JEJU KƏ́ NGŌN̄ SIRAK 13
13
Njə̄rā kə naá kə́ ta tɔ̄l̄ ta a ojə yá̰á̰ kə́ majə aĺ
1Deē ń ɔdə tīw̄ jīn tə́ ní, tīw̄ a tíya̰ jīn tə́ ō,
nge njə̄rā kə de kə́ nge kɔjə rɔ̄ɔ́ a tél yā to tītən ō.
2Yá̰á̰ ń kɔȳn tɔȳ tɔ́gí ní, ī-lōō kun ō,
deē ń tɔ́gən tɔȳ yāí, aláa ənge yá̰a̰ tɔyī ní, ī-lōō njə̄rā seneé ō.
Jóó nánjə ō, jóo tawá ō, a aw̄n̄ naā tə́ a?
Ré ɔdən̄ naā anī, nge kə́ kété a tɔ̄ɔ̄.
3Nge kənge yá̰a̰ rāā yá̰á̰ kə́ gōtə́ aĺ ɓáa əndā i wūn̄g ta tə́.
Rāā yá̰á̰ ní i kə nge ndoó, ba i gáŕ kadə̄ i nge ndoō n dəjen māȳ rɔ̄ kə̄ dɔ tə́ ɓáý.
4Ré ī-majə tām̄ yān tə́ anī, a əsa tətōí,
ba dan ń yá̰á̰í gətóo kɔ̄ɔ́ anī, a əya̰ī kɔ̄ɔ́.
5Ré ə́ngé yá̰a̰ anī a ndi seí ō,
a ɓogiī kanjə̄ kadə̄ kemən rāan kə saryaá ō.
6Ré ni gḛy kadə̄ ī-rāā yá̰á̰ kógə̄ḿ ādən anī, a gólī.
A mūŕ kəgō yā kadī ō, a rāāī kadə̄ ə̄ndā kemií dɔn tə́ ō.
Ni a ədaī najə̄ kə́ majə ō, a dəjeī na ké i rí n kə n rāā tām̄ yāí tə́ wa ō.
7A ɓāríī lo yá̰a̰ kəsa yān kə́ rāā ngá̰ý tə́ yā kəlań rɔ̄sɔl̄ dɔí tə́,
bátə́ kadə̄ ī-nujə yá̰a̰ yāí nja jōó aláa mətá.
Ta tɔ̄l̄ ta tə́ anī a mbóo seí.
Gō tə́ anī a rāāī nja bə̄yā̰ kə́ gogə́ tə́ ō,
a bḭ́ḭ̄ dɔn najə̄ yāí tə́ ō.
8Ə̄ndā kum kedə̄ dɔ rɔ̄í tə́ ba ī-lōō kadə̄ gólī,
kadə̄ əla rɔ̄sɔl̄ dɔí tə́ sɔɔ̄ń kur̄ dɔí kə́ gətóo.
9Ré de kə́ bo ɓāríī ta kəsa yá̰a̰ anī, ī-mbātə́.
Lo ń nuū tə́ a ra seí gagar ta kaw̄.
10Ī-lōō tewle ka̰ȳ ngɔ̄də̄ kaw̄, na sōgə́ mbəreīn̄ kə̄ gogə́.
Ī-lōō kəra sa̰y na sōgə́ dɔdə́ ndígə̄nalií.
11Ī-lōō kɔr̄ najə̄ seneé tītə̄ kə́ ásiī naā beé.
Ī-lōō taā kem najə̄ kɔrə̄n kə́ dan gān̄g aĺ,
tām̄ a nāāī i mbée kə najə̄ waa yāneé ō,
ká ré mūŕ kəgō adī gə̄gē anī, a əndā i mayí ō.
12De kə́ nge ger̄ ngɔ̄m̄ najə̄ yāí tām̄ yān tə́ aĺ ní,
a əya̰ī karī kanjə̄ kəndaī aĺ ō, kanjə̄ kənī súĺ jīí tə́ aĺ ō, a a̰a̰ kum tō ndoō yāí aĺ ō.
