JOEL 2
2
Dɔ ndɔ̄ yā Kɔ́ɔ̄ɓē i ngɔr
1Ī-kɔ̄ríī tōw̄ Siyo̰ tə́. Úriī kɔl rɔ̄ɔ̄ dɔ mbal̄ yāḿ kə́ táĺ tə́.
Ādə̄ de kə́ kem ɓēé gə̄ malang ndewn̄.
Ndɔ̄ yā Kɔ́ɔ̄ɓē a reē noó, dɔ ndɔ̄ ní i ngɔr.
2I ndɔ̄ kə́ ndul ndí ndí ō, risə til nding ō.
I ndɔ̄ yā kil̄ man̄ gə̄ ō, yā kil̄ man̄ kə́ ndul kíndíńg kíndíńg ō.
Gír de kə́ ngá̰ý gə̄ ō, ngangə̄n̄ ngá̰ý gə̄ ō,
tə̄ndān̄ naā tḭ̄ḭ̄n̄ kə̄ dɔ mbal̄ gə̄ tə́,
tītə̄ ta gír loo kə́ atə wororo beé.
I gír de gə̄ kə́ deē a̰a̰də́ nja kógə̄ḿ aĺ ɓáý ō, kə́ deē a a̰a̰də́ gogə́ to̰ aĺ i kə́ bátə́ gə̄ tə́ ō,
bátə́ ɓāl̄ yā gír kojə gə̄ kə́ ndɔ̄ń tə́ tə́.
3Hor o̰o̰ loo kété nodə́ tə́ ō, ɓáa, ta ndo̰ hor kə́ o̰o̰ bəlim bəlim i gōgə̄ gōdə́ tə́ ō.
Ɓē to kété nodə́ tə́ i tītə̄ ndɔr̄ kə́ Eden beē.
Ba ré mānə̄n̄ i dəla loo kə́ nujə sák sák kɔ̄ɔ́ beē.
Yá̰á̰ kógə̄ḿ kə́ teē ta jīdə́ tə́ gətóo.
4Nin̄ ton̄ tītə̄ ɓūtə̄ sə́nda gə̄ ō,
tītə̄ ngé kal̄ sə́nda gə̄ kə́ mbutən̄də́ beē ō.
5Nin̄ a tḭ́ḭ̄n̄ bal dɔ mbal̄ gə̄ tə́, kōōdə́ ɓār̄ tītə̄ kōō púsə rɔ̄ɔ̄ gə̄ beē,
tītə̄ kōō ta ndo̰ hor kə́ o̰o̰ a kújə beé,
tītə̄ gír de kə́ ngan̄g ngá̰ý gə̄ kə́ ran̄ kə ta naā yā rɔ̄ɔ̄ beé ō.
6Ɓōĺ kə́ ngá̰ý tɔ̄l̄ gír nápar de gə̄ malang kété nodə́ tə́,
ɓōĺ rāā adə̄ ta kumdə́ tūr̄ kɔ̄ɔ́.
7Nin̄ ngɔ̄də̄n̄ tītə̄ go̰ rɔ̄ɔ̄ gə̄ ō, alə̄n̄ ndogə̄ mbal̄ tītə̄ ngé rɔ̄ɔ̄ gə̄ beé ō.
Náā nəkɔ́ ɓáā kumən i súmūú dɔ róbə yān tə́.
Nin̄ tɔ̄ɔ̄n̄ kɔ̄ɔ́ dɔ róbə yādə́ tə́ alé.
8Nin̄ a̰ȳn̄ ngɔ̄də̄ ngá̰ý kə̄ nodə́ tə́.
Mánə̄n̄ dan yá̰a̰ gə̄ ń a túrə̄n̄neédə́ gə̄ ní tə́, kanjə̄ dəba.
9Nin̄ taān̄ loo kem ɓēé ō, a̰ȳn̄ ngɔ̄də̄ dɔ ndogə̄ mbal̄ gə̄ tə́ ō,
alə̄n̄ dɔ kújə gə̄ tə́ ō,
tudən̄ kum ko̰rō̰ kújə gə̄ tə́ aw̄n̄neé kemeé tītə̄ ngé ɓogə gə̄ beé ō.
10Dɔ nang ndebə ō, dɔ rā̰ yéȳ ō.
Mbang nin̄ kə nāá ō udən̄ tilií ō. Tə́yō̰ gə̄ unjə̄n̄ to̰ aĺ ō kété nodə́ tə́.
