JEJU KƏ́ NGŌN̄ SIRAK 49
49
Jojiyas
1Əga kem de gə̄ dɔ Jojiyas tə́ anī, to tītə̄ kə́ əga kemdə́ i dɔ ítər kə́ otə majə gə̄ kə́ guŕ naā tə́ beē.
Nge ń nuū i kəla rāā nge guŕ ítər gə̄ naā tə́.
Jojiyas to i tītə̄ yibə̄ tejə ō,
yá̰a̰ kəsa kə́ majə ō, kasə nduú ō, yá̰á̰ kə́ ɓār̄ gōsə̄ ō beé.
2Ni un róbə́ kə́ súūmú, tɔdɔ̄ tūr̄ kum ngán Israel gə̄ kə̄ rɔ̄ Kɔ́ɔ̄ɓē tə́ ō,
ɔgə̄ rāā ɓesə̄ kə́ majə aĺ ngá̰ý gə̄ kɔ̄ɔ́ ō.
3Ni tūr̄ rɔ̄n kə̄ rɔ̄ Kɔ́ɔ̄ɓē tə́ kə ngarā̰ kemən gēé malang.
Kem ndɔ̄ gə̄ ń de gə̄ majənə̄ń aĺ tə́ ní, ni tūr̄ de gə̄ kə̄ rɔ̄ Nə́ɓā tə́.
Mban̄g kə́ gō gogə́ gə̄ kə́ Juda tə́ ō, Jeremi nge koō taa ō
4Mban̄g gə̄ malang rāān̄ yá̰á̰ kə́ gōtə́ aĺ gə̄ kə̄ dɔ naā tə́,
ba i Dabid ō, Ejekiyas ō, Jojiyas ō ngóy n rāān̄ aĺ ní.
Tɔdɔ̄ nin̄ əya̰n̄ ndū najə̄ yā Nge Ndi dɔ rā̰ tə́ kɔ̄ɔ́.
Mban̄g gə̄ kə́ Juda tə́ gətóon̄ kɔ̄ɔ́,
5tɔdɔ̄ adə̄n̄ de kə́ rang gə̄ tɔ́gə́də́ ō,
unən̄ kɔsə go̰n yādə́ adə̄n̄ nápar de kə́ rang gə̄ ń i tə̄rā gə̄ ní ō.
6Ɓē ń Nə́ɓā gə̄rā ní, ɓē ń lo kə́ táĺ i kemeé ní,
madə̄ ba̰ā̰ gə̄ əlan̄ hor dɔ tə́ ō,
rāān̄ adə̄ de gə̄ gətóon̄ kum róbə kɔsə gə̄ kə́ kemeé tə́ ō,
7najə̄ yā Jeremi tə́.
Tɔdɔ̄ nin̄ rāānən̄ yá̰á̰ kə́ tōr̄ ngá̰ý,
ni ń Kɔ́ɔ̄ɓē əndān nge koō taa tə́ i kété pá tá kadə̄ ojənən̄ ní.
Kɔ́ɔ̄ɓē əndān nge koō taa tə́ i yā kadə̄ ni ɔr̄ yá̰a̰ kə ngəraá ō,
nujə yá̰a̰ ō, rāā yá̰a̰ kadə̄ oy ō ngóy alé,
ba i yā kadə̄ ni əndā kújə ō, əndā kāgə̄ ō.
Ejekiyel
8Ejekiyel i deē ń a̰a̰ kɔsə go̰n yā Kɔ́ɔ̄ɓē ní.
Kɔ́ɔ̄ɓē ɔjən kɔsə go̰n ní i dɔɔ́ dɔ púsə yā serubḛ gə̄ tə́.
9Əga kem Kɔ́ɔ̄ɓē dɔ madə̄ ba̰ā̰ gə̄ tə́, gír man̄ kə́ edə kə tɔ́gɔ́ tə́ ō,
ni rāā majə kə ngé kun gō róbə́ kə́ súūmú ō.
Ngé koō taa kə́ kutə gidə i jōó gə̄
10Kə̄ngā ngé koō taa kə́ kutə gidə i jōó gə̄ ton̄ ɓádá nuū,
banī ādə̄ Kɔ́ɔ̄ɓē rāā adə̄ ngé kun gotədə́ gə̄ ḭḭn̄ dɔɔ́!
Tɔdɔ̄ nin̄ əlan̄ go̰ kem Jakob tə́ ō,
ajən̄ Jakob ō, tām̄ tɔ́gə́də́ ur̄ wak alé.
Jorobabel ō, Yesuwa ō
11Deē a əda najə̄ bo yā Jorobabel i ba̰ý?
Ni to i tītə̄ tambō̰o̰ beé kem jī Kɔ́ɔ̄ɓē kə́ kṵṵ́ tə́.
12Yā Yesuwa kə́ ngōn̄ Yosadak i tītə̄ ń nuū ō.
Ɓāl̄ yādə́ tə́ ní, nin̄ jōó mbak tél rāān̄ kújə yā Kɔ́ɔ̄ɓē gogə́ rang ō,
rāān̄ kújə́ kə́ táĺ tām̄ yā Kɔ́ɔ̄ɓē tə́ ō,
kadə̄ de gə̄ ɔsən̄ go̰n lo ní ngándáńg ō.
Nehemi
13Nehemi rāā adə̄ əga kem de gə̄ dɔn tə́ ngá̰ý ō.
Ndogə̄ mbal̄ kə́ gidə ɓē yājí tə́ ń tetə nang tə́ kɔ̄ɔ́ ní, i ni n tél unən dɔɔ́ gogə́ ní.
Ni téĺ tə́lá bápə gə̄ ta tə́ gogə́ ō, tə́lá kélé gə̄ ta bápə gə̄ ní tə́ gogə́ ō,
tél rāā kújə yājí gə̄ gogə́ ō.
De kə́ bo gə̄ kə́ ta kəla gíŕ tə́
14Dan de gə̄ malang kə́ dɔ nang tə́ ń Kɔ́ɔ̄ɓē rāādə́ ní, de kə́ tītə̄ Henok gətóo.
Tām̄ unnən̄ dɔ nang tə́ aw̄n̄ seneé kɔ̄ɔ́.
15De kə́ tītə̄ Jəjep gətóo ō.
Ni i ngār yā ngákṵ́ṵn gə̄ ō, nge kɔsə kíĺ gír deē yān gə̄ ō.
De gə̄ ɓōlə́n̄ gidə kə̄ngān gə̄ ngá̰ý ō.
16Dan deē ndul gə̄ tə́ ní, de gə̄ ɔsən̄ go̰n Sem ō, Setə ō.
Banī yá̰a̰ malang kə́ ndi kə kumneé ń Nə́ɓā rāā ní, Adam i dɔ tə́ dɔɔ́.
Currently Selected:
JEJU KƏ́ NGŌN̄ SIRAK 49: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.