TƏ́DA 15

Ndujə̄ ō, Yibə̄ ō, Kasə ō, kə́ ndējə̄

1-2Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō:

Ré ūgī dɔ nang ń Kɔ́ɔ̄ɓē adə̄sí kadə̄ ī-ndiī tū tə́ ní tə́, 3ba ā ī-róōī dā̰ horoó yā kadə̄m̄, aláa ā ī-tunī dā̰ kənī ndū, aláa dā̰ kə́ kə gō kem ndigə yāsí, aláa dā̰ kə́ ndɔ̄ rāā nāā tə́ yā kadə̄m̄ anī, ā ī-gērāī i man̄g, aláa i batə̄, aláa i bə̄yā̰ n ā ī-tunī yā kadə̄ sēēn nel̄ Kɔ́ɔ̄ɓē ní. 4Ba nge ndejə̄ dā̰ ní a əndā ndujə̄ kə́ ló̰ȳ kə yibīí kem lāngá mətá dɔ tə́. A ló̰ȳ ndujə̄ ní i kə yibə̄ kə́ asə kem lāngá kógə̄ḿ kə núsə. 5A adə̄ kasə nduú kə́ yā tə́te kem lāngá kógə̄ḿ kə núsə dɔ ngōn̄ batə̄ kə́ yā róō horoó tə́ ní, aláa kə́ yā tun̄ karī tə́ ní. 6Ré i bal batə̄ anī a adə̄ ndujə̄ kə́ ló̰ȳ kə yibīí kem lāngá mehḛ́ dɔ tə́. A ló̰ȳ ndujə̄ ní i kə yibə̄ kə́ asə kem lāngá jōó. 7A adə̄ kasə nduú dɔ tə́ i kem lāngá jōó ō. Ā ī-ndējə̄ Kɔ́ɔ̄ɓē yá̰á̰ kə́ sēēn nel̄ gə̄ ń noō. 8Ré i man̄g kə́ bəra n deē róō horoó aláa tun̄ tām̄ ndūn kə́ ənī tə́, aláa tām̄ yā kem kógə̄ḿ tə́ adə̄m̄ anī, 9deē ní a adə̄ ndujə̄ kem lāngá ndōhó dɔ tə́ ō, a ló̰ȳ ndujə̄ ní kə yibə̄ kə́ asə kem lāngá mətá ō, 10a adə̄ kasə nduú kem lāngá mətá dɔ tə́ ō. Yá̰a̰ tun̄ kə́ sēēn nel̄ Kɔ́ɔ̄ɓē n noó.

11Ré i man̄g kə́ bəra, aké i bal batə̄, aké i ngōn̄ batə̄, aké i ngōn̄ bə̄yā̰ n ā ī-tunī yā kadə̄ Kɔ́ɔ̄ɓē anī, ā ī-rāāī i tītə̄ ń noō. 12Dā̰ gə̄ ń ā ī-tunīdə́ yā kadə̄ Kɔ́ɔ̄ɓē ní, ré kutədə́ i kóndóńg gə̄gē anī, ā ādī yá̰a̰ ndējə̄ gə̄ kə́ dɔ tə́ malang. 13Ngán Israel gə̄ malang a unən̄ i gō ndū gə̄ ń noō n a tunə̄nəń yá̰á̰ kə́ sēēn nel̄ Kɔ́ɔ̄ɓē ní. 14Ré tə̄rā ń ndi dansí tə́ ngɔr ɓáý, aláa jóó ngá̰ý ní ndigə tun̄ dā̰ kadə̄ sēēn nel̄ Kɔ́ɔ̄ɓē anī, a rāā i tītə̄ yāsí. 15Ndū najə̄ ní i tām̄ yā ngé kán naā gə̄ tə́ malang. I tām̄ yāsí sḭḭ̄ ngán Israel gə̄ tə́ ō, tə̄rā gə̄ ń ndin̄ dɔ dáńsí tə́ ní ō. I ndū najə̄ kə́ a tūr̄ aĺ ō, a to ngándáńg ō, tām̄ yāsí tə́ ta kum Kɔ́ɔ̄ɓē tə́. 16Ndū najə̄ kə́ tām̄ yāsí tə́ ō, tām̄ yā tə̄rā gə̄ ń ndin̄ dɔ dáńsí tə́ ní ō, i kógə̄ḿ beē.

