TƏ́DA 16
16
Kore əsō wōn̄g
1Kore ngōn̄ Isar ń i ngōn̄ Kehat kə́ ngōn̄ Lebi ní, ɔr Datan nin̄ kə Abiram ngán Eliab gə̄ ō, On kə́ ngōn̄ Pelet ō ń nin̄ i de gə̄ kə́ gír kaa yā Ruben tə́ ní gōn tə́, 2sāań ta Moijə. Nin̄ ḭḭn̄ dɔn tə́ kə ngán Israel gēé ɓú jōó kə kutə mí gōdə́ tə́. De gə̄ ní i ngol ngán Israel gə̄ ō, i ngé kɔsə kum gotə ngé kán̄ naā gə̄ ō, i de kə́ rīdə́ ɓār̄ gə̄ ō. 3Nin̄ kánə̄n̄ naā dɔ Moijə nin̄ kə Aaro̰ tə́ ba ədan̄də́ na:
Ń toō asə tā. Ngán Israel gə̄ malang nin̄ i de kə́ táĺ gə̄ ō, Kɔ́ɔ̄ɓē i dɔ dáńdə́ tə́ ō, ba i náā n adə̄sí ta róbə kḭḭ dɔ ngé gə̄ ń Kɔ́ɔ̄ɓē kán̄də́ naā tə́ ní?
4Moijə oō najə̄ gə̄ ń noō anī əsō sébə kumən nang tə́. 5Gō tə́ anī əda Kore kə́ ngé kə́ gōn tə́ gə̄ malang na:
Bírí kə ndɔ̄ý anī Kɔ́ɔ̄ɓē a ɔjə dɔ deē ń i yān ō, kə́ táĺ ō, kə́ ni ndigən kadə̄ aw̄ rɔ̄n tə́ ō ní. Deē ń Kɔ́ɔ̄ɓē a gə̄rān ní, Kɔ́ɔ̄ɓē a ndigə kadə̄ deē ní aw̄ rɔ̄n tə́. 6Beé ní ḭ Kore ō, de kə́ gōí tə́ gə̄ ō, ɔ́yiī ganán gə̄, 7ba bírí anī ī-ɓōkíī yā̰l̄ hor gə̄ kemeé ō, ī-ɓōkíī kajaja kum yā̰l̄ hor gə̄ ní tə́ ta kum Kɔ́ɔ̄ɓē tə́ ō. Ba i deē ń Kɔ́ɔ̄ɓē ā gə̄rān ní n i de kə́ táĺ ní. Ngán Lebi gə̄, ń toō asə tā. 8Moijə əda Kore ɓáý to̰ na:
Ngán Lebi gə̄, ōōī. 9Gə̄rā ń Nə́ɓā yā Israel gə̄rāsí dan ngán Israel gə̄ tə́, ba adə̄sí ta róbə kaw̄ rɔ̄n tə́ ō, gə̄rāsí kadə̄ ī-rāāī kəla kə́ tām̄ yā kújə yā Kɔ́ɔ̄ɓē tə́ ō, kadə̄ ī-raī no ngé kán̄ naā kə́ Israel tə́ ī-ndɔ̄yī Nə́ɓā kə rīdə́ ō ní asəsí aĺ ɓáý a? 10Kɔ́ɔ̄ɓē adī ḭ Kore ō, ngákó̰ó̰í gə̄ malang ń nin̄ i ngán Lebi gə̄ ní ō, ta róbə kaw̄ rɔ̄n tə́ kɔ̄ɔ́ ɓá, anī ī-sāāī kənge kəla tun̄ yá̰a̰ dɔ tə́ ɓáý to̰ a? 11I tām̄ najə̄ ń noō tə́ n ḭ ō, de kə́ gōí tə́ gə̄ ō, ə̄ndāī rɔ̄sí naā tə́ i-mbātíiń Kɔ́ɔ̄ɓē ní a? Ba gír yā Aaro̰ na i rí á ī-tāmī seneé ní?
