HEBƏRO 6

1I beé ní, ādə̄ j-əya̰ī yá̰á̰ ndóō kə́ ta kəla gíŕ tə́ gə̄ kə́ dɔ Kərist tə́, ba jə-mānī kə̄ tū yá̰á̰ ndóō yā de kə́ tɔ́gə gə̄ tə́. Jə-lōōī tél reē gogə́ dɔ yá̰a̰ gə̄ ń rāān̄ rɔ̄də́ i gír gisə yá̰á̰ ndóō ngeé ń toō tə́ ní. Yá̰a̰ gə̄ ní i: Tūr̄ gidə kɔ̄ɔ́ ta kəla kə́ ndāńg karī gə̄ tə́ ō, kə́ dɔ taā kem Nə́ɓā tə́ ō, 2yá̰á̰ ndóō kə́ dɔ batém gə̄ tə́ ō, kə́ dɔ kəndā jī dɔ de gə̄ tə́ ō, dɔ de kə́ kə́ koy gə̄ kə́ a ndólə̄n̄ tə́ ō, dɔ sarya kə́ ngándáńg tə́ ō. 3Ādə̄ j-əya̰īdə́ kə̄ gōjí tə́ ba j-awī kə̄ kété. Ré Nə́ɓā ndigə anī, i yá̰á̰ ń noō n j-a jə-rāāī ní.

4Najə̄ yā ngé gə̄ ń tél a rāān̄ háĺ kə́ majaĺ gogə́ ní. Nə́ɓā rāā adə̄ loo unjə̄ kow dɔdə́ tə́ nja kógə̄ḿ. Nin̄-nāān̄ nel̄ kadə̄ karī kə́ dɔ rā̰ tə́ ō, əngen̄ Ndíĺ kə́ Táĺ ō. 5Nin̄-nāān̄ najə̄ kə́ nel̄ ngá̰ý yā Nə́ɓā ō, nin̄-gerə̄n̄ tɔ́gə yā dɔ nang kə́ kijə kə́ ndɔ̄ń tə́ ō. 6Ɓá tā ba tél əsōn̄ gogə́ tū háĺ kə́ majaĺ tə́. De gə̄ ń noō ní, loo rāādə́ kadə̄ tél tūrə̄n̄ háĺdə́ ɓáý to̰ ní gətóo. Tɔdɔ̄ nin̄-tél əndan̄ Ngōn̄ Nə́ɓā kə máyá̰ tū kāgə̄ kə́ dēsə́ tə́ gogə́ ɓáý to̰ ō, rāān̄ adə̄ de gə̄ tájə̄nən̄ ō.

7Ré dɔ nang a̰ȳ man̄ kə́ edə dɔn tə́ kə̄ nja naā tə́, ba kōō kə́ majə əɓan̄ tū tə́ tām̄ yā ngé gə̄ ń ndɔrə̄n̄ dɔ nang ní tām̄ yādə́ tə́ ní anī, Nə́ɓā tɔ́r̄ tan dɔ nang ní tə́. 8Banī ré i túpə kōn̄ gə̄ kə ngar̄ gə̄ n əɓan̄ tū tə́ anī, i dɔ nang kə́ teē yá̰a̰ alé, na̰y ngɔr kadə̄ Nə́ɓā ndɔ̄lə́n ō. Ta tɔ̄l̄ ta anī a róōnən̄ kɔ̄ɔ́ ō.

9Ká ré j-ɔrə̄ń najə̄ beé gə̄gē anī, kó tár gə̄, jə-ger̄ mámák kadə̄ sḭḭ̄ i dɔ róbə́ kə́ majə tə́, adə̄ i nge ń a aw̄ kə deē tū kajə tə́ ní. 10Tɔdɔ̄ Nə́ɓā i kə́ gōtə́ aĺ alé. Dɔn a ndígə̄nal kəla gə̄ ń ī-rāāī ní aĺ ō, táŕ kə́ tām̄ yān tə́ ń ɔ́jiī kə̄ ndágá ní aĺ ō. Sḭḭ̄ ɔ́jiī táŕ ní kə̄ ndágá, i kə ta kūl̄ rāā kəlaá kadə̄ de gə̄ yān gə̄. Kəla ní ī-rāāī kété ō, ā ī-rāāī ngɔlaā ɓáý ō. 11Ba jə-gḛy kadə̄ sḭḭ̄ kógə̄ḿ kógə̄ḿ ní, o̰o̰sí tɔdɔ̄ Nə́ɓā bátə́ ta tɔ̄l̄ ta tə́. Loo ń noō tə́ yá̰á̰ ń ə̄ndāī kemsí dɔ tə́ ní a reē yā kudə gírí kə taá malang. 12Jə-ndigə kadə̄ ī-téliī de kə́ yay gə̄ alé, banī kadə̄ ī-ndájī ngé gə̄ ń taān̄ kem ō, tə́gān̄ tadə́ ō ní. Ngé gə̄ ń noō əngen̄ yá̰á̰ ń Nə́ɓā ənī míndən yā kadə̄ ní.

