JEJU KƏ́ NGŌN̄ SIRAK 14
14
Ndi majə yā de kə́ súūmú
1Rɔ̄nel̄ i kə deē ń əda najə̄ kə́ gō tə́ aĺ alé,
adə̄ ndə̄ngā rɔ̄n najə̄ yá̰a̰ rāan gə̄ kə́ gōtə́ aĺ tə́ alé ní.
2Rɔ̄nel̄ i kə deē ń kemən rāan aĺ ō,
yá̰a̰ gə̄ ń əndā kemən dɔ tə́ ní nal̄ aĺ ō ní.
Ngur yá̰a̰ ō, suu ō
3Yá̰a̰ kənge əhɔn̄ naā kə nge suú alé.
Ré deē ɓájə̄ lo kun yá̰a̰ kadə̄ gíŕ yá̰á̰ kə́ mang tə́ ní, kum kənge yá̰a̰ yān n to rá?
4Nge kɔgə̄ rɔ̄n yá̰a̰ ba kán̄ kə̄ dɔ naā tə́ ngá̰ý ní,
a rāā kəla i tām̄ yā de kə́ rang gə̄ tə́.
I de kə́ rang gə̄ n a əɓanə̄ń dɔɔ́
yā ndiń majə ní.
5Deē ń rāā rɔ̄n nəkɔ́ yá̰á̰ kə́ tōr̄ ní,
a rāā majə i kə náāá?
Yá̰a̰ kənge yān a rāā majə kə deé alé.
6Rāā rɔ̄ yá̰á̰ kə́ tōr̄ i yá̰á̰ kə́ majə aĺ tɔȳ yá̰á̰ kə́ majə aĺ gə̄.
I beé n deē a əngeń ndéy tām̄ kem ndul yān tə́ ní.
7Ré nge suu rāā majə kə deé anī rāā i gō ger̄ aĺ tə́,
ta tɔ̄l̄ ta tə́ anī a ɔjə kem ndul yān kə̄ ndágá.
8Nge ka̰a̰ yá̰a̰ a ndə̄ngā i mbé ní, majə tām̄ yā kəla kógə̄ḿ tə́ alé.
Rāā tītə̄ kə́ a̰a̰ de kógə̄ḿ aĺ beé ō,
a idə i tan gír de gə̄ tə́ ō.
9Yá̰a̰ asə kumən ni nja kógə̄ḿ alé,
adə̄ yá̰á̰ ń adə̄nən̄ ní, asə kumən alé.
Suu kə́ kemən tə́ rāā adə̄ kemən ngan̄g ngóróró.
10Nge suu a adə̄ deē yá̰a̰ kəsa yān i kə gō kem ndigə yāneé aĺ ō,
yá̰a̰ kəsa gətóo dɔ tábəl yān nəkɔ́ tə́ ō.
Ger̄ lo rāā yá̰á̰ kə́ majə kə yá̰a̰ kəngeé
11Ngōnə̄ḿ, ré āw̄ kə yá̰á̰ jīí tə́ anī,
á̰a̰ gō rɔ̄í ḭ̄kɔ́ adə̄ majə ō,
ī-ndējə̄ Kɔ́ɔ̄ɓē yá̰a̰ gə̄ ń i kə́ sɔɔ̄n ní ō.
12Ī-lōō kadə̄ dɔí ndígə̄nal na sḛ́ý laā anī yo a reē ō,
ḭ̄ ī-ger̄ ndɔ̄ ń ɔjə reēń ní aĺ ō.
13Ī-rāā majə kə madə̄ taí pá tá óý ɓáý.
Ī-rāā kem majə seneé kə gō ń tɔ́gí asəń ní.
14Ī-lōō kɔgə̄ rɔ̄í ndi majə kə́ tām̄ yā ndɔ̄ kógə̄ḿ tə́.
Yá̰á̰ ń ndū najə̄ ɔgə̄ aĺ ní,
ī-lōō kəya̰ ta róbə tɔ̄l̄ ɓōon kə́ kemií tə́ kadə̄ mān̄ karī.
15Kəla yāí ń ī-rāā á ɔ́r loon tə́ ní,
ī-ger̄ majə kadə̄ ā ə́ya̰ kanə̄n yā kadə̄ de kə́ rang gə̄ ō,
ngé kənge yá̰a̰ ndəbāí gə̄ a kēgə̄n̄ naā ō,
a túgə̄n̄ i wə̄lā dɔ tə́ n a kēgə̄nəń naā ní ō.
16Ādə̄ yá̰a̰, aláa ī-taā yá̰a̰, yā kadə̄ rɔ̄í nelīiń,
tɔdɔ̄ deē a ənge rɔ̄nel̄ ɓádá tṵ alé.
17Tá ndi deē kə kumneé i yá̰á̰ kə́ a əsō ngísə tītə̄ yā kūbə̄ beé.
I ndū najə̄ kə́ to i jóo: adə̄ i gáŕ kadə̄ ā óy.
18Kāgə̄ ń mbīn i ngá̰ý dɔ tə́ ní,
mbīn kə́rēý gə̄ a tə́sōn̄ ō, kə́ madə̄ gə̄ a əɓan̄ ō.
Deē ndul gə̄ ń utə̄n̄ gō naā kə gō ɓāl̄ kojədə́ gēé ní, yādə́ i tītə̄ ń nuū ō:
kə́ madə̄ gə̄ a oyn̄ ō, a ojən̄ kə́ rang gə̄ ō.
19Yá̰a̰ malang ń de gə̄ rāān̄ ní, a gətóo kɔ̄ɔ́ ō,
de gə̄ ní a aw̄n̄ kɔ̄ɔ́ kə kəla rāādə́ gēé ō.
Sāā kum kedə̄
20Deē ń gḛy kum kedə̄ ō,
un kur̄ dɔn gírəń yá̰a̰ ō ní, i nge rɔ̄nel̄.
21Ni dəje rɔ̄n najə̄ əda na ké róbə yā kum kedə̄ n to rá wa.
Háĺ ń kum kedə̄ ra kə deé ta kun ní, ni gír̄ yá̰a̰ dɔ tə́.
22Ni un gō róbə yā kum kedə̄ ní tītə̄ nge ndo̰ beé ō,
ra lo ɓɔ̄ɔ̄ rɔ̄ tə́ a umə̄ń kum kedə̄ lo gə̄ ń i gáŕ kadə̄ a man̄ tū tə́ ní tə́ ō.
23Ni a̰a̰ lo ko̰rō̰ kújə yā kum kedə̄ tə́ ō,
ra ta róbə́ kújə yān tə́ a oōń najə̄ ō.
24Ni ndi ngɔr kə̄ kadə kújə yā kum kedə̄ tə́ ō,
əla kāgə̄ nja kújə tandā yān i tū ndogə̄ mbal̄ yān gə̄ tə́ ō.
25Ni udə kújə tandā yān kadə kum kedə̄ tə́ ō,
ndi lo kə́ ndi majə i tū tə́ tə́ ō.
26Ni əndā ngánən gə̄ lo ń kum kedə̄ a ngɔ̄m̄də́ tū tə́ ní tə́ ō,
ndi kadə̄ kum kedə̄ tə́ tītə̄ de kə́ ndi gír kāgāá beē ō.
27Ndi ndílən tə́ ɓá anī mbang ɔsən aĺ ō,
ndi i gír kāgə̄ kə́ majə tə́ ō.
Currently Selected:
JEJU KƏ́ NGŌN̄ SIRAK 14: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.