12Gō tə́ anī Moijə əla ɓāŕ Datan nin̄ kə Abiram ngán Eliab tə́ kadə̄ reēn̄, banī nin̄ tūr̄ ədan̄ na:
J-a j-aw̄ alé. 13Ī-teē sejí kɔ̄ɔ́ kem ɓē kə́ mba ō, yibə̄ tejə ō i ngá̰ý tū tə́ tə́, ba ī-reē sejí kem dəla loo tə́ kadə̄ j-oy kɔ̄ɔ́ ní asiī aĺ ɓáý á ī-sāā ndi dɔjí tə́ kə́ ngār tə́ ɓáý to̰ a. 14I ɓē kə́ mba ō, yibə̄ tejə ō i ngá̰ý tū tə́ n ī-reē sejí tū tə́ ní alé. I ndɔr̄ gə̄ kə kāgə̄ nduú gə̄ n ādə̄jí kadə̄ i yá̰a̰ kənge yājí ní alé. Ɔ́jəń na de gə̄ ń toō i de kə́ kum tɔ̄ɔ̄ gə̄ a? J-a j-aw̄ alé. 15Wōn̄g rāā Moijə ngá̰ý adə̄ ni-əda Kɔ́ɔ̄ɓē na:
Kɔ́ɔ̄ɓē, ī-lōō ndigə yá̰a̰ ndējə̄ yādə́. m̄-taā yá̰á̰ kə́rēý jīdə́ tə́ alé, kərō gə̄gē m̄-taā alé. m̄-rāā yá̰á̰ kə́ majaĺ kə deē kógə̄ḿ dandə́ tə́ alé.
Nə́ɓā ənda Kore nin̄ kə de gə̄ kə́ gōn tə́
16Moijə əda Kore na:
Bírí ī-reēī sḭḭ̄ kə de gə̄ kə́ gōí tə́ gēé malang ta kum Kɔ́ɔ̄ɓē tə́. Aaro̰ a reē sesí ō. 17De kə́ goí tə́ gə̄ ń nin̄ i deē ɓú jōó kə kutə mí ní a ɔyn̄ ganán yādə́ gə̄ jīdə́ gə̄ tə́ kógə̄ḿ kógə̄ḿ kə yā̰l̄ hor gēé kemeé. Adə̄ ganán malang i ɓú jōó kə kutə mí. Nin̄ a ɓōkə́n̄ kajaja kum yā̰l̄ hor kə́ kem ganán gə̄ ní tə́, ba a reēnəń ta kum Kɔ́ɔ̄ɓē tə́. Sḭḭ̄ kə Aaro̰ ā ī-reēī kə yāsí ō. 18Kore nin̄ kə de kə́ gōn tə́ gə̄ rāān̄ yá̰á̰ ń Moijə əda ni. Nin̄ ɔyn̄ ganán yādə́ kógə̄ḿ kógə̄ḿ kə̄ jīdə́ gə̄ tə́, ba ɓōkə́n̄ yā̰l̄ hor gə̄ kemeé ō, ɓōkə́n̄ kajaja kum yā̰l̄ hor gə̄ ní tə́ ō, ba aw̄ ran̄ ta kújə kənge naā tə́ kə Moijə ō, Aaro̰ ō. 19Kore ɓāŕ de kə́ gōn tə́ gə̄ malang adə̄ reē ran̄ ta kújə́ ní tə́.
Anī kɔsə gɔn yā Kɔ́ɔ̄ɓē teē ta kum ngán Israel gə̄ tə́ malang adə̄ a̰a̰n̄. 20Kɔ́ɔ̄ɓē əda Moijə nin̄ kə Aaro̰ na:
21Ɔ́tiī kɔ̄ɔ́ rɔ̄ de gə̄ ń noō tə́, tɔdɔ̄ m-ā m̄-róōdə́ i gidə kógə̄ḿ. 22Moijə nin̄ kə Aaro̰ əsō sébən̄ kumdə́ nang tə́ ba ədan̄ na:
Á Nə́ɓā, ḭ̄ ń ī-rāā adə̄ de gə̄ malang ndin̄ kə kumdə́ ní, de kə́ kógə̄ḿ beē rāā yá̰á̰ kə́ majanī, ā ī-rāā wōn̄g kə gotə de gə̄ malang a? 23Kɔ́ɔ̄ɓē tél əda Moijə na:
24Əda de gə̄ ādə̄ ndɔ́tə̄n̄ kɔ̄ɔ́ kadə kújə yā Kore nin̄ kə Datan tə́ ō, Abiram tə́ ō, ba aw̄n̄ sa̰y.
