TƏ́DA 9
9
Ndɔ̄ rāā nāā Pákə
1Kɔ́ɔ̄ɓē ɔr̄ najə̄ kə Moijə kem dəla loo kə́ Sinai tə́, i kem nāā kə́ ta kəga dɔ yā ɓāl̄ ń utə̄ gō nge ń ngán Israel gə̄ teēnəń kɔ̄ɔ́ Ejiptə ní. 2Ni-əda Moijə na:
Ādə̄ ngán Israel gə̄ rāān̄ nāā Pákə kə ndɔ̄neé. 3Ā ī-rāāī nāā i ta loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā ń toō. Ā ī-rāāī i kə gō ń ndū najə̄ ō, yá̰a̰ kāgə̄ ɓē ō ɔjəń ní. 4Moijə əda ngán Israel gə̄ kadə̄ rāān̄ nāā Pákə. 5Nin̄ rāān̄ nāā ní ta jī loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā kə́ ta kəga dɔ, kem dəla loo kə́ Sinai tə́. Ngán Israel gə̄ rāān̄ yá̰á̰ ń Kɔ́ɔ̄ɓē əda Moijə ní kə gōó majə.
6Banī de kə́rēý gə̄ ń ɔdən̄ rɔ̄ nīń ní asən̄ rāā pétə́ Pákə ndɔ̄ ń noō tə́ alé, tɔdɔ̄ majaĺ tákə̄də́. Ndɔ̄ nəkɔ́ ń noō tə́ nin̄ ədan̄ Moijə nin̄ kə Aaro̰ na:
7J-ɔdə rɔ̄ nīń adə̄ majaĺ tákə̄jí, ba i tām̄ rí tə́ á ɔgə̄n̄jí ndējə̄ Kɔ́ɔ̄ɓē yá̰a̰ tītə̄ yā gotə ngán Israel gə̄ kə ndɔ̄neé ní? 8Moijə tél ədadə́ na:
Ī-ngóōī ādə̄ m-ōō najə̄ ń Kɔ́ɔ̄ɓē a əda dɔsí tə́ ní pá tá.
9-10Kɔ́ɔ̄ɓē mēr̄ Moijə kəda ngán Israel gə̄ na:
Najə̄ ń toō i tām̄ yāsí tə́ ō, tām̄ yā ngáńsí gə̄ tə́ ō, ngán kaasí gə̄ tə́ ō. Ré majaĺ tákə̄ deē kógə̄ḿ ndɔ̄ nāā Pákə tə́ tām̄ ni ɔdə nīń deē, aké aw̄ i mbā kə́ sa̰y tə́ anī, deē ní a rāā nāā Pákə yā rɔȳń Kɔ́ɔ̄ɓē, 11banī a rāā i ta jī loo tíbə́ tə́, kə ndɔ̄ kə́ nge ko̰ kutə gidə i sɔ́ yā nāā kə́ nge ko̰ jōó. A əsa ngōn̄ batə̄ kə mápá kə́ rāā kanjə̄ kaa mápa ō, kə mbī kámbə́ kə́ katə̄ ō. 12A əya̰ gotə ngōn̄ dā̰ batə̄ ní kadə̄ loo tīī dɔ tə́ aĺ ō, a tétə̄ kəngān gə̄ aĺ ō. A rāā nāā Pákə́ ní i kə gō looneé. 13Banī deē ń majaĺ tákə̄n aĺ ō, aw̄ mbā tə́ aĺ ō, ba rāā najə̄ yā nāā Pákə i kə njaneé, adə̄ ni ɔdə rāā nāā Pákə kə ndɔ̄ Pákə aĺ ní, deē ń noō a ɔr̄nən̄ kɔ̄ɔ́ dan ngán Israel gə̄ tə́. Ni-ndējə̄ Kɔ́ɔ̄ɓē yá̰a̰ kə ndɔ̄neé aĺ ní, yá̰á̰ kə́ tōr̄ tām̄ yā majaĺ yān tə́ a rāān i nəkɔ́. 14Ré tə̄rā ń ndi ɓē sesí ní ndigə rāā nāā Pákə yā kɔsəń gɔn Kɔ́ɔ̄ɓē anī, a rāā i kə gō ndū najá ō, yá̰a̰ kāgə̄ ɓē ō kə́ dɔ tə́. Ndū najə̄ ní i tām̄ yā ngán Israel gə̄ tə́ ō, tə̄rā gə̄ tə́ ō.