Mápá kə́ ta kəga dɔ kə́ ndējə̄ Nə́ɓā

17-18Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō: Ré ā ūgī dɔ nang ń Kɔ́ɔ̄ɓē a aw̄ sesí kə̄ tū tə́ ní tə́, 19ba ā ə́saī mápá kə́ tū tə́ anī, ā ɔ̄rī dɔ yā ndējə̄ Kɔ́ɔ̄ɓē. 20Ā ī-ló̰yī ndujə̄ yā kɔr̄ mápá tə́. Ba mápá kə́ ta kəga dɔ ń ā ɔ̄rī ní, ā úniī dɔ yā kadə̄n. Ā úniī dɔ mápá ní yā kadə̄n i tītə̄ loo kɔr̄ dɔ kōō kem gárāá. 21Adə̄ kə́ ta kəga dɔ ń ɔ̄rī ní, ā ī-ndejī Kɔ́ɔ̄ɓē. Nge ń noō i ndū najə̄ kə́ a to ngándáńg tām̄ yāsí tə́.

Dā̰ kə́ tun̄ kadə̄ Nə́ɓā yā kutə̄ń dɔ majaĺ kə́ deē rāā kə gō kem ndigə yānneé alé

22-23 Ndū najə̄ gə̄ ń Kɔ́ɔ̄ɓē əda Moijə kadə̄ ndang adə̄sí sḭḭ̄ ō, ngáńsí gə̄ ō, ngán kaasí gə̄ ō, ta kəla gír tə́ ní, aké ngé gə̄ ń adə̄sí gō madə̄ gə̄ tə́ ní, ré ī-mānī dɔ, ba i kə gō kem ndigə yāsí alé, 24ré yá̰á̰ kə́ majaĺ ní ngán Israel gə̄ gerə̄n̄ gō aĺ ō anī, i nin̄ malang n a adə̄n̄ man̄g kə́ bəra kə́ yā róō horoó kadə̄ sēēn nel̄ Kɔ́ɔ̄ɓē ní. Nin̄ a ndējə̄n̄ ndujə̄ ō, a tə́ten̄ kasə nduú ō dɔ tə́. A tunə̄n̄ bal bə̄yā̰ tām̄ yā majaĺ tə́ ō. 25Nge tun̄ yá̰a̰ a rāā yá̰á̰ kə́ yā kutə̄ń dɔ majaĺ ní dɔ ngán Israel gə̄ tə́. Loo ń noō tə́ Nə́ɓā a mā̰ȳ rɔ̄n dɔdə́ tə́. Tām̄ majaĺ ní i kə́ rāā kə gō kem ndigə yādə́ alé ba nin̄ róōn̄ yá̰a̰ horoó ō, tunə̄n̄ yá̰a̰ ō, ndējə̄n̄ Kɔ́ɔ̄ɓē najə̄n tə́. 26Nə́ɓā a mā̰ȳ rɔ̄n dɔ ngán Israel gə̄ tə́ malang ō, dɔ tə̄rā gə̄ ń ndin̄ dɔ dáńsí tə́ ní ō, tɔdɔ̄ i de gə̄ malang n najə̄ əsō dɔdə́ tə́ tām̄ majaĺ kə́ rāā kə gō kem ndigə yādə́ aĺ ní tə́.

27Ré i de kə́ kógə̄ḿ beē n rāā yá̰á̰ kə́ majaĺ kə gō kem ndigə yānneé alé anī, deē ní a ndējə̄ ngōn̄ bə̄yā̰ kə́ ɓāl̄ kógə̄ḿ kə́ yā tun̄ tām̄ yā majaĺ ní tə́. 28Nge tun̄ yá̰a̰ a rāā yá̰á̰ kə́ yā kutə̄ń dɔ majaĺ kə́ rāā kə gō kem ndigií aĺ ní dɔ deē ní tə́ ta kum Kɔ́ɔ̄ɓē tə́ ō, Kɔ́ɔ̄ɓē a mā̰ȳ rɔ̄n dɔn tə́ ō, 29De gə̄ ń rāān̄ yá̰á̰ kə́ majaĺ kə gō kem ndigə yādə́ aĺ ní, ká i ngán Israel gə̄, aké i tə̄rā gə̄ ń ndin̄ dandə́ tə́ ní gə̄gē anī, ndū najə̄ kə́ dɔdə́ tə́ i kógə̄ḿ beē.