13I beé ní, ə̄ndā kum kedə̄ dɔ rɔ̄í tə́ ngá̰ý,
tām̄ ḭ̄ i dɔ róbə́ kə́ ún a oy tə́. #13.13 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i sɔ́ gətóo tū tə́.
Ngé kənge yá̰a̰ gə̄ ō, ngé ndoō gə̄ ō
15Yá̰a̰ malang kə́ ndi kə kumneé a tár i yá̰á̰ kə́ to tītən ō,
deē a tár i deē madə̄n ō.
16Yá̰a̰ gə̄ malang a ɓoon̄ naā i kə gō gíŕdə́ gēé ō,
deē a taā i deē madə̄n ō.
17Soó ō ngōn̄ batə̄ ō ní, i rí yādə́ n i dɔ naā tə́?
I tītə̄ nge rāā majaĺ ń ran̄ ta naā tə́ kə nge rāā yá̰a̰ kə gō ń Nə́ɓā ndigə ní beē.
18I lápə́ya kə́ ba̰ý n a to dɔ dán bísə nin̄ kə ɓongōó tə́ ní?
Nge yá̰a̰ kal̄ lo nin̄ kə nge ndoó ní, i lápə́ya kə́ ba̰ý n a to dɔ dáńdə́ tə́ ní?
19Mbúr̄ gə̄ kə́ ran̄ dəla lo tə́ i dā̰ yā ɓɔl gə̄ ō,
ngé ndoō gə̄ i yá̰a̰ kəsa yā ngé kənge yá̰a̰ gə̄ ō.
20Yá̰á̰ kə́ hɔliyɔ karī nel̄ nge kɔjə rɔ̄ aĺ ngá̰ý,
tītə̄ ń nelə̄ń nge kənge yá̰a̰ kə nge ndoó aĺ ngá̰ý ní beē.
21Nge kənge yá̰á̰ ń njan əhɔ dɔ nang tṵ aĺ ní, madə̄ tan gə̄ əhɔnən̄ dɔɔ́,
banī nge tél kə rɔ̄neé kə̄ nang tə́ ń əsō ní, deē yān gə̄ mbərenən̄ kə̄ gogə́.
22Dan ń nge kənge yá̰a̰ rāā yá̰á̰ kógə̄ḿ kə́ gōtə́ aĺ anī, ngé dḭḭ̄n gə̄ i ngá̰ý.
Ré ɔr̄ i najə̄ kə́ to mbóo gə̄gē anī, de gə̄ a ndigən̄ gōn tə́.
Ba ré de kə́ najə̄n gətóo rāā yá̰á̰ kógə̄ḿ kə́ gōtə́ aĺ anī, de gə̄ a kɔ̄lə̄n̄ i seneé najə̄n tə́.
Ré ɔr̄ najə̄ kə́ to ngáā gə̄gē anī, usə deē dɔ tə́ alé.
23Dan ń nge kənge yá̰a̰ a ɔr̄ najə̄ anī, de gə̄ malang ndin̄ kə tadə́ kə́ mbóó ō,
najə̄ kɔrə̄n nel̄də́ ngá̰ý ō.
Dan ń nge ndoō a ɔr̄ najə̄ anī, a dəjen̄ na ké i náā n nuú wa.
Ba ré njan əhɔ dɔ nang aĺ anī, a mbərenən̄ kadə̄ teē əsō.
24Yá̰a̰ kənge i yá̰á̰ kə́ majə dan ń majaĺ gətóo dɔ tə́ ní.
Banī nge rāā yá̰a̰ gō yā Nə́ɓā tə́ aĺ a əda na ndoō i yá̰á̰ kə́ majə aĺ.
25I dan wur deē n i nge tūr̄ ta kum deē
kadə̄ majə, aláa kadə̄ majə aĺ ní.
26Ta kum deē kə́ kə rɔ̄nelé, ɔjə kadə̄ kem deē i kə́ majə.
Banī deē a gíŕ yá̰á̰ ngá̰ý pá tá a tetə kāgə̄ najə̄ kə́ majə ɓáý.
Currently Selected:
JEJU KƏ́ NGŌN̄ SIRAK 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.