TƏ́DA 10

Bərúnjə gə̄ kə́ rāān̄də́ kə gində̄ arjā̰a̰á̰

1Kɔ́ɔ̄ɓē əda Moijə na:

2Ī-mēr̄ rāā bərúnjə gə̄ jōó, ādə̄ rāān̄də́ kə gində̄ arjā̰a̰ kə́ koó. Bərúnjə gə̄ ní i yā ɓāŕəń ngán Israel gə̄ kadə̄ kánə̄nəń naā ō, ndɔ́tə̄nəń ɓē ō. 3Ré a kɔ̄rə́n̄ bərúnjə gə̄ ní jōó mbak anī, i ngán Israel gə̄ malang n a kánə̄n̄ naā rɔ̄í tə́ ta kújə kənge naā tə́ ní. 4Ré kɔ̄rə́n̄ i bərúnjə́ kə́ kógə̄ḿ beē anī, i ngār gə̄ ń nin̄ i ngol ngé rɔ̄ɔ̄ gə̄ yā ngán Israel gə̄ ní ngóy n a kánə̄n̄ naā rɔ̄í tə́ ní. 5-6Ré ā ī-tétī ndū bərúnjə anī i yā ndɔ́təń ɓē. Tétə̄n kə́ ta kəga dɔ i kadə̄ de gə̄ kə́ dām̄ kə́ gír ɓē tə́ gə̄ əsōnəń róbó, kə́ nge ko̰ jōó i tām̄ yā de gə̄ kə́ dām̄ mbɔ́r ɓē kə́ geleé tə́. 7Banī ā ī-ɓāríī de gə̄ kadə̄ ɔsən̄ dɔdə́ naā tə́ i kə bərúnjə́ kə́ ɓāŕ kanjə̄ tétə̄ ndūn.

8I ngán Aaro̰ gə̄ ń i ngé tun̄ yá̰a̰ gə̄ ní n a kɔ̄rə́n̄ bərúnjə gə̄ ní. Ndū najə̄ ń toō a to ngándáńg tām̄ yāsí tə́ ō, tām̄ yā ngáńsí gə̄ tə́ ō, ngán kaasí gə̄ tə́ ō.

9Dan ń ā ī-ndiī dɔ nang yāsí tə́ ba ḭ́ḭḭ̄ yā rɔ̄ɔ̄ madə̄ ba̰ā̰sí gə̄ kə́ ngé rāā kumsí ndoō tə́ gə̄ anī, ā ī-tétī ndū bərúnjə gə̄ ní kadə̄ əgań kem Kɔ́ɔ̄ɓē Nə́ɓā yāsí dɔsí tə́ ba taāńsí jī madə̄ ba̰ā̰sí gə̄ tə́ əya̰sí dɔɔ́. 10Ā ī-kɔ̄ríī bərúnjə ndɔ̄ rɔ̄nel̄ tə́ ō, ndɔ̄ pété tə́ ō, ndɔ̄ nāā kə́ kijə tə́ ō, dan ń ā ī-róōiń dā̰ horoó yā kadə̄ Kɔ́ɔ̄ɓē ní ō, ā ī-tunīiń yá̰a̰ tām̄ yā kem kógə̄ḿ tə́ ní ō. Ā ī-kɔ̄ríī bərúnjə kadə̄ əgań kem Nə́ɓā yāsí dɔsí tə́. Mā i Kɔ́ɔ̄ɓē Nə́ɓā yāsí.

Ngán Israel gə̄ ḭḭn̄ Sinai aw̄ ugə̄n̄ dɔ nin̄ loo kə́ Moab tə́

(10—20)

Ngán Israel gə̄ əsōn̄ róbó

11Kə ndɔ̄ kutə jōó yā nāā kə́ nge ko̰o̰ jōó yā ɓāl̄ ń utə̄ gō nge ń ngán Israel gə̄ teēnəń kɔ̄ɔ́ Ejiptə ní, kil̄ man̄ ḭḭ kɔ̄ɔ́ dɔ kújə́ ń sandúkə ndū najə̄ yā Nə́ɓā i kemeé tə́ ní. 12Ngán Israel gə̄ ḭḭn̄ dəla loo kə́ Sinai tə́ kə gō naā aw̄n̄. Ba kil̄ man̄ aw̄ əhɔ loo dəla loo kə́ Paran tə́. 13I ta kəla gíŕ ndɔ́tə̄də́ loo kə gō ndū Kɔ́ɔ̄ɓē ń adə̄ Moijə ní ɓáý.

14I ɓūtə̄ áskar gə̄ kə́ gō dərapóo yā Juda tə́ n əsōn̄ róbó kété ní. Nason ngōn̄ Aminadab i ngol áskar gə̄ kə́ gír ɓē yā Juda tə́ ō, 15Netanel ngōn̄ Suar i ngol áskar gə̄ kə́ gír ɓē yā Isakar tə́ ō, 16Eliab ngōn̄ Helon i ngol áskar gə̄ kə́ gír ɓē yā Jabulo̰ tə́ ō.

