ deē tə́,
ī-lōō ka̰ȳ kasə nduú rāań rɔ̄nel̄ naā tə́ seneé,
na sōgə́ ngurən rāāī ō,
kemií ḭḭ huy adə̄ ī-ger̄ najə̄ tṵ aĺ ō, njaí rəte adə̄ ī-teē ə̄sō ō, taí tḭ̄ḭ̄ ō.
Ger̄ lo ndi kə dəngam gēé
10Ī-lōō kəya̰ madə̄ taí kə́ jóo kɔ̄ɔ́,
tām̄ madə̄ taí kə́ kijə asə seneé alé.
Madə̄ taí kə́ kijə to i tītə̄ kasə nduú kə́ kijə beé:
dan ń a tɔgə tá ā̰ȳ a nel̄ taí ɓáý.
11Ré nge rāā majaĺ rāā yá̰a̰ ba teēn yá̰á̰ tə́ anī, ī-lōō ndə̄ngā.
Ta tɔ̄l̄ tan kə́ to rɔ̄nel̄ aĺ ń to a ngóōn ní, ḭ̄ ī-ger̄ alé.
12Ré kəla rāā ngé rāā yá̰a̰ kə gō kem ndigə yā Nə́ɓāá aĺ gə̄ teēdə́ yá̰á̰ tə́ anī, ī-lōō ndigədə́.
Ādə̄ əga kemií dɔ tə́ na bátə́ kadə̄ oynə̄ń ní, a ndin̄ kanjə̄ kənge ndéy alé.
13Deē ń i nge tɔ̄l̄ deē ní, ādə̄ ḭ̄ i rɔ̄n tə́ ngɔr alé,
anī ā ī-ɓōĺ yo alé.
Ba ré ā ī-reē rɔ̄n tə́ anī, ī-lōō rāā yá̰á̰ kə́ gōtə́ aĺ
na sōgə́ tɔ̄lī.
Majə kadə̄ ī-ger̄ na ā ī-njə̄rā i dan gūmbə̄ gə̄ tə́ ō,
dɔ ndogə̄ mbal̄ kə́ gīr̄ gidə ɓē tə́ ō.
14Ré ə́nge ta róbə anī, ī-ndəle nja deē madí ō,
ōōī naā kə ngé kum kedə̄ gēé ō.
15Ī-wál̄ najə̄ kə de gə̄ kə́ kur̄ dɔdə́ to nuú gə̄ ō,
ādə̄ najə̄ kɔrí gə̄ malang i dɔ ndū najə̄ yā Nge Ndi dɔ rā̰ tə́ tə́ ō.
16Ādə̄ madə̄ kəsaí yá̰a̰ gə̄ i de kə́ súūmú gə̄.
Ādə̄ ɓōĺ ndíĺ Kɔ́ɔ̄ɓē i yá̰a̰ kənda kadə yāí.
Ngé kṵ ɓē gə̄
17Yá̰á̰ ń nel̄ de gə̄ ɓē kɔdə̄ gēé ní, i kəla ń rāān̄ kə jīdə́ ní.
Ba yá̰á̰ ń nel̄ de gə̄ rɔ̄ nge kṵ ɓē tə́ ní, i kum kedə̄ kə́ tū najə̄ kɔrə̄n tə́.
18De gə̄ kə́ kem ɓē yā nge ta ɓār̄ tə́ ɓōĺnən̄ ngá̰ý.
Deē ń wūn̄g rāan ní, najə̄ kɔrə̄n gə̄ rāā adə̄ nel̄ de gə̄ seneé aĺ ngá̰ý.
Currently Selected:
JEJU KƏ́ NGŌN̄ SIRAK 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.