JOJUE 13

Dɔ nang gə̄ kə́ yā taā ɓáý

1Jojue tɔgə ɓə́ga, ɓālə̄n i ngá̰ý. Anī Kɔ́ɔ̄ɓē ədan na: Ḭ̄ ī-tɔgə ɓə́ga kɔ̄ɔ́, ba dɔ nang gə̄ kə́ yā táā na̰y i ngá̰ý ɓáý. 2Dɔ nang gə̄ ń na̰y ní i dɔ nang yā Pilistin gə̄ ō, yā Gesur gə̄ ō, 3i dɔ nang ń rāānən̄ i dɔ nang yā Kanaan gə̄ tə́ ní ō. Dɔ nang ní i dɔ nang ń ḭḭ man̄ Sihor tə́ dɔ nin̄ loo kə́ Ejiptə tə́ bátə́ teēń gō nang kə́ Ekəron tə́ dām̄ mbɔ́r ɓē kə́ ko̰ó̰ tə́ ní. Mban̄g kə́ mí gə̄ yā Pilistin gə̄ ndin̄ i dɔ nang ní tə́ i mban̄g kə́ Gaja ō, kə́ Asdod ō, kə́ Askalon ō, kə́ Gat ō, kə́ Ekəron ō, Abit gə̄ ndin̄ dɔ nang ní tə́, 4dām̄ mbɔ́r ɓē kə́ geleé tə́ ō. Dɔ nang kə́ yā taā ɓáý to̰ i dɔ nang yā Kanaan gə̄ ń əla gír i Meyara dɔ nang yā Sidon gə̄ tə́ bátə́ teēń Apek dɔ nin̄ loo yā Amor gə̄ tə́ ní. 5Dɔ nang kə́ yā taā ɓáý to̰ i dɔ nang kə́ Gebal ō, dɔ nang Liban kə́ dām̄ kə́ gír ɓē tə́ ń a ɓārə́n̄ na i Baal Gad á i loo kə́ nja mbal̄ Hermon tə́ ní bátə́ teēń Lebo Hamat ō, 6gō nang kə́ mbalá ń ra dɔ dán Liban kə Misərepot Maim tə́ á de kə́ tū tə́ gə̄ i Sidon gə̄ malang ní ō. Mə̄kɔ́ m-ā m̄-tə̄ɓā de gə̄ ń ndin̄ dɔ nang gə̄ ń noō tə́ ní kɔ̄ɔ́ no ngán Israel gə̄ tə́. Yá̰a̰ ń kadə̄ i rāā ní i kadə̄ ī-gán̄g dɔ nang ní ādə̄ ngán Israel gə̄ tītə̄ ń m-ə́daīń ní ngóy. 7Adə̄ ī-gán̄g dɔ nang ní ādə̄ de kə́ gír ɓē kə́ ndōhó gə̄ tə́ ō, núsə de kə́ gír ɓē yā Manase tə́ gə̄ ō.

Loo gán̄g dɔ nang kə́ gidə bā Jurdḛ tə́

8De kə́ gír ɓē yā Ruben tə́ gə̄ ō, Gad tə́ gə̄ ō, núsə de gə̄ kə́ ta kəga dɔ kə́ gír ɓē yā Manase tə́ ō, əngen̄ dɔ nang yādə́ gə̄ kɔ̄ɔ́ ɓá gidə bā Jurdḛ kə́ dām̄ kə́ gír ɓē tə́. I Moijə kə́ nge kəla yā Kɔ́ɔ̄ɓē n adə̄də́ dɔ nang gə̄ ní. 9Gō nja loo yādə́ teē ɓē kə́ Aroer dɔ gɔ́sə man̄ Arnon tə́ ō, teē ɓē ń ra kum wól tə́ ní ō. Gō nja loo ní un loo kə́ kḭḭ kə̄ dɔɔ́ ba gidə asə naā ń ḭḭ Medeba bátə́ Dibon ní ō, 10un ɓē gə̄ yā Sihon mban̄g yā Amor gə̄ ń kété o̰o̰ ɓē kə́ Hesəbon ní kemeé ō. Gō nang ń o̰o̰ bāā dɔ tə́ ní, aw̄ bátə́ teē dɔ nin̄ loo yā Amon gə̄ tə́. 11Gō nja loo yādə́ ní un nang kə́ Galaad ō, nang yā Gesur gə̄ ō, yā Maaka gə̄ ō, mbal̄ Hermon malang ō, gō, nang kə́ Basan malang ō, kemeé, bátə́ ugə̄ń Salka. 12Nja loo yādə́ ní un dɔ nang yā mban̄g Og ń kété o̰o̰ ɓē kə́ Asətarot ō, Edrey ō, dɔ nang kə́ Basan tə́ ní kemeé. Og i ta nóý Repay gə̄. Kété Moijə tetə de gə̄ kə́ gō nang gə̄ ń noō tə́ rɔ̄ɔ̄ ba taā ɓē yādə́. 13Banī ngán Israel gə̄ tə̄ɓān̄ Gesur gə̄ ō, Maaka gə̄ ō, kɔ̄ɔ́ alé, ndin̄ dɔ dáńdə́ tə́ noō bátə́ ɓōólaā.

14I de ké gír ɓē yā Lebi tə́ gə̄ ngóy n Moijə adə̄də́ dɔ nang aĺ ní. Tītə̄ ń Kɔ́ɔ̄ɓē ədanəń ní, i núsə yá̰á̰ kə́ tun̄ kadə̄ Kɔ́ɔ̄ɓē Nə́ɓā yā Israel n i yá̰a̰ kənge yādə́ ní.