11Ndū Kɔ́ɔ̄ɓē ɓār̄ kété no ngé rɔ̄ɔ̄ yān gə̄ tə́.
Kutə ngé rɔ̄ɔ̄ yān gə̄ i ngá̰ý al̄ naā.
Deē ń rāā yá̰á̰ ń Kɔ́ɔ̄ɓē əda ní i de kə́ tɔ́gən i ngá̰ý.
Ndɔ̄ yā Kɔ́ɔ̄ɓē i ndɔ̄ kə́ bo ngá̰ý ō, to ɓōĺ ngá̰ý ō.
I náā n asə tə́gā tan ndɔ̄ ndɔ̄ ní tə́ ní?
Kum mbang tūr̄ hál
12Kɔ́ɔ̄ɓē ɔr̄ najə̄ əda na:
Ngɔlaā ní, ī-teliī kə̄ rɔ̄ḿ tə́ kə ngarā̰ kemsí malang.
Ī-*ndiī ɓō tām̄ yāḿ tə́ ō, ī-nōōī ō, ī-sɔ̄míī ō.
13Ī-rə́yā̰ī dan wursí gə̄ ba i kūbə̄ kə́ rɔ̄sí tə́ gə̄ alé.
Ī-téliī kə̄ rɔ̄ Kɔ́ɔ̄ɓē Nə́ɓā yāsí tə́.
Ni i Nə́ɓā kə́ kumən a o̰o̰n ō, kə́ nge kem majə ō,
kə́ a rāā wōn̄g láẃ aĺ ō, kə́ nge ra dɔ ndūn tə́ ō.
Ni i nge lōō gír yá̰á̰ kə́ to kum kaȳ aĺ ń núm̄ kemən tə́ yā rāā kə deē ní ō.
14Majanī Nə́ɓā a tél yā tūr̄ ndūn ō,
kemən a sɔl̄ ō, adə̄ a nujə sejí kɔ̄ɔ́ alé.
Ni a adə̄jí yá̰a̰ kənge ngá̰ý ō.
Adə̄ ā ī-tunī yá̰a̰ ō, ā ī-tə́teī kasə nduú ō, yā kadə̄ Kɔ́ɔ̄ɓē yāsí.
Kum mbang ndi ɓō tām̄ yā Nə́ɓā tə́ ō, rāā Kɔ́ɔ̄ɓē ɓɔ́ ō
15Ī-kɔ̄ríī tōw̄ Siyo̰ tə́,
ī-*ndiī ɓō tām̄ yā Nə́ɓā tə́ ɔ̄rīneé kamsí, ə̄nīī mbēr̄ kán̄ naā kə́ táĺ.
16Ɔ́siī dɔ ngán Israel gə̄ kə̄ naā tə́.
Ī-ɓāríīdə́ tām̄ yā kán̄ naā kə́ táĺ tə́.
Ɔ́siī dɔ de kə́ tɔgə ɓə́ga gə̄ ō,
balsáa gə̄ ō, ngáń kə́ ta mba tə́ gə̄ ō naā tə́.
Ādə̄ nge taā dəyá̰ kijə teē kújú kɔ̄ɔ́ ō,
nge taā ngaa kijə teē kújú kɔ̄ɔ́ ō.
17Ādə̄ ngé tun̄ yá̰a̰ gə̄ ń i de kə́ bo gə̄ yā Kɔ́ɔ̄ɓē ní
ran̄ mbənā ngōn̄ kújə́ kə́ ta róbə́ tə́ kújə yā Kɔ́ɔ̄ɓē tə́
kə loo tun̄ yá̰a̰ ba nōōn̄ tə́.
Ādə̄ ədan̄ na: Kɔ́ɔ̄ɓē, á̰a̰ kum tō ndoō yā gír deē yāí gə̄.
Ī-lōō rāā kadə̄ yá̰á̰ kə́ to rɔ̄sɔl̄ ə̄sō dɔ yá̰a̰ kənge yāí tə́,
yā kadə̄ nápar de gə̄ lúrən̄də́.
I tām̄ rí tə́ á de gə̄ ədan̄ dan gír nápar de gə̄ tə́ na Nə́ɓā yādə́ i rá ní?
18Nə́ɓā rāā jang tām̄ yā ɓē yān tə́.
