JEJU KƏ́ NGŌN̄ SIRAK 48
48
Eli
1Eli nge koō taa ḭḭ tītə̄ hor beé ō,
najə̄ kɔrə̄n unjə̄ tītə̄ hor ngel̄ beé ō.
2Ni rāā adə̄ ɓōō əsō kem ɓēé ō,
ṵṵn tɔdɔ̄ Kɔ́ɔ̄ɓē ngá̰ý adə̄ rāā adə̄ kutə de gə̄ tél i ngá̰ý aĺ kɔ̄ɔ́ ō.
3Ni ɔgə̄ man̄ kedə̄ kə ta kūl̄ najə̄ kə́ ta Kɔ́ɔ̄ɓē tə́ ō,
rāā adə̄ hor ḭḭ dɔ rā̰ tə́ əsō nang tə́ nja mətá ō.
4Eli, yá̰a̰ rāāí kə́ to ɓōĺ gə̄ rāā adə̄ ɔsən̄ go̰nií ngá̰ý!
I náā n asə kɔjə rɔ̄n kəda na n-asə rāā yá̰á̰ kə́ to tītə̄ yāí gə̄ ní?
5Ḭ̄ ń ī-ndól̄ de kə́ koy ní,
ḭ̄ ń kə ta kūl̄ najə̄ yā Nge Ndi dɔ rā̰ tə́ ī-rāā adə̄ de kə́ oy aw̄ ɓádá ndól̄ ní.
6Ḭ̄ ń ī-tḭ̄ḭ̄ ta mban̄g gə̄ ō,
ī-mbəre ngé kəto dɔɔ́ gə̄ adə̄ tə́sōn̄ ō ní.
7Ḭ̄ ń ōō kɔ̄l̄ dɔ mbal̄ Sinayi tə́ ō,
ōō najə̄ yā ndéý kə́ tām̄ yā majaĺ tə́ dɔ mbal̄ Horeb tə́ ō ní.
8Ḭ̄ ń úr yibə̄ dɔ mban̄g gə̄ tə́ kadə̄ əndān̄ nja de gə̄ tām̄ kəla rāādə́ gə̄ tə́ ō,
dɔ ngé koō taa gə̄ tə́ kadə̄ unən̄ gotií ō ní.
9Ḭ̄ ń uniīn̄ kə hor kə́ to tītə̄ nél māĺ beē
kem púsə́ kógə̄ḿ kə́ sə́nda hor gə̄ unən̄ tə́ aw̄n̄ seí ní.
10Kə gō ń makətūbə̄ kə́ táĺ gə̄ ɔjənə̄ń ní, kɔ̄l̄ kə́ ndɔ̄ń tə́ ń a to ní,
i ḭ̄ n i nge rāā kadə̄ wūn̄g yā Kɔ́ɔ̄ɓē tetə dan ń a sāā bə̄gā kə̄ dɔ de gə̄ tə́ ní.
Sɔɔ̄ kadə̄ bɔbə̄ ngōn̄ ō ngōn̄ ō ní ə̄ndādə́ naā tə́ ō,
ī-tél ə̄ndā gír ɓē gə̄ yā Jakob gogə́ ō.
11Ngé gə̄ ń a̰a̰īn̄ ní, rɔ̄də́ nel̄də́ ō,
ngé gə̄ ń tárən Kɔ́ɔ̄ɓē bátə́ oynəń ní, yādə́ i rɔ̄nel̄ ō.
Tɔdɔ̄ rɔ̄kum, j-a jə-ndi kə kumjí.
Elije
12Dan ń ɓɔ̄ɔ̄n̄ Eli kem nél māĺ tə́ anī,
ndílən rosə kem Elije.
Dan ń Elije ndiń kə kumneé ní, ni ndew ta kum ngār kógə̄ḿ tə́ aĺ ō,
de kə́ asə kəndā gúu dɔn tə́ gətóo ō.
13Yá̰á̰ kə́ ngan̄g ngá̰ý tām̄ yān tə́ gətóo.
Gō yon tə́ gə̄gē ní, dā̰ rɔ̄n əda najə̄ kə́ Nə́ɓā əndā tan tə́ ɓáý.
14Dan ń ndiń kə kumneé ní, rāā yá̰á̰ kə́ to kɔr kum gə̄,
gō yon tə́ gə̄gē ní, kəla rāan gə̄ majən̄ to ɓōĺ ngá̰ý.