17Ró̰ȳn̄ kújə yā Nə́ɓā ta naā tə́ adə̄n̄ ngán Gerson gə̄ ō, ngán Merari gə̄ ō, adə̄ ətōn̄ aw̄nəń.

18Ɓūtə̄ áskar gə̄ kə́ gō dərapóo yā Ruben tə́ utə̄n̄ gōdə́. Elisur ngōn̄ Sedeur i ngol áskar gə̄ kə́ gír ɓē yā Ruben tə́ ō, 19Selumiel ngōn̄ Surisaday i ngol áskar gə̄ kə́ gír ɓē yā Simeo̰ tə́ ō, 20Eliasap ngōn̄ Dewel i ngol áskar gə̄ kə́ gír ɓē yā Gad tə́ ō.

21Ngán kaa Kehat gə̄ ń a ətōn̄ yá̰á̰ kə́ táĺ gə̄ ní utə̄n̄ gōdə́. A rāān̄ kújə́ kə́ táĺ yā Nə́ɓā kadə̄ oy kété pá tá nin̄ a ugə̄n̄.

22Gō tə́ anī ɓūtə̄ áskar gə̄ kə́ gō dərapóo yā Epəraim tə́ əsōn̄ róbó. Elisama ngōn̄ Amihud i ngol áskar gə̄ kə́ gír ɓē yā Epəraim tə́ ō, 23Gamliel ngōn̄ Pedasur i ngol áskar gə̄ kə́ gír ɓē yā Manase tə́ ō, 24Abidan ngōn̄ Gidoni i ngol áskar gə̄ kə́ gír ɓē yā Benjamḛ tə́ ō.

25Ɓūtə̄ áskar gə̄ kə́ gō dərapóo yā Dan tə́ utə̄n̄ gōdə́. Nin̄ i ta mūtə̄ bōȳ madə̄də́ gə̄ malang. Ahiejer ngōn̄ Amisaday i ngol áskar gə̄ kə́ gír ɓē yā Dan tə́ ō, 26Pagiel ngōn̄ Okəran i ngol áskar gə̄ kə́ gír ɓē yā Aser tə́ ō, 27Ahira ngōn̄ Enan i ngol áskar gə̄ kə́ gír ɓē yā Nepətali tə́ ō.

28Ngán Israel gə̄ əsōn̄ róbó kə gō naā i tītə̄ ń noō n aw̄nəń ní.

Moijə sāā de kə́ yā kɔjədə́ ta róbə

29Moijə əda Hobab ngōn̄ umən kə́ dəngam kə́ Madian ń rīn na i Rewel ní na:

J-a j-aw̄ i kə̄ ɓē ń Kɔ́ɔ̄ɓē ənī míndən dɔ tə́ yā kadə̄jí ní tə́. Ī-reē āw̄ sejí na j-a jə-rāā majə seí, tɔdɔ̄ Kɔ́ɔ̄ɓē ənī míndən yā rāā majə kə Israel. 30Hobab tél əda na:

M-ɔ́də alé, m̄-ndigə i tél kaw̄ ɓē yāḿ tə́, dan ngééḿ gə̄ tə́. 31Moijə tél ədan na:

m̄-rāāī ɓɔ́, ī-lōō kəya̰jí. Ḭ̄ ī-ger̄ loo gə̄ kə́ mángá ń kadə̄ j-əhɔ loo ndi tū tə́ ní. Ḭ̄ i nge kɔr nojí. 32Ré āw̄ sejí anī yá̰á̰ kə́ majə gə̄ ń Kɔ́ɔ̄ɓē a adə̄jí ní, j-a j-ādə̄ ā ə́nge sejí ō.

33Ngán Israel gə̄ ḭḭn̄ mbal̄ yā Kɔ́ɔ̄ɓē tə́, njə̄rān̄ ndɔ̄də́ mətá. Sandúkə madə̄ naā yā Kɔ́ɔ̄ɓē i kété nodə́ tə́ yā sāā loo kɔr̄ koō tām̄ yādə́ tə́. 34Ré ndɔ́tə̄n̄ ɓē kadaá anī kil̄ man̄ yā Kɔ́ɔ̄ɓē i dɔdə́ tə́ dɔɔ́. 35Ré sandúkə madə̄ naā a ɔr̄ dɔɔ́ anī Moijə əda na:

Kɔ́ɔ̄ɓē, ḭ́ḭ dɔɔ́ ādə̄ madə̄ ba̰ā̰í gə̄ tə̄ndān̄ naā tḭ̄ḭ̄n̄ kɔ̄ɔ́ ō, ādə̄ ngé rɔ̄ɔ̄í gə̄ a̰ȳn̄ naā kɔ̄ɔ́ noí tə́ ō. 36Ba ré a əndān̄ sandúkə́ ní kə̄ nang tə́ anī Moijə əda na:

Kɔ́ɔ̄ɓē, ī-tél ī-reē ī-ndi dan kósə́ ngán Israel gə̄ tə́.

Currently Selected:

TƏ́DA 10: SARDC

Highlight

Copy

Compare