25Moijə aw̄ kənge Datan nin̄ kə Abiram tə́, anī kum kɔɔ̄ gə̄ yā ngán Israel gə̄ unən̄ gōn. 26Moijə əda de gə̄ na:
Ī-ndɔ́tiī kɔ̄ɔ́ kadə kújə yā ngé kem ndul gə̄ ń noō tə́. Ī-lōōī kɔdə rɔ̄ yá̰a̰ yādə́ kógə̄ḿ, na sōgə́ óyiī sedə́ loo ń Nə́ɓā a əndadə́ tām̄ yá̰á̰ kə́ majaĺ gə̄ malang ń nin̄ rāān̄ tə́ ní. 27Anī de gə̄ ɔtən̄ kɔ̄ɔ́ kadə kújə yā Kore tə́ ō, Datan tə́ ō, Abiram tə́ ō aw̄n̄ sa̰y.
Datan nin̄ kə Abiram teēn dan ta kújə yādə́ gə̄ tə́ kə nə̄yá̰də́ gē, ngáńdə́ gē, ngán kaadə́ gē. 28Moijə əda na:
Yá̰á̰ ń a rāā yā rāā yá̰a̰ toō n ā ī-gerīiń kadə̄ i Kɔ́ɔ̄ɓē n əlam̄ rāā yá̰a̰ gə̄ ń noō tə́ ní malang, ba i mā n m̄-rāādə́ kə dɔḿ ní alé. 29Ré de gə̄ ń toō oyn̄ i yo ń de gə̄ malang a oyn̄ ní ō, ré i yá̰á̰ ń a rāā de gə̄ malang ní n rāādə́ ō anī, i Kɔ́ɔ̄ɓē n əlam̄ ní alé. 30Banī ré Kɔ́ɔ̄ɓē rāā yá̰á̰ kə́ yáā, adə̄ dɔ nang teē tan urdə́ kə yá̰a̰ yādə́ gēé malang ō, ré aw̄n̄ ɓádá kə kumdə́ ō anī, ā ī-gerī kadə̄ nin̄-kídə̄n̄ i Kɔ́ɔ̄ɓē. 31Dan ń Moijə tɔ̄l̄ ta najə̄ gə̄ ń noō anī, dɔ nang njar gír nja Datan nin̄ kə Abiram tə́. 32Dɔ nang teē tan urdə́ kə de gə̄ yādə́ gə̄ malang ō, ur de gə̄ yā Kore gə̄ ō, yá̰a̰ kənge yādə́ gə̄ ō malang. 33Dɔ nang ɔr tan dɔdə́ tə́ adə̄ nin̄ aw̄n̄ ɓádá kə yá̰a̰ kənge yādə́ gēé malang. Nin̄ gətóon̄ kɔ̄ɔ́ dan ngé kán̄ naā gə̄ tə́ i tītə̄ ń noō. 34Ngán Israel gə̄ malang ń ra gīrə̄n̄ gidədə́ ní oōn̄ sō̰ḿdə́ anī aȳn̄ naā kɔ̄ɔ́ tām̄ ədan̄ na:
Ré j-a̰yī aĺ anī, dɔ nang a urjí. 35De kə́ ɓú jōó kə kutə mí gə̄ ń ra a ndējə̄n̄ kajaja ní, Kɔ́ɔ̄ɓē adə̄ hor kógə̄ḿ teē róōdə́ malang.
Currently Selected:
TƏ́DA 16: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