Ni-a̰a̰ kum tō ndoō yā gír deē yān gə̄.
19Kɔ́ɔ̄ɓē tél əda gír deē yān gə̄ na:
M-ā m-ə́la kə gémē ō, kasə nduú ō, yibə̄ ō, yā kadə̄sí kadə̄ ndān̄sí.
M-ā m-ādə̄sí yá̰a̰ gə̄ ń noō ngá̰ý.
M-ā m̄-rāā kadə̄ yá̰á̰ kə́ to rɔ̄sɔl̄ əsō dɔsí tə́ dáń nápar de gə̄ tə́ to̰ aĺ bátə́.
20M-ā m̄-tə̄ɓā madə̄ ba̰ā̰sí kə́ ḭḭ mbɔ́r ɓē kə́ ko̰ó̰ tə́ kɔ̄ɔ́ sa̰y rɔ̄sí tə́.
M-ā m̄ tə̄ɓān kum kə̄ loo kə́ mángá tə́ ō,
kə́ nujə sák sák kɔ̄ɔ́ tə́ ō.
M-ā m̄-tə̄ɓā ngé gə̄ ń njə̄rān̄ nodə́ tə́ kum kə̄ bā katə̄ tə́ gír ɓē tə́ ní ō,
ngé gə̄ ń njə̄rān̄ gōdə́ tə́ kum kə̄ bā bo kə́ no ɓē tə́ ní ō.
Nīńdə́ a ndum adə̄ loo a otə ndum rḭḭ.
Rɔ̄kum, ni-rāā yá̰á̰ kə́ bo ngá̰ý gə̄.
21Dɔ nang, ī-lōō ɓōĺ, ādə̄ rɔ̄í nelī ngá̰ý ō, ī-rāā walya ō,
tɔdɔ̄ Kɔ́ɔ̄ɓē rāā yá̰á̰ kə́ bo ngá̰ý gə̄.
22Dā̰ kə́ bembeé gə̄, ī-lōōī ɓōĺ.
Tɔdɔ̄ mu gə̄ kə́ kem kə̄sā gə̄ tél a sitən̄ gogə́ ō, kāgə̄ gə̄ anə̄n̄ ō,
Kāgə̄ kótə̄ ō, kāgə̄ nduú ō, anə̄n̄ ngá̰ý ō.
23Sḭḭ̄, de kə́ Siyo̰ tə́ gə̄,
adə̄ rɔ̄sí nel̄sí ngá̰ý ō, ī-rāāī walya ō,
najə̄ yā Kɔ́ɔ̄ɓē Nə́ɓā yāsí tə́.
Tɔdɔ̄ ni-adə̄sí man̄ ta ɓar yā kajəńsí, ni-rāā adə̄ man̄ edə ngá̰ý dɔsí tə́,
adə̄ man̄ ta ɓar ō, man̄ ta ɓāl̄ ō, edə dɔsí tə́ tītə̄ kə́ kété jóo.
24Kōō gémē rosə kem gár̄ gə̄ ō,
Kasə nduú mbə́rē rosə kem jóon gə̄ ba rə̄ɓā kə̄ nang tə́ ō,
yibə̄ rosə kem kūn gə̄ ba rə̄bā kə̄ nang tə́ ō.
25Kōō yāsí gə̄ ń m-ə́la kə kur̄ kə́ ngá̰ý yāḿ gə̄ ń
i yim̄ gə̄ ō kə́ndīŕ gə̄ ō gaẃ gə̄ ō taw̄ gə̄ ō,
adə̄ nujənə̄ń kɔ̄ɔ́ kem ɓāl̄ kə́ kété gə̄ tə́ ní, m̄-téləń m-ādə̄sí gogə́.
26Ā ə́saī yá̰a̰ kadə̄ ndān̄sí.
Ā ī-tɔ̄yī rī Kɔ́ɔ̄ɓē Nə́ɓā yāsí ń rāā yá̰á̰ kə́ to kɔr kum gə̄ tām̄ yāsí tə́ ní.
Rɔ̄ gír deē yāḿ gə̄ a sɔl̄də́ to̰ aĺ bátə́.
27Ā ī-gerī kadə̄ mā i dán Israel gə̄ tə́ ō,
kadə̄ mā i Kɔ́ɔ̄ɓē Nə́ɓā yāsí ō,
Nə́ɓā kə́ rang gətóo ō.
Currently Selected:
JOEL 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.