Nə́ɓā ənī míndə́n

13Dan ń Nə́ɓā ənī míndən adə̄ Abəraham ní, ni-ənge de kə́ rang kə́ bo tɔȳn yā túbə̄ kə rī kɔ́ɔ̄ alé. Adə̄ ni túbə̄ kə rɔ̄n nəkɔ́ 14əda na:

m̄-túbə kadə̄ m̄-rāā majə seí ō, kadə̄ m-ā m̄-rāā kadə̄ ngán kaan gə̄ i ngá̰ý ō#6.14 K. 14: Á̰a̰ī Tkg 22.16-17.

15Dan ń Abəraham tə́gā tan ndi ngóoń ta ní, ni-ənge yá̰á̰ ń Nə́ɓā ənī míndən yā kadə̄n ní. 16Loo ń ré de gə̄ a túbə̄n̄ anī, túbə̄n̄ i kə rī de kə́ bo tɔȳdə́ gēé ō, túbə̄ i yá̰á̰ kə́ a rāā adə̄ deē taā kem najə̄ kɔr̄ deē ō, a rāā adə̄ gír nējə̄ naā najə̄ dɔ yá̰á̰ tə́ a gān̄g ō. 17I tām̄ ń toō tə́ n Nə́ɓā ndigə kadə̄ ngé gə̄ ń a əngen̄ yá̰á̰ kə gō kənī míndən ní, gerə̄n̄ kum unjə̄ ngá̰ý, kadə̄ n-ā n-tūr̄ ndūn alé. I tām̄ najə̄ ń noō tə́ n ni-túbə̄ utə̄ń gō míndən kə́ ənī ní. 18Adə̄ yá̰á̰ kə́ loo tūr̄də́ gətóo gə̄, kə́ Nə́ɓā asə sor̄ tū tə́ aĺ gə̄ gír i jōó. Loo ń noō tə́ ní, jḭḭ̄ ń j-əngeī loo ɓɔ̄ɔ̄ rɔ̄ yājí i kemən tə́ ní, əlan̄ go̰ kemjí tə́ kadə̄ j-əhɔīń kəndā kem dɔ tə́ sásáp kadə̄ ngan̄g, kəndā kem dɔ tə́ ń əndān̄ nojí tə́ kadə̄ jə-gə̄rāī ní. 19Kəndā ń j-əndāī kemjí dɔ Nə́ɓā tə́ ní, əhɔ ndíĺjí gotə kógə̄ḿ tītə̄ gində̄ kə́ ta ngɔr ngo̰ ń əhɔn̄neé to bo gotə kógə̄ḿ ní. Kəndā kem dɔ tə́ ngeé ń toō ní ra ngan̄g ngá̰ý ō, əndā kūbə̄ ń gāngə̄n̄neé kem kújə yā Kɔ́ɔ̄ɓē kə́ dɔ rā̰ tə́ ní gān̄g, ba aw̄ bátə́ ugə̄ kem loo kə́ táĺ ngá̰ý tə́ ō, 20i loo ń noō n Jeju udə tū tə́ kété nojí tə́ tām̄ yājí tə́ ní. Ni-tél ngol ngé tun̄ yá̰a̰ gə̄ kə́ ngándáńg i kə gō jī loo rāā kəla yā Melkisedek ní#6.20 K. 20: Á̰a̰ī Pā 110.4.

Currently Selected:

HEBƏRO 6: SARDC

Highlight

Copy

Compare