Kil̄ man̄ utə̄ dɔ kújə yā Nə́ɓā
15Ndɔ̄ ń udənə̄ń kújə yā Nə́ɓā tə́ ní, kil̄ man̄ reē utə̄ dɔ. Kújə́ ní i kújə tandā ń sandúkə ndū najə̄ i kemeé ní. Ndɔ̄ɔ́ anī kil̄ man̄ ní unjə̄ tītə̄ hor bátə́ kadə̄ loo tīiń. 16To i tītə̄ ń noō kə ndɔ̄ gə̄: Kadaá anī kil̄ man̄ utə̄ dɔ kújə́ ní, ba ndɔ̄ɔ́ anī unjə̄ tītə̄ hor beé. 17Ré kil̄ man̄ ní ḭḭ kɔ̄ɔ́ anī ngán Israel gə̄ ndɔ́tə̄n̄ ɓē ō, ré dəba gotoó anī nin̄ ndin̄ ɓē loo ń noō tə́ ō. 18Adə̄ ngán Israel gə̄ a ɔrə̄n̄ dɔɔ́ ō, a ndin̄ gotoó ō, i kə gō ndū Kɔ́ɔ̄ɓē. Ré kil̄ man̄ ndi dɔ kújə yā Nə́ɓā tə́ ɓáý anī ngán Israel gə̄ a ndin̄ i gotoó. 19Ré ndi i ndɔ̄ ngá̰ý anī ngán Israel gə̄ a oōn̄ i ta Kɔ́ɔ̄ɓē adə̄ a əsōn̄ róbó alé. 20Kə́rēý gə̄ anī ndi dɔ kújə́ tə́ rāā ndɔ̄ ngá̰ý alé. Adə̄ ngán Israel gə̄ a ndin̄ gotoó ō, a ɔrə̄n̄ dɔɔ́ ō, i kə gō ndū Kɔ́ɔ̄ɓē. 21Dan kə́rēý gə̄ tə́ anī kil̄ man̄ ní a dəba gotoó i ndɔ̄ɔ́ kadə̄ loo tīī dɔn tə́ ngóy. Ré ḭḭ kɔ̄ɔ́ kə ndɔ̄ý anī ɔrə̄n̄ dɔɔ́ ō. Aláa dəba gotoó kadaá ō, ndɔ̄ɔ́ ō ngóy. Ba ré ḭḭ kɔ̄ɔ́ anī ɔrə̄n̄ dɔɔ́ ō. 22Ré kil̄ man̄ ní ndi dɔ kújə yā Nə́ɓā tə́ rāā i ndɔ̄ jōó, aké rāā i nāā kógə̄ḿ, aké rāā i ndɔ̄ ngá̰ý gə̄gē anī, ngán Israel gə̄ a ndin̄ i gotoó ba a ɔrə̄n̄ dɔɔ́ alé. Ré kil̄ man̄ ní ḭḭ kɔ̄ɔ́ anī ɔrə̄n̄ dɔɔ́ ō. 23Nin̄ a ndin̄ gotə kógə̄ḿ i kə gō ndū Kɔ́ɔ̄ɓēé ō, a ɔrə̄n̄ dɔɔ́ i kə gō ndū Kɔ́ɔ̄ɓēé ō. Ran̄ kəla yā Kɔ́ɔ̄ɓē i kə gō ndū Kɔ́ɔ̄ɓē ń adə̄ Moijə ní.
Currently Selected:
TƏ́DA 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