15Gō yá̰a̰ gə̄ ń nuū tə́ malang gə̄gē ní, ngán Israel gə̄ tūrə̄n̄ háĺdə́ alé,
əya̰n̄ majaĺ yādə́ gə̄ kɔ̄ɔ́ alé,
bátə́ kadə̄ ɔynə̄ńdə́ dɔ nang yādə́ tə́ aw̄nəń sedə́ kɔ̄ɔ́ ō,
tə̄ndā tḭ̄ḭ̄nəńdə́ kə̄ lo gə̄ tə́ malang dɔ nang tə́ ō.
I gotə de kə́ sḛ́ý beē gə̄ n nayn̄ ō,
i mban̄g kə́ gír kojə yā Dabid tə́ n nay ō ní.
16Ngé kə́rēý gə̄ dɔ dáńdə́ tə́ rāān̄ yá̰á̰ kə́ nel̄ Nə́ɓā,
banī ngé kə́ rang gə̄ rāān̄ yá̰á̰ kə́ gōtə́ aĺ gə̄ kə̄ dɔ naā tə́.
Mban̄g Ejekiyas ō, Ejayi nge koō taa ō
17Ejekiyas rāā ɓē yān adə̄ ngan̄g ō,
rāā adə̄ man̄ reē kemeé ō.
Ni ndēr̄ mbal̄ kə gindí,
ba rāā lo gə̄ kə́ yā ngɔ̄məń man̄ ō.
18Mban̄g Senakerib reē ənī ɓē kə́ Jerusalem rɔ̄ɔ̄ i ɓāl̄ yān tə́.
Ni əla Rabəsake ngol áskar yān gə̄ adə̄ aw̄
un jīn dɔɔ́ rɔ̄ɔń ɓē kə́ Siyo̰ ō,
ɔjə rɔ̄n ngá̰ý ō.
19Lo ń nuū tə́ ngarā̰ kem de gə̄ ndew ō, jī de gə̄ ndew ō,
rɔ̄də́ tōr̄də́ tītə̄ dəyá̰ gə̄ kə́ a rāān̄ kem beé ō.
20Nin̄ ɓārə́n̄ Kɔ́ɔ̄ɓē ń kem majə yān i ngá̰ý ní ō,
əlan̄ jīdə́ kum kə̄ rɔ̄n tə́ ō.
Nge kə́ táĺ ń ndi dɔ rā̰ tə́ ní, adə̄də́ yá̰á̰ ń dəjen ní kə̄ ta jī tə́ nuū,
un Ejayi gāngəń dɔdə́.
21Kɔ́ɔ̄ɓē ənī géŕ ger yā Asiri gə̄ rɔ̄ɔ̄ ō,
deē yān kə́ dɔ rā̰ tə́ tɔ̄l̄də́ malang kɔ̄ɔ́ ō.
22Tām̄ Ejekiyas rāā yá̰á̰ kə́ nel̄ Kɔ́ɔ̄ɓē.
Ni ra ngan̄g dɔ róbə yā kaan Dabid tə́,
tītə̄ ń Ejayi nge koō taa dəjenəń kadə̄ rāā ní.
Ejayi ń i nge koō taa kə́ bo ō, nge ka̰a̰ yá̰á̰ kə́ rɔ̄kum ō ní.
23Dan ngeé ń nuū tə́ ní, Ejayi rāā adə̄ mbang tél kə gōneé ō,
Nə́ɓā ənī ndɔ̄ mban̄g ta madə̄ tə́ ō.
24Ndíĺ kə́ táĺ rāā kəla dɔn tə́ kə tɔ́gɔ́, adə̄ ni a̰a̰ kum mbang gə̄ kə́ ta ngóý tə́ ō,
sɔl̄ kem ngé gə̄ ń əhɔn̄ ndoō kem ɓē kə́ Siyo̰ tə́ ní ō.
25Yá̰a̰ gə̄ ń a rāān̄ yā rāā yá̰a̰ no ndɔ̄ kə́ ta tɔ̄l̄ ta tə́ ní, ni əda najə̄ yādə́ kété ō,
yá̰á̰ kə́ to lo mundə̄ tə́ gə̄ ń a rāān̄ yā rāā yá̰á̰ ɓáý ní, ni əda najə̄ yādə́ kété ō.
Currently Selected:
JEJU KƏ́ NGŌN̄ SIRAK 48: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.