15Dɔ nang ń Moijə adə̄ de kə́ gír ɓē yā Ruben tə́ gə̄ kə gō gír kaa yādə́ gēé ní, 16dɔ ninə̄n̄ kə́ dām̄ mbɔ́r ɓē kə́ geleé tə́ i ɓē kə́ Aroer ń ra dɔ gɔ́sə man̄ Arnon tə́ ní ō, i ɓē ń ra kum wól tə́ ní ō. Nja loo yādə́ ní un loo kə́ kḭḭ kə̄ dɔɔ́ ba gidə asə naā ń gīr̄ gidə ɓē kə́ Medeba ní kemeé. 17Adə̄ i ɓē kə́ Hesəbon ō, gotə ɓē kə́ rang gə̄ ō. Rī ɓē gə̄ ní n toó: Dibon ō, Bamot Baal ō Bet Baal Meon ō, 18Yahas ō, Kedemot ō, Mepat ō, 19Kiryataim ō, Sibəma ō, Seret Sahar ń ndi dɔ ngōn̄ mbal̄ ń dɔn un dɔ loo kə́ wól loo tə́ ní ō, 20Bet Peor ō, gō kadə̄ mbal̄ Pisga ń risə kum kə̄ nang tə́ ní ō, Bet Yesimot ō. 21Nja loo yādə́ ní un i ɓē gə̄ ń ndin̄ loo ké kḭḭ kə̄ dɔɔ́ ba gidə asə naā tə́ ní ngóy alé, ba un dɔ nang yā Sihon mban̄g yā Amor gə̄ ń kété o̰o̰ ɓē kə́ Hesəbon ní ō. Moijə tetən rɔ̄ɔ̄ ō, tetəń ngār gə̄ kə́ Madian ń əlan̄ dɔdə́ gíŕ tɔ́gə yān tə́ ní rɔ̄ɔ̄ ō. Ngār gə̄ ní i Ebi ō, Rekem ō, Sur ō, Hur ō, Reba ō. 22Balam kə́ kɔdə̄sā kə́ ngōn̄ Beor i dan de gə̄ ń ngán Israel gə̄ tɔ̄lə̄n̄də́ kə kaskaraá ní tə́ ō. 23Dɔ nang ń de kə́ gír ɓē yā Ruben tə́ kə́ dām̄ kə́ no ɓē tə́ i bā Jurdḛ. Dɔ nang ń de kə́ gír ɓē yā Ruben tə́ gə̄ əngen̄ kə gō gír kaa yādə́ gēé ní n noó. Ɓē bo yādə́ gə̄ n noó ō, ngán ɓē gə̄ n noó ō.

24Dɔ nang ń Moijə adə̄ de kə́ gír ɓē yā Gad tə́ gə̄ kə gō gír kaa yādə́ gēé ní 25un ɓē kə́ Yajer ō, ɓē gə̄ kə́ Galaad malang ō, núsə dɔ nang yā ngán Amon gə̄ ō, kemeé bátə́ teēń Aroer kadə ɓē kə́ Raba tə́. 26Dɔ nang ní ḭḭ Hesəbon bátə́ ugə̄ Ramat Mispe ō, Betonim ō, ḭḭ Mahanaim bátə́ ugə̄ gō nang kə́ Loo Dabar tə́ ō. 27Dɔ nang yādə́ kə́ ndágə loo gə̄ tə́ un ɓē kə́ Bet Haram ō, Bet Niməra ō, Sukot ō, Sapon ō kemeé. Ɓē gə̄ ń noō i gotə ɓē gə̄ kə́ dɔ nang yā Sihon mban̄g kə́ Hesəbon ń na̰yn̄ ní. Dɔ nang yādə́ ní i gidə bā Jurdḛ tə́ dām̄ kə́ gír ɓē tə́ Dɔ ninə̄n i bā Jurdḛ ugə̄ń bā bo kə́ Kineret tə́, dām̄ mbɔ́r ɓē kə́ ko̰ó̰ tə́. 28Dɔ nang ń de kə́ gír ɓē yā Gad tə́ gə̄ əngen̄ kə gō gír kaa yādə́ gēé ní n noó. Ɓē bo yādə́ gə̄ n noó ō, ngán ɓē yādə́ gə̄ n noó ō.

29Dɔ nang ń Moijə adə̄ núsə de kə́ gír ɓē yā Manase tə́ gə̄ kə gō gírka yādə́ gēé ní, 30ɓē kə́ Mahanaim i dɔ ninə̄n kə́ dām̄ mbɔ́r ɓē kə́ geleé tə́. Dɔ nang ní un gō nang kə́ Basan malang ō, dɔ nang yā Og mban̄g kə́ Basan ō, ngán ɓē gə̄ ké kutə mehḛ́ yā Yair ń i gō nang ń noō tə́ ní ō, 31un núsə dɔ nang kə́ Galaad ō, Asətarot nin̄ kə́ Edrey ń kété i ɓē bo gə̄ yā Og mban̄g kə́ Basan ní ō kemeé. I dɔ nang ń noō malang n adə̄n̄ núsə́ ngán kaa Makir kə́ ngōn̄ Manase kə gō gír kaa yādə́ gēé ní.

32Dɔ nang ń Moijə gán̄g adə̄ de gə̄ gidə bā Jurdḛ tə́ dan ń ndiń loo gə̄ kə́ Moab tə́ ní n noó. Ré deē ra ɓē kə́ Jeriko tə́ anī, i kə̄ dām̄ kə́ gír ɓē tə́. 33De kə́ gír ɓē yā Lebi tə́ gə̄ ní, ni-adə̄də́ dɔ nang alé, ba ədadə́ na yá̰a̰ kənge yādə́ na i rāā kəla yā Kɔ́ɔ̄ɓē Nə́ɓā yā Israel.

Currently Selected:

JOJUE 13: SARDC

Highlight

Copy

Compare