JEJU KƏ́ NGŌN̄ SIRAK 8
8
Kəndā kum kedə̄ dɔ rɔ̄ tə́
1Ī-lōō gákə̄ deē ń tɔ́gən i ngá̰ý ní,
na sōgə́ ə̄sō jīn tə́.
2Ī-lōō kɔ̄l̄ kə nge kənge yá̰á̰,
na sōgə́ tɔ́gən tɔȳ yāí.
Tām̄ lɔ́r tḭ̄ḭ̄ ta de gə̄ ngá̰ý,
mban̄g gə̄ gə̄gē, rāādə́ adə̄ rāān̄ yá̰á̰ ń sɔɔ̄ kadə̄ rāān̄ aĺ ní.
3Ī-lōō gákə̄ de kə́ nge taa ɓār̄,
ī-lōō tə́nī kīr̄ kum hor yān tə́.
4Ī-lōō kɔsə kum kə de kə́ kɔjə̄ dūún,
na sōgə́ tájə̄ kaaí gə̄.
5Deē ń ndə̄ngā rɔ̄n tām̄ majaĺ yān tə́ ní, ī-lōō kɔ̄l̄ seneé.
Ādə̄ əga kemií dɔ tə́ na jḭḭ̄ malang ní, najə̄ i dɔjí tə́.
6Ī-lōō kídə̄ deē najə̄ tɔgə kə́ ni tɔgə kɔ̄ɔ́ tə́,
tām̄ danjí tə́ ní, de kə́rēý gə̄ a tɔgən̄ i mbée ō.
7Ī-lōō rāā rɔ̄nel̄ tām̄ de kə́ rang kə́ oy tə́.
Ādə̄ əga kemií dɔ tə́ na i gáŕ kadə̄ jḭḭ̄ malang ní, j-a j-oyiī.
8Najə̄ ń ngé kum kedə̄ gə̄ a ənīn̄ gotə ní ī-lōō kídə̄,
banī ə̄ndā rɔ̄í ta ndóō kāgə̄ najə̄ yādə́ gə̄ tə́.
Tām̄ ā ī-ndóō kɔjə̄ i rɔ̄də́ tə́ ō,
i nin̄ n i ngé kɔjiī lo rāā kəla kadə̄ de kə́ bo gə̄ ō ní.
9Gotə najə̄ kə́ jóo gə̄ yā de kə́ tɔgə ɓə́ga gə̄ ní, ī-lōō kəya̰ kɔ̄ɔ́
tām̄ nin̄ kɔ́ gə̄ gə̄gē ní, oōn̄ i ta ngé kojədə́ gə̄ tə́.
Ā ī-ndóō lo ger̄ kum najə̄ i rɔ̄də́ tə́ ō,
kum najə̄ kə́ yā tūr̄ kəda deē láẃ ní, ā ī-ndóō i rɔ̄də́ nin̄ tə́ ō.
10Ī-lōō kəla hor tū kúl yā nge rāā majaĺ tə́,
na sōgə́ hor yān ṵṵī.
11Ī-lōō kadə̄ ī-raī ta naā tə́ kə de kə́ nge ɓōĺ ndíl deē aĺ,
na sōgə́ sāā ta róbə kəhɔī kə najə̄ kə́ taí ḭ̄kɔ́ tə́.
12Deē ń tɔ́gən tɔȳ yāí ní, ī-lōō kadə̄n nar lo tə̄nā tə́.
Ba ré ādən anī, ī-rāā nar yāí ní yá̰á̰ kə́ ta tḭ̄ḭ̄ kɔ̄ɔ́ tə́.
13Ī-lōō kəndā rɔ̄í ta kə̄rā yā deē kə́ ḭ̄ ásə kəgā aĺ tə́.
Ba ré ə̄ndā rɔ̄í ta tə́ anī, ādə̄ əga kemií dɔ tə́ na i gáŕ kadə̄ ā ə̄gā.
14Ī-lōō rāā sarya kə nge gān̄g saryaá.
Tām̄ a gāngə̄n̄ sarya ní kadə̄ a majə i tām̄ yān ní tə́, sɔɔ̄ń kəla ń ni a rāā ní.
15Ī-lōō kaw̄ mbā tə́ kə deē kə́ usən yá̰a̰ alé,
na sōgə́ ni rāā adə̄ yá̰á̰ kə́ tōr̄ gə̄ tɔyn̄ tɔ́gí.
Tām̄ ni a rāā i yá̰á̰ ń kemən ndigə ní ō,
ā óy seneé sɔɔ̄ń yá̰a̰ rāā yān kə́ mān̄ naā wa̰t ō.
16Deē ń a rāā yá̰a̰ anī a əndā i tɔ́gən tá ta róbə́ tə́ ní, ī-lōō kadə̄ míndə́sí ul̄ naā seneé.
Ī-lōō kənda dəla lo seneé gān̄g.
Tām̄ ɓōkə́ mósə deē nang tə́ i yá̰á̰ kógə̄ḿ alé ta kumən ni tə́.
Ni a tɔ̄lī lo ń deē asə dḭḭ̄ tū tə́ aĺ ní tə́.
17Ī-lōōī koō naā dɔ yá̰á̰ tə́ kə de kə́ mbóó,
tām̄ ni a asə mundə̄ najə̄ kɔr̄sí alé.
18Ī-lōō rāā yá̰á̰ kə́ lo mundə̄ tə́ ta kum tə̄rā tə́.
Tɔdɔ̄ ḭ̄ ī-ger̄ yá̰á̰ ń ni a ḭḭ yā rāā ní alé.
19Najə̄ ń to kemií tə́ ní, ī-lōō kəda deē kə̄ nuú.
De kə́ yā rāāī kə́ra tāmən tə́ a gətóo.
Currently Selected:
JEJU KƏ́ NGŌN̄ SIRAK 8: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.