30Banī deē ń rāā yá̰á̰ kə́ majaĺ kə gō kem ndigə yānneé ní, ká i ngōn̄ nge ɓē, aké i tə̄rā gə̄gē anī, ni kídə̄ i Kɔ́ɔ̄ɓē adə̄ a ɔr̄nən̄ kɔ̄ɔ́ dan gír deē yān gə̄ tə́. 31Ni-kídə̄ najə̄ yā Kɔ́ɔ̄ɓē ō, mān̄ dɔ míndən ō ɓá ní a ɔr̄nən̄ kɔ̄ɔ́: Majaĺ yān na̰y dɔn tə́.

Deē kógə̄ḿ man̄ dɔ ndū najə̄ kə́ dɔ sabat tə́

32Dan ń Israel gə̄ i kem dəla loo tə́ ɓáý ní, əngen̄ deē kógə̄ḿ loo kɔy kīr̄ tə́ ndɔ̄ sabat tə́. 33De gə̄ ń əngen̄ deē ní loo kɔy kīr̄ tə́ ní aw̄n̄ seneé no Moijə tə́ ō, Aaro̰ tə́ ō, ngán Israel gə̄ tə́ malang ō. 34Ənīnən̄ dəngáyá tām̄ yá̰á̰ ń a rāān̄ yā rāā seneé ní deē əda aĺ ɓáý. 35Tā anī Kɔ́ɔ̄ɓē əda Moijə na:

Deē ń toō i yā yo. Ngán Israel gə̄ malang a aw̄n̄ seneé gidə ɓē tə́ ndágá yā tə́nīn kə mbalá yā tɔ̄lən. 36De gə̄ rāān̄ yá̰á̰ ń Kɔ́ɔ̄ɓē əda Moijə ní. Aw̄n̄ kə deē ní gidə ɓē tə́ ndágá ba tə́nīnən̄ kə mbalá adə̄ oy.

Kəlā gə̄ kə́ ta kūbə̄ gə̄ tə́

37-38Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō: Sḭḭ̄ ō, ngáńsí gə̄ ō, ngán kaasí gə̄ ō ní, ā ī-tə́nāī kəro ta kəlā kəjō kūbə̄ yāsí gə̄ tə́, ba a ə́ya̰ī ta kəlā kəjōn kadə̄ teē kə̄ ndágá ō, ā ī-do̰ō̰ī kəlā kə́ ndul gusə gusə gə̄ tū kəron gə̄ tə́ ō. 39Adə̄ ā ō̰ō̰ī kūbə̄ gə̄ kə́ ta kəlā kəjōdə́ gə̄ teēn̄ kə̄ ndágá, yā kadə̄ ré á̰a̰ī tadə́ anī, əga kemsí dɔ ndū najə̄ gə̄ yā Kɔ́ɔ̄ɓē tə́ malang, kadə̄ ī-rāāiń yá̰a̰ gə̄ ń ədan̄ ní. Loo ń noō tə́ ā úniī gō ngur yá̰a̰ gə̄ kə́ kemsí tə́ ō, kum kəsō yá̰a̰ gə̄ ō, kadə̄ ī-téliīń ngé rāā yá̰a̰ gōtə́ aĺ gə̄ alé. 40I beé n ā ī-gírīiń rāā yá̰a̰ gə̄ ń ndū najə̄ yāḿ gə̄ malang ədan̄ ní ō, ā ī-téliīń de kə́ táĺ gə̄ tām̄ yā Nə́ɓā yāsí tə́ ō ní. 41Mā i Kɔ́ɔ̄ɓē Nə́ɓā yāsí, nge teē sesí kɔ̄ɔ́ kem ɓē kə́ Ejiptə tə́ adə̄ mā i Nə́ɓā yāsí rɔ̄kum. Mā i Kɔ́ɔ̄ɓē Nə́ɓā yāsí.

Currently Selected:

TƏ́DA 15: SARDC

Highlight

Copy

Compare