JAKƏ 3
3
Ɔ̄rī najə̄ láẃ alé
1Ngákó̰ó̰ḿ gə̄, ādī de kə́ dáńsí tə́ kə́ ngé ndóō de gə̄ yá̰a̰ gə̄ i ngá̰ý alé, tɔdɔ̄ ī-gerī kadə̄ a gāngə̄n̄ sarya kə́ ngan̄g ngá̰ý dɔjí jḭḭ ngé ndóō de gə̄ yá̰a̰ gə̄ tə́. 2Tɔdɔ̄ jḭḭ̄ malang jə-rāāī yá̰á̰ kə́ gō tə́ alé. Ré deē kógə̄ḿ ɔr̄ najə̄ ba əda yá̰á̰ kə́ gō tə́ aĺ alé anī, ni i de kə́ majə ɔtə̄ kə taá kə́ asə kəhɔ rɔ̄n kə taā malang kə jámá. 3Ré j-əlaī jámá ta sə́nda gə̄ tə́ yā kadə̄ nin̄-oōn̄neé tají anī, i yā kadə̄ jə-tetiīneé dɔ rɔ̄də́ kə taá malang ō.
4Á̰a̰ī too bo gə̄. Ká boon̄ ngá̰ý ō, néĺ ń a səlādə́#3.4 Néĺ ń a səlādə́: Too ń a njə̄rā i kə nélé ní, i too kə́ udən̄ kāgə̄ kemeé danaá bang ba tṵ́ṵ̄n̄ kūbə̄ gə̄ tū tə́ yā kadə̄ nél əsō kemeé ɓáa ɔr too aw̄ń. ní əla i kə tɔ́gɔ́ ngá̰ý ō gə̄gē anī, a tetən̄ dɔdə́ ta kaw̄ loo ń nge nēl̄də́ gḛy kaw̄ sedə́ tū tə́ ní tə́ i kə háý#3.4 Háy ní i háý kə́ ni a ra i gír too tə́ kum man̄ tə́. kə́ dūú ngá̰ý. 5Yā ta ndo̰jí i beé ō. Ni i ngōn̄ rɔ̄jí kə́ dūú sḛ́ý beē ba rāā yá̰á̰ kə́ bo ngá̰ý gə̄.
Hor kə́ sḛ́ý beē asə ko̰o̰ ku kāgə̄ kə́ bo ngá̰ý gə̄ ní ī-gerī aĺ a? 6Ba ta ndo̰jí i hor ō, i loo kə́ yá̰á̰ kə́ majaĺ gə̄ malang i tū tə́ ō. Ni i ngōn̄ rɔ̄jí kógə̄ḿ kə́ dan madə̄ gə̄ tə́ kə́ nge tákə̄ gotə rɔ̄jí malang kə yá̰á̰ kə́ yḛreé. Ni i nge kunjə̄ hor Gehen#3.6 Gehen: Á̰a̰ī Mat 5.22; Mark 9.47-48; Luk 12.5 ō; tū «Kum Najə̄ kə́ Ngón̄g Ngón̄g gə̄» tə́ ō. kəla dɔjí tə́ ndɔ̄ kojəjí tə́ bátə́ ndɔ̄ koyjí tə́. 7Gír dā̰ kə́ bembeé gə̄ malang ō, yel̄ gə̄ ō, kur̄ kə́ kagə nang tə́ gə̄ ō, dā̰ kə́ maná gə̄ ō ní, deē asə ndóōdə́ rāā yá̰á̰ ń kemən ndigə ní. 8Banī ta ndo̰jí ní, deē kógə̄ḿ kə́ asə tetə dɔn gətóo. I yá̰á̰ kə́ tōr̄ kə́ a to jəke alé. Kəga kə́ a tɔ̄l̄ deē rosə kemən. 9J-ɔriī ta nge ń i Kɔ́ɔ̄ɓē ō, Bɔbə̄jí ō ní seneé ō, jə-ndɔ̄líī de gə̄ ń Nə́ɓā rāādə́ adə̄ teēnən̄ ní#3.9 Nə́ɓā rāādə́… : Á̰a̰ī Tkg 1.26-27 i seneé ō. 10Tɔ́r̄ ta ō, ndɔ̄ĺ ō, teēn̄ i tají kə́ kógə̄ḿ beē tə́. Ngákó̰ó̰ḿ gə̄, majə kadə̄ i tītə̄ ń noō alé. 11Man̄ kə́ sɔl̄ ō, man̄ kə́ katə̄ ō, a teēn̄ ta kəɓa man̄ kə́ kógə̄ḿ beē tə́ a? 12Ngákó̰ó̰ḿ gə̄ kāgə̄ kótə̄ asə kan̄ olibə a? Kāgə̄ nduú asə kan̄ kótə̄ a? Kəɓa man̄ kə́ katə̄ a teē man̄ kə́ sɔl̄ alé.
Kum kedə̄ kə́ dɔɔ́
13I náa n i de kə́ kumən edə̄ ō, kə́ ger̄ yá̰a̰ ō, dɔ dáńsí tə́ ní? Ādə̄ ni-ɔjə hál dɔ sɔl̄ ō, kum kedə̄ yān ní ō kə̄ ndágá. 14Ba ré ə̄ndāī naā nii adə̄ wursí atə̄sí kárárá kə naá ō, ā ī-rɔ̄ɔ̄ī naā dɔ yá̰á̰ tə́ ō anī, ī-lōōī hítə̄ rɔ̄sí ō, nujə najə̄ kə́ rɔ̄kum kə sor̄ yāsí ō. 15Kum kedə̄ ń toō i kum kedə̄ kə́ ḭḭ i dɔɔ́ alé, banī i kum kedə̄ kə dɔ nang tə́ ō, i yā deē ndul ō, yā ndíĺ kə́ majaĺ gə̄ ō. 16Tɔdɔ̄ loo ń kəndā naā nii ō, rɔ̄ɔ̄ naā dɔ yá̰á̰ tə́ ō i tū tə́ ní, yá̰a̰ a a̰a̰ gō naā tū tə́ aĺ ō, yá̰á̰ kə́ majaĺ gə̄ malang i tū tə́ ō. 17Banī deē ń aw̄ kə kum kedə̄ kə́ dɔɔ́ ní a ngɔ̄m̄ rɔ̄n kanjə̄ rāā yá̰á̰ kə́ majaĺ kógə̄ḿ pá tá ndi kə kem sɔl̄ lɔmɔɔ́ ō, dɔn i kə́ sɔl̄ ō, ndigə najə̄ gō madə̄n gə̄ tə́ láẃ ō, a̰a̰ kum tō ndoō yā de gə̄ ngándáńg ō, kan̄ kə́ majə a rosə kemən ō, ni-ɔr̄ kam̄ de gə̄ aĺ ō, ni gól̄ loo aĺ ō. 18Ngé gə̄ ń kem sɔl̄ lɔm nel̄də́ ní, a dubə̄n̄ i kōō kem sɔl̄ lɔm kə gō gidədə́. Ba kan̄ yá̰a̰ gə̄ ń nin̄ a əjan̄ ní, i yá̰a̰ rāā kə́ gōtə́ gə̄.
Currently Selected:
JAKƏ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.